YOHANES 13
13
Ki Yesus in nondarit kon sioḷ in murí-Nea mita
1Tosinggaipa in Singgai Moḷoben Paska, koyongandon kinotaauan i Yesus kon wakutuneadon Sia in monaḷámai kon dunia naa sin mobuidon kon i Amá-Nea. Sia motabi kon intau mita inta nobaḻí kapunyaan-Nea kon dunia naa, bo tantú-Neabí doman kotabi umaai in kopaḷutan dunia naa.
2Kon wakutu in ki Yesus bo murí-Nea mita yogot mongaan, Ibilis nopogonúdon in niat moraat kon bonu in gina i Yudas Iskariot ki adí i Simon sinbá sia in momaḻidawan kon i Yesus.#13:2: Ibilis … momaḻidawan kon i Yesus: ande ibilis nonantúdon kon ki Yudas ki adí i Simon Iskariot in momaḻidawanbí kon i Yesus. 3Kinotaauan bidon i Yesus kon ki Amá in noposarakandon in kawasa-Nea komintan kon i-Nia. Kinotaauan-Neabí doman kon Sia in namangoi nongkon i Allah bo mobui doman kon i Allah. 4Tuamai Sia in sinimindog bo noḷongkut kon jubah-Nea bo nogibintoḷ in handuk. 5Onda intua Sia in nogaḻin kon tubig kon bonu in baskom, bo mulaidon nondarit kon sioḷ in murí-Nea mita poḷat iradatan-Nea in handuk inta pinogibintoḷ-Nea tatua. 6Bo nodapotdon in Sia kon i Simon Petrus. Ki Simon Petrus naa noguman, “Tuhan, umpaka dá ki Tuhanbí in mondarit kon sioḷ-Ku?”
7Ki Yesus in notubag, “Diápabí kinomangaḻeanmu onu in pomiaan-Ku naa, táe bain komangaḻeanmu.”
8“Donaai, Tuhan,” guman i Petrus kon i Yesus, “donaaibí mokoimontanmai Tuhan mondarit kon sioḷku!”
Táe ki Yesus in notubag, “Aka diá daritan-Ku iko, yo iko in diábí mokouḻí kon tonsilai nongkon i-Nakó.”
9Dá ki Simon Petrus in noguman, “Aka natua Tuhan, donaaidon tongá sioḷku, takindon doman ḻima bo uḷuku naa!”
10Tubag i Yesus kon inia, “Intau inta ain noinggú, ain bidon nodarit komintan, tuamai in diá bidon paraḷu daritan komintan koḻikud bidon in sioḷnea.#13:10: Kon bonu in tongonumai in naska dungkuḷmai diábí: koḻikud bidon in sioḷnea. Moiko nion in nodarit bidon tongá diápa komintan.” (11Kinotaauan bidon i Yesus in intau inta moposarakan kon i-Nia, tuamai Sia in noguman, “Moiko nion in nodarit bidon, táe diápa komintan.”)
12 #
Luk. 22:27
Nopaḷut mako in ki Yesus nondarit kon sioḷ monia, bui-Neadon iḷutud in jubah-Nea bo iḻimitú bui, bo noḻibó kon i monia, “Komangaḻean degá monimu in onu inta bagu-Ku inaidan kon i monimu? 13Moiko in mogoiní kon i-Nakó Guru bo Tuhan. Bo Noitutuibí intua, sin totuu kon Akuoi in Gurubí bo Tuhan. 14Dá aka Akuoi inta Guru bo Tuhanmu nondaritdon kon sioḷ monimu, yo moiko in mustibí doman mosidaritan kon sioḷ. 15Akuoi ain nobogoi in toḷadan kon i monimu, sinbá aidan domandon monimu onu inta ain inaidan-Ku kon i monimu. 16#Mat. 10:24; Luk. 6:40; Yoh. 15:20 Totuubí in tosingogon-Ku naa: Tobatú ata in diábí moiḻiu kon i tuangnea, bo totabá in diábí moiḻiu kon inta nopotabá kon inia. 17Aka kinotaauandon monimu komintan in naa, yo mosanang bidon in moiko aka pomiaanmu.
18 #
Mzm. 41:10
Onu in pinoguman-Ku naa in deemanbí soaḷ moiko komintan. Kotaauan-Kubí ki ine inta ain piniḻí-Ku, táe bá mobaḻídon onu inta pinais kon bonu in Buk Motusi nanaa, ‘Intau inta ain nongaan noyotakin-Ku, in moḷawangbí kon i-Nakó.’ 19Soaḷ tanaa muna-Kudon poguman kon i monimu kon dodai in diápa mobaḻí, sinbá aka mobaḻídon in soaḷ tatua yo pirisayaandon monimu kon Akuoibí in Sia inta sinumangoi ‘AKUOI OYÚON.’ 20#Mat. 10:40; Mrk. 9:37; Luk. 9:48, 10:16 Naa in poguman-Ku kon i monimu: Ki ine in motarima kon intau inta pinotabá-Ku, yo sia in notarima kon i-Nakó. Bo ki ine in motarima kon i-Nakó, yo Sia tua in notarimadon kon i-Nia inta nopotabá kon i-Nakó.”
Ki Yesus nopotaau kon onu in pomiaan i Yudas kon i-Nia
(Mat. 26:20-25; Mrk. 14:17-21; Luk. 22:21-23)
21Naonda in noguman mako natua in ki Yesus, totokdon in moajar in gina in Sia. Bo Sia in noguman, “Akuoi in mogumandon kon i monimu: Tobatú nongkon sigad monimu nion momaḻidawanbí kon i-Nakó.”
22Murí-Nea mita nooindoian takin noherang sin diábí kinotaauan monia mongo ki ine imakusud-Nea tua. 23Murí inta totok kinotabi Yesus iḻimitú kon diugmai i Yesus 24Dá ki Simon Petrus in nonuḷadá kon inia, sin mokiḻibó mongo ki ine imakusud-Nea tatua.
25Dá murí-Nea tatua in dinimiugdon kon i Yesus, bo noḻibó, “Ki ine in sia, Tuhan?”
26Ki Yesus in notubag, “Intau inta ogoian-Ku in roti inta ain pinoḷodok-Ku kon bonu in palo, sia tuata in intaunea.” Dá ki Yesus in nogamá kon roti topongkó bo pinoḷodok-Nea kon palo, bodongka inogoi-Nea kon i Yudas ki adí i Simon Iskariot. 27Naonda in ki Yudas notarima kon roti tatua, ginanea in kinogonúandon in Ibilis. Bo ki Yesus in noguman kon inia, “Aidaidon koḻikat onu in kino ibogmu pomiaan.” 28Diábí tobatúmai in kon sigad monia inta iḻimitú nongaan takin-Nea tua in nonotaau kon singog i Yesus tatua kon i Yudas. 29Oyúon in nosangka kon ki Yesus nopotabá kon i Yudas minayá notaḷui kon tobatú kaparaḷuan pakéon kon pesta, andeka mobogoi in doit topiḻik kon intau bogá, sin ki Yudas tua mokokadai kon doit in kas monia.
30Naonda in ki Yudas notarima mako kon roti tatua, sia in baḷú iḷumuai. Nodoḷomdon dodai intua.
Parenta inta mobagu
31Naonda in ki Yudas minayá, ki Yesus in noguman, “Tanaa Adí Intau pomuliaandon, bo ki Allah in pomuliaan pongin i-Nia. 32Aka ki Allah pomuliaan pongin i-Nia, dá Sia in pomuliaanbí doman i Allah pongin awak-Nea tontaní. Bo ḷagi bidon pomuliaan i Allah. 33#Yoh. 7:34 Adí-Ku mita, Akuoi in diá bidon moonggot in moyotakin monimu. Tayakonbí monimu in Akuoi, táe ná inta ain pinoguman-Ku kon itoi mita in Yahudi bo inta pinoguman-Ku doman kon i monimu, tampat inta bayáan-Ku in diábí kodapotan monimu. 34#Yoh. 15:12, 17; Yoh.1. 3:23; Yoh.2. 5 Akuoi in mobogoi in parenta mobagu kon i monimu: Moiko in mustibí mositabian tobatú bo tobatú. Ná Akuoi motabi kon i monimu, dá moiko in musti mositabian doman natua. 35Aka moiko bo mositabian, yo kotaauandon in intau kon moiko nion in murí-Kubí mita.”
Ki Yesus Nopotaau muna kon onu in aidan i Petrus
(Mat. 26:31-35; Mrk. 14:27-31; Luk. 22:31-34)
36Ki Petrus in noḻibó kon i Yesus: “Tuhan, kon onda in bayáan i Tuhan?”
Ki Yesus in notubag, “Kon onda in bayáan-Ku, diápabí in iko motaau dumudui tanaa mako. Iko in bambí dumudui kon singgai moiduduimai.”
37Dá kai Petrus doman, “Tuhan nongonu sin diábí motaau akuoi in dumudui in tanaa mako? Morelabí in akuoi in matoi sin kopontingan i Tuhan!”
38Ki Yesus in notubag, “Totuu iko in morela in matoi sin kopontingan-Ku? Pokotaaudon Petrus! Diápa in manuk mokukú, iko in koyongandon kotoḷu moguman, kon diábí nokanalmu in Akuoi!”
دیاریکراوەکانی ئێستا:
YOHANES 13: INOMOG
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Alkitab Singog In Mongondow Masa In Tanaa © Indonesian Bible Society, 2016.