GÉNESIS 17
17
Circuncisionta rurachishcaca Dioshuan ari ninacushcata ricuchijmi
1Abram ña iscun chunga iscun huatayuj cajpimi, Mandaj Diosca paiman ricurishpaca:
–Ñucaca tucuita rurai tucuj Diosmi cani. Ñuca ñaupajpi puri. Ima pandata ama rurai. 2Canhuanca shuj ruranatami rurasha. Canmantaca achcatami mirachisha. Yallitajmi mirachisha– nirca.
3Chaimi Abramca cungurishpa pambaman tupajta cumurijpi, Taita Diosca cashnapish nircaraj:
4–Ñuca canman imata ari nishcaca caimi: Canca achcacunapaj yayami tucungui. 5Cunanca ña mana Abramchu cangui. Ashtahuanpish cantaca achcacunapaj yaya tucuchun churashcamanta Abrahammi cangui. 6Canmantaca achcatami mirachisha. Yallitajmi mirachisha. Canmantami achca llajtacuna tucunga. Llajtacunata jatun mandajcunapish canmantami llujshinga. 7Canhuanca shuj ruranatami rurasha. Cambaj huahua huahuacunahuanpish, paicunapaj huahua huahuacunahuanpish huiñaita ruracushallami. Cambajpish, cambaj huahua huahuacunapajpish, paicunapaj huahua huahuacunapajpish huiñaipaj Taita Dios cangapajmi chashna rurasha. 8Canmanpish, cambaj huahua huahuacunamanpishmi cunan can maillata causashpa puricun tucui Canaan llajtataca huiñaipaj cusha. Ñucaca paicunapaj Taita Diosmi casha– nircami.
9Abrahamtaca Taita Diosca cutinmi cashna nirca:
–Ñuca canhuan ari ninacushcataca canpish, cambaj huahua huahuacunapish, paicunapaj huahua huahuacunapish pajtachicuchunlla. 10Ñucahuan canhuan, cambaj huahua huahuacunahuan, paicunapaj huahua huahuacunahuan ari ninacushcata ruranaca caimi: Cancunapurapi caj c'aricunaca tucuicunami circuncisionta rurana canguichij. 11Tucuicunami cancuna charishca aicha carata p'itina canguichij. Ñucahuan cancunahuan ari ninacushcata pajtachina cashcata ricuchijca chaimi canga. 12Cancunapurapi huacharij c'ari huahuacunataca huacharishcamanta pusaj punllapimi tucuicunata chai circuncisionta rurana canguichij. Chaitaca huahua huahua ruracuchunlla. Shujtaj llajtamanta cajcunata cullquihuan cancuna randishcacunapurapi cancunapaj huasipi huacharijpipish tucuicunatami chashnallataj rurana canguichij. 13Cancunapaj huasipi huacharishcacunaca, cancunapaj huahuacuna cashpapish, shujtaj llajtamanta cajcunata randishcacunapaj huahuacunata cashpapish circuncisionta rurachishcami cana can. Cancuna chashna cancunapaj aichapi rurachishcami ñucahuan cancunahuan huiñaipaj ruranata ari nishcata pajtachinataj cashcataca ricuchinga. 14Maijan cashpapish pai charishca aicha mirga carata mana p'itichijca, ñucahuan ari ninacushcata p'aquishcamanta cancunapuramanta anchuchishca cachun– nircami.
15Taita Diosca Abrahamtaca cashnapishmi nirca:
–Cambaj huarmitaca ña ama Sarai ningui. Ashtahuanpish cunamanta paipaj shutica Sarami canga. 16Paitaca ñucami ashtahuan alli cashca cachun nisha. Paimantami canmanpish shuj c'ari huahuata cusha. Paica achca llajtacunapaj mamami tucunga. Llajtacunata jatun mandajcunapish paimantami huacharinga– nircami.
17Chaimi Abrahamca pambaman tupajta cumurishpa paipaj shungupi asishpa: “Ña patsaj huatayuj yuyaj runaca ¿maitataj huahuayuj tucungari? Sarapish iscun chunga huatayuj huarmica ¿chichungachari?” nirca. 18Abrahamca Taita Diostaca:
–Ñuca churi Ismael, quiquinpaj ñaupajpi causangapishchari– nircami.
19Chaimi Taita Diosca: Cambaj huarmi Saramari shuj c'ari huahuata huachanga. Paitaca Isaacta shutichingui. Ñuca ari nishcataca paipi sinchita callarichishpami, paipaj huahua huahuacunahuanpish, paicunapaj huahua huahuacunahuanpish huiñaipaj pajtachicushalla. 20Ismaelmanta can mañashcatapish uyanimi. Paitapish alli cashca cachun nishami. Huahuacunayuj tucushpa, alli huiñachishpa yallitaj achcata mirarichunmi churasha. Paimantaca chunga ishqui mandajcunami llujshinga. Chashnami paimantaca jatun llajtata rurasha. 21Ñuca ari nishpa pajtachisha nishcataca shamuj huata cai punllacuna shinallapitajmi, Sara huachashca Isaachuan callarichisha– nircami. 22Taita Diosca Abrahamhuan ña tucui parlanacushpaca rircallami.
23Abrahamca chai punllallatajmi Taita Dios mandashca shinallataj paipaj churi Ismaeltapish, paipaj huasipi huacharishca paipajta rurajcunatapish, paipajta rurachun cullquihuan randishcacunatapish tucui c'aricunata paicuna charishca aicha mirga carata p'itirca. 24Abrahamca pai charishca aicha mirga carata p'itinapajca iscun chunga iscun huatayujmi carca. 25Paipaj churi Ismaelca, pai charishca aicha mirga carata p'itinapajca chunga quimsa huatayujmi carca. 26Abrahamtapish, paipaj churi Ismaeltapish chai punllallatajmi circuncisionta rurarca. 27Paipaj huasipi huacharishca paipajta rurajcunatapish, paipajta rurachun cullquihuan shujtaj llajtamanta randishcacunatapish, tucui c'aricunatami Abrahamhuan chai punllallataj circuncisionta rurarcacuna.
دیاریکراوەکانی ئێستا:
GÉNESIS 17: QCHI04
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Quichua Chimborazo Bible Revision 2010 © United Bible Societies, 2010.