लूका 21
21
गरीब बिधवा दा दान
(मरकुस 12:41-44)
1भिरी यीशुयैं अखीं चुक्की नैं अमीरां जो अपणा-अपणा दान दानपात्रे च पांदे दिख्या। 2तिन्हीं इक्क गरीब बिधवा जो भी तिस च दो दमड़ियां पांदे दिख्या। 3ताह़लू यीशुयैं ग्लाया, “मैं तुहां नैं सच्च ग्लांदा ऐ कि इन्नै गरीब बिधवा तां सबना ते जादा पाया ऐ। 4क्जोकि तिन्हां सबना अपणिया-अपणिया कमाईया दा थोड़ा हिस्सा दाने च पाया ऐ, अपर इन्नै अपणिया गरीबिया च अपणी सारी कमाई पाई दित्ती ऐ।”
मंदरे दे विनाश दी भविष्यवाणी
(मत्ती 24:1,2; मरकुस 13:1,2)
5जाह़लू कुच्छ माणु मंदरे दे बारे च ग्ला दे थे कि सैह़ कदेय छैल़ पत्थरां नैं कने दान कित्तियां चीज्जां नैं सजाया ऐ, तां तिन्हीं ग्लाया, 6“सैह़ दिन ओंगे, जिन्हां च एह़ सब कुच्छ जेह्ड़ा तुहां दिक्खदे हन, तिन्हां च ऐत्थु कुसी भी इक्की पत्थरे पर दूआ पत्थर नीं टिकगा। अपर इक्क-इक्क पत्थर ढाई दित्ता जांगा।”
मुसीबत कने दुख
(मत्ती 24:3-14; मरकुस 13:3-13)
7तिन्हां तिसते पुछया, “हे गुरू, एह़ सब काह़लू हुंगा? कने एह़ गल्लां जाह़लू पूरियां होणे पर हुंगियां, तां तिस बग्त दा क्या नसाण हुंगा?” 8तिन्हीं ग्लाया, “चौकन्ने रेह्आ कि भरमाये नीं जान, क्जोकि मते भरी मेरे नांऐ ते आई नैं ग्लांगे, मैं सैई ऐ, कने एह़ भी कि, ‘बग्त आई रेह्आ ऐ।’ तुहां तिसदे पचांह़ मत चली जांदे। 9जाह़लू तुहां लड़ाईयां कने हंगामे दी चर्चा सुणगे तां घबराई मत जांदे, क्जोकि तिन्हां दा पैहल्लैं होणा जरूरी ऐ; अपर तिस बग्त इकदम अन्त नीं हुंगा।”
10ताह़लू तिन्हीं तिन्हां नैं ग्लाया, “जातिआं पर जाति कने राज्जे पर राज्ज चढ़ाई करगा, 11कने बड्डे-बड्डे हिल्लण हुंगे, कने जगाह-जगाह पर अकाल कने महामारियां पोंगियां, कने अम्बरे च बुरिआं गल्लां कने बड्डे-बड्डे नसाण प्रगट हुंगे। 12अपर इन्हां सारियां गल्लां होणे ते पैहल्लैं मेरे नांऐ दिया बज़ाह ते तुहां जो पकड़गे, कने सतांगे, आराधनालय च घसीटगे, जेलां च करी दिंगे, राजेयां कने हाकमां सामणै लेई जांगे। 13अपर एह़ तुहां तांई गवाही दैणे दा मौका होई जांगा। 14इसतांई अपणे-अपणे मने च ठाणी लेआ कि अहां पैहल्लैं ई जवाब दैणे दी फिकर नीं करगे। 15क्जोकि मैं तुहां जो ऐदेय सब्द कने अक्ल दिंगा कि तुहां दे सब बरोधी सामणा या बरोध नीं करी सकगे। 16तुहां दे माँ-बुढ़े, कने भाऊ, कने रिस्तेदार, कने साथी भी तुहां जो पकड़ुआंगे; ऐत्थु तिकर कि तुहां च कुच्छ लोकां जो मारी दिंगे। 17मेरे नांऐ दी खातर सारे माणु तुहां नैं बैर रखगे। 18अपर तुहां दे सिरे दा इक्क बाल़ भी बांका नीं हुंगा। 19अपणे सबरे नैं तुहां अपणे प्राणा जो बचाई रखगे।
यरूशलेम सैहरे दे विनाशे दी भविष्यवाणी
(मत्ती 24:15-21; मरकुस 13:14-19)
20“जाह़लू तुहां यरूशलेम सैहरे जो सेना नैं घिरेया दिक्खगे, तां जाणी लैनेयों कि तिसदा उजड़णा नेड़े ऐ। 21तिस बग्त जेह्ड़े यहूदिया च होन, सैह़ प्हाड़ां पर नठ्ठी जान; कने जेह्ड़े यरूशलेम सैहरे च होन सैह़ दूये सैहरे जो ना जान; कने जेह्ड़े ग्रांऐ च होन सैह़ दूये ग्रांऐ च ना जान। 22क्जोकि एह़ बदला लैणे दे ऐदेय दिने हुंगे, जिन्हां च लिखियां सारियां गल्लां पूरियां होई जागियां। 23तिन्हां जणासां तांई खतरनाक बग्त हुंगा, जेह्ड़ियां गर्भवती कने बच्चेयां जो दुद पिलाणे आल़िआं हुंगी, तिस बग्त तिन्हां तांई नठणा बड़ा औखा होई जांगा। क्जोकि देसे च बड़ा सताव कने तिन्हां लोकां पर बड़ा प्रकोप हुंगा। 24सैह़ लोक तलवारा दिया धारा नैं मौत्ती दी घाट उतारे जांगे, कने दूये देसे लोक तिन्हां जो च कैदी बणाई नैं लेई जांगे; यरूशलेम सैहर होरनी जातिआं दे जरिये ताह़लू तिकर रौंदेया जांगा। जाह़लू तिकर होरनी जातिआं दा बग्त पूरा नीं होई जां।
माणुये दे पुत्तरे दा औणां
(मत्ती 24:29-31; मरकुस 13:24-27)
25“सूरजे च कने चन्द्रमे च कने तारेयां च नसाण दुस्सगे; कने धरतिया पर सारे देसां दे लोकां जो मुसीबत हुंगी, क्जोकि सैह़ समुंदरे दी गरजणा नैं कने लैहरां दिया उआज़ा नैं घबराई जांगे। 26डरे दिया बज़ाह ते कने संसारे पर ओणे आल़ी मुसीबतां दा इन्तजार करदे-करदे लोकां दे जी च जी नीं रैंह्गा, क्जोकि अम्बरे दियां सक्तियां हिलाईयां जाणियां हन। 27ताह़लू सैह़ मिन्जो, माणुये दे पुत्तरे जो सामर्थ कने बड़ी महिमा सौगी बदल़े पर ओंदे दिक्खगे। 28जाह़लू एह़ गल्लां होणा लगियां, तां सिध्धे होई नैं अपणे सिरे ऊपर चुकनेयों; क्जोकि तुहां दा छुटकारा नेड़े हुंगा।”
धूड़े दे रूखे दा उदारण
(मत्ती 24:32-35; मरकुस 13:28-31)
29तिन्हीं तिन्हां नैं इक्क उदारण भी ग्लाया, “धूड़े दे रूखे कने सारेयां रूखां जो दिक्खा। 30जिंआं तिन्हां च कुम्बलू निकल़दे हन, तां तुहां दिक्खी नैं अप्पु ई जाणी लैंदे हन कि गर्मिया दा मौसम ओणे आल़ा ऐ। 31तिस तरीके नैं जाह़लू तुहां इन्हां गल्लां जो हुंदे दिक्खगे, ताह़लू तुहां जाणी लेआ कि परमात्मे दा राज्ज ओणे आल़ा ऐ। 32मैं तुहां नैं सच्च ग्लांदा ऐ, कि इसा पीढ़िया दे लोकां दा अन्त ताह़लू तिकर नीं हुंगा, जाह़लू तिकर एह़ सारियां गल्लां पूरियां नीं होई जान। 33अम्बर कने धरती टल़ी सकदे हन, अपर मेरियां गल्लां कदी नीं टली सकदियां।
जागदे रेह्आ
(मत्ती 24:36-41; मरकुस 13:32-37)
34“इस बज़ाह ते चौकन्ने रेह्आ, कुत्थी इआं नीं होयैं कि तुहां दे मने च खुमार, कने मतवाल़ापन, कने इसा ज़िन्दगिया दी फिकर करी नैं सुस्त होई जान, कने सैह़ दिन तुहां पर गल़फाये साइआं चाणचक आई पोयैं। 35क्जोकि सैह़ सारे धरतिया पर रैहणे आल़ेआं पर इस तरीके नैं आई पोंगा। 36इसतांई जागदे रेह्आ कने हर बग्त प्रार्थना करदे रेह्आ कि तुहां इन्हां सब ओणे आल़िआं मुसीबता ते बची करी रैह़न कने माणुये सामणै खड़ोणे जोग्गा तां बणा।”
37सैह़ हर दिन मंदरे च सिक्षा दिंदा था, कने रातियो बाहर जाई नैं जैतून नांऐ दे प्हाड़े पर रैंह्दा था; 38कने भ्यागा तड़कैं ई सारे माणु तिसदी सुणने तांई मंदरे च तिस अल्ल ओंदे थे।
دیاریکراوەکانی ئێستا:
लूका 21: XNR
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
This work is licensed under Creative Commons Attribution-ShareAlike 4.0 License.