Маттэ 15
15
ЯПШӀЫКӀУТФЭНЭРЭШЪХЬ
Тыжъхэм къакӀэныжьыгъэ хабзэхэр
(Марк 7:1-23)
1Джащыгъум Ерусалим къикӀыгъэ фарисейхэмрэ Тэурат егъэджэкӀо пащэхэмрэ Исус дэжь къакӀохи, къеупчӀыгъэх:
2– О уигъогу рыкӀохэрэр тятэжъхэм къытфагъэнэгъэ хабзэхэм сыда зыкӀатекӀыхэрэр? Сыда пӀомэ, ахэмэ аӀэхэр амытхьакӀхэу машхэх!
3– Шъори шъуятэжъхэм яхабзэхэм шъуатетыным пае, Тхьэм иунашъо сыда шъузыкӀытекӀырэр? – ариӀожьыгъ Исус. 4– Сыда пӀомэ, Тхьэм ыӀуагъ#15:4 Тхьэм ыӀуагъ – еплъ Пегъымбар Мусэ ятӀонэрэ тхылъэу ытхыгъэм 20:12; 21:17.: «Уятэрэ уянэрэ лъытэныгъэ афэшӀ», «Хэти зятэ е зянэ ӀаекӀэ тегущыӀэрэр шъуукӀын фае». 5,6Ау шъо шъоӀо: «„Сэ тынэу шъо шъостын слъэкӀыщтыгъэр джы Тхьэм пае тын сшӀыщт“ ыӀоу, цӀыф горэм ежь ятэ е янэ риӀомэ, ащыгъум ятэ-янэхэм лъытэныгъэ афимышӀыми хъущт». Аущтэу шъушӀэзэ, шъуятэжъхэм къышъуфагъэнэгъэ хабзэхэмкӀэ Тхьэм игущыӀэхэр лъэныкъокӀэ ешъогъэзыкӀых. 7Шъо, нэпитӀу зиӀэхэр! Пасэм пегъымбар Ешайа шъыпкъэр къышъуиӀолӀагъ моущтэу зеӀом#15:7-9 пегъымбар Ешайа зеӀом – еплъ Пегъымбар Ешайа тхылъэу ытхыгъэм 29:13.:
8«Мы цӀыфхэм аӀупэхэмкӀэ сагъэлъапӀэ, ау агухэмкӀэ спэчыжьэх.
9Ахэмэ цӀыфхэр Тхьэм иӀофхэм афагъасэхэзэ, Тхьэм иунашъо ичӀыпӀэ цӀыф хабзэ зэрэрагъэуцорэм пае, сэ сызэрагъэлъапӀэрэр хьаулый».
10Ащ нэужым Исус цӀыф купышхомэ къяджи, ариӀуагъ:
– ШъукъэдаӀуи, зыгурыжъугъаӀу. 11ЦӀыфыр мыкъабзэ зышӀырэр ыжэ дахьэрэр арэп, ыжэ къыдэкӀырэр ары нахь.
12Джащыгъум игъогу рыкӀохэрэр Исус къыбгъодахьэхи, къеупчӀыгъэх:
– Фарисейхэм а къэпӀуагъэхэр зызэхахым, агу мыхъун къызэрэрагъэхьагъэр ошӀа?
13– Сыдрэ къэкӀыгъэу ся Тэу уашъом щыӀэм чӀым химыгъэтӀысхьагъэр къыхэтхъыжьыгъэ хъущт, – ариӀожьыгъ Исус. 14– Ахэмэ ауж шъуикӀ. Мы фарисейхэр цӀыф нэшъухэм япэрыт нэшъух. Зы нэшъум адрэ нэшъур зэрищэн хъумэ, тӀури машэм ифэщт.
15Аущтэу зеӀом, Петрэ Исус къыриӀожьыгъ:
– А гъэсэпэтхыдэу къэпӀотагъэм къикӀырэр къыдгурыгъаӀу.
16– Джыри зи къыжъугурымыӀоу ара? – къыӀожьыгъ Исус.
17– Жэм дахьэрэ пстэури ныбэм зэрихьэу, пкъым къызэрэхэкӀыжьырэр къыжъугурыӀорэба? 18Ау жэм къыдэкӀыхэрэр гу кӀоцӀым къекӀых. Ахэр ары цӀыфыр мыкъабзэ зышӀыхэрэр; 19сыда пӀомэ, гум къикӀыхэрэр мыхэр арых: гупшысэ бзаджэхэр, цӀыф укӀыныр, зинэ шӀэныр, тыгъоныр, цӀыфхэм пцӀы ателъхьаныр, ӀаекӀэ цӀыфхэм атегущыӀэныр. 20Ахэр ары цӀыфыр мыкъабзэ зышӀыхэрэр. Ау Ӏэ мытхьакӀыгъэхэмкӀэ шхэным цӀыфыр мыкъабзэ ышӀырэп.
Ханаан хэкум щыщ бзылъфыгъэм шӀошъхъуныгъэу иӀагъэр
(Марк 7:24-30)
21ЕтӀанэ Исус а чӀыпӀэм икӀи, къалэхэу Тиррэ Сидонрэ яӀэгъо-благъо кӀуагъэ. 22Джащыгъум а лъэныкъом къикӀыгъэу, Ханаан хэкум щыщэу бзылъфыгъэ горэ#15:22 Ханаан хэкум щыщэу бзылъфыгъэ горэ – а бзылъфыгъэр мыджуртэу, Рим къэралыгъошхом щыщ Сирие хэкум къыщыхъугъ. Еплъ Марк 7:26. Исус къекӀолӀагъ, куозэ:
– Тхьэматэ, Даутэ ы Къу, гукӀэгъу къысфэшӀ. Зы джынапцӀэ горэм сэ спхъу Ӏаеу ригъэзыгъ.
23Ау Исус а бзылъфыгъэм зы гущыӀэ риӀожьыгъэп, зы пэгъокӀи ритыжьыгъэп. Игъогу рыкӀохэрэр Исус къыбгъодахьэхи, къаӀуагъ:
– Мыр куозэ, тауж итышъ, ӀугъэкӀ.
24– Израиль цӀыфхэу мэл кӀодыгъэхэм афэдэхэр ары ныӀэп сыкъызфэкӀуагъэхэр, – къыӀожьыгъ Исус.
25Ау бзылъфыгъэр Исус къыбгъодахьи, лъэгонджэмышъхьэкӀэ ыпашъхьэ къитӀысхьи, къыӀуагъ:
– О тхьэматэ, къыздэӀэпыӀ!
26– Хьалыгъур сабыйхэм аӀыпхэу хьэхэм ябгъэшхыныр тэрэзэп, – пэгъокӀ ытыжьыгъ Исус.
27– Шъыпкъэ, тхьэматэ, – къыӀожьыгъ бзылъфыгъэм, – ау хьэхэми ятхьэматэхэм яӀанэ къетэкъохырэ шкъойхэр ашхых.
28– О бзылъфыгъ, шӀошъхъуныгъэу уиӀэр ины, – риӀуагъ Исус. – О зэрэпшӀоигъом тетэу къыбдэрэхъу. А сыхьат дэдэм къыщегъэжьагъэу а бзылъфыгъэм ыпхъу хъужьыгъэ.
Исус цӀыфыбэхэр зэригъэхъужьыгъэр
29Ащ нэужым Исус а чӀыпӀэм икӀи, Галилей псыхъураем рекӀокӀыгъ. Ӏуашъхьэм дэкӀуаий, ащ тетӀысхьагъ. 30ЦӀыфыбэхэм цӀыф лъащэри, Ӏащэри, нэшъури, дэгури, нэмыкӀрэ уз зиӀэхэри къыздащэхи, Исус дэжь къэкӀуагъэх. Сымаджэхэр ащ ылъакъохэм адэжь щагъэгъолъхи, Исус ахэр ыгъэхъужьыгъ. 31Бзакохэр гущыӀэхэу, Ӏащэхэр псаухэу, лъащэхэр тэрэзэу зекӀохэу, нэшъухэр къэплъэжьыгъэхэу цӀыфхэм залъэгъум, агъэшӀагъощтыгъ, Израиль и Тхьэ щытхъу фашӀыщтыгъ.
Исус нэбгырэ миниплӀ зэригъэшхагъэр
(Марк 8:1-10)
32Исус игъогу рыкӀохэрэм къяджи, ариӀуагъ:
– Мы цӀыфхэм сыгу ягъу, сыда пӀомэ, мэфищ хъугъэу сигъусэх, ашхыни яӀэп. МэлакӀэ лӀэхэу стӀупщыжьынхэкӀэ сыфаеп. Гъогум щызэхэфэнхэкӀи мэхъу.
33– Мыщ фэдиз цӀыф купышхом афикъун хьалыгъу шъоф нэкӀым тыдэ къитхын тлъэкӀына? – къыраӀуагъ игъогу рыкӀохэрэм Исус.
34– Хьалыгъу тхьапша шъуиӀэр? – яупчӀыгъ Исус ахэмэ.
– Хьалыгъуиблырэ пцэжъые тӀэкӀурэ тиӀ, – къаӀожьыгъ ахэмэ.
35Джащыгъум Исус цӀыф купышхор чӀыгум етӀысэхынэу унашъо афишӀыгъ. 36Хьалыгъуиблымрэ пцэжъыехэмрэ къыштэхи, Тхьэм щытхъу фишӀыгъ. ЕтӀанэ хьалыгъухэр зэгуичыхи, игъогу рыкӀохэрэм аритыгъ. Ахэми цӀыфхэм афагощыгъ. 37ЦӀыф пстэури шхагъэ, загъэшхэкӀыгъ. Ащ нэужым хьалыгъу такъырхэу къялыжьыгъэхэр мэтиблымэ арызэу аугъоижьыгъэх. 38Шхагъэхэр, бзылъфыгъэхэмрэ сабыйхэмрэ хэмытхэу, нэбгырэ миниплӀ фэдиз хъущтыгъэх. 39ЕтӀанэ Исус цӀыф купышхор ытӀупщыжьи, къуашъом итӀысхьи, Магадан хэкум кӀуагъэ.
دیاریکراوەکانی ئێستا:
Маттэ 15: AdgNT14
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© Институт перевода Библии, 1991, 1992, 2014. Стокгольм