LUKAS 4
4
Nitu an su' Usif Yesus
(Mat. 4:1-11; Mrk. 1:12-13)
1Usif Yesus, le nahenu nok Smanan Knino, anfani nem na'ko Noe Yordan, ma Smanan Knino anhel neki neu mnela hufui. 2In namaika anbi nane neno bo' ha ma Nitu ansu' nani. In kan bukae nit fa sa' es bi neno-neno le nane ma leka neno namsopun onane te In namnah. 3Nitu nak neu In nak, “Kalu Ho Uisneno In anah Ko, Ho mak fatu i hen fani utunu'.” 4Usif Yesus natae neu in nak: “Mansian anmoni ka al fa nok utunu' anmes.”
5Nitu neki Usif Yesus neu tubu mese ma onle tasmela matak, Nitu nalile neu Usif Yesus ale plenat pah pinan. 6Nitu nak neu In: “Of au fe Ko ale kuasat nok apinat fun ale sa' nane nana'at nalali neu kau ma au fe neu sekau le au lomi. 7Kalu Ho mofhae meu kau, Hom pal kum ale i ok-oke.” 8Nai Yesus natae in nak: “Antui nalali nak: Ho es mofhae neu Uisneno, ma amonen neu In anmes!”
9Namuni te in neki Usif Yesus neu Yerusalem ma nahakeb nan In bi Ume Uisneno penen, oket nak neu In, “Kalu Ho Uisneno Anmone Ko, mumofut Ho aom mu'ko i, 10fun antui nani nak: Of anlelu In ahake neno tunan neu Ko, hen pao Ko, 11ma of sin nat-nat Ko bi sin niman he nati' Ho haem kais antom neu fatu.” 12Usif Yesus natae neu in nak, “A'an nabel'on nak: Kais hom su' ho Uisneno!”
13Nitu nasopu ale in lasi su'at, in naskot na'ko Usif Yesus ma anpao leku le'at.
Usif Yesus na'ub In mepu anbi Galilea
(Mat. 4:12-17; Mrk. 1:14-15)
14Anbi kuasat Smanan Knino Usif Yesus anfani neu Galilea. Ma In kanan nasitbon bi pah nane funam natef. 15In nanoina sin anbi sin ume buat ma sin alsin naliatas In kanan.
Antite Usif Yesus anbi Nazaret
(Mat. 13:53-58; Mrk. 6:1-6)
16Ma Usif Yesus nem neu Nazaret bale le In nanae anbine, ma natuin In antak nalali bi Neno Snasat antam neu ume buat, ma In anfen hen soi Sulat Knino. 17Ma anfe neu In Mafefa Knino Nai Yesaya in sulat ma In anfei sulat ma In napeni lasi le matui nak,
18“Uisneno Smanan anbi Kau,
natuin In anop nalali min fomeni neu Kau,
he etun beno alekot neu amamu'it sin.
Ma In ansonu Kau,
19he kakan lasi fetis neu atoni mafutu sin,
ma etun lasi mnitas neu afolot sin,
he ufetin ale atoni le anbi hamu'it,
he uton leku Usif tunan le ankoenon nemen.”
20Usif Yesus anunu nafani sulat nane ma anfe nafani neu ameput, oket In antok. Ale atoni abit ume buat nane sin matkenu nake' neu In. 21Oket In nanoina sin nak, “Neno i tuis i natiabon bi hi lukem.” 22Ma sin alsin antebes ma namkakan antom a'at ma uab le anpoi na'ko In fefan ma sin nak, “Ai i ka Nai Yusuf in anmone ka?” 23Oket Usif Yesus nak neu sin, “Of hi miton Kau leta i mak, Mnane, muleko kum ho aom! Ho mo'e nai amsa bi Ho kuan ale lasi le haim nen nak Ho mo'e mani anbi Kapernaum!” 24In nak anteni neu sin, “Au eut ki namneo, katit fa Mafefa knino le ansimo nani anbi in kuan. 25Au u'uab neu ki, ma Au a'at nane namneo. Bi batan Nai Elia anmu'i bife banu namfau bi Israel. Afi neno tunan anekon ton tenu ma funan ne, leka amnahas naek bi pah nane. 26Ma kan sonu fa Nai Elia neu bife mese na'ko sin, mes neu bife banu mese anbi kuan Sarfat pah Sidon. 27Bi batan Mafefa Knino Nai Elisa anmu'i atoni men poko namfau bi Israel mes katit fa es na'ko sin he naleok al Nai Naaman, atoni Siria nane.” 28Leka sin nen lasi onane sin alsin abit ume buat nane nato'an. 29Sin anfen, ma antite napoitan Usif Yesus neu kuan kotin ma neki neu tubu tunan le nahakeb kuan nane anbin, hen polin nasanut In na'ko panaf ninen. 30Mes Usif Yesus anpoi natuin sin atnankenu ma nao kun.
Sman Nitu antam neu atoni
(Mrk. 1:21-28)
31Nalali te Usif Yesus nao neu Kapernaum, kot es anbi pah Galilea, ma In nanoina sin bi Neno Snasat. 32Sin nekan namnekun neu In noina, fun In a'an nahenu nok kuasat. 33Anbi ume buat nane anmu'i atoni mese le niut sae ma in an'anbai nok hanan naek, 34“Hoi Yesus atoni Nazaret, ai Ho mu'i lasi sa' mok kai ka? Ho aum he mule'un kai ka? Au uhin Ko, Ho sekau Ko: Le'u Knino mu'ko Uisneno.” 35Usif Yesus ankas in ma nak, “Mutena, ampoi nai mu'ko in!” Ma nitu nane antepon atoni nane neu atoni amfaun sin atnanan, oket in anpoi ma ka namenab fa atoni nane. 36Sin namkak nain oke, ma anmau'aben es nok es nak, “A'at i matain le'uf, nok In kuasat ma In matanen In naplenat ale kuasat nitu ma sin anpoi.” 37Ma beno antom In anpoi funam natef bale-bale.
Yesus naleko' atoni namfau
(Mat. 8:14-17; Mrk. 1:29-34)
38Usif Yesus nao nasaitan ume buat nane ma nao neu Nai Simon in ume. Nai Simon in baif anmainin naek ma sin antoti Usif Yesus hen tulun nan. 39Usif Yesus anhake bi bife nane aon bian, ma anli'u maininit nane, ma menas nane anpoi. Bife nane anfen oket nabiku sin.
40Manas anmof ai antes onane te atoni namfau sin neki neu Usif Yesus ale atoni amenat le anmu'i menas huma-huma. In anpoh sin mes-mese neki In niman ma naleko' sin. 41Nitu anpoi na'ko ale amenat sin ma an'anbai nak, “Ho Uisneno Anmone Ko.” In tal sin matani ma ka nabe'i sin na'uab fun sin nahin nak In Neno Anan kun.
Usif Yesus nanoina anbi ume-ume onen totis
(Mrk. 1:35-39)
42Neno nok-noka onane te Usif Yesus anpoi na'ko kot nane ma nao neu bale teta es. Ma atoni namfau sin nami In oket nae'ku nokan ma sin natau In he kais nao nasaitan sin. 43Mes In nak neu sin, “Bi kuan-kuan bian amsa, Au mes he netun Plenat Uisneno, fun ansonu Kau neu lasi i.” 44Ma In anetun Lasi Knino bi ume-ume buat pah Yudea.
دیاریکراوەکانی ئێستا:
LUKAS 4: AOZ
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە