YUH 4
4
Isa ka a ɲɔɔn bɛn Samarika muso la kɔlɔn da la
1Farisilu ka a mɛn ko Isa ye karandenilu sɔrɔnna ka tamin Yaya kan, ko a ye karandenilu sunna ji rɔ ka tamin Yaya kan fanan. 2(Kɔni Isa jɛrɛ tɛ mɔɔilu sunna ji rɔ; a la karandenilu le ye mɔɔilu sunna ji rɔ.) 3Isa kɛni wo kalema, a bɔra Jude mara rɔ, ka a kɔsɛ Kalile. 4A taatɔla Kalile, a ka kan ka Samari mara ratɛɛ.
5A sera Samari so do kɔndɔ, so wo tɔɔ le Sikari. A tɛrɛ ye Yakuba la sɛnɛ tɔrɔfɛ, a ka mɛn di a dencɛ Yusufu ma. 6Awa, yɔrɔ wo rɔ Yakuba la kɔlɔn ye ye. Isa a tɛrɛ ra kɔri taama ma. A ka i sii kɔlɔn da la, tele tala waati.
7Samarika muso do nara ji ta diya. Isa ka a fɔ a yɛ ko: «N sɔ ji rɔ n ni n min.» 8(A la karandenilu tun da wa so kɔndɔ dɔɔnninta santa ɲinin diya.) 9Samarika muso ka a fɔ Isa yɛ ko: «Nfenna ile, Yahudiya cɛɛ, ri n maɲininka ko n ye i sɔ ji rɔ, nde mɛn ye Samarika muso ri?» A damira ye mɛn di Yahudiyailu ni Samarikailu mako tɛ i ɲɔɔn na. 10Isa ka a jabi: «Ni i ka Alla la sanba lɔn a ni mɛn ye a fɔla i yɛ ko: ‹n sɔ ji rɔ n ni n min,› ile tun da a maɲininka, a ni a tun da ji don i bolo, ɲenemaya ji kɔnin.» 11Muso ka a fɔ: «N maari, jilafɛ si tɛ i bolo ka ji ta mɛn na kɔlɔn kɔndɔ, baa kɔlɔn a ra jiini ba le. Ji mɛn ye ɲenemaya dila mɔɔ ma, wo sɔrɔnna mi? 12Ile, i ka bon ka tamin an benba Yakuba la, an buruju mɛn ka kɔlɔn ɲin di an ma? A ni a dencɛilu a ni a kolofenilu wo tɛrɛ ye ji minna kɔlɔn ji ɲin de la.»
13Isa ka a jabi: «Ni mɔɔ ka imin ji ɲin na, ji lɔɔ a ri a mira fanan, 14kɔni n ye ji mɛn dila, ni mɔɔ mɔɔ ka wo ji min, ji lɔɔ tɛ wo tii mira butun fewu. Baa ji wo di kɛ ikomin tenke a kɔndɔ ka ɲenemaya banbali di a ma.» 15Muso ka a fɔ a yɛ ko: «Maari, ji wo di n ma. Wo wa kɛ ji lɔɔ tɛ n fanan mira. N mako ti bilala kɔlɔn ji ɲin na butun.» 16Isa ka a fɔ a yɛ ko: «I ye wa i furucɛ kili ka na yan sisen.» 17Muso ka a jabi: «Furucɛ ti n bolo.» Isa ka a fɔ a yɛ: «I jo ye a rɔ ka a fɔ ko: ‹Furucɛ ti n bolo.› 18A damira ye mɛn di i ra furucɛ mɔɔ loolu sɔrɔn. Cɛɛ mɛn ye i bolo sisen, i la cɛɛ tɛ wo ri. I ka tuɲa le fɔ.»
19Awa, muso ka a fɔ: «N maari, n da a ɲayen ko i ye nabi le ri. 20Ande Samarikailu, an burujuilu ka Alla bato koyinkɛ ɲin kan. Kɔni aile Yahudiyailu ka a fɔ ko a fɛrɛ tɛ fo mɔɔilu ye Alla bato Jerusalɛmu le. A ye di wo rɔ?» 21Isa ka a fɔ a yɛ ko: «Ai ye la nde la, waati natɔ ai ti Fa batola koyinkɛ ɲin na, wala Jerusalɛmu. 22Aile Samarikailu, ai ye fen batola ai ma fen mɛn lɔn. Andeilu, Yahudiyailu, an ye fen de batola, an ka fen wo lɔn, ka a masɔrɔn kisi ko bɔni Yahudiyailu le rɔ. 23Awa, waati natɔ kɔnin, a ra se an ma, Alla batola bɛrɛ bɛrɛ ri Fa bato a sɔnɔmɛ ɲuma la a ni tuɲa la, baa Fa ye mɔɔ wo ɲininna mɛn di kɛ a batola bɛrɛ bɛrɛ ri. 24Alla ye Nii de ri, a ni bɛɛ mɛn ye a batola ka kan ka a bato sɔnɔmɛ ɲuma la a ni tuɲa la.» 25Muso ka a fɔ Isa yɛ ko: «N ka a lɔn ko Mɔɔ Suwandinin a natɔ, mɛn ye kilila Mɔɔ Ɲenematɔmɔnin. A wa na, a ri a bɛɛ ɲafɔ an yɛ.» 26Isa ka a jabi: «Nde mɛn kumala i yɛ mɛn de ri.»
27Waati wo la a la karandenilu kɔsɛtɔla le tɛrɛ. Ii kabannakoyara ka Isa yen kumala Samarika muso yɛ. Kɔni, mɔɔ si ma a maɲininka ko: «I ye nfen kɛla wa?» Ni wo tɛ, «Nfenna i ye kumala muso ɲin yɛ?» 28Awa, muso ka a la jitafen bila yɔrɔ wo rɔ i kɔrɔkɔrɔ, ka i kɔsɛ so kɔndɔ. A ye taminna a fɔla mɔɔilu yɛ ko: 29«Ai ye na a ragbɛ. N da ɲɔɔn bɛn cɛɛ do la, a ka a fɔ n yɛ n da fosi kɛ, a ka wo bɛɛ ɲafɔ. A ye Mɔɔ Ɲenematɔmɔnin de ri, wo rɔ wa?» 30Mɔɔ le ye bɔla so fan bɛɛ rɔ ka na Isa ma.
31Waati wo rɔ, Isa la karandenilu ka a madiya ko: «Karanmɔɔ, dɔɔnnin kɛ.» 32Kɔni Isa ka a fɔ ii yɛ ko: «Damunin fen do ye n bolo ai ma mɛn lɔn.» 33Wo rɔ, a la karandenilu tɛrɛ ye i ɲɔɔn maɲininkala ko: «Mɔɔ le nara dɔɔnninta di a ma wa?»
34Isa ka a fɔ ii yɛ ko: «N balo ye mɛn di: mɛn ka n nana n ye wo sawo kɛ, fo n ye wo kɛ ka a ban. 35Ai ye a fɔla fanan ko: ‹Yani karo naanin, ko suman nadan waati le wo ri›, kɔni nde ye a fɔla ii yɛ ko: Ai la ɲa lɔ. Ai ye suman tɔnsɔn mafɛne sɛnɛ rɔ. Suman ka waati ra se. 36Mɛn ye suman kala, wo ye a sara sɔrɔnna sisen. Ii mɛn ye ladɛnna, woilu ri ɲenemaya banbali sɔrɔn ten. Wo rɔ, sifoyila ni sumankala ri sɛwa i ɲɔɔn fɛ. 37Nba, tuɲa le sanda wo ri: ‹Do ye foyili kɛla dogbɛrɛ ri na sumanka kɛ.› 38N da ai lana sumanka diya mɛn ai ma a baara kɛ fɔlɔ. Doilu ra baara kɛ, a ni ai ra tɔnɔ sɔrɔn woilu la baara la.»
39Nba, Samarika muso wo wara sereya bɔ sokɔndɔ mɔɔilu yɛ ko: «N ka ko mɛn kɛ kɔrɔman, cɛɛ wo ka wo bɛɛ fɔ n yɛ.» Wo le kosɔn, Samarika siyaman lemɛniyara Isa ma. 40Wo le rɔ, Samarikailu nara Isa tɛrɛn ye tuma mɛn na, ii ka a madiya ko a ye waati do kɛ ii wara. Isa sɔnda ka tele fila kɛ ii wara ye. 41Nba, mɔɔ siyaman gbɛrɛilu lemɛniyara a ma a jɛrɛ la kumakan kosɔn. 42Ii ka a fɔ muso yɛ ko: «Fɔlɔfɔlɔ an lemɛniyara a ma i la kumakan de la gbansan, kɔni sisen an da a la kuma lamɛn fanan ka la a la. An lana a la ko tuɲa le. An ka lɔn ko a ye Kisiba le ri, mɛn di se dunuɲa bɛɛ kisila.»
Isa ka ɲɛmɔɔba la dencɛ lakɛndɛya
43Tele fila taminnin kɔ rɔ Isa bɔra yɔrɔ wo rɔ ka a wa Kalile. 44(A jɛrɛ ka kuma ɲin sereya ko Alla la nabi tɛ bonyanin a jɛrɛ la jamana kɔndɔ.) 45Kɔni ni Isa sera Kalile, Kalilekailu ra a labɛn kun yɛ. Nba ii ra wa Jerusalɛmu Taminkunna Sali kɛ diya, wo rɔ ii tun ka a yen Isa ka ko mɛnilu kɛ.
46Isa ka a kɔsɛ Kana, Kalile mara rɔ. A tun ka ji yɛlɛman so mɛn kɔndɔ ka a kɛ rɛsɛnji ri. Ɲɛmɔɔ tɔnɔman a dencɛ ma kɛndɛ Kapɛrinahumu so kɔndɔ. 47Ɲɛmɔɔ wo tɛrɛ ye kuma mɛnna ko Isa ra na ka bɔ Jude mara rɔ ka na Kalile mara rɔ. Wo rɔ a wara ka wa Isa tɛrɛn ka a madiya ko a ni na Kapɛrinahumu ka a dencɛ lakɛndɛya, ka a masɔrɔn a faatɔla tɛrɛ. 48Isa ka a fɔ ko: «Ai ye a fɛ ka tɔɔmasere yen, fen mɛn ye kabannako ri. Ni wo tɛ, ai ti lala n na.» 49Ɲɛmɔɔ wo ka a fɔ ko: «N maari, na n wara, yani n dencɛ ye faa.» 50Isa ka a fɔ a yɛ ko: «Wa i wara. I dencɛ ra kɛndɛya.» Cɛɛ wo lara Isa la kuma la ka i kɔsɛ.
51A tɛrɛ ye silala tuma mɛn na a la jɔnilu nara a kun kɔrɔ bɛn. Ii ka a fɔ a yɛ ko: «I dencɛ a kɛndɛ le tɛrɛ.» 52Ɲɛmɔɔ ka ii maɲininka ko: «A kɛndɛyara waati ɲuman?» Ii ka a jabi: «Kunun tele tala a ra tamin waati kelen ɲɔɔnna a fari sumara.» 53A fa hankili bilara ko Isa ka kuma fɔ a yɛ waati wo le la ko: «I dencɛ ra kɛndɛya.» Ɲɛmɔɔ a lara Isa la, a ni a denbaya bɛɛ.
54Nba, Isa ka tɔɔmasere kabannako filana wo kɛ Kalile a bɔ kɔ rɔ Jude.
دیاریکراوەکانی ئێستا:
YUH 4: AKS
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/