Luka 17
17
Unushi, uneki u ka̱ɗu, n ulinga
(Mat. 18:6-7; 18:21-22; Mar. 9:42)
1Yesu u danai mukumitoni n ni, “Ili i na i tsu zuwa uma a yaꞋan unushi, mayun ɗa i ta̱wa̱. Amma atakaci i ta̱ a kuvana vuza na u tsu zuwa i ɗa i yaꞋan. 2Wi ta̱ a kulaꞋa a shiyaka yi n kutali e kuɗeku, ka̱ta̱ a vakangi a mala u kuwa̱ punu, an wa zuwa muku n wawaꞋa n nam pa n yaꞋan unushi. 3Saka ka̱ci ka̱ nu.
“Vuza nu u yaꞋan baci unushi, dansuka yi. U shika̱ baci unushi, cinukpaka yi u ɗa. 4U yaꞋanka wu baci unushi ali kucindere a kanna ke te, ɗa kpamu u bonoi wa̱ nu ali kucindere, n u danai, ‘N shika̱ ta̱ unushi,’ cinukpaka yi.”
5Ɗa azusuki a danai, “Vuzagbayin, doku uneki wa̱ a̱ɗu u tsu!”
6Ɗa wu ushuki, “Yi baci n uneki u ka̱ɗu ko kenu ci icuꞋu i musta,† vi ta̱ a kufuɗa va dana maɗanga mo korondo ma nam pa, ‘Muɗa̱, ka̱ta̱ va bana vi shikpa̱ ka̱ci ka̱ nu a mala.’ Maɗanga ma mi ta̱ ta na a kupanaka wu.
7“Vuza ɗa̱ yoku wi baci n kagbashi a kuyaꞋanka yi vicimba ko kaguɓa ka nlala, ana wu uta̱i a kakamba, yi ɗa̱i u kudana yi? Wi ta̱ a kudana yi, ‘Ta̱wa̱ na vu da̱sa̱ngu vi lyaꞋa ili’? A̱Ꞌa̱! Ta nannai ba. 8Sai biꞋi u yaꞋanka vuzagbayin vi ni u lyaꞋa, ka̱ta̱ u doku u soꞋo. Ayin a nan lo yeve u lyaꞋa, ka̱ta̱ u doku u soꞋo. 9Wi ta̱ a kucikpa kagbashi ka, adama a na u yaꞋin ili i na u danai ni u yaꞋan? Ta nannai ba. 10A̱ɗa̱ kpamu dem, ayin a na baci i yaꞋin ili i na a danai ɗa̱ i yaꞋan, u gaꞋan ta̱ i dana, ‘A̱tsu aza a ulinga a ɗa koci, ci yaꞋan ta̱ i na i gaꞋin ci yaꞋan.’ ”
O potsokpoi nkutu kupa
11Yesu a nwalu a kubana a Urishelima ɗa u yawai a uteku u mere ma Samariya† n Ga̱lili. 12A̱yi a kuꞋuwa a̱ likuci, ɗa nkutu kupa n gasai n a̱yi. Amma ɗa a shamgbai daꞋin. 13Ɗa e ɗekei n ka̱la̱ka̱tsu ka̱u, “Yesu Vuzagbayin, pana asuvayali a̱ tsu.”
14Ana we enei le, ɗa u danai, “Banai i yotsongu ka̱ci ka̱ ɗa̱ u anan ganu.” Ele a̱ ka̱tsuma̱ ka nwalu, ɗa o potsoi.
15Vuza te vi le, ana we enei u potso ta̱, ɗa u bonoi wa̱ ni, n u cikpai Ka̱shile n ka̱la̱ka̱tsu ka̱u. 16U kuɗa̱ngi e kelime ke Yesu, ɗa u cikpai ni kpamu, a̱yi ta na vuma vu Samariya ɗa.
17Ɗa Yesu we ecei, “A̱ɗa̱ uma kupa ɗa i potsoi ba? Te uma kuci tamkpamu i? 18Babu vuza na u kubono wa cikpa Ka̱shile sai komoci ka nam pa?” 19Ɗa u danai vuma va, “Ɗenga̱ vu wala. Uneki u ka̱ɗu u nu u potsokpo wu ta̱.”
Kuta̱wa̱ ku tsugono tsu Ka̱shile
(Mat. 24:23-41)
20Kanna ke te, Afarishi a banai u Yesu adama a na e ece yi ko wana ɗai tsugono tsu Ka̱shile tsa̱ kuta̱wa̱. Ɗa Yesu wu ushuki, “N kindana ku ɗa̱ ku ɗa i kene tsugono tsu Ka̱shile† a̱ kuta̱wa̱ ba. 21Ya kufuɗa kudana, ‘Tsu ɗa na,’ ko ‘Tsu ɗa na ɗe,’ ba, adama a na ta punu ci n a̱ɗa̱.”
22Ɗa u danai mukumitoni n ni, “Ayin i ta̱ lo a̱ kuta̱wa̱, ana i kuyongo a kuciga ye ene kanna ka na Maku ma Vuma u kubono, amma ye kene ba. 23Uma a kudana ɗa̱ ta̱, ‘A̱yi ɗa na ɗe,’ ko ‘A̱yi ɗa na.’ Ka̱ta̱ yu uta̱ ko i tono le a kubana a̱ ubuta̱ u yoku ba. 24Maku ma Vuma mi baci o kubono, wi ta̱ a kuyaꞋan an ulaɗi u na u tsu laɗa maru-maru ra̱ka̱. 25Amma u kusoꞋo ta̱ atakaci biꞋi a̱ ili n a̱bunda̱i, ka̱ta̱ kpamu uma a anana a nam pa a iwan yi.
26“Tsu na ili i yaꞋin a ayin a̱ Nuhu#Ugi. 6:5-8. ta kpamu i kuyaꞋan nannai a ayin a Maku ma Vuma. 27Uma a kulyaꞋa n o soꞋi n a yaꞋin yolo, ali a kubana a ayin a na Nuhu u uwai a kpantsu. Ɗa ta na mini ma̱ ta̱wa̱i, ɗa mu unai le ra̱ka̱.
28“Derere ɗa n ayin o Lotu,† uma a kulyaꞋa n o soꞋi, kutsula n e dengei, kucimba n a maꞋi. 29Amma, kanna ka na Lotu u ka̱sa̱kpa̱i Sodom,† akina n farinwuta a̱ cipa̱i gaɗi, ɗa a unai le ra̱ka̱.#Ugi. 18:20—19:25.
30“Ta kpamu ka kuyaꞋan nannai a kanna ka na Maku ma Vuma ma̱ kuta̱wa̱. 31A kanna ka nan lo, babu vuza na wi pulai ɗevu m kpaꞋa ka̱ta̱ u bono a asuvu adama a na u taɓula ucanuku u ni punu.#17:31 Luka u danai, “uma gaɗi vu kunu.” Ubuta̱ u na Yesu u yongoi, iꞋuwa ya, a yaꞋan ta̱ i ɗa n ubuta̱ u na vuza u kukumba gaɗi adama a na u yongo ɗe a kuvuka. Ta kpamu nannai, babu vuza na u kuyaꞋan a kashina, ka̱ta̱ u dana wi ta̱ o kubono kuɗika ili i yoku. 32Ciɓa n vuka vu Lotu!#Ugi. 19:26. 33Vuza na de dem wi a kuciga wuma u ni, wi ta̱ a kunamba u ɗa. Vuza na kpamu u iwain u ɗa, wi ta̱ a̱ kuciya̱ u ɗa. 34N dana ɗa̱, n kayin ka nan lo, uma e re a kuyaꞋan ta̱ ivaꞋin a̱ kajiba ke te, vuza te u kuyaꞋan ta̱ uɗiki, ka̱ta̱ vuza te wo okpo. 35A̱ma̱ci e re a kuyaꞋan ta̱ a kuyaꞋan kiya a̱ ubuta̱ u te, vuza te u kuyaꞋan ta̱ uɗiki, ka̱ta̱ vuza te wo okpo. [ 36Uma e re a kuyaꞋan ta̱ a kashina, vuza te u kuyaꞋan ta̱ uɗiki, ka̱ta̱ vuza te wo okpo.]”
37Ɗa e ecei, “Vuzagbayin, te ɗai ili i nam pa i kuyaꞋan?”
Ɗa wu ushuki le n kansa, “Ubuta̱ u na baci ka̱kuwushi ki, ta lo asakali a ci shana.”
دیاریکراوەکانی ئێستا:
Luka 17: asgNT
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2012 Wycliffe Bible Translators, Inc. All rights reserved