KĨAMBĨRĨRIA 4
4
1Nake mũndũ ũcio akĩonana na mũka ũcio wake Hawa, nake akĩgĩa ihu, agĩciara Kaini, akiuga atĩrĩ, Ndĩ kũgĩa na mwana wa mũndũ mũrũme nĩ ũndũ wa gũteithio nĩ Jehova. 2Na ningĩ agĩciara Habili, mũrũ wa nyina. Nake Habili ũcio aarĩ mũrĩithi wa mbũri; no rĩrĩ, Kaini aarĩ mũrĩmi. 3Namo matukũ maathiathia, Kaini agĩtwara irio imwe cia mũgũnda, ituĩke ihaki rĩa Jehova. 4#Ahib 11.4.O nake Habili agĩtwara mbũri imwe ciake iria ciarigithathĩtwo nĩ mbũri cia rũru rũake, o na maguta mamwe ma cio. Nake Jehova agĩĩtĩkĩra Habili na ihaki rĩake; 5no rĩrĩ, ndaigana gwĩtĩkĩra Kaini na ihaki rĩake. Nake Kaini agĩcinwo nĩ marakara, agĩtuka gĩthiithi. 6Nake Jehova akĩũria Kaini atĩrĩ, Warakara nĩkĩ? Na ningĩ watuka gĩthiithi nĩkĩ? 7Githĩ ũngĩĩka wega, ndũngĩĩtĩkĩrũo o nawe? No ningĩ kũngĩtuĩka atĩ ndũgwĩka wega-rĩ, wĩhia ũgũkuoheria o mũromo-inĩ; nakuo kwĩrirĩria kwaguo nĩgũkũrorete, no rĩrĩ, wee no nginya ũũhootage. 8#Mat 23.35; Luk 11.51; 1 Joh 3.12.Nake Kaini akĩĩra Habili mũrũ wa nyina ũhoro ũcio. Na rĩrĩ, gũgĩkinya atĩrĩ, atĩ hĩndĩ maarĩ mũgũnda Kaini agĩũkĩrĩra Habili mũrũ wa nyina, akĩmũũraga. 9Nake Jehova akĩũria Kaini atĩrĩ. Mũrũ wa nyũkwa Habili-rĩ, e ha? Nake Kaini akĩmũcokeria akiuga atĩrĩ, Niĩ ndiũĩ. Kaĩ akĩrĩ niĩ mũmenyereri wa mũrũ wa maitũ? 10#Ahib 12.24.Nake akĩmũũria atĩrĩ, Nĩ atĩa wĩkĩte? Mũgambo wa thakame ya mũrũ wa nyũkwa nĩũrangaĩra uumĩte thĩ. 11Na rĩu, wee nĩwagwatwo nĩ kĩrumi kiumanĩte na tĩri, o ũcio wathamirie kanua wanĩrĩrie thakame ya mũrũ wa nyũkwa guoko-inĩ gwaku; 12warĩma mũgũnda, tĩri ndũgacoka gũkuonera kĩrĩa kiumaga hinya-inĩ waguo; ningĩ ũgũtuĩka mũũri wa kũũrũraga gũkũ thĩ. 13Nake Kaini akĩĩra Jehova atĩrĩ, Iherithia rĩakwa rĩkũneneha gũkĩra rĩrĩa ingĩhota gwĩtiiria. 14Atĩrĩ, ũmũthĩ nĩwanyingata wangirania na tĩri o harĩa wakinya, na nĩngũtũũra ndiganĩrĩirio na ũthiũ waku, ndũũre ndĩ mũũri wa kũũrũraga gũkũ thĩ; na nĩgũgakinya atĩrĩ, atĩ mũndũ ũrĩa wothe ũkangorerera no kũũraga akanjũraga. 15Nake Jehova akĩmwĩra atĩrĩ, Tondũ ũcio mũndũ ũrĩa ũkooraga Kaini akarĩhio maita mũgwanja. Ningĩ Jehova agĩĩkĩra Kaini rũũri, nĩ getha mũndũ o na ũrĩkũ ũrĩa ũkamũkorerera ndakanamũringe akue. 16Nake Kaini akiuma harĩ Jehova, agĩthiĩ agĩtũũra bũrũri wa Nodu, ũrĩa warĩ rũere rũa kũu Edeni rũrĩa riũa rĩrathagĩra.
17Na rĩrĩ, Kaini akĩonana na mũka, nake akĩgĩa ihu, agĩciara Enoku; ningĩ agĩaka itũũra, akĩrĩtua Enoku o ta ũguo mũrũwe etagwo. 18Nake Enoku agĩciara Iradu, nake Iradu agĩciara Mehujaeli, nake Mehujaeli agĩciara Methushaeli, nake Methushaeli agĩciara Lameku. 19Nake Lameku ũcio akĩhikia aka erĩ; ũmwe wao etagwo Ada, na ũrĩa ũngĩ etagwo Zila. 20Nake Ada agĩciara Jabali; ũcio nĩwe ithe wa andũ arĩa matũũraga hema-inĩ na makagĩa na indo cia thakame. 21Nake mũrũ wa nyina etagwo Jubali, na nĩwe ithe wa andũ othe arĩa ahũri kĩnanda kĩa mũgeto na arĩa ahuhi mũtũrirũ. 22Nake ũcio wetagwo Zila agĩciara Tubali-Kaini, ũrĩa warĩ mwĩgithia wa mũturi o wothe wa indo cia rũthuku na cia igera; na mwarĩ wa nyina na Tubali-Kaini etagwo Naama. 23Nake Lameku akĩĩra aka acio ake ũũ:
Atĩrĩrĩ, inyuĩ Ada na Zila, ta iguai mũgambo wakwa;
Inyuĩ, aka a Lameku, ta thikĩrĩriai ũrĩa nguuga,
Nĩ gũkorũo nĩngooraga mũndũ nĩ ũndũ wa kũnguraria,
Njũrage kĩmwana nĩ ũndũ wa kũnjĩkĩra nduutu.
24Kũngĩkorũo Kaini akarĩhĩrio maita mũgwanja-rĩ,
Lameku nake ndarĩ hingo atangĩĩrĩhĩria maita mĩrongo mũgwanja na mũgwanja.
25Ningĩ Adamu agĩcoka akĩonana na mũka rĩngĩ; nake agĩciara kahĩĩ, agĩgatua Sethu, agĩkiuga atĩrĩ, Nĩ ũndũ Ngai nĩatũmĩte ngĩe na mbeũ ĩngĩ ithenya rĩa Habili; tondũ we nĩoragirũo nĩ Kaini. 26O nake Sethu agĩciarĩrũo kahĩĩ, agĩgatua Enoshu; na hĩndĩ ĩo nĩyo andũ maambĩrĩirie gũthathayagia Jehova makĩgwetaga rĩĩtwa rĩu rĩake.
دیاریکراوەکانی ئێستا:
KĨAMBĨRĨRIA 4: OGKBIBLE
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
©Bible Society of Kenya, 2019