GÉNESIS 12
12
Abramta cayashcami
1Mandaj Diosca, Abramtaca: “Can maipi causana llajtataca ñucami ricuchisha. Cunanca can causacun llajtatapish, cambaj huasi ucupuracunatapish, cambaj yayapaj huasi ucupuracunatapish saquishpa rilla. 2Canmantaca shuj jatun llajtatami rurasha. Cambaj shutitaca alli nishca cachun, jatun nishca cachunmi churasha. Canmantami tucui shujtajcunapish alli nishca cangacuna. 3Canta c'uyajcunataca c'uyashami. Canta p'iñajcunataca p'iñashami. Cai pachapi tucui causajcunaca canmantami alli nishca cangacuna” nircami.
4Abramca Mandaj Dios nishca shinallataj rircallami. Lot runapish paihuanmi rirca. Abramca Haranmanta llujshinapajca, canchis chunga pichca huatayujmi carca. 5Abramca paipaj huarmi Saraita, paipaj huauquipaj churi Lotta, paipajta rurajcuna cachun Haranpi randishca runacunata pushashpa, pai trabajashpa imallata charishcacunataca tucuita apashpami Canaanman rirca. Canaanman chayashpaca, 6Abramca tucui chai llajtata rishpami, Siquempi caj More shuti pambapi caj encina yura c'uchuman chayarca. Chai llajtapica cananeocunami causarca. 7Chaipimi Mandaj Diosca, Abramman ricurishpaca: “Cambaj huahua huahuacunamanca cai llajtatami cusha” nirca.
Chaipimi Abramca, paiman ricurij Mandaj Diospaj shuj altarta rurarca. 8Chaimanta rishpaca Bet-elmanta inti llujshin ladoman caj shuj urcuman rishpami, paipaj carpa huasita chaipi shayachishpa tiyarirca. Pai tiyacunmantaca Bet-elca inti huashicun ladomanmi carca. Hai puebloca inti llujshin ladomanmi carca. Chaipipish Mandaj Diospaj shuj altarta rurashpami, Mandaj Diospaj shutipi mañarca. 9Abramca chaimanta rishpaca, asha asha caipi chaipi causashpami Neguevman chayarca.
Egiptopi Abram cashcami
10Chai llajtacunapica achca yaricaimi tiyarca. Achca yaricai tiyajpimi, Abramca Egiptopi causangapaj chaiman uriyarca. 11Abramca Egiptoman ñalla chayagricushpami, paipaj huarmi Saraitaca: “Canca sumaj ñahui huarmimari cangui. 12Egipciocuna canta ricushpaca: Chai huarmica chai runapaj huarmimari yuyachin ningacunami. Chashna nishpaca ñucataca huañuchingami. Ashtahuanpish canhuan saquiringapaj cantaca mana huañuchingacunachu. 13Canmanta ñucapaj alli llujshichunca canca: Ñucapajca ñuca panilla cashcata huillangui. Chashna ñucapaj allita rurajpimi, ñucaca mana huañusha” nircami.
14Egiptoman Abram yaicujpica, Abram nishca shinallatajmi egipciocunaca Saraitaca sumaj huarmi cajta ricurcacuna. 15Faraón churashca mandajcuna ricushpapish chai huarmica sumaj huarmimari nishpa Faraonman huillashpami, Sarai huarmitaca, faraón mandashpa tiyana huasiman pusharcacuna. 16Faraonca Sarai huarmimantami Abrampaj allita rurashpa ovejacunata, vacacunata, burrocunata, camellocunata curca. Abrampajta ruraj cachunpish c'aricunata, huarmicunatami curca.
17Shina cajpipish Mandaj Diosca, Abrampaj huarmi Saraita faraón chashna apashcaca mana pai munashca cajpimi paica faraontapish, paipaj huasipi causajcunatapish jatun llaquicunahuan llaquichirca. 18Chaimi faraonca Abramta cayachishpaca: “Canca ñucahuanca ¿imatataj rurashcanguichu imamí? ¿Ima nishpataj cambaj huarmi cashcataca mana huillarcangui? 19Ima nishpataj: Ñuca panillami nircangui. Ñuca huarmi cachun ñuca japishca cajpica, ima shinataj canman carca. Cunanca caipimi cambaj huarmi, paita pushashpa caimanta ri” nirca. 20Chashna nishcahuanmi Faraonca paipaj gentecunataca: “Abramtaca paipaj huarmindij, tucui imalla charishcacunandij cai llajtamanta llujshichishpa cachaichij” nishpa mandarca.
دیاریکراوەکانی ئێستا:
GÉNESIS 12: QCHI04
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Quichua Chimborazo Bible Revision 2010 © United Bible Societies, 2010.