Lúkkë 7
7
Ngémí kélfíi soldaara
(Saame Maccëe 8.5-13)
1Wocaˈ Yéesú woni ɓëewë iña ri fahaˈ waa won ra ɓéeɓ, ɗi kolohte saañce Kafarnawum. 2Daaha, lahte kélfë soldaari lahte súrgíi ri foŋkote ri níi foŋko. Súrgëe antee jér níi na ŋaatoh. 3Kelaˈ kélfëe ban fi Yéesú rë, ɗi wolte i ɓaha yëwúɗ ɗii na, woni biti ɗi ac sëmlëˈ súrgíi kúl kë. 4Lahuu wa Yéesú në rë, wa caguute ri na ɗagu wonu tih : « Ɓëeˈ wol fun ɗoo na ra cal habraˈ, 5ndée ɗi fahaˈte yen fi yëwúɗɗë, te daa ri taɓahroh tígë na ɗaguu ɓëy gina Koope ra. »
6Yéesú kolohte ñéerëˈté a wa. Leɓuu wa faam fa ra, kélfíi soldaara wolte i kooƴ ɗii na, lah wa woniɗ ri unni ƴeh : « Ɓahaa, ngana mokil afu, mi caleh fu haale faam soˈ ; 7daa tah mi habaˈ biti mi ƴinte caŋi fíyú. Wone un yínë kut, súrgíi sëˈ ay wah. 8Fu ot mi won ɗo ri, biti soˈ mi bee mi lahte kélfë yí daa paaˈuu soˈ sun, te mi kélfë i soldaar ɓal. Mi won ow yínë waa na gété rëe, ɗi saañ. Mi won ow kay aye raa, ɗi ac. Te mi won súrgíi sëˈ page yii bee raa ɓal, ɗi paŋ yaa. » 9Kelaˈ Yéesú unni kélfíi soldaara ra, ɗi éempé woni. Ɗi yíssëhté dúukëlí ɓëewë ñeyu tali ra na, won wa tih : « Mee ron won ra ee : mi ëllëy ɓëyí gémëˈté ɗeh ! Tali Israyel sah, mi ëllëy mani na. » 10Nimiluu kooƴƴa wolu ra faam kélfëe rë, wa ɗeefu súrgëe wahte.
Ɓelaa koohi këllú ɓúudé rë
11Filoon fi baaha, Yéesú kolohte na saañ gin-taaha na wonuu Nayin ra, taalibe yi a i ow caak ñéerúuté a ri. 12Leɓaˈ ri haalaani gina ra, lahte ɓúudé fí na kúrú hacaa yin. Húldë húmú koy yínë yaafi na ; ɗi fi yaafa ƴaala húlté. I ow caak di ɓëy gina na ɓedu yaafa. 13Olaˈ ɗi fi Yíkëe ɓelaa ra, keeña ɗúmpé ɗii na, ɗi won ɗi tih : « Yeɗɗe looya. » 14Ɗi antee leɓoh, tíkké yaˈ yi jaada, ɓëewë kúrú ɓúudé fë rë cagute. Ɗi won ɓúudé fë tih : « Kolee ƴaal kowa ! Daa mi túuƴ ɗë rí ! » 15Húldë yíppée koloh, tookke na won. Yéesú won yaafa tih : « Koohu abeh ! » 16Ɓëewë ɓéeɓ tíitúté níi tíit, wa na kañu Koope wonu tih : « Yonente gaan acce yen na ; Koope acce sëmlëˈí ɓëewí. » 17Ɓëy Yúdée a ɓëy deyi baa ɓéeɓ keluute yee paŋ Yéesú rë.
Yee won Yéesú sun fi Saŋ Batis ra
(Saame Maccëe 11.2-19)
18 Taalibe yi Saŋ ɓíllúté kélfíi wë iña na paŋ Yéesú rë ɓéeɓ. Tígí daaha, Saŋ dëekké ow ana waa na, 19wolte wa ɗi fi Yíkëe në, meeli nda daa ri Sëmlëhë në séentúu rë mbée ɓëewë waɗti sehun ow kay. 20Lahuu taalibe yi Saŋ Yéesú në rë, wa wonu ri tih : « Saŋ Batis daa wol fun meelu nda daa fu Sëmlëhë në séentúu rë mbée ɓëewë waɗti sehun ow kay ? »
21Guuttaa baaha, Yéesú paƴce na ow caak : i jéríɗ, i misikiɗ, ɓëewí lahuu yébítëh, a i búumíɗ. 22Ɗi antee won taalibe yi Saŋ tih : « Nímílí Saŋ na ɗon ɓílíɗ rí iña olu ron a ƴee keluu ron ra. Wëní rí biti búumíɗɗë yeelute, lëfëñíɗɗë koluute, guuñiɗɗa wahute#7.22 guuñiɗɗa wahute : Di gerek, bíníyú ɗeh : guuñiɗɗa ladute., likiɗɗa ee keluu ra, ɓëewë húlú rë këllúté ɓúudé, ñëkíɗɗë keluute Uni Neba. 23Ɓëyí af iñi soˈ taheh ɗi yeris ngémí, ɓëyí baa lahte sos-keeñ. »
24Bi na suu ɓëewë húmú wolu ɗii na ra, Yéesú yampe na goneel a dúukëlí ɓëewë yii leŋke Saŋ Batis na, meelte wa won tih : « Ɗon húmú payu olsoh yi luufa ? Tal bëhëerí ngilaaw ma na jaay ri neh maan ? 25Kon ɗon húmú payu olsoh yih ? Ɓëyí ɓekoh búuɓɓí wunte neh maan ? Yíkëe yí búuɓɓí wunna na pesu pesi neɓpe ra oluu faam buur. 26Mantee, ɗon húmú payu olsoh yi luufa ? Yonente neh a ? Mee ron won ra biti ɗi yonente kaah ; ɗi luk sah yonente gaan ! 27Daa ri ɓëeˈ në wonaˈ Koope Téerëe rë bitih : “Olsee ! May wol ow këllëh ɗaɗɗi ro waal.”#Saame Malasi 3.1 » 28Yéesú ɓaatte won tih : « Mee ron won ra ee : lahay ɓëyí límúté feey fi beh te luk Saŋ Batis gaan. Añcaŋ ɓëeˈ lukki ƴin Nguur ki Koope ra luk ɗii gaan. »
29Ɓëewë ɓéeɓ níi lukaˈ yeekoh yi túmë húmú síkírúu Saŋ níi rí bëtíssé wë rë tahute biti Koope júɓpé. 30Ndaa fariseŋŋa a yëeddëh yí kootii Mëyíis tahuy yee fahaˈ Koope ra, wa húmú kaaˈuute biti Saŋ bëtís wë.
31Yéesú ɓaatilte won tih : « May mínée mëldëˈ ɓëy jamanii bee a yih ? Wa maduu a yih ? 32Wa maduu a tuŋki tooku këem, ƴee na wonu affi ƴee tih : “Fun poosute, ɗon becuy ! Fun fogute, ɗon hílípúy fun !” 33Húmú ayaˈ Saŋ Batis kaaˈaˈte ñam a han ra, ɗon wonu ɗi lahaˈ yébítëh. 34Ayaˈ soˈ mi Koy-ɓëeˈ, mi na ñam maa han ra, ɗon wonu tih : “Ëlí ! Ɓëyí bee ñam a han kut daa afa, te ɗi kooƴaˈ yeekoh yi túmë a i bakaaroh kay.” 35Añcaŋ ɓëewë ñeyu Unni Koope ra ɓéeɓ olute biti waalli júɓpé. »
Yéesú a ɓelii bakaaroha
36Húmú lahte fariseŋi hínú Simoŋ dëekké Yéesú ñam faami. Yéesú saañce faam fin, lahte wa na ñamu. 37Gini baaha, húmú lahte ɓelii ɓosse pesaɗ. Kelaˈ ri biti Yéesú ín ñam faam fariseŋa ra, ɗi kúɗté bútlí yotuu laˈa na wonuu albataar ra, bi líiffé a laakkoloñi neɓpe, 38hompe kotti Yéesú na looy, muun mi na hilsiɗ kotta. Ɗi antee ɓeɓ fen fi moosse wa, fëenté#7.38 Fëenë fëen ɓelaa kotti Yéesú rë teeɓaˈ biti ri yeɗte Yéesú cér. wë, túmpé wë laakkoloña.
39Olaˈ fariseŋa dëek Yéesú faami ra yii bah, ɗi won nufi tih : « Ɓëyí bee hena yonente koon, tin ri ay yúh ɓelaa leɓ ɗii na bee ra a pesadi ɓosa homaˈ ɗi ra. » 40Yéesú won fariseŋa tígí daaha tih : « Simoŋ, mi lahte yii nay mi roo wone. » Simoŋ won ɗi tih : « Wone mi keloh ɓahaa. » 41Yéesú won ɗi tih : « Lahte ɓëewí ana yi húmú lahrute ɓëyí në wëtɗëˈ kabut. Ɓëyí yínëe lahiɗte ri kabut caak, ƴi yínëe luk ƴaaha sabboo. 42Bi ow yínë waa na sah mínéh ríi yíníl kabut ka, ɗi baalte wa ɓéeɓ ana. Tígí daaha, fu habaˈ biti ɓëyí bi di wa fi ƴaaha nay lukee fahaˈ ɓëeˈ wëtɗëˈ rë ? » 43Simoŋ won ri tih : « Mi habaˈ ri ɓëeˈ kabut ki lukki caak ra. » Yéesú won ɗi tih : « Fu won kaah. »
44Ɗi antee yíssëh ɓelaa na, won Simoŋ tih : « Ole yee paŋ ɓelii bee ra ! Haalaˈ mi faamu, fu onay soˈ muluɓ hosaa kot ; ndaa ɓelaa hosse kotti soˈ a muun mi, moosse wa a fen fi. 45Fu fëenëy sëˈ na wodoh fu soˈ ra ; ndaa haalaˈ mi dee níinén, ɓelaa yeɗɗay fëení kotti soˈ. 46Fu túmëy díw af soˈ sah ; ndaa ɓelaa baaɓpe laakkoloñ kotti soˈ. 47Daa tah mi won ɗon tih : ɗee fahaˈ soˈ ri níi fahaˈ ra daa teeɓaˈ biti ri baalute bakaaɗɗi caakki ; ndaa ɓëeˈ baalu bakaaɗ ƴutuuɗ ɗa, fahaˈi na gaaneh. »
48Yéesú antee won ɓelaa tih : « Fu baalute bakaaɗɗu. » 49Ɓëewë ɓani wa húmú loona ra wonantuu hanndal ki wa tih : « Ɓëyée daa wa níi na kaañ baalaˈ bakaaɗ ? » 50Ndaa Yéesú won ɓelaa tih : « Ngémú sëmlëˈté rë ; kolee fu saañ a jaamma. »
دیاریکراوەکانی ئێستا:
Lúkkë 7: NDV
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© (Active), Wycliffe Bible Translators, Inc. All rights reserved.