Genesis 3
3
In magꞌuꞌunu naꞌulug kat kasalaꞌan i taw nga binwat it Ampuꞌang Diyus
1Iyan dukul nga esa gasing giyuna it AMPUꞌANG DIYUS, kanyang adat nga mapiyandaya-dayaꞌ, subraꞌ paꞌ it muꞌsang ramu-ramu nga beken nga giyuna it AMPUꞌANG DIYUS. Miningkut kanya it babay ngayti, nga maat ya, “Unu, matuud nga inaat kamut Ampuꞌang Diyus nga may mga kayu situt kalulwakan ngaytu nga ega salyaen mit kumaꞌen i buwaꞌ nira?”#3:1 Kat pasepsep it mga mapipikir, si Satanas i nagpanakem baw nagpaꞌampang it dukul ngayti. Basaen i duꞌut Mga Ipiyalteg 12:9 baw 20:2, baw 2 Corinto 11:3 baw 11:14. Subuk giyamit ni Satanas i dukul ngayti isaꞌun makapakursud ya kat kasalaꞌan i duwa ngayting uꞌna-uꞌnang taw.
2Maat it babay ngayti, “Mapakay kaming kumaꞌen it buwat mga kayu situt kalulwakan ngaytu. 3Temed iyan esa ngayang asat tengaꞌ it kalulwakan ngaytu, iyan i ipiyagꞌaat it Ampuꞌang Diyus it amen nga ega salyaen namen it kumaꞌen. Maꞌunu baꞌ kaꞌnen na, maski sekel, daꞌkami semkel, ka kamataynen i panriga yat amen.”
4Maat i tubag it dukul ngayti, “Iyan bay matuud, daꞌkamu bayan matay. 5Takaꞌ atkayan i inaat it Ampuꞌang Diyus it imyu ka magkaꞌrutan ya nga kat uras nga kumaꞌen kamu kayan, subuk kamukrat nga banar i mata mi. Egay beken, makasbung kamu nat Ampuꞌang Diyus nga magkakilala nat magayen baw maraꞌe-raꞌet.”
6Ta, it namuyaan it babay ngayti nga palan magayeng kaꞌnen i buwaꞌ it iting kayu, ka magaye-gayeng pagletganan, baw iti na ngayti, mapisiꞌan it ega basta-bastang kasepsep, miyuꞌpuꞌ na kanya ka kimnaꞌen na. Binggayan ya gasiꞌ i iba ya ngayting lalaki nga minlep duꞌut kanya. Pagkabgay it kanya, kiyaꞌen ya na gasiꞌ. 7Egay beken, pagkakaꞌen nira, subuk sakaling nakasepsep, baw nakatanud na sirat eyaꞌ it mamaglelbas sira. Aypaꞌ binwat nira, namagdamit-damit it daꞌun it kayu nga pagpangaranat igos. Yanayti i tiyampiꞌ nira.
8Iyan apu-apun na, nabatiꞌan niray AMPUꞌANG DIYUS nga magpanaw-panaw duꞌun it kalulwakan ngayti. Pagkabatiꞌ nira, namagpatataguꞌ na sirang duwa kat panleteg it AMPUꞌANG DIYUS, namagpalingeb na duꞌun it puꞌut kayu. 9Temed tiyaꞌwagan it AMPUꞌANG DIYUS i lalaki ngayti, maat ya, “Ariyen ka?”
10Timnubag i lalaki ngayti, maat ya, “Nabatiꞌan ku bayay panaw mu ngayan situt kalulwakan ngaytu. Nagpatataguꞌ aku ka magꞌiꞌlam akut imu ka maglelbas aku.”
11Miyampang i AMPUꞌANG DIYUS, maat ya, “Ay siyuy nagꞌaat it imu nga maglelbas ka? Unu, kimnaꞌen ka nat buwat kayu ngayan nga ipiyagꞌaat kut imu nga ega masalyaan mut kumaꞌen?”
12Maat i tubag it lalaki ngayti, “Ay babay ngaytu bang ibinggay mut aken nga iba ku, kanya bay minggay it aken it buwat kayu ngayan. Pagkabgay ya, kiyaꞌen ku na.”
13Siyarunga it AMPUꞌANG DIYUS i babay ngayti bawnga miyampang. Maat ya, “Unuka binwat mu i atkayan?”
“Ay, inakalan aku bat dukul ngaytu,” maat i babay ngayti.
Natanaꞌan it dukul baw duwa ngayti nga uꞌna-uꞌnang taw
14Dukul siꞌ ngayti i siyarunga it AMPUꞌANG DIYUS. Maat ya, “Kayti nga binwat mu i atkaytu, makasiyang ka nat beken nga mga ramu-ramu ka sumpaan ta na ikaw. Deꞌgan mu nay ipanaw mut imu, katandaꞌ it sisindiren ka nay imu baw lilipi-lipiyen mintras egen ka paꞌ. 15Ipabetang-betang ku nang magkuntraꞌ kamu na it babay ngaytu, kaꞌanakan ya baw imung kaꞌanakan. May kaꞌanakan ya nga rumunut it ulu mu. Ikaw, kumagat it aꞌay ya.”#3:15 Pagpaꞌiguꞌan kaytu, pandaꞌeg ni Jesu-Cristo it ki Satanas. Sabap iyan inimatay si Jesus duꞌut krus, tanud ni Satanas nga kanya nay nandaꞌeg it ki Jesus ngayti, arit ega, ka inggen si Jesus it paꞌuliꞌ. Aypaꞌ sikayti, si Satanas i diyaꞌeg.
16Bawnga siyarunga ya siꞌ i babay ngayti baw inaat ya, “Padaklen kuy kakuriꞌan mut magpanganak. Kada manganak ka, rumuruꞌ kat dakulang sakit. Takaꞌ maski atkayan, dakulaꞌ nagay kayli mut asawa mu, baw pagsasakpen ya ikaw nga kanya i pagbayaꞌen mu.”
17Bawnga lalaki siꞌ ngayti, nga yanayti si Adan, i inaat it AMPUꞌANG DIYUS. “Kayti it namayaꞌ ka it inaat it asawa mu baw kimnaꞌen kat buwat kayu nga ipiyagpina-pinaꞌ ku nga ega kaꞌnen mu, paliꞌ mu nagay sumpaan ku nay lugtaꞌ. Kaꞌilangan magpaꞌres ka nga pirmi it dakulang paꞌres isaꞌun makapisiꞌ ka it ipagkaꞌgen, mintras egen ka paꞌ. 18Yay tumubuꞌ it madaliꞌ baw tumanip, dugi baw ilamunun, ega maat mga luwak nga pangaꞌen mi. 19Tumuruꞌ nay liꞌnget mu in magpakariga ka duꞌut uma isaꞌun may mapisiꞌ mu nga pangaꞌen. Atkayan i kabetangan mu seked it muliꞌ ka na kat lugtaꞌ, ka yay pinsiꞌan it binwat nga ikaw. Ta, it ikaw, lugtaꞌ i binwat, aypaꞌ uliꞌan mu, lugtaꞌ naga.”
20Ta, piyangaranan na ni Adan ngayti i asawa ya ngaytit Eva, nga ireg sugiden, kaꞌgenan, sabap kanya na i inaꞌ it muꞌsang taw. 21Bawnga may binwat it AMPUꞌANG DIYUS nga pakayan. Kulit it ramu-ramu i binwat ya nga ipiyapakay ya it kanira.
22Iyan atnakayti, maat siꞌ it AMPUꞌANG DIYUS, “Nakasubung-subung nat aten i taw ngaytu, nga magkaꞌrut nat magayen baw maraꞌe-raꞌet. Ta, it atkayan na, kaꞌilangan palꞌiden na sira isaꞌun ega na kapuꞌpuꞌ baw kumaꞌen it buwat kayu ngayang magpaꞌabwatay it kaꞌgenan, isaꞌun ega na maneꞌteꞌ nga egay kaskedan it kaꞌgenan nira.” 23Aypaꞌ piyalꞌid nat AMPUꞌANG DIYUS na Adan ngayti duꞌut kalulwakan ngayti nga duꞌut Eden, nga uripen na it pangarigra it lugtaꞌ, nga lugtaꞌ naga i pinsiꞌan it kanya, iyan giyuna kanyat Ampuꞌang Diyus. 24Egay beken, inimugaw na sira. Pagkalꞌid nira, bintangan it AMPUꞌANG DIYUS i ayun duꞌut lebatan it kalulwakan ngayti it pagpangaranat kerubin nga bilang guwardiya, baw may subung it karis nga magdeleg i tarem ya nga magꞌebeg nga pirmi isaꞌun ega na malapasan i dalan nga magꞌaduꞌut kayu ngayting magpaꞌabwatay it kaꞌgenan.
دیاریکراوەکانی ئێستا:
Genesis 3: TBWONT
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 1992, Wycliffe Bible Translators, Inc. All rights reserved.