ISYA KUTALA
Uju jo Bịbịlịa ugwa kwanda ukusanukisịgwa Nkinyakyusa.
Ukwanda ifyinja fị̄fị̄ngi ifịfịkindịle bālịmo bakalata babili Nkinyakyusa. Kalata ugwa kwanda asanụsị̄gwe nu mmịsịonalị Unjelemanị ugwa kipanga ikya Kilutelị. Ingamu ja kalata jujuju jo “Tesịtamentị Umpya”. Bo fịkindịle ifyinja fịfị̄ngị, kunyuma, po alyendịle nukujapo kalata ujungi. Kalata uju asanusị̄gwe na bandu abịngị panandi. Bamo bafumịle ku Malawi. Basanwịsye mbulongosị bwa mmịsịonalị ugwa kipanga ikya Molefịanị. Ingamu ja kalata uju jo “Ulwitikano Ulupya”.
Lolị bakalata bōsa bo babili bāli ba Lufị̄ngo Ulupya. Ulufị̄ngo Ulukulu lwakāli ukusanukisịgwa Nkinyakyusa.
Aba-Kilisịtị bwila balondaga ukuja nagwe Bịbịlịa gwēsa, ko kuti kalata uju ikukomanịa pamopene Ulufị̄ngo Ulukūlu nu Lufị̄ngo Ulupya. Kyala ugwa maka, afịsajịle ifịpanga ifya Kilutelị, Molefianị na Baputịsịtị ukubomba imbombo ingafụ jijiji.
Loli ifipanga fyene fikābagị̄le ukujānda nukujimalīsya imbombo jijiji. Ko kuno Ifyama fya Bịbịlịa (United Bible Societies, Nairobi) kusi kumpalanga kuno, fyo ifị fịbombịle imbombo ingulumba fị̄jo ukufịtūla ifipanga ifyo fịtatu. Ifyama ifyo fyo ifị fịsosị̄sye ubumaganyị ni ndalama.
Abakilisịtị aba balịsibị̄le na Tesịtamentị Umpya bikwagaga ubusị̄mbe bwa mwa Bịbịlịa uju buli pasịma. Abasanusị bagelịle fị̄jo ubusị̄mbe ubu bwalyandị̄gwe na ba-Jelemanị mwa Tesịtamentị Umpya, ubu Ulwịtikano Ulupya bakākōngịle. Pope ubusị̄mbe bumo bukakonga Tesịtamentị Umpya, kifwene Tesịtamentị Umpya basị̄mbile inosị lilino busịmbị̄gwe ing'osị, keta Johanị 1:29.
Kangi ukusanusya Bịbịlịa kukafụ kunongwa ja kuti Ikinyakyusa kikaja kimokyene, bamo bikuti “apisịle mmisi” abangi bịkuti “amịlịlwe amīsi” kangi bamo bịkuti “abūkị̄le mmisi.” Bamo bikuti “amapēlụpēlụ” bo abangi bịkuti “amapelele” kangi abangi bikutị “amapembesale”. Apa linga sịkuboneka sịsịsị po abasanusị bakongịle ilị̄syu ili likujobigwa nabandu abị̄ngị.
Aba basanwisye Bịbịlịa uju bānyonywaga fị̄jo ukusị̄mba kyene Ikinyakyusa ikisịta kongana. Loli sịbonịke ukuti isị sịkabagila ukukongịgwa bwịla, ko kuno mwa Bịbịlịa uju galimo amasyu amahesya; kifwene bo ibakụlị (Joh. 19:29); imị̄ta (Nehe. 3:13); bakelụbụ (Isab. 18:10).
Mwa Bịbịlịa, galịmo amasyu gamo aga gatịkwagịgwa mwa bakalata abị̄ngị abakūlu. Apa linga amasyu gagaga gịkuboneka, gabikị̄gwe nfyumba buno [ ] keta Joh. 8:1-11.
Tukusubila ukuti bosa aba bikubalaga Bịbịlịa uju Mbepo Mwịkemo ịkubalongosyaga ukunnkonga Jesụ Kilisịtị, Umpokị gwitu.
Lolị apa linga gwe kubala Bịbịlịja uju kusyagamo sịmo isị sịkagoloka, tukukusuma fị̄jo ukutusịmbila, utulinganịege kalata, ulutulo na kanandi.
