Máciya 21
21
Yéesu li anoken li ésukayi yata Yeelusalem
(Maak 11:1-11; Lík 19:28-40)
1Nan Yéesu li kúgoomaku, buko báliiŋe li ésukayi yata Betifaase li huyuuyahu hata unuunukenawu wan koonemuu Olíibiye, Yéesu li áhooñul bukan kúl̥uba li kúgoomaku koola min aboñiil, 2aaniil:
— Jijow boot li ésukayi yammuu hákiluul. Nan jommuu jíliiŋ, fan jiyaan jijuk asum ata hulaaha makoki. Jíl̥el̥ul bo ban li jíŋalulom bo. 3An alobuulumuu wah, li joonool: «Amaaŋenawu joke li bo». Fan ayaan akat bo min bubil.
4Wahawu unwu ubabbaj loon afulofetawu alob womuu, nan aanumuu:
5«Joon kata Siyoŋ:
“Jijuke, áyiiyawu ooluul ummu li ebil boot booluul,
ájoobiye buyinum, malemboole li asum aale,
li hulaaha hata asum, hubuk hata asum aale#Esay 62:11; Sakali 9:9; Saŋ 12:15.”»
6Muñeˈe kúgoomaku kúl̥uba li kujow kúliiŋ, li kukaan loon Yéesu alobiilumuu. 7Li kúŋalul asumawu li hulaahaahu. Ban li kuŋa’ wañawu wooliil kutal li úsolawu wata bo, min Yéesu alako ló. 8Bukan kameeŋe li kutal wañawu wooliil li bútinabu. Kaabuku li kúfalenul waan li unuunukenawu, kukaan li bútinabu. 9Bukanabuku kayabumuu Yéesu hákil, li kákibbenoolumuu li kunaak kúwoolen koon:
«Hosanna! Usalaal Añiilawu ata Dayit!
Ateemit ajow ásooniyen anawu abilummuu li kajawaku kata Amaaŋenawu!
Hosanna Ateemit ata haatiya tiya#Ukijenawu 118:25-26!»
10Nan Yéesu áliiŋumuu Yeelusalem, ésukayi feh li écuh min kunaak kugel̥l̥en koon:
— Kama láalu ayi?
11Búsukabu banabumuu li akila li boon:
— Laalu afulofetawu Yéesu. Nasalet láfummulo, li etaamayi yata Gálile.
Yéesu li akesoo kújulawaaku li Eluufayi yata Ateemit
(Maak 11:15-19; Lík 19:45-48; Saŋ 2:13-22)
12Fúlum tó, Yéesu li anoken li Eluufayi yata Ateemit áliiŋ, li akesoo bukanabuku kalako dómuu kájulaaku li hunoomahu. Ban li áhoolul sitaabulasu sata kalakomuu kawecekoolaku kata sídalamasu, li kúbahumaku kata kalakomuu kájulaaku kata síleebaanasu. 13Yéesu li aaniil:
— Hulimahu hata Ateemit hoone: «Eluufayi yúmbaam fan ehooñi eluuf yata kal̥aw.#Esay 56:7; Selemi 7:11» Bale bukuluul li jilaañen yo elako kawokaay kata ékuu.
14Bukan káfuume li bukan kakaje li kubil kutook Yéesu li Eluufayi yata Ateemit, li afakeniil. 15Bale nan huhaanaahu hata élambaayi li kaliikenemuu ésukayi Eluwaayi yata Móyiis kujukumuu min Yéesu akaanumuu jáahaleni, li min foof bañiilabu bunaake bulobumuu butiya li Eluufayi yata Ateemit boon: «Hosanna! Usalaal Añiilawu ata Dayit!», súumutiil.
16Muñeˈe li kugel̥l̥en Yéesu koonool:
— Lujame min kulobemuu?
Yéesu li aaniil:
— Lijame feh. Kama jijangawut kulimaku kata Ateemit kaanumuu:
«Lújiji bañiil batit li kaloŋumuu li kalaah li kusali kasal kata mal̥egen#Ukijenawu 8:3.»
17Fúlum tó, Yéesu li akatiil to min áfu’ li ésukayi ajow boot Betani ajow aŋot bo.
Sembe sata káyinen
(Maak 11:12-14, 20-24)
18Muñeˈe li bújomabu, Yéesu li alako élaañul boot li ésukayi, bucaa li bujokool. 19Nan alakomuu ejowayi, li ajuk bul̥el̥u li bútinabu. Li ajow boot to. Nan áliiŋ tomuu li ajuk li bul̥el̥uwabu etoj bale. Muñeˈe li aan bo:
— Kale, let ubaj mutiñaay boot nanoonan!
Bul̥el̥uwabu li buyaan busay. 20Nan kúgoomaku kata Yéesu kujukumuu loon muñaˈa, li kusego ŋáa’ min koon:
— Kama buu nokoole bul̥el̥uwabu umbu li buyaan busay to muñowu hi’?
21Yéesu li aaniil:
— Li mal̥egenamu fan ilobuul, jibajeenumuu káyinen ban jíwettoolut, let mantee fan jiyili jikaan wahawu wan ikaanumuu bul̥el̥uwabu umbu bale. Bale fan jiyili foof joon huyuuyahu unhu, «Uyinno taatu ujow ulo li husamuwahu,» fan hukaan mo. 22Ban wahoowah feh wan jil̥awe Ateemit li káyinen ló, fan jibaj wo.
Kakaañenaku kata Yéesu
(Maak 11:27-33; Lík 20:1-8)
23Muñeˈe Yéesu li ánokenul li Eluufayi yata Ateemit, áliiŋul li alako ló kaliiken ésukayi Hulimahu hata Ateemit. Huhaanaahu hata élambaayi li kunahaanaku kata ésukayi, li kúkoojulool min kugel̥l̥enool koonool:
— Li kakaañen kay lúkaanume wahawu unwu? Ban ayi aseni kakaañenaku unku?
24Yéesu li aaniil:
— Injé foof boot min igel̥l̥enuul hulim hano bale. Jilobom homuu, ínje foof fan ilobuul li kakaañen kay líkaanume wahawu unwu. 25Kama ayimaa asene Saŋ kakaañen kata kábatiise bukan? Mantee Ateemit, mantee bukan?
Muñeˈe li kulako to búwonnoo min koon:
— Oonaamuu, «Ateemit», fan aanolaal: «Kama wáa újimuu jíyinenut li Saŋ?» 26Bale oonaamuu, «Bukan kusenool ko», lootaale úkoliyaal búsukabu, mata foofiil feh kujoojok Saŋ loon afulofet.
27Muñeˈe li koon Yéesu:
— Jihaasut.
Yéesu li aaniil:
— Kama ínje foof let ilobuul li kakaañen kay líkaanume wahawu unwu.
Yéesu li aŋa’ bañiil búl̥uba akaan bukittenoolum
28— Muñowu buu jiyinoole li bukittenoolumabu umbe? Bile baj ánayine abaje bañiil búl̥uba báyine. Li aan átinaalawu: «Añoolom, ujow ulok síyaat li bul̥ibabu bata úbiiñawu.» 29Añiilawu li aanool: «Ifañut.» Bale li fiyo jakee, li ajok li ehaaseen min ajow bulokabu. 30Fúlum tó, ánayinaawu li alob añoolool aahu wahawu wanolawu. Añiilawu li aanool: «Fan ijow, amaaŋen.» Bale abilut ajow. 31Muñowu ayi li buko kúl̥uba akaanumuu wahawu wan atuubawool afañumuu?
Li koonool:
— Atínaalawu.
Yéesu li aaniil:
— Li mal̥egenamu fan ilobuul, bukanabuku kayabemuu búhal li bukanabuku káfulowe bomuu muñaˈa fan kujanduul kunoken li Jáyiiyaju jata Ateemit. 32Mata Saŋ labiibil booluul min áhiisuul bútinabu bacolaabu, jíyinenut li akila. Bale bukanabuku kayabemuu búhal li bukanabuku káfulowe bomuu muñaˈa kúyinenyinen li akila. Ban maayeet nan jijukumuu wahawu unwu, jijokut li ehaaseen min jíyinen li akila.
Yéesu li aŋa’ kuloka li bul̥ib bata úbiiñ kál̥afute akaan bukittenoolum
(Maak 12:1-12; Lík 20:9-19)
33— Jijanten bukittenoolum bakee: Bile baj an ata etaam al̥uke úbiiñ li bul̥ib. Nan al̥ukumuu úbiiñawu aban, li ateef hukalab áwooñen bul̥ibabu. Ban li awok tan ammuu anaak al̥uuten kúul̥aku kata úbiiñawu, ban foof li ateef káfooyum kagimbe. Nan abanumuu feh, li akat bul̥ibabu li kuŋen kata kuloka úbiiñ min bil kunaak kucaamool to joola, min akila ajow kañaahoo. 34Muñeˈe nan taŋayi yata kabajaku kata ébiiñayi élehenulumuu, ánayinaawu ata bul̥ibabu li aboñ kulokaabuku koola boot bata kulokaabuku kata úbiiñawu, mantee li kúsenulool joola li ébiiñayi. 35Bale nan kulokaabuku kata ánayinaawu kúliiŋumuu, kulokaabuku kata úbiiñawu li kujokiil, akee li kutekool, aahu li kumukool, áhaajutawu li kutekool kuyitik kumuk. 36Anáyinaawu ata bul̥ibabu li alaañen aboñ kuloka kukee kahaŋe mameeŋ kútinaalabuku. Bale kulokaabuku kata úbiiñawu li kumit kukaaniil loon kukaanumuu kaabuku. 37Li húbanumahu, ánayinaawu ata bul̥ibabu li aboñiil añoolool min ayinoo li aan: «Manooman fan kusuu añoolom.» 38Bale nan kulokaabuku kata úbiiñawu kujukumuu añiilawu, li kúsuumenoo koon: «Añiilawu ammuu li atowowool ummu. Jibil umukaalool min uŋalaal bútowowabu boola ukilaal.» 39Mal̥egen li kujok añiilawu kúfuletum tíyaŋ bul̥ibabu, ban li kumukool. 40Muñeˈe nan ánayinaawu ata bul̥ibabu bata úbiiñawu ammuu li álaañul, buu laate akaan kulokaabuku umbuku kata úbiiñawu?
41Li koonool:
— Fan ámukikoo kulokaabuku umbuku kata úbiiñawu kúl̥afutaaku. Ban li aŋa’ bul̥ibabu bata úbiiñawu asen kuloka kukee kooken, kaate kunaak kusenool joola li ébiiñayi taŋayi yata yo.
42Yéesu li aaniil:
— Kama jímusut jijanga li Hulimahu hata Ateemit haanumuu:
«Huyitikahu humum ho han kuteefaabuku koonumuu hujakut,
ho hubile huhaŋumuu májaliŋ kaaku feh#Ukijenawu 118:22; Esay 8:14; 28:16; Maak 12:10; Lík 20:17; Bakaanelabu 4:11; Kata Lom 9:33; 1 Fiyeel 2:6.»
Laalu búkaanum bata Amaaŋenawu,
wah wásuume ŋáa’ bajuk li kúkilolaal!
43Wahawu unwu újimuu fan eenuul, Jáyiiyaju jata Ateemit fan jiyabi li kuŋenuul, min jiŋali sen bukan kaate kútuul Hulimahu hata Ateemit.
44An alomuu li huyitikahu unhu, fan ayiisoo feh, ban huyitikahu hulomuu li an, fan hugunjool feh#21:44 Síliibal sakee sihaan sibajut hulimahu unhe.
45Nan huhaanaahu hata élambaayi, li kufaaliisiyeŋaku kujamumuu bukittenoolumabu boola, li kúnaanum koon Yéesu buko lalobe li buko. 46Muñeˈe li kulako huŋes bútin boot min kujok Yéesu, li kúkoli búsukabu, mata bukanabuku kujokoojok loon afulofet.
دیاریکراوەکانی ئێستا:
Máciya 21: cskDBL
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2008, Wycliffe Bible Translators, Inc. All rights reserved.