KEJADIAN 9
9
Fef Bela Uisneno nok Nai Nuh
1Uisneno anfe tetus neu Nai Nuh ma in anah sin ma In namolok nak, “Ampe' ma mimfau nai, he nati' hi sufam nane natua pah pinan funam natef. 2Ale kolo ma ika ma ale mu'it bian of namtau ma nasman neu ko. Sin alsin anbi ho kuasat. 3Ale nane ok-oke nabe'i anfani ho mnahat, onle luet-luet nomate amsa; Au fe sin neu ko anfani ho mnahat. 4Lasi mese le ka nabe'i fa he hi miahan esle' sisi le in na' fe anbin, natuin smanaf nane anbi na' in nanan. 5Atoni mese-mese ma mu'it le namate mansian of Au kas umate in. 6Au mepu mansian nane onle Au amsa; es nane, sekau namate mansian of namate in amsa.
7Namneo, of hi misuf ma mika'u, mimfau ma mitua pah pinan anfunam natef.”
8Uisneno namolok neu Nai Nuh nok in anah sin nak, 9“Leku le i Au mo'e ani Au fef bela oke ki ma oke hi sufam, 10ma oke ale amonit le nane'o, esle' kolo-kolo ma ale mu'it anbi pah meto esle' sin alsin le anpoi na'ko bnao le nane nok ki. 11Le i Au fef bela oke ki: Au manta'en ak ale amonit le nane'o of Au ka ule'un ateni fa eki noe sako. Of kan mu'in teni fa noe sako le nale'un pah pinan le i anteni. 12Anfani on ataka neu Au fef bela nane anhaek nabal, le Au mo'e ani oke ki nok ale amonit le nane'o, 13es nane te Au tao ani Au enus anbi nope anfani ataka neu Au fef bela oke pah pinan. 14Anbi haef-haef, leka Au amu neno tnanan eki nope, oke te hit mit enus nane, 15Au of umnau Au manta'en oke ki, ma neu ale amonit le nane'o, esle' nak noe sako of ka nale'un anteni fa ale amonit. 16Leka mit enus anbi neno atnanan, Au of it in, ma Au umnau Au manta'en le nabal-bal nane anbi Kau oke ale amonit anbi pah pinan. 17Le nane anfani ataka neu Au manta'en le Au fe ani neu ale amonit anbi pah pinan.”
Nai Nuh ma in anah-anah sin
18Nai Nuh in anah-anah sin le napoi na'ko bnao nane esle' Nai Sem, Nai Yafet ma Nai Ham. (Nai Ham nane amaf Kanaan.) 19Nai Nuh in anah teun sin le nane es anfani on atoni pah pinan sin naifine.
20Nai Nuh atoni amepu lene, ma in es anfani atoni ahunut le anmepu lene tua min kase. 21Leka Nai Nuh ninu nalali in tua min kase, in anmafu. In ankasu nani in blua pake sin ma in antup nok monas anbi in um-ume in nanan. 22Leka Nai Ham le anfani amaf atoni Kanaan, in nit nak in amaf anmonas, in anpoi ma naton lasi nane neu in biafin nua sin. 23Nalali onane te Nai Sem ma Nai Yafet sin naiti sobalu betkone mese ma sin nauf anbi sin benan. Sin anhone koti ma antam neu um-ume in nanan ma an amu sin amaf neki sobalu betkone nane. Sin nao neki sin kotin ma sin kan kiso neu fa sin amaf le anmonas nane. 24Leka Nai Nuh in matan anmeu na'ko mafu ma in nahin sa' le in anah ahet susu anmo'e neu in, 25in nak,
“Sukat neu ko Kanaan!
In of anfani ate amle'ut neu in biafin.
26Ampules Uisneno, Nai Sem in Uisneno!
Kanaan of anfani ate neu Nai Sem.
27So nati' Uisneno ansato anteni In tetus neu Nai Yafet
ma anhenua in bale maika.
So nati' in sufan natua nok Nai Sem in sufan.
Kanaan of anfani ate neu Nai Yafet.”
28Noe sako nane anfin, Nai Nuh fe in anmoni anteni ton 350. 29In anmate anbi tabu in nan ton 950.
دیاریکراوەکانی ئێستا:
KEJADIAN 9: AOZ
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە