GÉNESIS 9
9
Taita Diosca Noehuan imallata ruranata ari nishcami
1Taita Diosca Noetapish, paipaj churicunatapish alli cashca cachun nishpaca: “Huahuacunayuj tucushpa, alli huiñachishpa achcata mirarishpa cai pachapi jundarichij. 2Cai pachapi tiyaj tucui animalcunaca huairata purij alasyuj animalcunapish, pambapi purij animalcunapish, mama cuchapi causaj animalcunapish tucuicunami cancunata manchacuj tucungacuna. Tucui chaicunataca cancunapaj maquipimi churani. 3Causaiyuj caj tucui animalcunaca cancuna micunapajmi. Chashnallataj yacu granocunatapish, verdi q'uihuacunatapish tucuitami cancunaman cuni. 4Ashtahuanpish causaita cuj yahuarndij aichataca ama micunguichij. 5Chashna cashcamanta maijanpish shujtajta huañuchijtaca, llaquichingapaj catishatajmi. Shinallataj maijan animalpish maijan runata huañuchijtaca llaquichingapaj catishatajmi. Runata huañuchijtaca pi cachunpish llaquichingapaj catishatajmi.
6Maijanpish shuj runapaj yahuarta jichajtaca, paitapish shujtaj runami yahuarta jichanga.
Runataca Taita Dios paiman rijchajta rurashcamanta pi mana yahuarta jichanallachu.
7Ashtahuanpish cancunaca huahuacunayuj tucushpa, alli huiñachishpa achcata mirarichij.
Cai pachapica achca huahuacunayuj tucushpa tucuipi jundarichij” nircami.
8Taita Diosca Noeta, paipaj churicunataca cashnapishmi nirca: 9Ñucaca cancunahuanpish, cancunapaj q'uipa huahua huahuacunahuanpish, shuj ruranatami chashnataj cachun ari nini. 10“Cancunahuan caj causaiyujcunahuanca: Huambuj huasimanta llujshishpa cancunahuan caj huairata purij alasyuj animalcunahuanpish, sacha animalcunahuanpish, charina animalcunahuanpish shuj ruranatami ruragrini. 11Ñuca cancunaman ari nishcaca caimi: Cai pachapi causaiyuj caj tucuicunataca ña mana cutinca yacu juilluhuan chingachishachu. Cai pachapi imalla tiyajcunata chingachingapajca yacu juilluca ña mana ashtahuan tiyangachu”.
12Taita Diosca cashnapishmi nirca: “Cancunapajpish, cai pachapi caj causaiyuj animalcunapajpish ñuca ari nishcata ricuchijca caimi: 13Ñuca cuichitami jahua p'uyupi churani. Chai cuichimi cai pachapi causajcunapaj ñuca rurasha nishpa ari nishcata ricuchijca canga. 14Cai pachaman p'uyuta ñuca cachajpica, cashnami tucunga. Ñuca churashca cuichimi chai p'uyupica ricuricungalla. 15Chaita ricushpami ñucaca cancunapajpish, cancunahuan caj causaiyuj tucui laya animalcunapajpish ñuca rurasha nishpa ari nishcataca yuyarisha. Causaiyuj caj tucuicunata chingachingapajca yacu juilluca ña nunca mana tiyangachu. 16P'uyupi cuichita ricushpaca, causaiyuj caj tucuicunapaj ñuca rurasha nishpa huiñaipaj ari nishcatami yuyarisha”.
17Taita Diosca Noetaca: “Cai pachapi causaiyuj caj tucuicunapaj ñuca rurangapaj ari nishcata ricuchijta churashcaca chaimi” nircami.
Noé machashcami
18Huambuj huasimanta llujshij Noepaj churicunaca Sem, Cam, Jafetmi carca. Cam runaca, Canaanpaj yayami. 19Chai quimsa runacunami Noepaj churicunaca. Paicunamantami tucui cai pachapi mirarishpa catirca.
20Noeca allpapi cutinllataj trabajai callarishpaca uvatami tarpurca. 21Chai uva vinota ubyashpa machashpami Noeca, paipaj carpa huasi chaupi ucupi lluchulla siricurca. 22Canaanpaj yaya Cam runaca, paipaj yaya lluchulla siricujta ricushpami, canllaman caj paipaj ishqui huauquicunaman chaita huillarca. 23Chaimi Sempish, Jafetpish churanata japishpa paicunapaj rigra jahuapi churashpa, huashaman purishpa paipaj yaya lluchulla cashcataca tapachircacuna. Chashnami paicunapaj yaya lluchulla cashcataca mana ricurcacuna 24Noeca machai cacharirishpa rijcharishpami, paipaj q'uipa churi Cam imata rurashcata yachaj chayashpa, 25cashna nirca:
“¡Canaanca mana alli nishca cachun!
¡Cambaj ishqui huauquicunapajta rurajcunapajta ruraj cachun ninimi!” nirca.
26Noeca cashnapishmi nirca:
“¡Semtaca ñuca Mandaj Taita Dios, alli nichun.
Canaanca, cambajta ruraj cachun!
27¡Jafettaca Taita Diosca jatunyachishca cachun.
Jafetca Sempaj carpa huasicunapi causachun.
Canaanca, Jafetpajta ruraj cachun!” nircami.
28Noeca yacu juillu tiyashca q'uipaca, 350 huatacunahuanmi causarca. 29Noeca tucuimantaca, 950 huatacunata causashpami huañurca.
دیاریکراوەکانی ئێستا:
GÉNESIS 9: QCHI04
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Quichua Chimborazo Bible Revision 2010 © United Bible Societies, 2010.