Texte de la Bible: Azumeina © Alliance Biblique du Tchad, 1999 Enregistrement du Nouveau Testament Azumeina ℗ 2012 Hosanna

Azumeina - 2012 Edition (NT) Drama

Azumeina Bible © Alliance Biblique du Tchad, 1999.

Teyofil, suma ablaud’a a hal lovota á b’ir yam ahle suma a le adigeina. Azi b’ir wa ahle suma azi wazi ki irazi kad’u tinda dei na, azi ni suma a mbut suma a tchi wal zlad’a hAlonid’ina. Azi vami ad’u ahle ndazina mi. Ki tchetchemba, sama ngolâ, Teyofil, an tan ni hal ad’u ahle suma lena woi tetet kad’u tinda dei, an wala ni djivid’a iran á vang ad’ud’a yam ahle ndazina pet mi. An le hina kayam ang wäd’u gagazid’a ki hat ta a had’angzid’a.

Kur atchogoi d’a Herot namul ma ngolâ yam ambas sa Jude-d’id’a, ma ngat buzuna mi nga, simiyêm ala Zakari. Mam nad’u ades ma ngat buzuna hi Abiya-na. Amamba simiyêt ala Elizabet. Ndat nad’u andjafâ hi Aron ma ngol ma ngat buzunina mi. Azi djak ni suma d’ingêrâ avok Alona, a ge yazi kä ad’u gata ki vun ma hed’a hi Salad’ina pet. Wani azi vut nga gor ri, kayam Elizabet ti ni gendreged’a, azi djak a djeng mamara mi.
Kur bur máma Zakari nga mi le sun mam mba ngat buzuna avok Alona, kayam ni nguid’a hades mama á led’a d’igi suma ngat buzuna a nga le na. A manam ki togina á kal kur yima a tinim iram vama hi Salad’ina á ngal dubang ma his djivid’ina. Ablau suma a nga tchen Alona abu ata yima mam nga mi ngal dubang ma his djivid’ina.
Ata yi máma, malaikana hi Salad’ina mi nde woi ir Zakari, mi nga tchola abo ma ndjufâ hi yima a minim ki lora á ngal dubang ma his djivid’ina kuana. Ata yima Zakari mi wuma, vunadigam mbi pat fek abo mandarâ.
Wani malaikana mi dum ala: Zakari, ang le mandar ri, kayam Alona mi hum tchen manga. Amanga Elizabet mba d’i vut gorâ, ang mba tinim simiyêm ala Jean. Ang mba le furîd’a ngola, suma ablaud’a a mba le furîd’a yam vut mamba mi. Mba mi mbut sama ngolâ avok Salad’a, mba mi tche süm guguzlud’a ki süm ma ayîna d’uo mi. Mba mi oî ki Muzuk ma bei tchod’a ba na ata yima a mba vud’uma. Mba mi hulongî ki Israel-lâ ablaud’a mi Ma didina Alo mazina. Mam tamba mba mi i avogovok avor Alona ki Muzu’â kad’enga hi ma djok vun Alona Elie-d’a á zlap abuyod’a ki grod’a tu, á mba ki suma bei ge yazi kä ad’u ned’a hi suma d’ingêrîd’a, mba mi min suma yam Salad’a mi.
Wani Zakari mi de mi malaikana ala: Ahle ndazina a mba le ni nana ge? Kayam me ami kamanda djengêmi mamara da’.
Wani malaikana mi hulong dum ala: An ni Gabriel ma nga tchola avok Alona á lum sundina. Mi sununï á dang zlad’a, á mbang zla d’a djivi ndata mi. Wani kayamba ang he nga gagazid’a yam zla man nda mba d’i ndak ata yi matnid’a d’uo d’a, ang mba ngruf kiki bei de zlad’a gak ahle ndazina a le tua mbeî.
Suma tok suma a nga djup Zakari-na a le atchap kayam yam ve ngola krovo ata yima a tinim iram vama. Kid’a mi ndabud’a, mi ndak á dazi zlad’a d’i. Azi wala va nde iram ata yima a tinim iram vama. Mam nga mi dazi zlad’a kabomu, mi ar ngrufa kiki.
Ata yima bur mam ma le sunda kur gong nga kud’ora hAlonid’a dapma, mi hulong avo hatamu. Bugol bur máma, amamba Elizabet ti ve wirâ, ti ngei tat tilâ vahl. Ti dala: Salad’a mi le ki sed’en hina á pat zulona kan ndei avok suma.

Kur til ma karagayana, Alona mi sunï malaikana Gabriel kur azì ma ngol ma Galile ma a yum ala Nazarat na. Mi mba ata gor wei d’a sama a yum ala Josef ma ad’u andjafâ hi David-na nga mi d’umuta. Gor wei ndata, simiyêt ala Marie. Malaikana mi kal gevet mi dat ala: An gak depa. Alona mi vak wa sumad’a, Salad’a mi nga ki sed’egu.
Wani vunadigat ti pat fek yam zla ndata, ti djib’er kurut ala ad’u dep ndata nana ge? Wani malaikana mi dat ala: Marie, ndak le mandar ri, kayam Alona mi vak wa sumad’a. Ndak mba d’i ve wirâ, ndak mba d’i vut gorâ, ndak mba d’i tinim simiyêm ala Jesus. Mam mba mi kak ma ngolâ, a mba yum ala Alo ma sä akulo ma kal teglesâ Goroma. Salad’a Alona mba mi tinim amul ma ngolâ d’igi abum ngolo David na. Mam mba mi te leud’a yam Israel-lâ gak didin, leu mamba mba d’i dap pi.
Marie ti de mi malaikana ala: Va mama mba mi le ni nana ge? Kayam an zlap nga ki mandjuf fi.
Malaikana mi hulong dat ala: Muzuk ma bei tchod’a ba na mba mi mba kagu, ad’enga hAlo ma sä akulo ma kal teglesîd’a mba d’i zlubuk yak d’igi angusâ na. Kayam ndata, gor ma bei tcho ma ndak mba d’i vud’uma, Alona mba mi tinim simiyêm ala Alo ma kal teglesâ Goroma. Wiyeka Elizabet ta a nga de kat ala: Ti ni gendreged’a d’a, ti ve nga wir gor mandjufâ ki mamarad’u. Ki tchetchemba; tilit ni karagaya. Kayam vama hle Alona abod’ina nga d’i.
Marie ti dala: An ni weid’a hi Salad’id’a. Ar mi le ki sed’en d’igi ang de na. Malaikana mi arad’u.

Ata yi máma, Marie ti tchola, ti i atogo zak kur azì ma nga yam ahina d’a yam andaga d’a Juda-d’ina. Ti kal avo hi Zakari, ti ge Elizabet depa. Ata yima Elizabet ti hum depa hi Marie-d’ina, gorâ mi tchol akulo kurud’u, Elizabet ti oî ki Muzuk ma bei tchod’a ba na mi. Ti er ad’ut akulo ala: Ndak ka Alona mi b’e vunam kak ngola kal aropma peta, Alona mi b’e vunam yam gor ma ndak mba d’i vud’uma mi. An ni nge ko ba, Salana asum ti mba avo hatan nge? Ata yima an hum dep makina, gorâ mi tchol akulo kurun ki furîd’a. Ndak le furîd’a kayamba ndak he gagazid’a yam vama Salad’a mi daksina ala mba mi le d’a.

Marie ti dala:
An nga ni gile Salad’a kurunu.
An nga ni le furîd’a yam Alo ma sud’una,
kayam mi tin iram kan an wei mam mba lulumad’a.
Gagazi, ar avok hî, suma kur atchogoid’a pet
a mba de kan ala: Ta Alona mi b’e vunam kata,
kayam Alo ma ad’engêm kal petna,
mi le vama ngolâ kanu.
Mam mi Ma bei tchod’a ba na.
Kur atchogoi d’a lara ge pet
mam mba mi we hohowa suma a nga lum mandarama.
Mi tak sun nda ad’eng nga mi lat kabomba woyo,
mi ndjoî suma a nga ki djib’er ra yam mba ad’enga kuruzina woi yayak.
Mi zut suma te yamba kä woi yam zlumiyô mazina,
mi hle yam suma lulumana akulo mi.
Mi hop suma meid’a tchazina kahle suma djivina,
mi dik suma ndjondjoîna woi kabozi hawa.
Mi mba á ndjun azong mama Israel,
mi mar nga á tak we hohou mamba woi
ata Abraham kandjavam mbi gak didin
d’igi mi hle vunam mabuyoi ngolo na.
Marie ti kak ki Elizabet go ki tilâ hindi, bugol ti hulong avo hatad’u.

Ata yima bur ma vuta hi Elizabet-na nda’â, ti vut gor mandjufâ. Ndrot sumazina ki b’oziyotna, a hum zla we hohou d’a ngol la Salad’a mi wat hohowota, a le furîd’a zlapa ki sed’et mi. Kur bur ma klavandina, a mba á ngat gorâ bayâd’a, a min á tinim simiyêm kabum ala Zakari. Wani asum ti hulong dazi ala: Nga na d’i! A mba yum ala Jean.
Azi dat ala: Sama ki simi ma hina na nga aduk b’oziyo’â d’i. Azi labozi mabum á we simi ma mam min tinimzina. Mi tchenezi agu ma tcheta, mi b’irim simiyêm kua ala Jean. Azi pet a le atchap. Ata yi máma na wat, Zakari vunam mal leyo, nga mi de zlad’a, nga mi gile Alona ki delem akulo. Suma a nga kaka gevezina pet a le mandarâ. Zla ndata i kur azì ma yam ahina d’a Jude-d’ina pet. Suma a hum zla ndatina pet, a ngom zla ndata kuruziya, a djop tazi ala: Gor máma mba mi mbut ni nana ge? Ad’enga hi Salad’id’a ti nga ki sed’emu.

Jean abum Zakari mi oî ki Muzuk ma bei tchod’a ba na, mi djok vun Alona, mi dala:
Ar ei gileigi Ma didina Alona hi Israel-lîna,
kayam mi djib’er yam sum mama á wurak kaziya.
Mi tcholei Ma Sut ma ad’engâ adigei
ad’u andjafâ hazong mama David-na
d’igi mi davok dei avun mam suma djok vun suma
mi tinizi irazi vazi kur atchogoi d’a kal leid’ina na.
Mi hle vunam á pad’ei woi abo mei suma djangûna,
á pad’ei woi ad’u ad’enga hi suma a nga noyoî woina pet mi.
Mam mba mi tak we hohou mamba woi mabuyoi ngolo,
mba mi djib’er yam vun mam ma djin ma bei ka zlad’a ba na mi.
Alona mi gun tam mabui ngolo Abraham
á pad’ei woi ad’u ad’enga hi mei suma djangûna,
kayam ei lum sunda bei mandarâ ba,
kayam ei kagei suma mi tini irei vei
suma d’ingêrâ avorom burâ ki burâ kur tit meid’a.
Ang gorona, a mba yang ala
ma djok vuna hAlo ma sä akulo ma kal teglesîna,
kayam ang mba tit avok Salad’a á min lovot mamba,
á tak mi sum mama ala mam mba mi sud’uziya,
mba mi vat hurum mbei yam tcho mazid’a mi.
Alo meina nAlo ma we hohou mamba kal teglesâ,
mba mi b’o yina kei ki b’o d’a akulod’a
d’igi afata ti deî na,
á b’o yam suma a nga kaka kur nduvunda ad’u angus matnina,
á tini asei kur lovot ta b’leng nga halasa mi.
Gor máma nga mi wula, nga mi sira kur muzugamu, mi i kak hur fulâ gak bur ma mi tak tam mbei avok Israel-lîna.

گوێگرتن لە Luc 1