Yoano 7
7
1Habahwile yaya myanda Yesu badi akindakana mu Ngadileo: tabadi akindakana mu Yudea, ha mwanda wa Bena Yudea babadi abakyebe kumwiha. 2Bidibwa bia Kusehela bia ku Bitanda bibadi hehi. 3Bakwabo n’e babamulungwile’shi: Katuka kuno, wende mu Yudea’shi, bana bobeba-bukishi bakamone bikitshino biobe biokitshi. 4Takwi muntu sungangumune akitshi mwanda ku bufiefi, su akyebe kwiukyibwa kwi bantu. Su okitshi bino binyi, eleshe kwi be-hano-ha-nsenga. 5Mwanda bakwabo ba munda tambamukumine. 6Biabia Yesu bebambile’shi: Kihindji kiande takiabandjile kufika; anka kihindji kienu ki kwanka mafuku oso. 7Ba hano-ha-nsenga tabeuku kwikala nenu lukuna: anka be nami lukuna mwanda nebasokola’shi, fbikitshino bienu bibubi. 8Anwe kakaminei ku bino bidibwa, tanyende binobino ku bino bidibwa; mwanda kihindji kiande takiabandjile kukumbana. 9Habahwile kwakula yino misambo kwabadi, tabashalele mu Ngadileo.
10Anka habayile bakwabo ne, biabia E namu bakamine, tamwende ha toka, anka bu mu bufiefie. 11Biabia Bena Yudea baba mukimbile ku Bidibwa bia Kusehela abeihushene’shi; E kwi kunyi? 12Kubadi bangi be bungi babadi abaununa ha mwanda we. Bangi’shi: E muntu ebuwa: bangi namu’ ’shi: Ooo, ’ōngola bantu bisumanga. 13Anka tambamu temuna ku meso kwa bantu, mwanda badi aba tshinyi Bena Yudea.
14Binyibiabia, Yesu bakamine mu Ntempelo, hankatshi ha Bidibwa bia Kusehela, balambukishe. 15Biabia Bena Yudea babakanyine’shi: A! uno muntu mwiukye mikanda bi kunyi kwa shī mulambukishwe. 16Yesu bebalulwile’shi: Lulambukisho lwande ta ndwande, ny’anka lwa bantumine. 17Ese muntu, su akakitshi mulombene’ shimba die, akashingula lulambukisho luno, su ndw’Efile Mukulu, su neisambila ami na mwinyi. 18E akwila na mwinyi, akimbi ntumbo ye na mwinyi: ank’e akimbi ntumbo ya bamutumine, e nga binyibinyi, te na yishīyilulame munda mwe. 19Mosesa tamwinuhe mikanda ya milangilo su? anka takwi muntu sungangumune’nu eyikitshi. A ha mwanda kinyi wa nukyebe kuñihaila? 20Bantu abamwalulwile’shi: We na mukishi munda: A mbanyi abakukimbi kukwiha? 21Yesu bebalulwile’shi: Nakitshine mufubo umune’nka, n’anwe boso nubeukanya. 22Binyibiabia, Mosesa benuhele mwanda wa kisale (tankia kwi Mosesa, anka nkia bashenukulu) n’anwe mwifuku dia Sabado anusala muntu. 23Su muntu musale h’efuku dia Sabado, kutshina’shi: kishila kia Mosesa takikashulwa; nwi nami nsungu su, mwanda nahashishe muntu h’efuku dia Sabado? 24Tanuhwandjikishanga muntu bu bia numumono kumpala, anka hwandjikisha kihwandjikisho kia kululama. 25Henyihaha bangi ba Yelusalema babaihwishe’shi: Au tangwinyi abakimbila kwiha’u? 26Anka, talanga, husha bu biakula na matalwa, n’abo tabamwalula mwanda. A! batontshi abeuku binyibinyi’shi uno nyi Kidisitu na Mwinyi su? 27Sunga biabia, atwe atumwiuku kubafikile: anka ahafiki Kidisitu takwi muntu akeuku kwafiki. 28Binyibiabia Yesu belele musase mu Ntempelo, mubadi mulambukisha’shi: Anunyiuku, anwiuku namu kunafikile: nkimwifwile anka bantumine nga binyibinyi, E tanumwiuku. 29Anka’mi nyimumwiukye, mwanda nyi mufikye kwadi, n’E bantumine. 30Biabia abatompele kumukwata: anka takwi muntu bamukumine masa, mwanda kihindji kie takibadi kibande kukumbana. 31Bantu be bungi babamukuminyine, ababambile’shi: Ahafiki Kidisitu, akakitshi bilengeleshi bikile’bi abikitshi uno su?
32Bafadiseo abahushishe bia bamununanga bino bintu ha mwanda we; na Bafadiseo na batshiite bakata abatakwile bampulushi kumukwata. 33Binyibiabia Yesu bebalungwile’shi: Nyi anka nenu kihindji kihela, biabia nyende kwi bantumine. 34Anukankimbi, tanuka ’mono, na kwatulji anwe tanwiuku kufika. 35Biabia Bena Yudea tabeakushena munkatshi mwabo’shi: Akēnde kwi kunyi kwa tushatwiuku kumumo no? akēnde kwi bakwetu abahalakene munkatshi mwa Badjentaila, akalambukisha Badjentaila su? 36Au uno mwanda wi na minyi wambashi: Anukankimbe, tanuka’ mono; na kwandji tanukafikye kwanka?
37Kwifuku dia kunfudilo, adia dikata dia Bidibwa bia Kusehela; Yesu baimene bēlele musase’shi: Su muntu e na nyota, afikye kwandjimi, atome. 38Ese ankumina, bu bibafundjibwe bibakwile, munda mwe amukatuku ngui yamema a muwa. 39(Anka uno E badi akula wa Kikudi-E-Selele, badi akikyebwa kuhebwa kwi bakumukumina, mwanda Kikudi-E-Selele badi tabandjile kufika, mwanda Yesu tabadi mutumbishibwe.)
40Binyibiabia, bantu be bungi hababahushishe uno mwanda’shi: Binyibinyi E ngwinyi mutemukye. 41Bangi’shi: Uno nyi Kidisitu. Anka bamo namu’shi: Aa! Ki disitu akatuku mu Ngadileo su? 42Bifundjibwe tabibetulungwile’shi: Kidisitu batukile ku kekulu ka Dafidi, mu kibalo kia Beteleme, nyi kubadi Dafidi su? 43Biabia kulāmuna kubatukile munkatshi mwabo ha mwanda we. 44Bangi babakyebele kumukwata, anka muntu tamumukume masa.
45Henyihaha, kubafikile basalai kwi batshiite bakata na Bafadiseo, babebehwishe’shi: A nkinyi kianushi befikile n’E? 46Bampulushi babebalulwile’shi: Takubadi muntu kala mpa na binobino, euku kwakula hamune na uno muntu.
47Biabia Bafadiseo bebalulwile’shi: Anwe namu bahu kwinongola su? 48Bamo ba mu batontshi betu, na ba Bafadiseo babamukumina su? 49Anka bantu ba kina kibumbu kishī kiukye mukanda wa milangilo nkielwe mulua.
50Nikodema, yawa bafikile kwi Yesu bufuku, biabadi mwikale a ku ba’nka, bebalungwile’shi: 51Milangilo yetu ayitshibi kimu kia muntu anushī ahushishe, na kwiuka mwanda wadimukite su? 52Babamwalulwile’shi: Obe namu we a ku Ngadileo? Okimbe, okamono’shi: Ku Ngapoile takwa kutuka mutemukye. 53Biabia muntuna muntu ibabālukile muntu kwe, muntu kwe.
دیاریکراوەکانی ئێستا:
Yoano 7: NTLK52
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 1952 Alliance Biblique de la République Démocratique du Congo