GÉNESIS 19
19
Sodoma, Gomorra pueblocunata chingachishcami
1Chai ishqui angelcunaca ña tutayacuitami, Sodomaman chayarca. Lotca Sodomaman yaicuna pungullapimi tiyacurca. Paicunata ricushpami Lotca jatarishcahuan tupanaman rishpa paicunapaj ñaupajpi pambaman tupajta cumurishpaca, 2cashna nirca:
–Ñuca amitocunalla, cunan tutaca cancunapajta rurajpaj huasiman shamushpa chaipi samarichunmi rogapani. Cancunapaj chaquicunatapish chaipi maillanguichijllami. Cayaca utcata jatarishpa, cancuna maiman ricushca ñanllatataj ringuichijllami– nirca.
Shina nijpimi paicunaca: –Chaitaca mana rurai tucunchijchu. Cunan tutaca, cai ñanllapimi pacarishun– nirca.
3Shina nijpipish Lotca paicunata jacupaichij nicujllapimi, paicunaca Lotpaj huasiman rircacuna. Chaipica sumaj micuita rurashpa, levadura illajlla tandata cusashpa carajpimi micurcacuna.
4Ashtahuanpish paicuna manaraj dormij siririjpimi, chai pueblopi causaj tucui c'aricunaca huambracunamanta callarishpa yuyajcunacama, Lotpaj huasi muyundijta shayarircacuna. Paicunaca c'aricunapurallataj chayarinacujcunami carca. 5Chaimi Lottaca:
–Cunan tuta cambaj huasiman shamuj runacunaca ¿maipitaj? Paicunata llujshichi, ñucanchijca paicunahuanmi chayarinacushun ninchij– nishpa caparircacuna.
6Chaimi Lotca, paicunahuan rimangapaj llujshishpa, punguta alli huichcashpa shayarishpaca, 7cashna nirca:
–Huauquicunalla, chashna millaitaca ama ruraichijchu nishpami rogapani. 8Riquichij, ñucaca c'arihuan manaraj chayarinacushca ishqui ushushicunatami charini. Cancuna munashcata rurachunca, paicunatami canllaman llujshichigrini. Ashtahuanpish cai runacunaca ñuca cayajllapimari shamurcacuna. Paicunataca ama imata rurapaichijchu– nirca.
9Chaimi paicunaca:
–¡Chaimanta anchui! nishpaca cashna nircacuna: ¿Chai maimanta shamuj ñucanchijpurapi causacujllachu ñucanchijta mandasha nin imamí? Paitacarin caishujcunata yallimari llaquichishun– nishcahuanmi, Lottaca aisashpa shitashpa, punguta p'aquingapaj c'uchuyarcacuna. 10Chaimi Lotpaj huasipi puzacujcunaca paicunapaj maquita chutashpa Lotta huasiman yaicuchishpa pungutaca alli huichcarcacuna. 11Ashtahuanpish canllaman caj c'aricunataca huambracunatapish, yuyajcunatapish ñahui mana ricujcunatami rurarca. Chaimantami paicunaca pungu maipi cashcata mashcacushpalla shaicurcacuna.
12Chai q'uipami Lotpaj huasipi puzacujcunaca:
–Cambaj quiquin huasi ucupuracunaca ¿caipica ashtahuan tiyanchu? Cai pueblomantaca cambaj yernocunatapish, churicunatapish, ushushicunatapish, can imalla charishcacunatapish llujshichi. 13Cai pueblotaca chingachigrinchijmi. Cai pueblopi causajcuna yallitaj millaita rurashcata caparishpa huillashcami Mandaj Diospajman chayarca. Chaimi Mandaj Diosca cai pueblota chingachichun ñucanchijta cacharca– nircacunami.
14Chaimi Lot rishpaca, paipaj ushushicunahuan cazaranacunataca:
–¡Cai pueblopi causajcunataca, Mandaj Diosca chingachigrinmi. Chaimanta jatarichij caimanta llujshishpa jacuchij!– nirca.
Ashtahuanpish Lotpaj yernocunaca pugllacunllami yuyarcami. 15Ñalla pacarigrijpimi, chai angelcunaca Lottaca:
–Jatari, cai pueblopi causajcunata llaquichijpi paicunahuan ama chingaringapajca cambaj huarmitapish, cambaj ishqui ushushicunatapish pushashpa utca ri– nircacuna.
16Shina nijpipish, Lotca mana utca llujshircachu. Mandaj Dios Lotta llaquishpa chai pueblomanta llujshichinaman cachashcamantami chai angelcunaca Lottapish, paipaj huarmitapish, ishqui ushushicunatapish maquimanta aisashpa chai pueblomanta llujshichishpa canllaman churarca. 17Pueblomanta ña canllaman cajpica chai angelcunaca:
–Cancunapaj causaita quishpichingapajca callpashpa richij. Ama huashaman tigrashpa ricunguichij. Cai pambacunapipish maipi ama pararishpa, urcupi miticunaman utca callpashpa richij. Mana chashna rurashpaca chingachishcami canguichij– nircami.
18Shina nijpi Lotca:
–Ñuca amitocunalla, maitataj chashnaca ninguichijyari. Ashtahuanpish ñucaca caitami rogasha nini. 19Cancunapajta ruraj ñucaca cancunapaj ñahuipi alli ricurijpimari ñucataca achcata c'uyashpa huañunallapi cajpi quishpichingapaj shamushcanguichij. Shina cajpipish chai urcupi miticugrinamanca mana ri tucushaca. Chai urcuman manaraj chayajpi jatunta llaquichicui japijpica huañushamari. 20Cai chainijllapimari shuj uchilla pueblo tiyan. Chai pueblotaca manapishchari imata ruranguichij. ¿Manachu chai pueblollapi miticugri tucuni?– nirca.
21Shina nijpi chaicunamanta shujca:
–Can mañashcata uyashcamanta, chai pueblotaca mana chingachishachu. 22Shinashpaca utca rishpa, chaipi miticugri. Chaiman chayangacama imata mana rurashachu– nirca.
Chai puebloca uchilla cashcamantami, Zoar shuti carca.
23Zoarman Lot ña chayajpica, inti llujshircallami. 24Chai q'uipami Mandaj Diosca Sodoma, Gomorra pueblocunapica azufrehuan rupacuj ninata jahua pachamanta tamyachirca. 25Chai pueblocunataca tucui chai c'uchulla pambacunandij, chai pueblocunapi causajcunandij, chai llajta granocunandijmi tucuita chingachirca. 26Lotpaj huarmica huashaman tigralla ricushcamantami jatun cachi rumi tucushpa saquirirca.
27Abrahamca cayandij tutamantaca, Mandaj Dioshuan maipi cashcallamantajmi rirca. 28Sodoma, Gomorra pueblocunata, tucui chai pambacunata asomashpa ricunapajca, chai pambamantaca hornomanta llujshicuj cushni shina achca cushni llujshicujtami ricurca. 29Chai pueblota chashna chingachigrishpaca, Taita Diosca Abraham mañashcata yuyarishpami Lottaca chai pambapi tiyaj pueblocunata chingachigrishca chaupimanta llujshichirca.
Moabitacunapish amonitacunapish ima shinalla callarishcami
30Ashtahuanpish Lotca, Zoarpi causanata manchashcamantami, paipaj ishqui ushushicunandij urcupi causanaman rirca. Chaipica shuj jutcupimi quimsandijtaj causarcacuna. 31Chaipimi Lotpaj punta ushushica, q'uipa ushushitaca:
–Ñucanchij yayaca ñamari yuyaj. Tucui cai llajtapi causajcuna shinallataj quiquin aillupuralla ñucanchijhuan cazaranapajca caipica c'aricunaca manamari tiyanchu. 32Chaimanta cunanca ñucanchij yayaman vinota ubyachishpa machachishpa paihuan dormishpa huahuacunayuj tucushun. Chashna rurajllapimi ñucanchij yayapaj huahua huahuacunaca mana chingaringa– nircami.
33Chai tutallatajmi vinota ubyachishpa machachishpaca, punta ushushiraj paipaj yayahuan dormirca. Lotca paipaj ushushi paihuan siririshcatapish, jatarishpa rishcatapish mana yacharcachu. 34Chai cayandij punllami punta ushushica, q'uipa ushushitaca:
–Ñucaca caina tutaca ñucanchij yayahuanmi dormircani. Cunan tutaca can dormingui. Cunanpish vinota ubyachishpa machachishun. Chashna rurashpa huahuacunayuj tucujllapimi, ñucanchij yayapaj huahua huahuacunaca mana chingaringa– nircami.
35Shina nishpa paicunapaj yayaman vinota ubyachishpa machachishpaca, chai tutaca q'uipa ushushimi yayahuan dormirca. Lotca, q'uipa ushushi paihuan siririshcatapish, jatarishpa rishcatapish mana yacharcachu. 36Lotpaj ishqui ushushicunaca, paicunapaj quiquin yayapajllatatajmi chichurcacuna. 37Punta ushushica shuj c'ari huahuatami huacharca. Chai huahuataca Moabtami shutichirca. Paimi moabitacunapaj punta yayaca. 38Shinallataj q'uipa ushushipish, shuj c'ari huahuata huachashpaca, Ben-ammi shutitami shutichirca. Paimi amonitacunapaj punta yayaca.
دیاریکراوەکانی ئێستا:
GÉNESIS 19: QCHI04
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Quichua Chimborazo Bible Revision 2010 © United Bible Societies, 2010.