य्‍हक्‍को बर्‌स लीप्‍चे बप्‍तीस्‍मा पीन्‍बे युहन्‍नाचे यहुदीया प्रदेस्‍की उजाड ग्‍लारी खज्‍यीम् चोले प्रचार स्‍य्‍हेङ्‌ब तीप्‍ज्‍यी। थेचे पङ्‍ज्‍यी, “पस्‍चताप स्‍य्‍हेङो, तलेपङ्‍सम् स्‍वर्‌गइ य्‍हुल् ज्‍यदङ् खबल मुब।” तलेपङ्‍सम् यसैया अगम्‍बक्‍तचेएनो चु युहन्‍नाइ बारेरी चोले पङ्‍बल मुबल-
“उजाड ग्‍लारी म्‍ही गीःइ क्रीङ्‍बे केत्,
‘परमप्रभुइ ग्‍यम् टोप लउ,
थेङ् ब्रजेत्‍पे लागीरी ग्‍यम् तङ्-तङ् स्‍य्‍हेङो!’”
युहन्‍नाचे ऊँटकी पेइचे राबे येन् येन्‍ब मुबल, ओसेम् केप्‍परी डीइ केः खीब मुबल। ओसेम् तीरीतेङ् र्‌हीइ सीङ्‍सुर खुदु चब मुबल। ओसेम् म्‍हीमा यरुसलेम् सहरतेङ् यहुदीय प्रदेस्‍की जम्‍मनो ग्‍लामा, ओसेम् यर्‌दन स्‍योङ्‍की रेइमाकी जम्‍मनो ग्‍लामाचे युहन्‍नाइज खज्‍यी। ओसेम् थेङ्‍यीमाचे र्‌हङ्‍-र्‌हङ्‌की पाप स्‍वीकार लज्‍यीम् युहन्‍ना ग्‍यम्‍चे यर्‌दन ग्‍येन्‍दीरी बप्‍तीस्‍मा कीन्‍ज्‍यी।
तर युहन्‍नाचे फरीसीतेङ् सदुकीन्‍हङ्‍की य्‍हक्‍को म्‍हीमा थेज बप्‍तीस्‍मा कीन्‍बरी खटीबल म्रङ्‌ज्‍यीम् थेङ्‌यीमात पङ्‍ज्‍यी, “ओ पुख्रीइ कोलमा, पर्‌मेस्‍वर्‌चे न्‍हङ्‍य्‍हम्‍बे सजाय ग्‍यम्‍चे स्‍योर्‌बरी एङ्‌यीमात खल्‍चे चेतावनी पीन्‍ज्‍यी? होत्‍तज्‍यीम् एङ्‍यीमाचे पस्‍चताप स्‍य्‍हेङ्‌बल य्‍हीन्‍सम् हुजु अनुसारनो ब्रउ। ‘ङ्‌यीमा अब्राहामकी ज-जमे य्‍हीन्‍ब, होत्‍तज्‍यीम् पर्‌मेस्‍वर्‌की न्‍याय ग्‍यम्‍चे स्‍योरम्‍यङ्‍ब’ बी थम्‍हेनो। तलेपङ्‍सम् ङ एङ्‌यीमात पङ्‍ब अब्रहामकी लागीरी पर्‌मेस्‍वर्‌चे चु युङ्‌बमाचेएनो ज जमे स्‍य्‍हेङ्‌जेत्‍प खम्‍ब। दोङ्‌बोइ दुङ्‌री तरीचे तम्‍य्‍हम्‍बल मुब। ओसेम् ज्‍यबे रोरो अरोबे जम्‍मनो दोङ्‌बोमा थाज्‍यीम् मेन्‍हङ् ख्‍लास्‍ये मुब।
“ङचेम् एङ्‍यीमाचे पस्‍चताप स्‍य्‍हेङ्‌बल ङोन्‍बे लागीरी यीचे बप्‍तीस्‍मा पीन्‍ब। तर ङ बीम ङ्‍हच्‍छ्‍यङ् गीः ब्‍योन्‍खय्‍हम्‍बल मुब, ङम् थेङ्‌की पनेइ नाबरीएनो जेबल अरे। थेङ्‌चे एङ्‌यीमात पबीत्र आत्‍मातेङ् मेग्‍यम्‍से बप्‍तीस्‍मा न्‍हङ्‌स्‍ये मुब। अन्‍न क्रप्‍परी नख्‍लेइ थेङ्‌की फ्‍यारी मुब। थेङ्‌चे अन्‍नमा बर्‌टी ओसेम् पोल्‍वमा खेमेनो अस्‍यीबे मेन्‍हङ् ख्रङ्‍लाजेत्‍स्‍ये मुब।”


हुजु लीप्‍चे येसु युहन्‍ना ग्‍यम्‍चे बप्‍तीस्‍मा कीन्‍बरी गालील प्रदेस्‍चे यर्‌दन ग्‍येन्‍दीरी ब्‍योन्‍खज्‍यी। तर युहन्‍नाचे थेङ्‌त र्‌होद्‍प म्‍हइज्‍यीम्, “थेङ्‍चेक ङत बप्‍तीस्‍मा न्‍हङ्‍थोबल मुबल, तले थेङ्‍क ङइज ब्‍योन्‍खबल?” बी पङ्‍ज्‍यी। येसुचे सुङ्‌ज्‍यी, “देरे चोलेनो तपुङो, तलेपङ्‍सम् पर्‌मेस्‍वर्‌की थु टोप लपरी ङ्‍य्‍हङ्‍चे चोलेनो स्‍य्‍हेङ्‍थोब।” हुजु लीप्‍चे थेङ्‌त बप्‍तीस्‍मा पीन्‍बरी युहन्‍ना ङ्‍येन्‍ज्‍यी।
ओसेम् बप्‍तीस्‍मा कीन्‍जेत्‍ज्‍यीम् येसु यीन्‍हङ्‍चे डोङ्‍जेत्‍ज्‍यी। हुजु बेलोरीनो स्‍वर्‌ग ठोङ्‌ज्‍यी, ओसेम् थेङ्‌चे पर्‌मेस्‍वर्‌की आत्‍मा ढुकुर र्‌हङ्‌ले र्‌हङ्‌की जोरी ब्‍योन्‍युटीबल म्रङ्‌जेत्‍ज्‍यी, ओसेम् स्‍वर्‌ग ग्‍यम्‍चे चोतेबे केत् थ्‍येःज्‍यी, “चु ङइ म्‍होइबे ज य्‍हीन्‍ब, ओसेम् ङ थेतेङ् य्‍हक्‍को तङ्‍बल मुब।”

گوێگرتن لە मत्‍ती 3