लूका 19
19
चुंगी लैणे आल़ा जक्कई
1यीशु यरीहो सैहरे च पुज्जा कने रस्ते च चलेया था। 2तित्थु जक्कई नांऐ दा इक्क माणु था जेह्ड़ा चुंगी लैंणे आल़ेआं दा सरदार था कने अमीर था। 3सैह़ यीशुये जो दिक्खणा चांह़दा था कि सैह़ कुण ऐ। अपर मती भीड़ होणे दिया बज़ाह ते दिक्खी नीं सकदा था, क्जोकि सैह़ बोणा था। 4ताह़लू सैह़ तिसियो दिक्खणे तांई गांह दौड़ी नैं इक्की रुम्बली दे रूखे पर चढ़ी गेआ, क्जोकि यीशु तिस रस्ते च जाणे आल़ा था। 5जाह़लू यीशु तिसा रूखे अल्ल पुज्जा, तां ऊपर दिक्खी करी तिस नैं ग्लाया, “हे जक्कई, झटपट लौई आ; क्जोकि अज्ज मैं तेरे घरैं रैहणा ऐ।” 6सैह़ झटपट रूखे ते थल्लै लुत्था कने खुस होई नैं यीशुये जो अपणे घरेयो लेई गेआ कने तिसदा सुआगत कित्ता। 7एह़ दिक्खी नैं सारे लोक बुड़बुड़ाई नैं ग्लाणा लग्गे, “एह़ तां इक्क पापी माणुये दे घरेयो चलेया ऐ।”
8जक्कई खड़ोई करी प्रभु नैं ग्लाणा लग्गा, “हे प्रभु, सुण, मैं अपणी आधी धन दौलत गरीबां जो दिंदा ऐ, कने कुसी नैं बेइमानी करी नैं लेई भी लेआ ऐ तां तिस जो चार गुणा बापस करी दिंगा।” 9ताह़लू यीशुयैं तिस नैं ग्लाया, “अज्ज इस घरे च उद्धार आया ऐ, इसतांई एह़ भी अब्राहमे दा इक्क जागत ऐ। 10क्जोकि मैं माणुये दा पुत्तर गुआचेआं जो तोपणा कने तिन्हां दा उद्धार करणा आया ऐ।”
दस्सां मोहरां दा उदारण
(मत्ती 25:14-30)
11जाह़लू तित्थु लोक एह़ गल्लां सुणा दे थे, तां यीशुयैं इक्क होर उदारण देई नैं ग्लाया, इसतांई कि सैह़ यरूशलेम सैहरे नेड़े था, कने लोक समझदे थे कि परमात्मे दा राज्ज हुण ई ओणे आल़ा ऐ। 12कने तिन्हीं ग्लाया, “इक्क अमीर माणु दूर देसे जो चलेया तांजे राज्ज पद पाई नैं बापस औयें। 13तिन्हीं अपणे दासां च दसा जो सद्दी नैं तिन्हां जो दस मोहरां#19:13 दस मोहरां -दी कीमत इक्क हज़ार दिनां दियां दिहाड़ियां बराबर दित्तियां कने तिन्हां नैं ग्लाणा लग्गा, ‘मेरे बापस ओणे तिकर लैण-दैण करनेयों।’ 14अपर तिसदे सैहरे दे अक्खे-बक्खे रैहणे आल़े लोक तिस नैं बैर रखदे थे, कने तिसदे पचांह़ संदेसा दैणे आल़े दुवारी एह़ ग्लाई करी घल्लेया, अहां नीं चांह़दे कि एह़ अहां पर राज करैं।
15“जाह़लू सैह़ राज्ज पद पाई नैं बापस आया, तां इआं होएया कि तिन्हीं अपणेयां दासां जो जिन्हां जो मोहरां दित्तियां थियां तिन्हां जो अप्पु अल्ल सद्देया तांजे पता करैं कि तिन्हां लैण-दैण ते क्या-क्या कमाया। 16ताह़लू पैहल्ले आई नैं ग्लाया, ‘हे मालक, तेरियां मोहरां ते मैं दस होर मोहरां कमाईयां हन।’ 17मालकैं तिस नैं ग्लाया, धन, ‘हे उत्तम दास। तू मते ते ई थोड़े च बसुआसे जोग्गा निकल़ेया हुण दस्सां सैहरां पर हक्क रख।’ 18दूँये आई नैं ग्लाया, ‘हे मालक तेरियां मोहरां ते मैं पंज होर मोहरां कमाईयां हन।’ 19तिन्हीं तिस नैं भी ग्लाया, ‘तूमी पंजा सैहरां पर हाकम होई जां।’ 20त्रीयें दासें भी आई नैं ग्लाया, ‘हे मालक, दिक्ख तेरी मोहर एह़ ऐ, जिसियो मैं परने च बन्नी नैं रखदा था। 21क्जोकि मैं तिज्जो ते डरदा था, इसतांई कि तू कठोर माणु ऐ, जेह्ड़ा तैं नीं रखेया तिसियो चुक्की लैंदा ऐ, कने जेह्ड़ा तैं नीं बाया, तिसियो बड्डी लैंदा ऐ।’ 22मालकैं तिस नैं ग्लाया, हे दुष्ट दास, मैं तेरे ई मुँऐ ते तिज्जो दोसी ठैहरांदा ऐ। तू मिन्जो जाणदा था कि मैं सक्त माणु ऐ, जेह्ड़ा मैं नीं रखेया तिसियो चुक्की लैंदा, कने जेह्ड़ा मैं नीं बाया तिसियो बड्डदा ऐ; 23तां तैं मेरिया मोहरा सौकारां अल्ल क्जो नीं रखी दित्ते कि आई नैं ब्याजे समेत लेई लैंदा? 24कने जेह्ड़े माणु बक्खे खड़ोत्यो थे, तिन्हीं तिन्हां नैं ग्लाया, ‘सैह़ मोहर इसते लेई लेआ, कने जिस अल्ल दस मोहरां हन तिसियो देई देआ।’ 25तिन्हां तिस नैं ग्लाया, ‘हे मालक, तिस अल्ल दस मोहरां हन।’ 26‘मैं तुहां नैं ग्लांदा कि जिन्हां अल्ल ऐ, तिन्हां जो दित्ता जांगा; कने जिन्हां अल्ल नीं ऐ, तिन्हां ते सैह़ भी जेह्ड़ा तिन्हां अल्ल ऐ लेई लेआ जांगा। 27अपर मेरे तिन्हां बैरियां जो जेह्ड़ा नीं चांह़दे थे कि मैं तिन्हां पर राज्ज करैं, तिन्हां जो ऐत्थियो अंणी करी मेरे सामणै मारा’।”
यरूशलेम सैहरे च विजय प्रवेश
(मत्ती 21:1-11; मरकुस 11:1-11; यूहन्ना 12:12-19)
28एह़ गल्लां ग्लाई करी यीशु अपणे चेलेयां सौगी यरूशलेम सैहरे दे पास्सेयो तिन्हां दे गांह-गांह चला।
29जाह़लू सैह़ जैतून नांऐ दे प्हाड़े पर बैतफगे ग्रांऐ कने बैतनिय्याह ग्रांऐ अल्ल पुज्जा, तां तिन्हीं अपणे चेलेयां च दूँ जो एह़ ग्लाई नैं घल्लेया, 30“सामणै आल़े ग्रांऐ च जा; कने तिस ग्रांऐ च पुजदेयां ई इक्क गधिया दा बच्चा जिस पर कदी कोई भी नीं बैठेया ऐ, बन्नेया होएया तुहां जो मिलगा। तिसियो खोली नैं लेई ओआ। 31जे कोई तुहां ते पुछैं कि क्जो खोला दे हन, तां एह़ ग्लानेयों कि प्रभु जो इसदी जरूरत ऐ।”
32जेह्ड़े दो चेले घल्लेयो थे, तिन्हां जाई नैं जिंआं यीशुयैं तिन्हां नैं ग्लाया था, तिन्हां जो तिदेया ई मिल्ला। 33जाह़लू सैह़ गधे दे बच्चे जो खोला दे थे, तां तिस गधे दे मालकैं तिन्हां ते पुछया, “इस बच्चे जो क्जो खोला दे?” 34तिन्हां ग्लाया, “प्रभु जो इसदी जरूरत ऐ।” 35सैह़ तिसियो यीशु अल्ल लेई आये, कने अपणे कपड़े तिस बच्चे परालैं रखी नैं यीशुये जो तिस पर बठाई दित्ता। 36जाह़लू यीशु जा दा था, तां मतेआं लोकां अपणे कपड़े रस्ते च बछाई दित्ते।
37बक्खे ओंदे-ओंदे जाह़लू सैह़ जैतून प्हाड़े दी ढलाना पर पुज्जा, तां चेलेयां दी सारी मंडल़ी तिन्हां सारेयां सामर्थी दे कम्मां दिया बज़ाह ते जेह्ड़े तिन्हां दिख्यो थे, खुस होई नैं जोरे नैं परमात्मे दी स्तुति करणा लग्गे:
38“धन ऐ सैह़ राजा, जेह्ड़ा प्रभु दे नांऐ ते ओंदा ऐ,
सुअर्गे च सांति कने सुअर्गे च परमात्मे दी स्तुति होयैं।”
39ताह़लू लोकां दियां भीड़ा च कुच्छ फरीसी माणु तिस नैं ग्लाणा लग्गे, “हे गुरू, अपणे चेलेयां जो चुप रैहणे तांई ग्ला।” 40तिन्हीं जवाब दित्ता, “मैं तुहां नैं सच्च ग्लांदा ऐ, जे एह़ लोक चुप रैह़न तां पत्थर डड्डी पोंगे।”
यरूशलेम सैहरे तांई विलाप
41जाह़लू सैह़ बक्खे आया तां सैहरे जो दिक्खी नैं तिस पर रोया। 42कने ग्लाया, “जे तू, हाँ तू, अज्ज इतणा समझी लैंदा कि सांतिया दा मतलब क्या ऐ, अपर हुण तुहां ते छुपाई नैं रखेया ऐ। 43क्जोकि सैह़ दिन तिज्जो पर भी ओंगे कि तेरे बैरी मोर्चा बन्नी करी तिज्जो घेरी लैंगे, कने चौंन्नी पास्से ते तिज्जो बंद करी दिंगे; 44कने तेरे बैरी तिज्जो कने तेरे जागतां जो जेह्ड़े तिज्जो च हन, नास करी दिंगे, कने एह़ तेरे पत्थरां दे बणायो भवने दा इक्क भी पत्थर नीं छड्डगे; क्जोकि जाह़लू तिज्जो पर दयादृष्टि कित्ती गेई, तां तैं तिस मौके जो नीं पणछैणया।”
यरूशलेम सैहरे दे मंदरे ते बपारियां जो बाहर कड्डणा
(मत्ती 21:12-17; मरकुस 11:15-19; यूहन्ना 2:13-22)
45ताह़लू यीशु मंदरे च जाई नैं तित्थु बैठेयो बपार करणे आल़ेआं जो बाहर कड्डणा लग्गा, 46कने तिन्हां नैं ग्लाणा लग्गा, “पवित्रशास्त्रे च लिख्या ऐ, ‘मेरा मंदर प्रार्थना दा घर हुंगा,’ अपर तुहां इसियो डाकुआं दा अड्डा बणाई दित्ता ऐ।”
47यीशु हर रोज मंदरे च सिक्षा दिंदा था; कने प्रधान याजक कने सास्त्री कने लोकां दे मुखिये तिसियो खत्म करणे दा मौका तोपदे थे। 48अपर कोई तरीका नीं निकाल़ी सकेया कि एह़ कुस तरीके नैं करन, क्जोकि सारे माणु बड़ा मन लगाई नैं तिसदी सुणदे थे।
دیاریکراوەکانی ئێستا:
लूका 19: XNR
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
This work is licensed under Creative Commons Attribution-ShareAlike 4.0 License.