Dagaare, Southern - 2014 Edition ( Non-Drama NT)

Bible translation: Dagaare © 2014 Bible Society of Ghana www.biblesociety-ghana.org/ ℗ 2017 Hosanna A Gansoŋ Poɔ Yelbie ama yi la a Dagaare Gansoŋ poɔ, naŋ waa a Gansoŋ Laŋne naŋ be a Gaana paaloŋ poɔ soobo. Bana la taa o faŋ zaa

Dagaare, Southern - 2014 Edition (Drama NT)

First New Testament in Dagaare Language © The Bible Society of Ghana, 2013.

A bebiri na zaa daare, Yeezu da yi la a yiri poɔ a te zeŋ a mane noɔreŋ. Nembeɛoŋ da ŋmaagyili O la, ka O da kpɛ zeŋ gbori poɔ, kyɛ ka a noba zaa are a mane noɔreŋ. O da lɔɔ la sekpɔgɔ a yeli yɛlɛ yaga ko ba, a yele, “Yɛ kyɛllɛ! Boreborɔ kaŋ la da yi ka o te bore o weɛ. O naŋ da borɔ, a bombie mine da le la sobiri zu ka nuuli wa de di. Ka a bombie mine le pikubo zu, a be da ba taa tɛne yaga, ka a da buli wieouŋ zaa, a tɛne naŋ da ba e zuluŋ zuiŋ. Kyɛ ŋmenaa naŋ da wa do, a bombulo da zoɔlɛɛ la, a ko, a naŋ da ba taa nyaga zuiŋ. A bombie mine da le la goore poɔ, ka a goore baa fogle a. A bombie mine meŋ da le la tɛnnoɔ poɔ, a maale velaa. Ka a bonzuri mine eŋ bie kɔɔ, amine lezaata, amine lezare ne pie. Vɛŋ ka soba na zaa naŋ taa tobo kyɛlle woŋ!”


Lɛ la ka a potuuribo wa soore O, “Bonso ka fo lɔɔrɔ sekpɔgɔ korɔ a noba?” Ka O yeli sɔge, “Yɛnee, ba ko yɛ la a bammo ka yɛ na baŋ a tenvelaa naaloŋ yelsɔglɔ, kyɛ ba ba ko bana eŋ. Banaŋ zaa naŋ taa, ba na ko ba la bon-yaga poɔ, ka ba taa ka a gore ba. Kyɛ banaŋ naŋ ba taa bonzaa, haali gba bon ba naŋ taa, ba na de a la yi ba zie. Bon naŋ so ka N yele a yɛlɛ ne sekpɔgɔ korɔ ba la, ‘ba kaara la, kyɛ ba nyɛrɛ, a wono kyɛ ba kyɛllɛ, bee a baŋ a tɛgɛ.’ A ba zie la ka a Ŋmen-yelmanna Azaaya yelbie na sereŋ tu a tuubu, a seŋ o naŋ yeli:
‘Yɛ sereŋ na kyɛllɛ la, kyɛ daŋ koŋ baŋ a tɛgɛ,
yɛ sereŋ na kaara la, kyɛ daŋ koŋ nyɛ.
A noba ŋa sukyie darɛɛ la,
ka ba tobo e kpeɛne a ba wono yɛlɛ,
ka ba ũũ ba nimie;
ka ka ba na ta kaa ne ba nimie,
a woŋ ne ba tobo,
a baŋ a tɛgɛ ne ba sukyie kyɛ leɛ ba eebo,
ka N na saŋ ba.’ ”
Kyɛ yɛ nimie ane yɛ tobo nyɛ la maaloo, bonso, yɛ nimie nyɛrɛ la, ka yɛ tobo meŋ wono. Yelmeŋɛ ka N yele korɔ yɛ, Ŋmen-yelmanneba yaga ane nemmenne yaga da boɔrɔ la ka ba nyɛ bon yɛ naŋ nyɛrɛ kyɛ ba nyɛ a, a da boɔrɔ ka ba woŋ a yɛlɛ ama yɛ naŋ wono, kyɛ ba woŋ a.


“Yɛ pãã woŋ a boreborɔ sekpɔgre tɛgɛ. A bombie anaŋ ba naŋ da bore a sori zu la neɛzaa naŋ woŋ a naaloŋ yelbiri kyɛ ba baŋ a tɛgɛ, a sebɛlbɛllɛ maŋ wa zeɛ la a bonna ba naŋ bore o sukyiri poɔ gaa ne. A anaŋ ba naŋ bore a pikubo poɔ, la soba na naŋ woŋ a yelbiri a de o wieouŋ zaa ane kyelloo; kyɛ a soba ŋa tɔ ba taa nyaga, o maŋ taa la kannyiri belaa lɛ, kyɛ ka yelwonaa bee dɔgroŋ kaŋ wa kpɛ o a Naaŋmen yelbiri zuiŋ, o yeldeebo maŋ le la wieouŋ zaa. A bombie na ba naŋ da bore goore poɔ, la soba na naŋ woŋ a yelbiri, kyɛ ka a teŋɛzu yeltarre ane bombɔ nɔmmo maŋ fogle a yelbiri taa ka o koŋ wɔŋ bonzaa. Kyɛ a anaŋ ba naŋ bore tɛnnoɔ poɔ, la a soba na naŋ woŋ a yelbiri a baŋ o tɛgɛ, a sereŋ wɔŋ a eŋ bie, amine bie kɔɔ, amine lezaata, amine lezare ne pie.”

A Yeezu da la lɔɔ la sekpɔgre kaŋ ko ba, a yeli, “A tenvelaa naaloŋ waa seŋ ŋa, koɔraa kaŋ naŋ bore bombi-sonne o weɛ poɔ; kyɛ saŋ na neɛzaa naŋ wa te gbiri, a dɔndɔmɔ da wa bore la narse eŋ a kyi poɔ kyɛ gaa. A bombulo naŋ wa baa, a dɔge eŋ bie, a narse meŋ pãã da sããɛ la. Ka a koɔraa tontonema wa soore o, ‘Daana, bombi-sonne yoŋ naane ka fo da bore a weɛ poɔ be? Ka yeŋ pãã ka a narse ŋa meŋ yi a kyi poɔ?’ Ka o yeli sɔge, ‘A dɔndɔmɔ la e a lɛ.’ Ka a tontonema soore o, ‘Fo na boɔrɔ la ka te gaa te vɔ a narse bare be?’ Kyɛ ka o leɛ yeli sɔge ba, ‘Ai! Bonso, ka yɛnee voɔrɔ a narse, yɛ na erɛ la wa laŋ vɔ ne a kyi meŋ. Yɛ vɛŋ ka a zaa laŋ baara te ta a kyi kyeɛbo saŋ. A kyi kyeɛbo saŋ, N na yeli la a kakyeɛrebɛ; Yɛ daŋ vɔ a narse leŋ lantaa a nyege. Kyɛ pãã kyɛ a kyi a eŋ n bugo poɔ.’ ”


A Yeezu da la lɔɔ la sekpɔgre kaŋ ko ba, “A tenvelaa naaloŋ waa seŋ ŋa tobiri neɛ kaŋ naŋ de bore o weɛ poɔ; a tobiri sereŋ waa la a teere zaa poɔ bombi-bile, kyɛ ka o naŋ wa te baa baare o maŋ waa la kpoŋ gaŋ a teere zaa, a leɛ teɛ ka nuuli maŋ wa wuo a kyogri o ulli zu.”

O da la lɔɔ la sekpɔgre kaŋ ko ba, “A tenvelaa naaloŋ waa seŋ ŋa pɔge kaŋ naŋ de dããbelɛ eŋ zɔŋ ŋmannɔɛ ata poɔ, ka a iri pi a zaa.”


A Yeezu da yeli la a yɛlɛ ama zaa ko a nembeɛoŋ ne sekpɔgɔ. O da ba yeli yelzaa ko ba ka sekpɔgɔ yoŋ naane. A ŋaa da eɛɛ la ka ka a Ŋmen-yelmanna yeluu na tu a tuubu:
“N na haa la N noɔre a lɔɔ sekpɔgɔ;
N na manne la a yelsɔglɔ zaa, a yi a tendaa piiluu saŋ a ko ba.”

Lɛ la ka a Yeezu da bare a nembeɛoŋ kyɛ iri kpɛ die. A O potuuribo da wa la O zie a wa yele, “Iri a weɛ narse sekpɔgre pare ko te.” Ka a Yeezu yeli sɔge, “A neɛ na naŋ bore a bombi-sonne la a Nensaala Bie; a weɛ la a andonɛɛ, ka a bombi-sonne meŋ waa a naaloŋ biiri, ka a narse meŋ waa Setaana biiri. A dɔndɔmɔ na naŋ bore a narse la a sebɛlbɛllɛ. A boma kyeɛbo saŋ la a teŋɛ baaroo, ka a kakyeɛrebɛ e a malekere. Aŋa lɛ ba naŋ vɔ a narse leŋ lantaa a nyege vũũ na, lɛ ka a na waa a teŋɛ baaroo saŋ. A Nensaala Bie na toŋ la O malekere ka ba wa gbaale banaŋ zaa naŋ erɛ ka noba erɛ yelbebe ane yelbe-erebɛ zaa yi ne a O naaloŋ poɔ, ka ba de ba lɔɔ eŋ vũũ kpoŋ poɔ, zie na ba naŋ na kono kyɛ nyerɛ nyemɛ. A lɛ la ka a nemmenne pãã na nyegrɛ aŋa ŋmenaa a ba Saa naaloŋ poɔ. Vɛŋ ka soba na zaa naŋ taa tobo kyɛlle woŋ.”

“A tenvelaa naaloŋ waa seŋ ŋa nabontegroŋ kaŋ ba naŋ sɔgle weɛ poɔ, ka neɛ kaŋ nyɛ o, a de maaleŋ sɔgle, kyɛ ka o poɔ pɛle yaga, ka o leɛ gaa te koɔre o boma zaa a wa da ne a weɛ.
“Laboriŋ, a tenvelaa naaloŋ waa ŋa yɛreyɛrɛ naŋ boɔrɔ salema; o naŋ wa te nyɛ kaŋ daaroŋ naŋ ba wono, ka o gaa te koɔre o boma zaa a wa da ne.
“Lamaaleŋ, a tenvelaa naaloŋ waa ŋa zonkyogi ba naŋ de lɔɔ eŋ mane poɔ, a nyɔge zomparɛɛ parɛɛ zaa. A zonkyogi naŋ da wa paale, ka a zonnyɔgrebɔ tage yi ne dondoli, a te zeŋ teŋɛ kyɛ tuuri a bonveɛle eŋ peɛ poɔ, kyɛ de a bonfaare lɔɔ bare. Lɛ ka a na waa a andonɛɛ baaroo saŋ. A malekere na wa wɛle la a nenfaare yi a nemmenne poɔ, a de ba lɔɔ eŋ vũũ kpoŋ poɔ, zie na ba naŋ na kono kyɛ nyerɛ nyemɛ.

“Yɛ baŋ la a yɛlɛ ama zaa tɛgɛ be?” Ka ba yeli sɔge, “Õõ.” Ka O yeli ko ba, “A lɛ zuiŋ, a bege wulwullo zaa ba naŋ wuli a tenvelaa naaloŋ yɛlɛ, waa seŋ ŋa yidandɔɔ naŋ yage bompaala ane bonkorɔ yi ne o naboma poɔ.” A Yeezu naŋ da wa lɔɔ a sekpɔgɔ ama baare, O da yi la a be gaa.


A Yeezu da leɛ wa la O meŋɛ teŋɛ poɔ a wa piili wullo a noba ba puoruuderi pooreŋ. A noba zaa nɔɛ da maaɛ la ka ba yele, “Yeŋ ka a dɔɔ ŋa nyɛ a yɛŋ ŋa tɔ, ane a toŋkpeɛne ama? A kapenta bidɔɔ mɔɔ naane a ŋa be? O ma naane ka ba boɔlɔ Mareya? O yɔɔmine naane Gyimisi, Yuzɛb, Saamon ane Gyudase be? Te ne a O yɔɔpuuli zaa naane be a kyɛ be? Ka yeŋ pãã la ka a dɔɔ ŋa nyɛ a ama zaa?” Ka ba poore da sãã ne O. Kyɛ ka a Yeezu yeli ko ba, “Ŋmen-yelmanneba daŋ ba nyɛ yuori bamenne tenne ane ba yie poore, ka teŋyobo poore naane.” A Yeezu da ba toŋ toŋkpeɛne yaga a be, ba naŋ da ba taa yeldeebo zuiŋ.

گوێگرتن لە Mat 13