KORINTUS 1 3
3
Intau inta nogaid kon oaidan i Allah
1Utatku mita, sabanarnea akuoi in diábí motaau moyosingog takin monimu naonda bo takin intau mita inta ain kinawasaan Roho i Allah. Sin moiko nion diápa motoindudui kon i Allah bo diápa doman noguyang in pirisaya monimu kon i Kristus. 2#Ibr. 5:12-13 Koḻipod in moiko tongápabí pinokaankumai in kaanon adí mointok, deemanpabí kaanon intau inta noguyangdon sin diápa in moiko mokomampu in mokaan kon natua. Táe umaaipa doman masa in tanaa natuapa doman in moiko, 3sin moiko tantúpabí doman dinumudui kon tabiatmu saḷaku intau. Sin aka oyúonpa doman in ointoian bo yogenggeng kon sigad monimu, yo mangaḻenea kon tua moiko in dumuduipabí kon tabiat in intau, ná intau inta diá nonotaau kon i Allah. 4#Kor.1. 1:12 Aka oyúonpa doman in kon sigad monimu in mosingog kon, “Kami in dumudui i Paulus,” bo ibanea doman in moguman, “Akuoi in dumudui i Apolos,” oaid tatua in naonda bo oaid in intau inta diá nonotaau kon i Allah.
5Sabanarnea ki inebí in ki Apolos andeka ki Paulus tua? Bá kotaauan monimu, kami naa in tongábí intau mita inta nogaid kon oaidan i Allah inta mopoyaput in Habar Mopia kon i monimu sinbá mopirisayadon in moiko kon i Kristus. Kami naa in tongábí mopobayá in oaidan inta pinoki aid i Tuhan kon inami. 6#Rsl. 18:4-11, 24-28 Aka ibarat pinomuḷa, akuoi in nomuḷa bo ki Apolos in nomuta-mutak, táe ki Allahbí in nobogoi in kobiagan. 7Manangka intua ki Allahbí in moponti-ponting, sin Sia in mobogoi in kobiagan. Ki inta nomuḷa bo ki inta nomuta-mutak in diábí totok moponting; 8notongkaibí in taya dua tua, tongábí tumpaḷa motarima kon boḻi in ḷopí monia. 9Kami naa in tongábí tumpaḷa mogaid kon onu in pinoki aid i Allah; bo moiko nion naonda bo gobá i Allah.
Moiko naonda doman bo baḷoi i Allah. 10Lantaran kapandoian inta inogoi i Allah, dá akuoi naonda bo intau inta nonotaaudon totok kon pogogaid kon bangunan tatua. Munadon nogaid kon pondasi sin popoḻitúan in bangunan tatua, bo intau ibanea in mamangoi moposindog in bangunan kon pondasi tatua. Pomuḷoi intau in mustibí monarukira muna mongo naonda in mopoḻitú in bangunan kon pondasi tatua. 11Tongábí ki Kristus in sinampat i Allah mobaḻí pondasi kon bangunan tatua, diábí in pondasi ibanea mako. 12Taau bidon kon tobatú bo tobatú mongo bangunan naonda in posindogonnea. Bangunan inta inaidanka nongkon buḷawan, andeka inaidan nongkon saḷaka, andeka nongkon batu permata, andeka nongkon kayu, andeka nongkon bonok noingkag, andeka nongkon pangkoi in payoi. 13Bayongan onu inta inaidan in intau modaitbí koontongan kon wakutu in koangoian bui i Kristus. Sin kon wakutu intua tuḷubí in mopoontong kon bayongan inta inaidan in intau. Tuḷubí in moguji bo monantú kon mopia andeka diá in oaidan mita tatua. 14Aka bangunan inta pinosindog kon bangunan tatua bo diá mopokak, yo intau tatua in motarimabí kon boḻi in onu inta inaidannea tatua. 15Tongá aka mopokak, yo morugi totok in sia; mosaḷamatbí in sia táe naonda bo intau inta noiḷuai nongkon bonu in tuḷu.
16 #
Kor.1. 6:19; Kor.2. 6:16 Degá diá kinotaauan monimu kon awak monimu nion in Baḷoibí i Allah inta pinogutunan in Roho-Nea? 17Aka oyúon in momogutú kon Baḷoi i Allah, yo pogutúonbí doman i Allah in intau tatua. Sin Baḷoi i Allah in tongábí Baḷoi-Nea tontaní, bo moikobí nion in Baḷoi i Allah inta imakusud naa.
18Donaai tobatúmai in monguboḷ kon awaknea tontaní. Aka oyúon in kon sigad monimu in monganggap mobijaksana in sia podudui in raian intau, yo intau tatua in mustibí tumekeng bodok, sinbá totu-totuu mobaḻí mobijaksana in sia. 19#Ayb. 5:13 Sin kabijaksanaan in intau kon dunia naa diábí in baraguna kon i Allah. Kon bonu in Buk Motusi in pinais nanaa, “Ki Allah in mojebak kon intau mita inta mongobijaksana podudui in pandoinea tontaní.” 20#Mzm. 94:11 Bo oyúon doman in pinais nanaa, “Kinotaauanbí i Tuhan kon raian in intau mita inta mongobijaksana diábí baraguna.” 21Tuamai in dikabí moduí kon intau, sin bayongan yagi-yagi in nodait bidon inogoi kon i monimu. 22Ki Paulus, ki Apolos, ki Petrus, dunia naa, kobiagan bo kopatoian, masa in tanaa andeka kon singgai moiduduimai naa, bayongan yagi-yagi in kapunyaanmu bidon. 23Ki togi kon i monimu nion in ki Kristusbí, bo kitogi kon i Kristus in ki Allahbí.
دیاریکراوەکانی ئێستا:
KORINTUS 1 3: INOMOG
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Alkitab Singog In Mongondow Masa In Tanaa © Indonesian Bible Society, 2016.