GÉNESIS 21
21
Isaac huacharishcami
1Mandaj Diosca pai nishca shinallatajmi Sara huarmitaca ricuj shamurca. Mandaj Diosca pai cusha nishpa ari nishca shinallatajmi pajtachirca. 2Saraca paipaj cusa Abraham yuyaj cai pachapi chichushpami shuj c'ari huahuata huacharca. Chai huahuaca Taita Dios cusha nishca huata pajtajpimi huacharirca. 3Abrahamca paipaj huarmi Sara huachashca huahuataca, Isaactami shutichirca. 4Abrahamca paipaj churi Isaactaca Taita Dios mandashca shinallatajmi huacharishcamanta pusaj punllapi circuncisionta rurarca. 5Abrahamca paipaj churi Isaac huacharinapajca patsaj huatayujmi carca. 6Sara huarmica cashnami nirirca: “Taita Diosmari ñucataca asichin. Ñuca huahuayuj tucushcata pipish uyajcunaca cushicushpami ñucahuan asingacuna. 7Abrahamtaca pitaj Saraca huahuayuj tucushpa huahuata chuchuchingamari ninman carcari. Pai ña yuyaj cajpipish paipaj shuj huahuatamari huachani” nircami.
Agartapish, Ismaeltapish Abraham llujshichishpa cachashcami
8Huahua Isaac huiñajpica, chuchucushcamanta raquircami. Isaacta chuchumanta raqui punllami Abrahamca sumaj micuita rurarca. 9Egiptomanta caj Agarpi charishca Abrahampaj churi Ismaeltaca, Saraca paipaj churi Isaacta imatapish nishpa p'iñachicujlla cashcatami ricurca. 10Chaimi Saraca, Abrahamtaca: “Ñucanchijpajta ruraj huarmitaca paipaj churindij caimanta llujshichishpa cachai. Ñucanchijpajta ruraj huarmipaj churica, ñuca churi Isaac-huanca imata mana japingachu” nirca. 11Sara chashna nishcaca Abrahamtaca Ismaelpish paipaj quiquin churillataj cashcamantami paitaca jatunta llaquichirca. 12Chaimi Taita Diosca, Abrahamtaca: “Chai churimantapish, cambajta ruraj huarmimantapish ama yalli llaquirichu. Cambaj huarmi Sara imallata nishcata rurailla. Isaacmanta mirarishcacunallami, cambaj huahua huahuacuna canga. 13Cambajta ruraj huarmipi huacharishca churipish, cambaj quiquin churi cashcamanta paimantapish jatun llajtatami rurasha” nirca.
14Abrahamca, cayandij tutamanta utcata jatarishpami Agarmanca tandatapish, capachu yacutapish apachishpa paipaj churi Ismaeltapish cushpaca ripailla caya minchacama nishpa cacharca. Chaimanta rishpaca Agarca Beerseba shuti shitashca pambapimi caiman chaiman puricurcalla. 15Agarca capachu yacu ña tucurijpimi, paipaj churitaca shuj yura ucupi sirichishpa, 16rishpaca arcohuan shitajpi caspi urmana shinapi tiyarigrirca. Paica: “Cai huambra huañujtaca mana ricusha ninichu” nishpa chaipi tiyacujpimi huambraca sinchita huacarca.
17Taita Diosca chai huambra caparijta uyarcami. Chaimi Taita Diospaj angelca Agartaca jahua pachamanta cayashpaca: “Agar, ¿imataj tucungui? Ama manchaichu, cambaj huahua caparijtaca Taita Diosca uyarcami. 18Jatari, cambaj churitaca maquimanta japishpa jatarichi. Ñucaca paimantaca jatun llajtatami rurasha” nirca.
19Taita Dios Agarpaj ñahuita pascajpi, shuj pugyu yacuta ricushpami, paica chaiman rishpa capachupi yacuta jundachishpa paipaj churiman ubyachirca. 20Chai huambraca Taita Dios paihuan cajpimi, shitashca pambapi huiñashpa chaipi causarca. Chai huambraca arcohuan shitanata alli yachajmi carca. 21Paica Parán shuti shitashca pambapimi causarca. Ismaeltaca paipaj mamami, egipcia huarmihuan cazarachirca.
Abrahamhuan Abimelechuan ari ninacushcami
22Chai punllacunallatajmi Abimelecca, paipaj soldadocunata mandaj Ficolndij Abrahampajman rishpaca:
–Taita Dios canhuan cajpi can tucui imata rurashcapish alli cashcatami ricunchij. 23Chaimanta cunanca ñucatapish, ñuca churitapish, ñuca nietotapish imata mana llaquichinata ari nipai. Ashtahuanpish ñuca cambaj ima shinami allita rurarcani, chai shinallataj canca ñucapajpish, can causacun cai llajtapajpish allita ruranata Mandaj Diospaj ñaupajpi ari nipai– nircami.
24Chaimi Abrahamca:
–Chashna rurashatajmi– nirca.
25Chashna nishpapish Abrahamca, Abimelecpajta rurajcuna shuj yacu pugyuta quichushcata yuyarishpami Abimelectaca rimarca. 26Chaimi Abimelecca:
–Pi chashna rurashcataca mana yachanichu. Canpish ñucamanca imata mana huillashcanguichu. Cunancama ñucaca chaitaca imata mana yachashcanichu– nirca.
27Chaipimi Abrahamca ovejacunata, vacacunata Abimelecman cushpa, mana p'iñanacushpalla causanata ishquindijtaj ari ninacurca. 28Chai q'uipaca Abrahamca, paipaj canlla ovejacunamanta canchis huarmi ovejacunata ch'icanchijpimi, 29Abimelecca Abrahamtaca:
–Can ch'icanchishca canchis ovejacunaca ¿imatataj ricuchin?– nirca.
30Chaimi Abrahamca:
–Cai canchis ovejacunataca, ñuca allashpa cai pugyuta surcushcata ricuchichunmi canmanca cuni– nirca.
31Mana p'iñanacushpalla causanata ishquindijtaj ari ninacushcamantami, chai pambataca Beersebata shutichircacuna.
32Mana p'iñanacushpalla causanataca Beersebapimi ari ninacurca. Chai q'uipaca Abimelecca, paipaj soldadocunata mandaj Ficolndij filisteocuna causacun quiquin llajtallamantaj tigrarcallami. 33Abrahamca Beerseba pambapi shuj tamarisco yurata tarpushpami, huiñaita causacuj Mandaj Taita Diosta chaipi mañaj carca. 34Abrahamca filisteocunapaj llajtapica uni huatacunatami causarca.
دیاریکراوەکانی ئێستا:
GÉNESIS 21: QCHI04
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Quichua Chimborazo Bible Revision 2010 © United Bible Societies, 2010.