LUKA 4
4
1Go Yesu, waina e pura ki Naatana Tapu, e liliu pae Yordan po pei tea viragiana pae Naatana masop̃alo naaleatia rualima pati, 2e do pei tea maridogoana pae diabolo. Go e da gani te navatuna naaleatia maga wanogoe mau: go ragi waina eu nopu, e pitolo. 3Go diabolo e noa ki nia, e naga, Ku pe vei Sup̃e Natuna, p̃a tip̃aki vatu waia naga ega vei bred sikai. 4Go Yesu e pasa dara paki nia, e naga, E pei tea midiriana, naga Naatam̃oli ega wo da mauri pae bred sikina mau. 5Go e piragi a sake, po pisei ki nia namarakiana maga mamau puti ni maramana namata makali sikai ni ragi. 6Go diabolo e noa ki nia, e naga, Aga wo dua ko naveinawotaana mamau puti waia, go nasamasamaana kakada: nalakena e pei tea vituakiana paki nau; go a dua tea waina a masauna naga aga tua e asa. 7Nalakena tea wanogoe nigo ku pe lotu naraegu, tea mamau puti eu pe wo pei tea anigo. 8Go Yesu e pasa dara po noa ki nia, e naga, E pei tea midiriana, naga P̃a lotu ki Yehovah Sup̃e anigo, go p̃a maneana suasua ega sikina. 9Go e piragi a paki Yerusalem po lawo ki nia e lawodu tea varau pakilagi ni nasum̃a tapu, po noa ki nia, e naga, Ku pe vei Sup̃e Natuna, p̃a tum̃am̃a nadi ki‐go pae nea pakitano: 10nalakena e pei tea midiriana, naga
Ega wo dip̃aki agelo aneana maga nalo kakam̃a, naga euga vavaigoro ko:
11Go,
Euga wo dapetape ko doko nam̃elearuda maga,
Naga p̃a ta dapilagona te vatu sikai mau.
12Go Yesu e pasa dara po noa ki nia, e naga, E pei tea noaana, naga P̃a ta maridogo Yehovah Sup̃e anigo mau.
13Go ragi waina diabolo e mari sua sara namaridogoana, e m̃elu dua ki nia pano pa pa paki te ragi.
14Go Yesu e liliu pilake nakasuaana ni Naatana paki Calilea: go narogorogoana sikai nalo kakana e sokapule usuraki navanua mamau wanogoe daliviri. 15Go e do pasa piseiki ekopu ni nasum̃a ni nasaisaiana adeada maga, e pei tea samasamaniana pae tea maga mamau puti.
16Go e umai paki Nasareth, waina e pei tea vakaleana asa: go e paki ekopu ni nasum̃a ni nasaisiana naaleatia ni sabbath, pae natomariana aneana, po duleana naga ega veveve. 17Go tusi ki profeta Isaiah e pei tea vituakiana paki nia. Go e pukepiri tusi wanogoe, po pap̃ai tokora waina e pei tea midiriana asa, e naga,
18Naata ni Yehovah e doko au,
Nalakena e puvurai ki nau naga aga rogorogo ki narogorogoana wia paki tea tika maga:
E po dip̃aki lua au umai naga aga rogorogo ki naveresiana paki tea viragiluapavakotoana maga,
Go ki namoroleosaiana paki tea kesa maga,
Naga aga tip̃aki lua tea mari p̃oroworosiana maga euga vei tea veresiana pano,
19Naga aga rogorogo ki natau ni nasaup̃iaana ki Yehovah.
20Go e lulu ki tusi po dua tasiga asa liliu, po dasake: go namata ni tea maga mamau puti waina eu doko ekopu ni nasum̃a ni nasaisaiana eu leo soki a. 21Go e pae asa noa ki da, e naga, Masoso navasaana midiriana wanogoe e po lolomana nadaligamu. 22Go tea maga mamau puti eu maneana noa sokisoki, po maga navasaana ni nasaup̃iaana maga waina eu dave pae nawokana pano: go eu naga, Tea waia e da pei Yosef natuna kite? 23Go e noa ki da, e naga, Kuga wo alagoro noa ki nau naluluakia waia, Naatam̃oli ni medisine, p̃a tum̃am̃a mari pauri ko: tea maga waina au po dogo ra eu pei tea mariana Kapernaum, p̃a moro mari ra tokora waia navanua anigo. 24Go e naga, Lomau a noa ki mu, naga Te profeta sikai e da pei tea viragiana navanua aneana mau. 25Ma a noa ki mu tea waina e pei lomau, naga Nagoroi malepu laapa eu doko Israel naaleatia maga ki Eliyah, ragi waina nakoroatelagi e p̃ono doko natau dolu go atelagi latesa, dapala navitoloana warua sikai e pakilina usuraki navanua mamau; 26go Eliyah e da pei tea tip̃akiluaana pa punusi sikai kakada mau, ma e pei tea tip̃akiluaana paki Sarepta sikai maau, ni navanua ni Sidon, punusi nagoroi sikai waina e pei malepu. 27Go lepero laapa eu doko Israel ragi ki profeta Elisha; go sikai kakada e da pei tea mariana e dautau mau, ma Naaman tea ni Siria e sikina pei tea mariana e dautau. 28Go tea maga mamau puti waina eu doko ekopu ni nasum̃a ni nasaisaiana, ragi waina eu dogo tea maga wanogoe, eu pura ki namaritausuana; 29go eu duleana, po nadi ki nia paki etaku ni natokoana, po piragi a paki narae ni tava waina natokoana adeada e pei tea tavagiana asa, naga euga nadi ki nia siwo pae napatira sikai pakitano. 30Ma nae e pa duaduru m̃aleoputo kakada po surata pano.
31Go e siwo umai paki Kapernaum, natokoana sikai ni Calilea. Go e do pasapisei ki da naaleatia ni sabbath: 32go eu saram̃akoto navasapiseikiana aneana; nalakena navasaana aneana e pilake naveinawotaana. 33Go naatam̃oli sikai e doko ekopu ni nasum̃a ni nasaisaiana, waina e peani naata ni dimon loa sikai; go e pioso ki nadaleo kasua sikai. 34E naga, Ako! Kinami auga kasa kigo, Yesu ni Nasareth? Ku umai naga p̃a mari punue gami kite? A atae ko, ku pei Tea Tapu ki Sup̃e. 35Go Yesu e pasa kasua ki nia, po naga, P̃a vunuta, po dave umai m̃elu dua ki nia pano. Go dimon wanogoe e nadi ki nia paki natano m̃aleoputo, po dave umai m̃elu dua ki nia pano, po da mari sa ki nia mau. 36Go namagaana warua e pakilina ki tea maga mamau puti, go eu saisai pasa dum̃ada paki da, po naga, Navasaana waia e pei nasava? Nalakena ki naveinawotaana go ki nakasuaana e dip̃aki naatana loa maga go eu dave umai pano. 37Go narogorogoana sikai nalo kakana e sokapule paki sara tokora ni navanua wanogoe daliviri.
38Go e duleana m̃elu dua ki nasum̃a ni nasaisaiana, po paki ekopu ni nasum̃a ki Simon. Go Simon anagoroi p̃ilana e pei tea vuatiana ki namasakiana warua sikai; go eu maneana pavarani a. 39Go e lawodu kolovagoro e, po pasa kasua ki namasakiana wanogoe; go e marua ki nia; go e duleana m̃araverave, po madeada suasua ki navinaga.
40Go ragi waina elo e do musu, tea maga mamau puti waina eu peani tea manainai seara ki nasasanaana visarasara maga eu piragi ra umai punusi a; go e pusake nam̃elearuna maga ara mamau puti, po mari pauri ra. 41Go dimon maga ma eu dave umai m̃elu dua ki tea laapa, eu pioso, po naga, Nigo ku pei Sup̃e Natuna. Go e pasa kasua ki da, po da suasua ki da naga euga vasa mau, nalakena eu atae naga nae e pei Kristo.
42Go ragi waina e pei aleati, e dave umai po paki maso maladi sikai: go taua maga ni naatam̃oli eu laaga asa, po umai punusi a, po naga euga mauti a, naga ega ta m̃elu dua ki da pano mau. 43Ma e noa ki da, e naga, E one au one naga aga rogorogo ki narogorogoana wia ni namarakiana ki Sup̃e paki natokoana p̃ota maga: nalakena a pei tea tip̃akiluana umai raki tea wanogoe.
44Go e do dogorogo ekopu ni nasum̃a ni nasaisaiana maga ni Calilea.
دیاریکراوەکانی ئێستا:
LUKA 4: NTB
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Bible Society of the South Pacific