YOHANES 7
7
Ki Yesus bo ki utat-Nea mita
1Nopaḷut mako kon tua, ki Yesus minaya-mayá mako in Galilea. Doí in Sia minayá in Yudea, sin itoi mita in Yahudi nonomayádon mako moḻimod kon i-Nia.
2 #
Im. 23:34; Ul. 16:13 Dodai intua diádon moonggot bo porayaan kon Singgai Moḷoben in Pondok Daun. 3Dá ki utat mita i Yesus in noguman kon i-Nia, “Taḷaaidon in tampat tanaa bo bayádon in Yudea, sinbá murí-Mu mita in mokoontong doman kon oaidan-Mu. 4Diábí intau in mobuni kon onu inta inaidannea, aka moibog in sia kotaauan in bayongan intau. Aka Iko in mogaid kon soaḷ mita ná tatua, yo musti poontong kon bayongan in dunia!” (5Sin ki utat-Neapa mita tontaní in diápabí doman mopirisaya kon i-Nia.)
6“Deemanpabí wakutu-Ku,” guman i Yesus kon i monia, “Táe aka kon i monimu, motaaubí in pomuḷoi mako. 7Moiko in diábí kodoí in dunia naa. Táe Akuoi in memang kodoíbí in dunia naa, sin Akuoi in umuran moguman kon dunia kon oaidnea in moraat. 8Bayádon tontaní in moiko kon poramean tatua. Akuoi in diápabí mayá#7:8: Akuoi in diábí mayá: tongonumai in naska dungkuḷmai: Akuoi in diápabí mayá. , sin deemanpabí wakutu-Ku.” 9Tua in guman i Yesus kon i utat-Nea mita, bo nogutunpa in Sia kon Galilea.
Ki Yesus kon Singgai Moḷoben in Pondok Daun
10Naonda in ki utat-Nea mita minayá kon poramean tatua, inumuni-uni mako in ki Yesus bo minayá tontaní. 11Kon dodai in pinoramean tatua, itoi mita in Yahudi notayak kon i-Nia bo noḻibó magí mako, “Kon onda in Sia?”
12Moantó intau in momangkoidon moyogombong soaḷ Sia. Oyúon in noguman: “Sia Intaubí mopia.” Táe oyúon doman in noguman: “Diá! Sia in mopoyaying kon intau mobayong.” 13Táe diá in tobatúmai intau in mokobaḻí moguman taran-tarangan soaḷ ki Yesus sin mosia in moondok kon itoi mita intau in Yahudi.
14Wakutu in koyogotdon pinoramean, ki Yesus in sinumuot kon Baḷoi Tuhan, bo nomangkoidon nobogoi in totundú. 15Itoi mita in Yahudi totok in noherang bo noguman, “Naondabí in kinototaau-Nea kon soaḷ mita tatua, bokaka diábí kon dodai onda in Sia nosikoḷa?”
16Ki Yesus in notubag, “Onu in sinundú-Ku naa in deemanbí totundú-Ku, táe totundúbí i-Nia inta nopotabá mangoi kon i-Nakó. 17Intau mita inta moibog dumudui kon i Allah, kotaauanneabí mongo nongkon i Allah in totundú-Ku naa andeka nongkon i-Nakó tontaní. 18Intau inta motundú kon onu in kinoibognea tontaní, sia tua i motayakbí kon bá horomaton. Táe intau inta moramuji sinbá horomaton in ki Inta nopotabá kon inia yo mojujur in sia tua, bo diábí in uboḷ kon inia. 19Degá diábí kinotaauan monimu kon ki Musa in nobogoidon in parenta mita i Allah kon i monimu? Táe diá in tobatúmai in kon sigad monimu in dinumudui kon parenta mita tatua. Nongonu sin moiko in moibogbí moḻimod kon i-Nakó?”
20Intau moantó kon tua in notubag: “Nobundai Iko! Ki inebí in moibog moḻimod kon ini-Mu?”
21Ki Yesus in notubag, “Tongá tobatú in oaidan pinomia-Ku bo moherang in moiko. 22#Kḻn. 17:10; Im. 12:3 Ki Musa in nobogoi in atorang kon i monimu sinbá sunaton, umpakabí sunat tatua deemanbí atorang nongkon i Musa, táe nongkon mogoguyangbí mita tungkuḷ in ki Musa diápa. Tuamai, umpaka singgai in Sabat moiko monoit doman kon intau. 23#Yoh. 5:9 Aka tua pomiaan monimu sinbá diá moḷawang kon atorang i Musa soaḷ sunat, yo nongonu sin moiko in tumorúbí kon i-Nakó tongá popisí in nongundam kon bayongan awak intau kon singgai in Sabat? 24Dikabí mohakim kon intau tongá podoyon kon onu inta koontongan, táe podoyonbí kon inta moadil.”
Totuu degá kon ki Yesus in Datu Mopoposaḷamat?
25Noiduduimai kon tua, degá tongonumai intau in Yerusalem in noguman, “Sia naa degá inta taya-tayakonmai in intau sin ḻimodon? 26Táe indoiai mobebasbí in Sia in mosingog kon tayowon intau moantó, bo diábí in moguman kon onu bo onu kon i-Nia. Kinotaauandon degá in pomarenta naton kon Sia naa in Datu Mopoposaḷamat? 27Táe aka Datu Mopoposaḷamat in mamangoi, yo diábí tobatúmai intau in monotaau kon asaḷ-usuḷ-Nea! Táe aka asaḷ-usuḷ Intau tanion yo kinotaauanbí naton.”
28Wakutu in ki Yesus koyogot mobogoimai in totundú kon bonu in Baḷoi Tuhan, Sia in nosingog noropot, kai-Nia, “Dá kinotaauan bidon monimu mongo ki ine in Akuoi naa bo kinotaauan bidon monimu in asaḷ usuḷ-Ku? Tongá bá kotaauan monimu, kon deemanbí ibog-Ku tontaní in namangoi. Akuoi naa in pinotabábí i-Nia inta Mobanar, táe diá kinotaauan monimu in Sia. 29Táe Akuoi in nonotaaubí kon i-Nia, sin Akuoi in nongkon i-Nia, bo Siabí tua in nopotabá kon i-Nakó.”
30Dodai intua ramujiondon monia domokon in Sia, táe diá tobatúmai intau mokobaḻí mokadai kon i-Nia, sin deemanpa wakutunea. 31Nobayong in kon sigad monia tua in nomangkoidon mopirisaya kon i-Nia, bo noguman, “Aka Datu Mopoposaḷamat tua in mamangoi, yo degá Sia mokoaid kon mobayo-bayong in inta mokoherang mita nongkon Intau tanaa?”
Usaha Modomok kon i Yesus
32Kinodongogandon in intau mita in Parisi onu in iyogombong in intau moantó soaḷ ki Yesus. Tuamai, mosia takin imang mita itoi nopotabá kon tongonumai in moḷoḷukad kon Baḷoi Tuhan bo modomok kon i Yesus. 33Ki Yesus in noguman kon intau mobayong inta kon bonu in Baḷoi Tuhan, “Diá bidon moonggot Akuoi in moyotakin monimu, sin mopaḷut mako kon tua Akuoi in mayádon kon i-Nia inta nopotabá kon i-Nakó. 34Tayakonbí monimu in Akuoi, táe diábí mouḻí monimu; sin moiko in diábí mokodapot kon tampat inta bayáan-Ku.”
35Dá itoi mita intau Yahudi in nosiḻibóandon, “Mayá in onda degá in Intau tanaa dá diá mouḻí naton in Sia? Degá mayá in Sia kon intau mita in Yahudi inta nogutun kon butá intau Yunani, bo mopoyaput doman in totundú kon intau mita in Yunani? 36Onu in makusud in singog-Nea: Tayakonbí monimu in Akuoi, táe diábí mouḻí monimu in Akuoi, bo moiko in diábí mokodapot kon tampat inta bayáan-Ku?”
Tubig inta Mobogoi in Kobiagan
37 #
Im. 23:36
Kon singgai pangabisan nongkon porayaan tatua, tuata in singgai inta totok moponting kon porayaan tatua, ki Yesus in sinimindog kon bonu in Baḷoi Tuhan bo nosingog noropot; “Intau inta moyogang angoidon kon i-Nakó bo nonginum. 38#Yeh. 47:1; Za. 14:8 Soaḷ intau inta mopirisaya kon i-Nakó in pinaisdon kon Buk Motusi nanaa, ‘Nongkon bonu in ginanea ḷumuai in bokaká inta mobogoi in kobiagan.’ ” #7:38: Tosingogon mita i Yesus kon tontagá mita 37-38 motaau terjemahan: “Intau inta morogang in angoi kon i-Nakó, bo intau inta mopirisaya kon i-Nakó yo ponginumdon. Ná inta pinais kon Buk Motusi: ‘Nongkon bonu in ginanea ḷumuai in bokaká in tubig inta mobogoi in kobiagan.’ ” (39Ki Yesus in nongonguman kon soaḷ Roho i Allah, inta bain tarimaan in intau mita inta mopirisaya kon i-Nia. Sin wakutu intua Roho i Allah in diápa inogoi; sin ki Yesus in diápa pinomulia.)
40Nobayong intau in nokodongog kon onu in siningog i Yesus, bo kon sigad monia tua oyúon in noguman, “Intau tanion in totu-totuubí kon nabi inta pinodandi mamangoi tua!”#7:40: Nabi tatua: Indoiai 1:21.
41Ibanea in noguman, “Naadon in Datu Mopoposaḷamat!”
Táe oyúon doman in noguman, “Ah deeman! Sin Datu Mopoposaḷamat in diábí mamangoi nongkon Galilea? 42#Sam.2. 7:12; Mi. 5:1 Kon Buk Motusi ain pinais, kon Datu Mopoposaḷamat in nongkon buíbí i Daud, bo mamangoibí nongkon ḻipu in Betlehem, ḻipu inta pinogutunan i Daud koḻipod.” 43Pangabisannea intau mita momangkoidon mobobayowan kon soaḷ ki Yesus. 44Oyúon in modomok kon i-Nia, táe diá tobatúmai intau in mokobaḻí mokadai kon i-Nia.
Itoi mita in Yahudi diá Mopirisaya
45Naonda in moḷoḷukad mita kon Baḷoi Tuhan inta pinotabá minayá modomok kon i Yesus nobuidon mangoi, imang mita itoi bo intau mita in Parisi noḻibó kon i monia, “Nongonu sin diábí dinia mangoi monimu kon naa in Sia tua?”
46Dá moḷoḷukad mita tatua in notubag, “Uḻe, diápa kon dodai onda in intau in mosingog ná pososingog-Nea tatua!”
47Dá intau mita in Parisi in noḻibó bui, “Eta degá moiko pinoyaying-Nea domandon?” 48“Oyúondon degá in kon sigad in itoi mita naton andeka intau in Parisi in nopirisaya kon i-Nia? 49Táe intau moantó tanaa, diábí nonotaau kon hukum i Musa, kinatuḷadon in mosia.”
50 #
Yoh. 3:1-2
Kon sigad in intau mita in Parisi tatua oyúon in ki Nikodemus inta nokoimontandon namangoi kon i Yesus. Ki Nikodemus in noguman kon intau mita in Parisi ibanea, 51“Podudui in hukum i Musa, tobatú intau in diábí motaau in hukumon aka pelekaranea diápa kinotaauan bo oaidnea in diápa pinirikisa.”
52Dá mosia in noguman kon inia, “Eta degá iko nion doman in nongkon Galilea? Pirikisadon kon bonu in Buk Motusi dá kotaauanmu bidon kon diábí in tobatúmai nabi in mamangoi nongkon#7:52: diábí in nabi nongkon: naska dungkuḷmai tobatú: nabi tatua in diábí in nongkon. Galilea!”
Bobay inta kinokadapatan nokituaḻing
[53Nopaḷut mako kon tua bayongan intau in norobuidon kon baḷoinea-baḷoinea.
دیاریکراوەکانی ئێستا:
YOHANES 7: INOMOG
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Alkitab Singog In Mongondow Masa In Tanaa © Indonesian Bible Society, 2016.