Saŋ 21
21
Kimtaani mbaala líif jén ɗë
1Filoon fi baaha, Yéesú feeñiyaatte taalibe yi ɓúk laahi Tiberiyat#21.1 laahi Tiberiyat : non tii ya na dëekúu laahi Galile ra.. Ɗi feeñiyaꞌ wa ɗeh : 2Simoŋ Peer a Toomaa fa na dëekúu Síisë rë daa húmú, a Natanayel fi ɓëy Kanaa di Galile, a koyyi Sebede, a taalibe yi Yéesú ana kay. 3Simoŋ Peer won wa tih : « Mee saañ seeɓ ɗa. » Wa wonu ri tih : « Caa fun ñéerëꞌ a ro fun ɓal. » Tígí daaha, wa ñéerúuté haalute gaala. Ndaa elgi baaha ɓéeɓ wa habuy yin.
4Yíilëꞌ Koo ra, Yéesú acce caŋke ɓúk laaha, ndaa taalibe ya yíihsíih rí. 5Ɗi won taalibe ya tih : « Ɗon habute jén saa yaawe ? » Wa wonu ri tih : « Fun habuy yin. » 6Ɗi won wa tih : « Yéesí mbaala hatna paaꞌ yaꞌ ñamaa di gaala ra, ɗon ay ham. » Tígí daaha, wa yeesute mbaala. Mbaala hampe jén, líif líifë níi wa míníh ríi ɗúhíɗ mulaa. 7Ow di taalibe ya, kooji Yéesú, won Peer tih : « Yaa Yíkëe ! » Kelaꞌ Simoŋ Peer uni bah, ɗi yíppée ɓekoh búubée ké rí húmú nís ɗí na seeɓ ɗi ra, yíppée haal mulaa. 8Taalibe yi kayya ayuu a gaala, na fasu mbaala líif jén ɗë. Wa húmú wuluuy ɓúk laaha, yee talluu wa ra waɗti hena jaak tíméer (100).
9Lahuu wa cépúté gaala ra, wa olute jén tíkúté sun kíi, mbúurú hompe hatni beh. 10Tígí daaha, Yéesú won wa tih : « Jénë ɗúhúu ron ham ɗa, kúrí i koy na deh. » 11Simoŋ Peer haalaatte gaala, fasse mbaala líif jén ɗë, ɗúhíɗté rí ëssë. Jénë ɓéeɓ hente koy tíméer a koy sabay iip a koy éeyë (153), te ɗee teem wa ra ɓéeɓ tahay mbaala ɗaɗ. 12Filoon fi baaha, Yéesú won wa tih : « Ëyí ɗon ñam ! » Ow yínë sah di taalibe ya kaañay rii meel daa ri wah, ndaa wa yúhúté biti yaa Yíkëe. 13Yéesú leɓohte, ɓeɓpe mbúurëe woraꞌte wa, ɗi ɓeɓpe jénë ɓal hente ɗaaha. 14Baa daa waali éeyë fë feeñiyoh Yéesú taalibe yi, këllúu rí ɓúudé rë.
Yéesú a Peer
15Ñamuu wa níi wocute ra, Yéesú meelte Simoŋ Peer won ɗi tih : « Simoŋ fi Saŋ, di fahaꞌ fu soꞌ luk di fahuu soꞌ ɓëewí ƴee a ? » Peer won ɗi tih : « Yíkëe, fu yúhté biti mi fahaꞌte ro. » Yéesú won ɗi tih : « Lah tooppitee harri soꞌ. » 16Yéesú meelaatte ri won tih : « Simoŋ fi Saŋ, fu fahaꞌte soꞌ a ? » Peer won ɗi tih : « Yíkëe, fu yúhté biti mi fahaꞌte ro kay ! » Yéesú won ɗi tih : « Lah níiré harri soꞌ. » 17Ɗi wonil ri waali éeyë fë tih : « Simoŋ fi Saŋ, fu fahaꞌte soꞌ a ? » Yee meelaꞌ ri Yéesú waali éeyë fë biti nda ri fahaꞌte ri ra, ɗúmëlté keeña. Ɗi loffe Yéesú won tih : « Yíkëe, fu yúh ɓéeɓ ! Kon fu yúhté biti mi fahaꞌte ro ! » Yéesú wonil ri tih : « Lah tooppitee harri soꞌ. 18Mee roo won kaaf ka ra ee : henaꞌ fu kúkëy rë, daa fu na húmú pokit afu geñuu, fu pay tígí neɓaꞌ ro ; ndaa tíl níi fu ɓaha raa, fay ɓéyíɗ yaꞌ yu, ow kay pokiɗ ɗo geñuu, kúɗ ɗë tígí fu fahaay naa pay. » 19(Unna won Yéesú ƴaa ra, ɗi hom teeɓaꞌi ɗee nay húlée Peer ra. Peer ay teeɓee ndami Koope ɗaaha.) Yéesú antee tík won ɗi tih : « Ñeye tal soꞌ. »
Yéesú a taalibee ɗi kooƴaꞌ ri ra
20Filoon fi baaha, Peer heeltohte, otte taalibee Yéesú kooƴaꞌ ri ra na ac filoon wa. Daa ri taalibee húmú sígím nuf Yéesú homuu wa ñama, meelte ɗi fi Yíkëe ɓëeꞌ nay rii yaaye ra. 21Olaꞌ Peer taalibee ra, ɗi meelte ɗi fi Yéesú won ɗi tih : « A ɗi fi bee nék Yíkëe ? » 22Yéesú won ɗi tih : « Mi fahaꞌ biti ɗi pes níi mi nimil raa, waal fu ƴaha yi na ? Fu lahaꞌ biti fu ñee tal soꞌ. » 23Yaa bah, wona líiwëlsëꞌté filiɓ fi ɓëewë gémú Yéesú në rë biti taalibii baa ii ñee húl. Añcaŋ, Yéesú wonay biti ri ii húl, ɗi won wono ndék tee : « Mi fahaꞌ biti ɗi pes níi mi nimil raa, waal fu ƴaha yi na ? »
24Ɗi fi taalibee sah-sah daa ɓílíɗ iñƴaa bíníté wë, te fun yúhúté biti iña won ɗi ra kaah.
25Yéesú paŋke i yin kay caak ƴi fu yéŋké biti ñeyun yínë-yínë bíníyú koon, mi lahte yaakaari biti téeré yë ii ɗam feey fi beh.
دیاریکراوەکانی ئێستا:
Saŋ 21: NDV
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© Wycliffe Bible Translators, Inc. All rights reserved.