GÉNESIS 14
14
Lotta prezu apacujpi cacharichishcami
1Sinar llajtata jatun mandaj Amrafel, Elasar llajtata jatun mandaj Arioc, Elam llajtata jatun mandaj Quedorlaomer, Goim llajtata jatun mandaj Tidal mandacui punllacunaca, 2paicunami Sodoma pueblota jatun mandaj Berahuan, Gomorra pueblota jatun mandaj Birsahuan, Adma pueblota jatun mandaj Sinabhuan, Zeboim pueblota jatun mandaj Semeberhuan, Bela nishca Zoar pueblota jatun mandajhuan macanacungapaj jatarishpa macanacurcacuna. 3Tucui chai mandajcunami Sidim pugru pambapi tandanacurca. Chai pugruca cunanca Cachisapa Cuchami. 4Chai pichca mandajcunaca chunga ishqui huatatami, Quedorlaomerpajta rurashpa causarcacuna. Ña chunga quimsa huatapica, Quedorlaomerta c'ariyashpami jatarircacuna. 5Chunga chuscu huatapica, jatun mandaj Quedorlaomerca paihuan shuj shinalla caj jatun mandajcunahuan tucushpami, Astarot Karnaim puebloman rishpa, refaitacunahuan macanacushpa misharca. Chai q'uipaca Ham pueblopi causaj zuzitacunatapish, Save-quiriataimpi causaj emitacunatapishmi misharca. 6Seir urcupi causaj horeocunatapish, shitashca pamba c'uchupi caj Parán shuti pambacamami misharca. 7Chaimanta tigracushpaca, En-mispat nishca Cades pueblomanmi chayarcacuna. Chai llajtapi causaj amalecitacunatapish tucuitami chingachircacuna. Hazezon-tamarpi causaj amorreocunatapish chashnallatajmi chingachircacuna.
8Chaimi Sodomata, Gomorrata, Admata, Zeboimta, Bela nishca Zoarta jatun mandajcunaca paicunahuan macanacungapaj llujshishpa Sidim pugru pambapi macanacurcacuna. 9Chai pichca jatun mandajcunaca Elam llajtata jatun mandaj Quedorlaomerhuan, Goim llajtata jatun mandaj Tidalhuan, Sinar llajtata jatun mandaj Amrafelhuan, Elasar llajtata jatun mandaj Ariochuanmi macanacurcacuna. Pichca jatun mandajcunami, chuscu jatun mandajcunahuan macanacurcacuna.
10Sidim pugru pambapica brea llujshicuj achca jutcucunami tiyarca. Sodomata jatun mandajpish, Gomorrata jatun mandajpish, chai macanacuimanta miticushpa callpacushpaca chai jutcucunapimi huashicurcacuna. Caishuj mandajcunaca urcupi miticungapajmi callparcacuna.
11Macanacuita mishajcunaca Sodomapi, Gomorrapi tiyashca achca charinacunatapish, granocunatapish tucuita apashpami rircacuna. 12Abrampaj huauquipaj churi Lotpish, Sodomapi causacushcamantami, paitapish pai imalla charishcacunandij tucuita aparcacuna. 13Macanacuimanta quishpirishpa rij shuj runami hebreo Abrammanca huillagrirca. Abramca amorreocunapura caj Mamre runapaj encina yuracuna tiyan allpapimi causacurca. Mamre runaca Escol, Aner runacunapaj huauquimi carca. Paicunaca Abramhuan shuj yuyailla tucushpa imatapish rurajcunami carca.
14Abramca paipaj familia Lotta prezu apashcata uyashpami, paipaj huasipi huacharishca paipajta rurajcunapuramanta 318 runacunata tandachishpa, prezu apajcunataca Dan pueblocama catishpa rirca. 15Chaipica Abrampish paipajta rurajcunapish paicunataca tuta paicuna imata mana yuyashcapi ñapish japishpami, Damasco pueblo jananij Hoba pueblocama llaquinayajta callpachircacuna. 16Chashnami chai mandajcuna imallata quichushpa apacushcataca imalla charishcacunata, paipaj sobrino Lotta, pai imalla charishcacunata, huarmicunata, gentecunatapish quichushpa tigrachimurca.
Abramta Melquisedec alli cashca cachun nishcami
17Quedorlaomertapish, paihuan caj jatun mandajcunatapish Abram mishashpa tigracujpica, Sodomata jatun mandajmi Save pugru pambapi tupanaman llujshirca. Chai pamballatatajmi, Jatun Mandajpaj Pugru Pamba nincuna. 18Chaipica Salem pueblota jatun mandaj Melquisedec, jahua pachapi causaj Taita Diospajta ruraj curami tandatapish, vinotapish apamurca. 19Paimi Abramtaca:
“Abram, cantaca jahua pacha Taita Dios alli nishca cachun.
Jahua pachatapish, cai pachatapish ruraj Taita Dios alli nishca cachun.
20Canta p'iñajcunata cambaj maquipi churaj Taita Diostaca alli nishca cachun” nirca.
Abramca macanacuipi imallata quichumushcataca, cada chungamanta shujtami Melquisedecman curca.
21Sodomata jatun mandajpish Abramtaca:
–Charinacunataca can japilla. Gentecunallata ñucaman tigrachi– nircami.
22Shina nijpimi Abramca Sodomata jatun mandajtaca: Jahua pachatapish, cai pachatapish ruraj jahua pacha Mandaj Taita Diospaj ñaupajpimi, 23ñucaca tucui imalla cambaj cashcacunataca mirga puchcallatapish, pargateta huatarinallatapish mana japishachu nircani. Abramtaca: “Ñucami charijyachircani nishpa can ninamantami chashna nircani” nirca. 24Ñucapajta rurajcuna micushcacunallatami mana tigrachi tucuni. Shina cajpipish ñucahuan rij Aner, Escol, Mamre runacunallami paicuna japina cashcataca japingacuna– nircami.
دیاریکراوەکانی ئێستا:
GÉNESIS 14: QCHI04
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Quichua Chimborazo Bible Revision 2010 © United Bible Societies, 2010.