Tílëdí apootarra 2
2
Cébí Ruuh-Peseŋ
1Lahaꞌ Pantakot ra, ɓëewë gémú Yéesú rë ɓéeɓ teeꞌluute tígë në teeꞌuu wa merees ra. 2Hom homo níi, wa keluute yodadi kolaꞌ sun man yodaɗ ngilaaw gaan nen, líiffé faam fa tooku wa ra del. 3Wahtii baaha, wa olute i yin ti pereem nen, madaꞌ kíi, haslaꞌte, bina-bina ɓéeɓ céppé ow fi ow waa na. 4Wa ɓéeɓ yípútée líif a Ruuh-Peseŋ, ow fi ow waa na ɓéeɓ a yee ɓeyaꞌ ri Ruuha ra, na won wonaɗ kay.
5Bín fë, ɗeef lahte yëwúɗɗí gémúté Koope níi gém, koluu ginna ëldúnë ɓéeɓ ayute dékúté Yerusalem. 6Keluu wa yodada ra, wa ayute caakute níi caak, teeꞌuute, éemúté níi éem ndah ow fi ow waa na ɓéeɓ na keluu ɓëewë gémú Yéesú rë na wonu wonaɗɗa ɓapu wa ra. 7Wa éemú éemë níi na wonu tih : « Ɓëewë në wonu ƴee ra, wa ɓéeɓ ɓëy Galile saa ɓal ? 8Kon henaꞌ ɗí níi ow fi ow yen na ɓéeɓ na keloh iña na wonu wa ra di wonada ɓap ɗi ra ? 9Te filiɓ fi yen, ƴee koluu ginni Parta ya, ƴee koluu Médí, Elam, Mesopotami, Yúdée, Kapados, Ponto a Aasi ; 10ƴee koluu Fírísí a Pamfili, ƴee Ésíp, ƴee koluu deya na wonuu Siren ra di Líbí ; lahte ƴi koluu Rom, 11Keret a Arabi ; lahte ƴi yëwúɗ tígí-tígí, bokaay a ƴee ɗeefru yëwúɗɗë yooni wa ra. Te añcaŋ, yen ee waa keluu wonaɗɗi yen ɗa, wa na waariyu iñi gaanna paŋ Koo ra ! » 12Wa ɓéeɓ éemúté, affi wa kúnëhté wa na wonantuu filiɓ fi wa tih : « Bee yi kan ? » 13Ndaa lahte ɓëewí na ñaawlu wa fi ɓëewë gémú rë wonu tih : « Ɓëewí ƴee mani tallaꞌ waa hap ƴee raa ! »
Gonli Peer
14Tígí daaha, Peer kolohte ɓani apootarri kayyi sabboo a yínë yë, ɗi ɓéyíɗté uni sun won tih : « Ɗon fi yëwúɗɗë a ɗon fa dékú Yerusalem ra ɓéeɓ, kúnsí nuffon ɗon síkírëh sëꞌ ndín ɗon yúh yee lah ra. 15Di habuu ɗon ɗi affon lahaay ɗaaha, ɓëewí ƴee maniyuy. Yen homu siñaakaɗ kep ee ! 16Yee lah baa ra, yonente Suwel húmú wonte ri. Ɗi húmú won tih :
17 “Koope won tih : Waalla nay míllée rë,
may haslaꞌ Ruuhi soꞌ sun fi ɓëewë ɓéeɓ,
tuŋki ron yíssëh yonente léhín woni soꞌ.
I yin ay feeñiyoh tuŋkon,
ɓaha ya ay olee heeƴ.
18 Ahaŋkay ! Bín fë rëe, may haslaꞌ Ruuhi soꞌ sun fi súrgë yí sëꞌ, ƴaal a ɓeleɓ
wa yíssëh yonente léhín woni soꞌ.
19 May teeɓaꞌ i kimtaan sun-Koo dín,
a iñi éemílëꞌté feey fi beh
ti ñif, kíi a i nér ɗúukëe nen.
20 Naꞌa ay míif ñúus túɗ,
céyín fë luum níi ti ñif nen,
balaa bisa nay aye Yíkëe rë lah,
bisi gaana ñéerëꞌ a ndam ra.
21 Te ɓëyí fí dëek Yíkëe ɓéeɓ ay múc.” # Saame Suwel 3.1-5
22« Ɗon fi ɓëy Israyel, síkíríi yee nay mi ron wone ra : Ɗon yúhúté biti Yéesú fí ɓëy Nasaret, ɗi ɓëyí Koope ñéerëꞌté a ri, yii hente kimtaan ɓéeɓ a iñi éemílëꞌté, Koope daa ñeyaꞌ ɗii na ɗi na an waa paŋ fíiyën. 23Ɗi fi baa yaayute ti di fahaꞌ ri Koope fa maañci tíɓ baaha ra nen. Te ɗon daa hawu ri, ɗon fa tahu ɓëewë në ñéyíh woni Koope ra daaƴ ɗi kurwah ra. 24Ndaa Koope këlíɗté rí ɓúudé, múcëlté rí coono fi kúl kë. Baa daa teeɓaꞌ biti kúl kë mínéh ríi ham. 25Nagajek Dawit húmú wonte yii bee sun fi :
“Mi olaꞌ Yíkëe fíi sëꞌ faraah,
te hém ɗi ee hëbís sëꞌ rek,
mi lahay yii sídëe mí.
26 Yii baa daa tah keeñ soꞌ sos,
te unni neɓpe na ɗúh ɓúk sëꞌ.
May fanee a yaakaar !
27 Ɗo fi Yíkëe, fii soo hel filiɓ kúl kë,
fii yeris soꞌ mi ɓëwú, ɓúudé fí sëꞌ yah.
28 Fu teeɓpe soꞌ waalla yuliɗ pesa ra,
fay home hëbís sëꞌ, fu sosil keeñ soꞌ.” #Saame Kañaa ya 16.8-11»
29Peer ɓaatte won tih : « Koy-yaayyi ƴeh, cëe mi won ɗon níi lan : ciffi yen Dawit húlté, hacute, te luuyi ee gin yen ee níi a ɗeh. 30Na húmú won ɗi woni baa ra, ɗeef ɗi húmú yonente, te Koope gappe ri, añohte ri biti ow di séttí ay rii lam ñaani nguur ka.#Saame Kañaa ya 132.11 ; 2 Samiyel 7.12-13 31Bín fë, ɗi otte biti Buura Koo fal ri ra ay koloh ɓúudé, daa tah ɗi won biti ɗi heluy filiɓ kúl kë, ɓúudé fí ii yah.#Saame Kañaa ya 16.10 32Te fun ɓéeɓ fun mínú seede biti Koope këlíɗté Yéesú fë na wonuu ra ɓúudé. 33Filoon fi baaha, ɗi ɓéyrúté tíkúté hëbís Koope, hompe yaꞌi ñamaa fi. Ɗi fi Koo Boffa yeɗte ri Ruuh-Peseŋ fa gapaꞌ ri ra, ɗi nampee rii haslaꞌ ɓëewë në. Daa ri yee na olu ɗon te na keluu ɗon ɗee ra. 34Dawit laway sun-Koo déꞌ, ndaa ɗi wonte bitih :
“Koo-Yíkëe won Yíkíi sëꞌ tih :
Tooke hëbís sëꞌ, yaꞌi ñamaa fi soꞌ deh,
35 níi bín nëy míi yíssée kaaꞌoh yu hen tíkëe yí kottu ra.” # Saame Kañaa ya 110.1
36« Kon ɗon fi ɓëy tali Israyel ɓéeɓ yúhí te ɗon ham affon biti Yéesú fë daaƴu ron kurwah ra, Koope fal ɗi fi baaha Yíkëe a Buur. »
37Unni ƴaa haalte ɓëewë në húmú síkírúu rë, wa meelute Peer a apootarri kayya wonu wa tih : « Fun waɗti pagun yi nék koy-yaayyi ƴeh ? » 38Peer won wa tih : « Lëfí pesaɗ, te ow fi ow ɗon na ɓéeɓ bëtsú di tii Yéesú-Kiristaa ɗon baalu bakaaɗɗon. Hen ɗaaha raa, Koope ay ron on Ruuh-Peseŋ. 39Te Ruuha gapaꞌ Koope baa ra, ɗon daa lahuu ri ɗoni koyyon a séttën, a ɓëewë dékú wul ra ɓéeɓ ɓal, ƴee Koo-Yíkëe nay waa dëeké fayu ra. »
40Peer wonte wa i yin kay caak na ɓaat waa héc, na ɓeddaꞌ wa won tih : « Pëgí níi ɗon fús di ɓëy jamanii beh, wa fi ɓëewí ɓossa. » 41Iña won Peer ƴaa ra, ow caak waa na tahute wa, wa bëtsúté. Yiin fi baaha, yii mitte ow júnní éeyë (3.000) ɓaatuute ɓëewë gémú rë.
Pesadi ɓëewë gémú rë
42Kolaꞌte baaha, ɓëewë gémú rë caguute lok na síkírúu iña na yëeddúu apootarra ra, wa bokute henute yínë, wa bokute woruute mbúurëe, wa na ɗagu yínë. 43Ow fi ow waa na ɓéeɓ yéŋké neeh faani, ndah Koope ñeyaꞌ apootarra na teeɓpe ɓëewë kimtaan a iñi éemílëꞌté caak. 44Ɓëewë gémú rë ɓéeɓ henute yínë, yii wa lah ri ɓéeɓ wa bok. 45Wa yaay iña lahuu wa raa, wa woraꞌ hélsë filiɓ fi wa, ow fi ow ɓéeɓ yeru yii mín paƴ ɗee teem sohlii ra. 46Yíilëe Koo ɓéeɓ, faraah wa teeꞌee filiɓ Faam fi gaani Koope. Wa lah faammi wa raa, wa bok woraꞌ ñammi wa, wa ñame a sos-keeñ lëhíh nuf kay na, 47wa njooɓe Koope. Wa neɓuute ɓëewë ɓéeɓ. Te yíilëe Koo faraah, Yíkëe ɓaat filiɓ fi wa ɓëewë múcël rí rë.
دیاریکراوەکانی ئێستا:
Tílëdí apootarra 2: NDV
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© Wycliffe Bible Translators, Inc. All rights reserved.