Mataio 4
4
Yesu lokwesacka lowec
Mrk 1:12-13; Luk 4:1-13
1Aime Aleng Sugucnenginengti Yesu lokwesacka lonale Asudi mengockeme himong kisiwa misaine mikacka hikewec.#Hib 2:18; 4:15 2Hikeme Yesu ye iwa deboc hadeng 40 nosing-sawe galu nosingte homawec.#Wah 34:28 3Inguc aime Lokwesac Ngicti yela kwesilu miwec, “Ga Wapongte Madec noine gagicka posa yago miyengka bafaliyelu bret aina!”
4Inguc mime Yesudi yowa ameine bafaliyecnolu yanguc edowec, “Yowa yanguc kwelengkeicne fagac,
‘Ngicti nosingka sugu mi ganoga, miyac. Ye Wapongte mickacni yowa ofecaigac, yogo sasawa balu ganoga.’ ” (Yef 8:3)
5Inguc mime Aleng Sugucnenginengti Yesu mengockeme taon gbagbacna#4:5 Ibu-mac Yerusalem iwa domawecte taon gbagbacne wackeibong. hikelu Ibu-mac feina wilinibenang, iwa lome domawec. Domame edolu yanguc micnowec, 6“Ga Wapongte Madec noine gagicka gageuctihac yawacni wintackelu haunong. Yowa yanguc kwelengkeicne fagac,
‘Ye gale ailu angelofocine bole-yowa yeleme yengi molengineng feina sesegubong, posa monicti higegone nalic mi helockedaicte.’ ” (Mige 91:11-12)
7Inguc mime Yesudi yanguc edowec, “Ailu hatacmac yowa yanguc kwelengkeicne fagac,
‘Ga Sugucne Waponggone lokwesacka mi lonong.’ ” (Yef 6:16)
8Inguc mime Aleng Sugucnenginengti Yesu hatacmac mengockeme tiki sugucne monicka fewec. Felu himongtowa himong gamangnginengkolec nga tapili nga hibi-angocine haicine monic-monic, yogo edalilu 9miwec, “Ngagegic, ga ngosockelu ketadi holenelelu afenuengka, wiyac sasawa yago geledacte.”
10Inguc mime Yesudi yanguc edowec, “Satang, ga baickenong. Yowa yanguc kwelengkeicne fagac,
‘Ga Sugucne Waponggone, ye moniyang sugu afeelu kwelec kwecnodamec.’ ” (Yef 6:13)
11Inguc mime Aleng Sugucnengineng ye hegilelu hikeme angelo yengi kwesilu Yesu bafickelu gaibong.
Yesu boleine molickelu bawec
Mrk 1:14-15; Luk 4:14-15
12Ngic yenge yowa yogo miibong, “Yengi Yoane muc-macka lobong ngiyegac.” Yesu ye yogo ngagelu Galili prowinswa Nasaret taonka hefaliye hikewec.#Mat 14:3; Mrk 6:17; Luk 3:19-20 13Hikelu Nasaret hegilelu Sebulun nga Nafatali yekele himong Galili lifuc mecina, Kapeneam taonka hikelu gawec. 14Aime Wapongte siduc-mimi ngic Yesaiyadi yanguc miwec, yogolec noine fikewec,
15“Yodan misa nebocina yefe lifucka hikegac, Sebulun nga Nafatali himong iwa Israel yengele alingkacni miyac, yengi Galili prowinswa gagaing. 16Ngic-ngigac yogo yenge kundungka gagaing, yenge angoc sugucne nganiibong. Aime ngic-ngigac himongka homacte bagewa gaibong, yengele hewacka angocine fikewec.” (Yes 9:1-2)
Yowa yogo noine ainale ye Kapeneam taonka ngiye-fangkec ailu gawec. 17Dameng iwa Yesudi ngic-ngigac yowa yanguc edocebalu weduyelelu gawec, “Honocmengte ngani-damongti biyac bangkalegacte ngenge kwelengineng hefaliyena.”#Mat 3:2; 10:7
Mic-tengteng wacebawec
Mrk 1:16-20; Luk 5:1-11
18Hadeng monicka Yesu ye Galili lifuc mecina haulu dingong balaibelu hikecgu hae-gba yaeckang nganicepame uficnginec lifucka wickelu domaiboc. Yogo Saimon, wacine monic Pita wackelu gaibong nga gbaine Endru. Yeke misa-sic baba ngic gaiboc. 19Yeke nganicepalu yanguc edocepawec, “Ngeke wele na balaibecnunic. Ngic yengi misa-sic bacaigaing, ngeke silicine yogo ingucnehac ngic-baba bole banicte wedungetedacte.” 20Inguc mime yeke iwahac uficnginec hegilelu Yesu balaibeiboc.
21Aime iwacni lelu hatacmac hae-gba yaeckang, Sebedi madeckecine, Yakobos nga gbaine Yoane nganicepawec. Nganicepame yeke mamacnginec Sebediholec gombawa uficngineng bamadickelu gaebongka wacepawec. 22Wacepame yeke dameng iwahac mamacnginec nga gomba hegilelu ye balaibeiboc.
Siduc Madicne edocebawec
Luk 6:17-19
23Yesu ye Galili iwa himongsoc lolickelu kpakpaduc macnginang felu wewedu bole balu ngani-damongte Siduc Madicne edocebalu weduyelelu gawec. Ailu ye ngic-ngigac huc haicine monic monicti bacebame tapilingineng waicne yenge sasawa bamadicebayackewec.#Mat 9:35; Mrk 1:39; Sale 10:38 24Inguc aime yele siducti hikelu Siria prowins sasawa saweyackewec. Saweme ngic-ngigac madicne yenge huc haicine monic monicti ngic-ngigac basowalecebaicne nga doic ngagecaigaing. Ailu ngic alengkolec nga gocne homa-gbolic aicaigaing, ailu ngic-ngigac hige-molengineng homaicne, yenge sasawa Yesula bacebalu hikeyackebong yedi bamadicebawec.#Mrk 6:55 25Aime Galili prowinswacni nga Dekapolis, iwacni ailu Yerusalem taonkacni nga Yudeya himong ailu Yodan nebocinacni ngic-ngigac habutowadi ye balaibeibong.#Mrk 3:7-8
S'ha seleccionat:
Mataio 4: MigNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2019, Wycliffe Bible Translators, Inc. All rights reserved.