Jenexi 7
7
Tuna konõto
1Morarame ynara tykase Ritonõpo Noe a:
— Omõtoko kanawa aka, omoro atapyĩ taõkõ maro emero. Omoro rokẽ zae exiketyme mase yneneryme. 2Aroko amaro onokyro tõkehko okyno tõkehko roropa. 7me aroko nuriamãkõkara, asakoro aroko nuriamãkomo orutua, nohpo, enara. 3Torõ tõ roropa emero rokẽ 7me aroko amaro, toto emãtohme ropa sero nono po. 4Ynara exiryke; taroino 7me ẽmepyry taropose ahtao konopo enehpõko ase, 40me ẽmepyry pona, saereme, koko, enara. Moro ke isene exiketõ enahkapõko ase, emero ynyrityamo.
5Mame Ritonõpo nyripohpyry emero tyrise Noe a, aomipona. 6600me jeimamyry nae Noe kynexine tuna konõto tukumase ahtao nono zumyhkatohme porehme. 7Tõsepynanohtohme kanawa konõto aka tõtyrise Noe, typyty maro, typoenõ maro, tumũkuru tõ pyxiã maro, enara. 8Onokyro tõkehko maro te, okyno tõ maro te, nuriamãkõ maro, nuriamãkõkara maro nono poro ytoytoketõ maro te, torõ tõ maro. 9Tõtyrise toto Noe tõ maro kanawa aka asasakoro, orutua te, nohpo, enara, Ritonõpo nyripohpyry omipona. 10Mame 7me ẽmepyry taropose ahtao nono tumyhpitose, tuna konõto kumaryke.
11Moro zano 600me jeimamyry Noe nae kynexine. Mame ẽmepyry 17mã po, nuno asakoro ehtoh po, tuna eutary tõ tuna konõto poe, nono zopino, toehmose kehko. Konopo konõto tooehse roropa kapu ae, osenuhmatoh konõto tõ tãtapuruhmakase samo. 12Konopo tooehse itamurume nono pona 40me ẽmepyry, koko saereme, enara. 13Mame moro ẽmepyry ae Noe tõ typyty maro tõtyrise kanawa konõto aka tumũkuru tõ oseruao maro Sem, Kam, Jape te, ipyxiãkõ roropa. 14Toto maro onokyro tõkehko tõtyrise roropa, okyno tõkehko roropa te, nono po ytoytoketõ roropa, torõ tõ roropa, enara. 15Emero tomõse toto Noe maro, kanawa aka asasakorone rokene. 16Tõtyrise toto orutua te, nohpo roropa, emero tyotyoro toto: onokyro tõkehko, okyno tõkehko Ritonõpo nyripohpyry ae ro Noe a. Mame Ritonõpo a omõtoh tapuruse, kanawa aka omõtopo.
17Morarame konopo konõto oehkehpyra nexiase 40me ẽmepyry pona. Itamurume xiriri tykase, sã katohro, sã katohro, sã katohro, zueme toehse tuna, mame kanawa tanỹse tuna a. 18Zueme toehse tuna exiryke kanawa tanỹse. 19Zuemehxo toehse tuna, ypy tõ tumyhkase emero kaetoko exiketõ roropa. 20Mame ypy tõ emero tymyhse ahtao tukumase ro tuna, 7 meturume. 21Toorihse emero isene exiketomo, nono põkomo: torõ tomo te, okyno tõkehko te, onokyro tõkehko te, nono poro ytoytoketomo te, ahno, enara. 22Toorihse emero toto nono põkomo, isene exiketomo, oseremaketomo. 23Noe rokẽ, tymaro exiketõ maro isene ro toh kynexine. Imehnõ emero tonahkapose Ritonõpo a, ahno te, okyno tõkehko te, onokyro tõkehko te, nono poro ytoytoketomo te, torõ tomo, enara. 24Mame 150me ẽmepyry taropose ahtao rokẽ tuna tãpaipitose ropa.
S'ha seleccionat:
Jenexi 7: apy
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
©2017, Wycliffe Bible Translators, Inc.