KA ʻEUANELIO I KĀKAU ʻIA AI E LUKA 19
19
MOKUNA XIX.
1 ʻO Zakaio. 11 ʻO nā pouna he ʻumi. 28 Holo Iesū i loko o Ierusalema. 41 Uē Iesū iā Ierusalema.
1¶ A komo aʻela ia i loko o Ieriko, a ma waena ia i hele aku ai.
2Aia ke kanaka i kapa ʻia ka inoa ʻo Zakaio, he luna ʻauhau nui, he nui nō hoʻi kona waiwai.
3A ʻimi aʻela ia e ʻike iā Iesū i kona ʻano; ʻaʻole hoʻi e hiki no ka paʻapū o kānaka; no ka mea, he poupou kona kino.
4Holo aʻela hoʻi ia ma mua, piʻi aʻela i luna ma ka lāʻau sukomorea e ʻike iā ia, i kona hele ʻana aʻe ma laila.
5A hiki akula ʻo Iesū ma ia wahi, nānā aʻela ia i luna, a ʻike iā ia, ʻōlelo aʻela iā ia, “E Zakaio, e iho koke mai ʻoe i lalo; no ka mea, ua pono iaʻu ke noho ma kou hale i kēia lā.”
6A iho koke maila ʻo ia i lalo, a hoʻokipa aʻela iā ia me ka ʻoliʻoli.
7A ʻo ka poʻe i ʻike ia mea, ʻōhumu ihola lākou a pau, ʻī aʻela, “Ua hele ia e hoʻokipa ʻia aʻe e ke kanaka hewa.”
8A kū aʻela ʻo Zakaio, ʻī akula ia i ka Haku, “Eiʻa, ʻālike ʻālike o kuʻu waiwai, e ka Haku, ʻo kaʻu ia e hāʻawi aku ai no ka poʻe ʻilihune; a inā i lawe au me ka hewa i kā kekahi, e pāhā kaʻu mea e uku aku ai iā ia.”
9A laila ʻōlelo maila Iesū nona, “I nēia lā ua hiki mai ke ola ma kēia hale; no ka mea, he mamo nō hoʻi ʻo ia nei na ʻAberahama.
10“No ka mea, ua hele mai nei ke Keiki a ke Kanaka e ʻimi a e hoʻōla i ka mea i nalowale.”
11¶ A i ko lākou hoʻolohe ʻana ia mea, ʻōlelo hou maila ʻo ia i nēia ʻōlelo nane; no ka mea, ua kokoke ʻo ia i Ierusalema, a ua manaʻo lākou e ʻike koke ʻia ke aupuni o ke Akua.
12No laila i ʻōlelo mai ai ʻo ia, “ʻO kekahi aliʻi e hele ana i ka ʻāina lōʻihi aku e loaʻa iā ia ke aupuni, a e hoʻi mai.
13Hea akula ia i nā kauā āna he ʻumi, hāʻawi akula iā lākou i nā pouna he ʻumi, a ʻī akula iā lākou, ‘E kūʻai ʻoukou a hoʻi mai au.’
14“A ua hoʻowahāwahā kona poʻe kānaka iā ia, a hoʻouna akula i ka luna ma hope ona, ʻī akula, ‘ʻAʻole o mākou makemake i aliʻi ia ma luna o mākou.’
15“Eia kekahi, a loaʻa mai iā ia ke aupuni, a hoʻi maila, kauoha aʻela e kiʻi ʻia ua poʻe kauā lā āna i waiho ai i ke kālā, i ʻike ʻo ia i ka mea i loaʻa hou mai i kēlā mea i kēia mea i ke kūʻai ʻana.
16“A laila hele maila ka mua, ʻī maila, ‘E ka haku, ua loaʻa mai i kāu pouna nā pouna hou he ʻumi.’
17“ʻĪ akula ʻo ia iā ia, ‘Ua pono, e ke kauā maikaʻi; ua mālama pono ʻoe i ka mea ʻuʻuku, e noho ʻoe ma luna o nā kūlanakauhale he ʻumi.’
18“A laila hele maila ka lua, ʻī maila, ‘E ka haku, ua loaʻa mai i kāu pouna nā pouna hou ʻelima.’
19“A ʻī akula ʻo ia iā ia, ‘E noho hoʻi ʻoe ma luna o nā kūlanakauhale ʻelima.’
20“A hele maila kekahi, ʻī maila, ‘E ka haku, eia kāu pouna aʻu i mālama ai e waiho ana ma loko o ke kāhei;
21no ka mea, ua makaʻu wau iā ʻoe; no ka mea, he kanaka ʻawaʻawa ʻoe, ua lawe ʻoe i ka mea ʻaʻole nāu i waiho iho i lalo, a ua ʻohi ʻoe i ka mea ʻaʻole nāu i lūlū.’
22“ʻŌlelo akula ʻo ia iā ia, ‘No kou waha ponoʻī mai e hoʻāhewa aku ai au iā ʻoe, e ke kauā loko ʻino; ua ʻike ʻoe he kanaka ʻawaʻawa au e lawe ana i ka mea ʻaʻole naʻu e waiho iho i lalo, a e ʻohi ana i ka mea ʻaʻole naʻu i lūlū.
23‘No ke aha lā i hāʻawi ʻole aku ai ʻoe i kaʻu kālā i kahi kūʻai kālā, a hoʻi mai au e ʻohi hou au ia me ka uku hoʻopaneʻe?’
24“A laila ʻōlelo akula ia i ka poʻe e kū mai ana, ‘E lawe aʻe i ka pouna mai ona aʻe, a e hāʻawi aku na ka mea iā ia nā pouna he ʻumi.’
25(“ʻŌlelo maila lākou iā ia, ‘E ka haku, he ʻumi nō āna pouna.’)
26“No ka mea, ke ʻōlelo aku nei au iā ʻoukou, ʻo ka mea ua loaʻa, e hāʻawi hou ʻia nō iā ia, a ʻo ka mea ua loaʻa ʻole, e kāʻili ʻia nō kāna.
27“A ʻo kēlā mau ʻenemi oʻu, ka poʻe i makemake ʻole i aliʻi au ma luna o lākou, e halihali mai, a e luku iho i mua o koʻu alo.”
28¶ A pau kāna ʻōlelo ʻana ia mea, hele mua ia e piʻi ana i Ierusalema.
29¶ Eia kekahi, a kokoke ia iā Betepage a me Betania, ma ka mauna i kapa ʻia ʻo ʻOliveta, hoʻouna akula ʻo ia i nā haumāna āna ʻelua,
30ʻī maila, “E hele aku ʻolua i kēlā kūlanahale e kū pono mai ana; a i ko ʻolua komo ʻana i loko, e ʻike aku nō ʻolua i ke keiki hoki i hīkiʻi ʻia, ʻaʻole i noho ʻia e ke kanaka, e wehe aʻe a e kaʻi mai iā ia.
31“A inā e nīnau mai kekahi iā ʻolua, ‘No ke aha lā ʻolua e wehe ai iā ia?’ E ʻōlelo aku ʻolua iā ia, ‘Ua nele ka Haku ia mea e pono ai.’”
32Hele akula ua mau mea lā i hoʻouna ʻia, a ʻike akula e like me kāna ʻōlelo ʻana iā lāua.
33A i ko lāua wehe ʻana aʻe i ke keiki hoki, nīnau maila nā mea nona ia iā lāua, “No ke aha lā ʻolua e wehe ai i ke keiki hoki?”
34ʻĪ akula lāua, “Ua nele ka Haku ia mea e pono ai.”
35A kaʻi maila lāua iā ia i o Iesū lā; a kau akula lākou i ko lākou mau ʻaʻahu ma luna o ke keiki hoki, hoʻonoho aʻela lākou iā Iesū ma luna iho.
36A i kona holo ʻana aku, hohola ihola lākou i ko lākou mau kapa ma ke alanui.
37A kokoke akula ʻo ia ma ke kaolo o ka mauna ʻo ʻOliveta, hauʻoli aʻela ka ʻaha haumāna a pau, e hoʻoleʻa ana i ke Akua me ka leo nui no nā hana mana a pau a lākou i ʻike ai;
38ʻī akula:
“«E hoʻomaikaʻi ʻia ke Aliʻi i hele mai nei ma ka inoa o ka Haku»;
He malu ma loko o ka lani, a he hoʻonani i luna lilo loa!”
39A ʻōlelo akula iā ia kekahi poʻe Parisaio ma waena o ka ʻaha kanaka, “E ke Kumu, e pāpā ʻoe i kāu poʻe haumāna.”
40ʻŌlelo maila hoʻi ʻo ia, ʻī maila iā lākou, “Ke ʻōlelo aku nei au iā ʻoukou, inā e ʻōlelo ʻole lākou nei, e hoʻōho koke mai nō nā pōhaku!”
41¶ A kokoke akula ia, nānā aʻela i ke kūlanakauhale, uē ihola ʻo ia iā ia;
42ʻī ihola, “Inā ʻoe i hoʻomanaʻo, ʻo ʻoe, i kēia lā ou, i kāu mau mea e malu ai! Akā ʻānō hūnā ʻia nō ia i kou mau maka.
43“No ka mea, e hiki mai ana nō nā lā iā ʻoe, e hana mai ai kou poʻe ʻenemi, i ka pā kaua a pōʻai iā ʻoe, a e hoʻopuni nō hoʻi lākou iā ʻoe, a e hoʻopaʻa iā ʻoe ma kēlā ʻaoʻao, a ma kēia ʻaoʻao a puni;
44a e hoʻohiolo lākou iā ʻoe a me kāu poʻe keiki i loko ou, ʻaʻole hoʻi lākou e waiho i kekahi pōhaku i loko ou, ma luna iho o kekahi pōhaku; no ka mea, ʻaʻole ʻoe i hoʻomanaʻo i kou manawa i kipa ʻia ai.”
45¶ A komo aʻela ʻo ia i loko o ka luakini, kipaku akula ʻo ia i ka poʻe kūʻai lilo aku ma loko, a me ka poʻe kūʻai lilo mai.
46ʻĪ maila ʻo ia iā lākou, “Ua palapala ʻia, ‘«He hale pule koʻu hale»;’ akā, ua hoʻolilo ʻia aʻe nei ia e ʻoukou i «ana no ka poʻe pōā».”
47¶ A aʻo maila ʻo ia i loko o ka luakini i kēlā lā i kēia lā; a ʻo nā kāhuna nui a me ka poʻe kākau ʻōlelo, a me nā luna o kānaka, ʻimi aʻela lākou e pepehi iā ia.
48ʻAʻole naʻe i loaʻa iā lākou ka mea e hiki ai; no ka mea, ua hoʻoikaika ka poʻe kānaka e hoʻolohe iā ia.
دیاریکراوەکانی ئێستا:
KA ʻEUANELIO I KĀKAU ʻIA AI E LUKA 19: KBH
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Ka Baibala Hemolele © Partners Development Foundation, 2018.