MWANDUSO 3
3
Udulu wa Munhu
1Nyoka kakala m'bala ng'hani kubanza wang'onyo wose wa kumuhulo yaawalumbile MNDEWA Mulungu. Nyoka kamuuza ija imtwanzi, “Kweli Mulungu kawalongela kamba sambimuje mujo wa m'biki wowose uli mkihati?”
2Ija imtwanzi kamwidika, “Todaha kuja mujo wa m'biki wowose uli mkihati, 3ila Mulungu kalonga, ‘Sambimuje mujo wa m'biki uli hagatigati ya ikihati ama kuukwasa. Kamba muhatenda avo, modanganhika.’ ”
4Nyoka kamulongela ija imtwanzi, “Hamdanganhika, 5kwavija Mulungu kovitanga kamba kipigiti vondamje mujo uno, meso genu gogubuligwa, na mowa kamba Mulungu, mogatanga ganogile na gehile.”
6Ija imtwanzi viyawene kamba mujo wa m'biki uja unoga kudigwa, na wonogeza meso, na vivija wosulukilwa mkongeza ng'hungwe, kasola mujo wake kauja. Kamgwelela mbigalo wake, na heyo vivija kaja. 7Kipigiti kikija viweshile kuja, meso gao gagubuligwa, na wavitanga kamba wakala mwazi. Avo washona mijani ya m'biki wa mtini wakiivaza.
8Abaho ija imbigalo na mtwanzi wake wadihulika dizwi da MNDEWA Mulungu viyakalile yotembela mkihati mkipigiti cha zua kuhonga, wakiifisa mmibiki ili mkihati giladi MNDEWA Mulungu sambiyawone. 9Ila MNDEWA Mulungu kamkema ija imunhu, na kumuuza, “Kwa kwahi?”
10Ija imunhu kedika, “Nikuhulika vuutembela mkihati, nidumba, kwavija nie nikala mwazi, avo nikiifisa.”
11MNDEWA Mulungu kamulongela, “Yalihi yakulongele kamba gweye kwa mwazi? Kuja mujo uja unikulagize sambiuje?”
12Ija imunhu kedika, “Ija imtwanzi yuunigwelele yawe hamoja na nie, iyo yanigwelele mujo uja, na nie nija.”
13MNDEWA Mulungu kamuuza ija imtwanzi, “Habali utendile vino?”
Kedika kalonga, “Nyoka kanibulunya, na nie nija.”
Nhaguso ya Mulungu
14Abaho MNDEWA Mulungu kamulongela nyoka, “Kwavija kutenda vino, gweye wiyeka kudukumizwa mmwanza wa wang'onyo wose, wofugigwa na wa kumuhulo. Kotambala na inda yako, na koja timbwisi mazua gose ga ugima wako. 15Nokwika udumuka hagatigati yako na ija imtwanzi, hagatigati ya wanago na wanage. Heyo kokuhonda ditwi jako, na gweye komulumiza kisiginho chake.”
16Abaho kamulongela ija imtwanzi, “Nowongeza usungu wako wa kulela, na gweye kolela na usungu, hata avo sulukila yako yowa ha mbigalo wako, na heyo kokutawala.”
17Abaho kamulongela ija imbigalo, “Kwavija gweye kumtegeleza mtwanzi wako, na kuja mujo uja unikulongele sambiuje, isi yodukumizwa. Kopata mandia gako mkugaya ng'hani mkuilima isi mmazua gose ga ugima wako. 18Isi yokulelela miba na mijani, na mandia gako gowa mijani ya kumgunda. 19Koja mandia gako mkusang'hanika ng'hani mbaka vondauibwelele isi ija iulumbigwe nayo. Kwavija kulumbigwa na timbwisi, na kobweleganya kuwa timbwisi kabili.”
20Adamu#3:20 Hano Adamu nhegulo yake munhu yakalile yalumbigwe kulawa mditimbwisi da isi. kamkema mtwanzi wake Hawa,#3:20 Mkieblania Hawa nhegulo yake ugima. kwavija kowa mama wa wanhu wose. 21Abaho MNDEWA Mulungu kawatendela Adamu na mtwanzi wake vivalo va ng'hwembe za wang'onyo na kawavaza.
Adamu na Hawa Wowingigwa Kulawa Mkihati cha Edeni
22Abaho MNDEWA Mulungu kalonga, “Lola, munhu ino sambi kalinga na tweye, kogatanga ganogile na gehile. Vivija sambiyagolose mkono wake na kubawa mujo kulawa mum'biki ulava ugima, na kuuja, na kuwa mgima mazua gose.” 23Avo MNDEWA Mulungu kamuwinga kulawa Mkihati cha Edeni na kumtenda yakailime isi ija iyalumbigwe nayo. 24Viyeshile kuwawinga waja iwanhu, keka Makelubi#3:24 Makelubi wao wene ugima wali kuulanga walumbigwe na Mulungu wali na mabawa. ng'ambu ya ulawilo wa zua wa Ikihati cha Edeni na kwika zele dili na moto dimeluka dihindukahinduka kuno na kuno kwiimiliza nzila ya kuchola hana um'biki ulava ugima.
دیاریکراوەکانی ئێستا:
MWANDUSO 3: Kizalamo
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Zaramo Bible Translation Project: © 2023 Pioneer Bible Translators
New Testament is a revision of: Zaramo New Testament: © 2020 The Word for the World International and © 2020 Pioneer Bible Translators