Yahaya 10
10
Agisana a maguɓi
1Yesu u danai, “N dana ɗa̱ mayun, oboki n aza a̱ ma̱ga̱la̱ka̱ a ɗa koci a ciga baci a uwa a̱ ubuta̱ u na nlala mi ushiyi, a tsu uwa n utsutsu ba, amma a kumba m mashilya. 2Vuza na u tsu uwa n utsutsu a̱yi ɗa maguɓi ma nlala ma. 3Vuza na wi a kinda utsutsu u tsu ɓa̱yuwa̱ka̱ yi ta̱. Ka̱ta̱ nlala m pana ka̱la̱ka̱tsu ka̱ ni. U ci ɗeke ta̱ nlala n ni n ula e le ka̱ta̱ u banka le kalina. 4Ayin a na baci wu uta̱ka̱i nlala n ni ra̱ka̱, u tsu wala ta̱ kelime ke le, ka̱ta̱ ta na o tono yi adama a na e yeve ta̱ ka̱la̱ka̱tsu ka̱ ni. 5O kutono vuza yoku ba, i ta̱ a kukucikpa a suma u vuma vu nan lo, adama a na e yeve ka̱la̱ka̱tsu ka̱ ni ba.” 6Yesu u danai le agisana a nam pa, amma e yeve ili i na u ciya̱i ba.
Yesu ɗa maguɓi ma singai
7Yesu u danai le, “N dana ɗa̱ mayun: Mpa ɗa utsutsu wu nlala. 8Aza a na a̱ ta̱wa̱i cau nu mpa ra̱ka̱, oboki a ɗa n aza a̱ ma̱ga̱la̱ka̱. Nlala ma m panaka le ba. 9Mpa ɗa utsutsu, aza a na baci a uwai n ubuta̱ u va̱ i ta̱ a̱ kuciya̱ wishi, ka̱ta̱ kpamu a uwa ka̱ta̱ a̱ uta̱ kpamu a bana a̱ ciya̱ ilikulyaꞋa. 10Koboki ka̱ tsu ta̱wa̱ ta̱ koci adama a na u boko, wu una, ka̱ta̱ kpamu u la̱nga̱sa̱, amma mpa n ta̱wa̱ ta̱ adama a na n neke wuma ka̱ta̱ a̱ ciya̱ u ɗa derere mayin.
11“Mpa ɗa maguɓi ma singai. Maguɓi ma singai me ci neke ta̱ wuma u ni adama a na wi isa nlala ma. 12Vuza vu zamalinga a̱yi wi derere m maguɓi ma na mi nu nlala n ka̱ci ka̱ ni ba. Ayin a na baci we enei ma̱kunzukunzu a̱ kuta̱wa̱, u tsu suma ta̱, ka̱ta̱ u ka̱sa̱kpa̱ nlala ma uteku u le. Ka̱ta̱ ma̱kunzukunzu ma̱ gba̱ra̱ nlala ma, ka̱ta̱ a tambalukpa a kakamba. 13Vuma va u tsu suma ta̱ adama a na a̱yi vuza vu zamalinga ɗa, u ci inda kpamu nlala ma mayin ba.
14-15“Mpa ɗa maguɓi ma singai. N yeve ta̱ nlala n va̱, tsu na kpamu Dada vu va̱ u yevei mu. Nlala n va̱ kpamu n yeve mu ta̱, tsu na n yevei Dada vu va̱. N neke ta̱ wuma u va̱ adama a na m ɓa̱nka̱ nlala ma. 16Mi ta̱ nu nlala n yoku n na mi punu a ushiga u nam pa ba, sai feu n tuka̱ le punu. I ta̱ a kupana ka̱la̱ka̱tsu ka̱ va̱, ra̱ka̱ vi le kpamu i ta̱ o kubono ushiga u te m maguɓi me te.
17“Dada u ciga mu ta̱ adama a na mu ushuku ta̱ kuneke wuma u va̱, adama a na mi isa u ɗa kpamu. 18Babu vuza na u kuɗika wuma u va̱. N neke ta̱ u ɗa n ucikali u va̱. Mi ta̱ n utsura, u na n neke u ɗa, mi ta̱ kpamu n utsura u na n kisa u ɗa, uteku u na Dada u danai mu n yaꞋan.”
19Ayahuda kpamu a panakpanai adama a ili i na Yesu u danai ba. 20Ele n a̱bunda̱i a danai, “Wunla̱i u gbani-gbani u tono yi ta̱, ɗa u bonokoi ni kajarishi. Yi ɗa̱i i zuwai ɗa yi a kupanaka yi?”
21Amma aza o yoku a danai, “Vuma vu na wunla̱i u gbani-gbani u bonokoi kajarishi, u tsu dansa ili tsu nam pa ba. Wunla̱i u gbani-gbani wi ta̱ a kufuɗa kuɓa̱yuwa̱ a̱shi a̱ ka̱yimba̱?”
A iwain Yesu
22Ayin a uta̱ni a yawai, ayin a na ele a ci ciɓa n Ka̱ɗiva̱ ka AvaꞋinka† a̱ A̱Ꞌisa̱ a Gbayin a Urishelima. 23Kanna ke te, Yesu a̱ kuka̱ra̱Ꞌa̱ punu a̱ A̱Ꞌisa̱ a a̱ ubuta̱ u na e ci ɗeke Kafalaka ke Sulemanu. 24Ayahuda a kanzai ni ɗa a danai, “Ali wana ɗai va kulyaꞋa kelime n kuzuwa a̱ɗu a̱ tsu a̱ ka̱sa̱kpa̱ munla̱i, ko avu ɗa ya? Avu ɗa baci Kirisiti Kishi dana tsu magaba.”
25Yesu wu ushuki, “N dana ɗa̱ ta̱ ɗe, amma yu ushuku ba. Ili i mereve i na n yaꞋin n kula ku Dada vu va̱ i yotsongu ta̱ ko mpa ɗa ya. 26Amma yu ushuku ba, adama a na a̱ɗa̱ nlala n va̱ n ɗa yi ba. 27Nlala n va̱ n tsu pana ta̱ ka̱la̱ka̱tsu ka̱ va̱, n yeve le ta̱, o tsu tono mu ta̱. 28N neke le ta̱ wuma u babu uteku, i a̱ kukuwa̱ ba, babu kpamu vuza na u kushaɗa le e ekiye a̱ va̱. 29Dada u neke mu ta̱ ele. U laꞋa ta̱ yaba dem, babu vuza na u kushaɗa le e ekiye a Dada vu va̱. 30Mpa n Dada, a̱tsu ɗa vi te.”
31Aza e kelime a Ayahuda a̱ ta̱ɗa̱i atali kpamu adama a na a vara Yesu a una. 32Amma u danai, “N yotsongu ɗa̱ ta̱ ili i singai n a̱bunda̱i i na Dada vu va̱ u suki mu n yaꞋan. Adama a ili ye ne i ɗai yi a kuciga kuvara mu?”
33A̱ ushuki, “Ci ciga kuvara wu adama a ukuna u singai ba, amma adama a na vi yaꞋin kadanshi ki ishikushi† u Ka̱shile. Avu vuma ɗa vi koci, amma vu dana yi ta̱ derere n Ka̱shile!”
34Ɗa wu ushuki, “I yeve ta̱ ɗe a na a ɗanai a Katagarda ka Ciɗa ka̱ ɗa̱ a na Ka̱shile ka danai, ‘A̱ɗa̱ a̱ma̱li a ɗa.’#Ishp. 82:6. 35Ci yeve ta̱ ili i na Katagarda ka Ciɗa ka danai mayun ɗa ko wanai. Ɗa kpamu Ka̱shile ke ɗekei uma a nan lo a̱ma̱li, uma a na u nekei akaka a̱ ni.#10:35 Uma a na a isai akaka a̱ Ka̱shile ele ɗa Musa n aza Israila ɗe a Kusan ku Sinai. 36Tsu va̱ na, Dada u neke mu ta̱ tsa avaꞋinka ɗa u suki mu punu a aduniyan. Yi ɗa̱i i zuwai ɗa i danai n yaꞋan ta̱ kadanshi ki ishikushi u Ka̱shile ana n danai, ‘Mpa ɗa Maku ma̱ Ka̱shile’? 37Mi baci a kuyaꞋan ili i na Dada vu va̱ u cigai n yaꞋan ba, ka̱ta̱ yu ushuku nu mpa ba. 38Amma n yaꞋan baci i na Dada vu va̱ wi a kuciga n yaꞋan, nekei a̱ɗu adama a nan lo, ko yu ushuku baci n kadanshi ka̱ va̱ ba. Yi ta̱ ta na e kuyeve mayun a na Dada wi ta̱ derere nu mpa, mpa kpamu derere n Dada.” 39A cigai kuka̱na̱ Yesu kpamu, amma ɗa u fa̱ta̱tsa̱i.
40Ɗaɗa u lazai u banai u pasai u Kuɗolu ku Urdu sai a̱ ubuta̱ u na Yahaya u gita̱i kuyaꞋanka uma kusumbu ka akucina, ɗa u shamgbai ɗe. 41Uma n a̱bunda̱i a banai wa̱ ni. Ɗa a̱ ka̱na̱i kudananai, “Yahaya u saꞋwa kuyaꞋan ili i mereve ba, amma ili ra̱ka̱ i na Yahaya u danai adama a vuma vu nam pa mayun ɗa.” 42Ɗa uma n a̱bunda̱i a na i ɗe e nekei a̱ɗu n Yesu.
دیاریکراوەکانی ئێستا:
Yahaya 10: asgNT
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2012 Wycliffe Bible Translators, Inc. All rights reserved