यहुदीया प्रदेस्‍की बेथलेहेम् पङ्‍बे नम्‍सरी येसु न्‍हबल मुबल। हुजु बेलोरी हुजु प्रदेस्‍की ग्‍यल्‍बो हेरोद मुबल। स्‍यर्‌चे खबे ज्‍योतीसीमा थेङ्‌त म्‍हइज्‍यीम् यरुसलेमरी दोखज्‍यी। ओसेम् म्‍हीमात ङ्‌योत्‍ज्‍यी, “यहुदीमाकी ग्‍यल्‍बो तज्‍यीम् न्‍हबे कोल खन मुब? तलेपङ्‍सम् थेङ् न्‍हबे तम् ङोन्‍बे सार् ङ्‌यीमाचे स्‍यर्‌री म्रङ्‍ज्‍यी, ओसेम् ङ्‌यीमा थेङ्‌त तेन्‍बरी खबल य्‍हीन्‍ब।”
चु तम् थ्‍येःज्‍यीम् ग्‍यल्‍बो हेरोदतेङ् यरुसलेम्‍री मुबे जम्‍मनो म्‍हीमा य्‍हक्‍को छेर्‌ज्‍यी। ओसेम् ग्‍यल्‍बो हेरोदचे जम्‍मनो ङ्‍हच्‍छ्‍यङ् लम्‍बुमातेङ् धर्‌म लोप्‍पोन्‍मात ङ्‌होत्‍ज्‍यीम्, “मुक्‍ती न्‍हङ्‌बे ख्रीस्‍ट् खन न्‍हबल तस्‍ये मुब?” पङ्‍ज्‍यीम् ङ्‌योत्‍ज्‍यी। थेङ्‍यीमाचे पङ्‍ज्‍यी, “यहुदीया प्रदेस्‍की बेथलेहेम् नम्‍सरी, तलेपङ्‍सम् धर्‌मइ छ्‍येःरी अगम्‍बक्‍तचे चोले ब्रीबल मुब-
‘ओ यहुदीया ग्‍लाकी बेथलेहेम्, ए यहुदीयरी सासन् लबे सहरमा न्‍हङ्‌री ताचेएनो ज्‍यीद अत,
तलेपङ्‍सम् ए ग्‍यम्‍से ङ्‍हच्‍छ्‍यङ् सासक् डोङ्‍खस्‍ये मुब,
ओसेम् थे ङइ म्‍ही इस्राएलीमाकी गोर्‌तेन् तस्‍ये मुब।’”
हुजु लीप्‍चे हेरोदचे स्‍यर्‌चे खबे ज्‍योतीसीमाता सार् गते बेलोरी म्रङ्‌बल बी खुसुक्‍ले ङ्‌होत्‍ज्‍यीम् ङ्‌योत्‍ज्‍यी। ओसेम् थेङ्‍यीमाचे स्‍येत्‍प बीसेम् हेरोदचे स्‍येज्‍यी। ओसेम् हेरोदचे थेङ्‌यीमात, “बेथेलेहेम्‍री ङ्‌यीज्‍यीम् कोलत ज्‍यनले म्‍हयो, कोलत यङ्‍ब बीसेम् ङत स्‍येतो, ओसेम् ङएनो खज्‍यीम् थेत तेन्‍स्‍ये मुब” पङ्‍ज्‍यीम् पीत्‍ज्‍यी।
ग्‍यल्‍बो हेरोदकी तम् ङ्‍येन्‍ब बीसेम् थेङ्‍यीमा बेथलेहेम्‍क्‍योर य्‍हर्‌ज्‍यी। थेङ्‍यीमा ग्‍यम्‍री य्‍हर्‌टीमम् स्‍यर्‌री म्रङ्‌बे सार् देबेएनो म्रङ्‌ज्‍यीम् थेङ्‌यीमाकी ङोन्-ङोन् य्‍हर्‌ज्‍यी। ओसेम् कोल मुबे ग्‍लाकी जोरी दोःब बीसेम् थेन्‍ले टीज्‍यी। सार्‌त म्रङ्‌ब बीसेम् थेङ्‍यीमा य्‍हक्‍को तङ्‌ज्‍यी।
ओसेम् थेङ्‍यीमा दीम्‍न्‍हङ् वङ्‌ब बीसेम् कोलत थेङ्‌की अम मरीयमतेङ् बक्‍च्‍य म्रङ्‍ज्‍यी। ओसेम् थेङ्‍यीमाचे पब्‍लु लज्‍यीम् थेङ्‌त तेन्‍ज्‍यी। हुजु लीप्‍चे थेङ्‍यीमाचे र्‌हङ्-र्‌हङ्‍की जोर्‌मा फेःज्‍यीम् म्‍हर्‌तेङ् ङोर्‌थङ् खबे सङ्‌स्‍यु ओसेम् मुर्‌र थेङ्‌त भेटी पीन्‍ज्‍यी।
हुजु लीप्‍चे ज्‍योतीसीमात हेरोदज दोःज्‍यीम् थङ्‌यीउ पङ्‍बे चेतावनी पर्‌मेस्‍वर् ग्‍यम्‍चे म्‍हङ्‍री यङ्‌ज्‍यीम् थेङ्‍यीमा ल्‍हो-ल्‍हो ग्‍यम्‍चे तज्‍यीम् र्‌हङ्‌की य्‍हुल्‍री दोःय्‍हर्‌ज्‍यी।

ज्‍योतीसीमा य्‍हर्‌ब बीसेम् योसेफचे म्‍हङ्‍री परमप्रभुइ स्‍वर्‌गदुत् म्रङ्‍ज्‍यी, ओसेम् स्‍वर्‌गदुतचे थेत पङ्‍ज्‍यी, “रेगो, कोलतेङ् कोलइ अमत बक्‍च्‍य बोर्‌ज्‍यीम् ग्‍योन् ग्‍योन्‍ले मीस्र य्‍हुल्‍री ङ्‍यीउ। ङचे एत दोःज्‍यीम् खोउ अपङ्‍गदे हुजुरीनो टीउ, तलेपङ्‍सम् कोलत सेत्‍परी हेरोदचे म्‍हइब छ्‍येटीबल मुब।”
चोतेबे म्‍हङ् म्रङ्‌ब बीसेम् योसेफ येसुतेङ् येसुइ अमत बक्‍च्‍य बोर्‌ज्‍यीम् म्‍हुननो मीस्र य्‍हुल्‍री ङ्‌यीबरी डोङ्‍ज्‍यी। ओसेम् हेरोद अस्‍यीगदे थेङ्‍यीमा मीस्र य्‍हुल्‍रीनो टीज्‍यी। परमप्रभुचे अगम्‍बक्‍त ग्‍यम्‍से सुङ्‌बे फ्रोइ चोले टोप तज्‍यी, “ङचे ङइ जत मीस्र य्‍हुल् ग्‍यम्‍से ङ्‌होत्‍ज्‍यी।”

ज्‍योतीसीमाचे थेत लुनेम् बी स्‍येब बीसेम् हेरोदत य्‍हक्‍को बुमो रप्‍ज्‍यी। ओसेम् सार् डोङ्‌बे बेलो ज्‍योतीसीमा ग्‍यम्‍चे स्‍येब अनुसार बेथेलेहेम्‍तेङ् हुजुइ रेइ रेइमाकी नम्‍सरी मुबे ङ्‍य्‍हीत्‍तीङ्तेङ् ङ्‍य्‍हीत्‍तीङ् बीम दुङ्‍की अपकोलमा जम्‍मतनो सेत्‍लाको पङ्‍ज्‍यीम् हेरोदचे स्‍यीपइमात पीत्‍ज्‍यी। चोले यर्‌मीया अगम्‍बक्‍तचे पङ्‍बे तम् टोप तज्‍यी-
“रामारी चोतेबे केत् थ्‍येःज्‍यी,
य्‍हक्‍को क्राटीबलतेङ् दुख म्‍हन्‍दीटीबल।
राहेल र्‌हङ्‌की कोलमाकी लागीरी क्राटीबल मुब।
थेत खल्‍चेएनो कुटी टीन लअखम्,
तलेपङ्‍सम् थेल जम्‍मनो कोलमा स्‍यीबल मुब।”

हेरोद स्‍यीब बीसेम् परमप्रभुइ स्‍वर्‌गदुत् मीस्ररी योसेफकी म्‍हङ्‍री म्रङ्‍ज्‍यी। ओसेम् स्‍वर्‌गदुतचे योसेफत पङ्‍ज्‍यी, “रेगो, कोलतेङ् कोलइ अमत बोर्‌ज्‍यीम् इस्राएल य्‍हुल्‍री दोःज्‍यीम् ङ्‍यीउ, तलेपङ्‍सम् कोलइ बुः कीन्‍ब म्‍हइबलमा स्‍यीज्‍यीन्‍ज्‍यी।” होत्‍तज्‍यीम् योसेफ कोलतेङ् कोलइ अमत बोर्‌ज्‍यीम् इस्राएल य्‍हुल्‍री दोःज्‍यी।
तर यहुदीया प्रदेस्‍री हेरोदकी ज अर्‌खीलाउस ग्‍यल्‍बो तबल मुब पङ्‍बे तम् थ्‍येःज्‍यीम् योसेफ हुजुरी ङ्‌यीबरी लोङ्‌ज्‍यी। ओसेम् योसेफचे म्‍हङ्‍री देबेनो परमप्रभु ग्‍यम्‍चे चेतावनी यङ्‌ज्‍यीम् गालील प्रदेस्‍री ङ्‍यीज्‍यी। ओसेम् थेङ्‍यीमा हुजुरी नासरत पङ्‍बे ज्‍यीद सहर्‌री टीज्‍यी। चोले अगम्‍बक्‍तमाचे, “थेङ्‌त नासरी पङ्‌स्‍ये मुब” पङ्‍बे तम् टोप तज्‍यी।

گوێگرتن لە मत्‍ती 2