Mateu 11
11
Haga 11
Iuwãu Tipoꞌoro Raꞌyn Temiitꞌin Iesui Kape Sio Iesui Toineꞌen Miitꞌin Porekuatno Sese Toineꞌen
Iruka 7.18-35 Piat Ewy
1Miꞌi hawyi tohenoi henoi yne raꞌyn temiitꞌin 12 ok takaria pe aikotã waku taꞌatunug hamuat hap. Miꞌi hawyi Iesui toto iraꞌyn temiitꞌin wywo mekewat tawa pyi iraniaꞌin muꞌe hamo hawyi tohenoi henoi raꞌyn tehay miitꞌin me mekewat irania tawa koꞌi yt pya i itote pywiat rakaria kape.
2Miꞌi turan Iuwãu woꞌosetꞌok hat toineꞌen woꞌopyhik hawe maꞌato miꞌi turan toikuap aikotã aikotã aipotypot minug koꞌi hap hawyi toiꞌatupoꞌoro raꞌyn temiitꞌin Iesui kape. 3Tuwat hemiitꞌin hawyi apo iꞌatuꞌe raꞌyn -Urukaꞌiwat En apo urumiekatup taꞌyn sio poꞌog uruhekatup wẽtup ok te. Miꞌi hap ti Iuwãu tikuap teran iꞌatuꞌe 4Miꞌi hawyi Iesui tiꞌatuwesat -Eweiꞌaipok to Iuwãu hawyi ewehenoi ro miꞌi pe aikotã aikotã eimikuap uhehay wakuat koꞌi iꞌewyte uiminug eiꞌakasa hap koꞌi e. 5Miꞌi hawyi ewehenoi ro Iuwãu pe aikotã yt ihapytig i rakaria teꞌereꞌakasa raꞌyn hap koꞌi. Iꞌewyte yt hewyry kuap i rakaria ikohyewyry kuap taꞌyn hap. Iꞌewyte hepihi pihi rakaria iꞌatuehãite iraꞌyn hap. Iꞌewyte yt hewaure kaꞌa rakaria ikuap taꞌyn sehay hap koꞌi. Iꞌewyte ikuꞌuro rakaria teꞌerehymut iraꞌyn hap. Iꞌewyte meimewat ihakyꞌeꞌi rakaria Tupana ehay kuap haria wo teꞌeropyhuꞌat. 6Iꞌewyte uwe uwe tepiat hoꞌopot pykai yt uiwaure i. Miꞌi hat wyti uimowepiit kahato hat topyhuꞌat wuatꞌi eꞌat pe e Iesui Iuwãu potpoꞌororia pe.
Iruka 7.24 Piat Ewy
7Miꞌi hawyi teꞌeraꞌaipok iraꞌyn Iuwãu potmuꞌeria miꞌi pykai Iesui henoi henoi raꞌyn miitꞌin sem me woꞌosetꞌok hat Iuwãu etiat. Saꞌawyꞌi eweiwat kahato yahig wato kape aimuꞌe hat Iuwãu kapiat eiꞌakasa hamo turan apo aikotã ywytu potiat uiweran ewy apo kowoꞌi kowoꞌi Iuwãu e. 8Iraniaꞌin miitꞌin esokpe ikahuria hap ewy apo Iuwãu esokpe toineꞌen. Maꞌato sokpe wakuaria puo ti morekuaria yat pe yn tukupteꞌen kuap e. Maꞌato miꞌiria yt ewy hin i Iuwãu toineꞌen katupono yahig notiat hesokpe iꞌanam nakat wo yn toineꞌen. 9Pyno kan hamo eweiwat eiwehaꞌat hamo. Pyno Tupana ehay moherep hat kapiat eiwehaꞌat hamo apo. Taꞌi pywo pe areꞌe eweiꞌakasa kahato raꞌyn ti poꞌog Tupana ehay moherep rakat kape.
10Katupono saꞌawyꞌi mio tã e Tupana tosaꞌyru pe miwan me. -Uhaꞌyru e meiũran ti aru woropoꞌoro miitꞌin kape maꞌato ti atikyꞌesat wẽtup ok ti atipoꞌoro eꞌyian me. Miꞌi ti aru eto hamuat hap etiat henoi henoi miitꞌin me -Eweimohãpyk o ipuꞌap huut hap eꞌyian me e hat. 11Pywo pe ti areꞌe ehepe torannia haryporiaꞌin kaipywiaria wemoherep haria toꞌoran myi ti Iuwãu woꞌosetꞌok poꞌog iwato rakatno katupono Iuwãu henoi henoi kahato raꞌyn Tupana saꞌyru uut hap etiat. Miꞌi pykai iraniaꞌin Tupana toineꞌen aiporekuatno hap eꞌat etiat kuap haria poꞌog Iuwãu kai tukupteꞌen. 12Iuwãu henoi raꞌyn aikotã Tupana topyhuꞌat wyti aru aiporekuatno hap etiat. Miꞌi hawyi miꞌi mohey hanuaria taꞌatuhãꞌãg kahato iraniaꞌin porerokosap yt naku i nug hap pywiat Tupana toineꞌen aiporekuatnuat mohey hanuaria wo. 13Iuwãu woꞌosetꞌok hat eꞌyian mete ti torannia Tupana ehay moherep haria iꞌewyte Muisei woꞌonapin hat kaipyi taꞌatuhenoi henoi kahato raꞌyn Tupana aikporekuatnuat hap etiat. 14Pyno sio eweimohey teran mio wat ihay pote Iuwãu hawyi Eria wyti tuut hamuat e hap aikotã saꞌawyꞌi wuat tohenoi Marakia 4.5 piat. Pywo ti Iuwãu etiat taꞌatuhenoi are. Pyno miꞌi e hap eweimohey kuap pote eweimohey ro are katupono Eria tuut raꞌyn Miꞌi ti Iuwãu e. 15Pyno ehewaure kaꞌa pote eweikuap to hawyi eweipyhuꞌat iꞌe hap upi. 16Pyno mesuwe atunug hãꞌãg hap koran wuaria miitꞌin ete. Pyno miꞌiria ti aikotã hirokaria tukupteꞌen temahara turan oken note. Miꞌi hawyi iraniaꞌin tewyriaꞌin toꞌowẽpapꞌi toꞌewowi ewowi. 17Pywo waku watepy wepy woꞌokyiꞌat turanuat maꞌato yt eweikyꞌesat i. Miꞌi hawyi waku watepy woꞌosyp turan maꞌato yt eweiwak teran hin i hap ewy. Miꞌi hap ewy miitꞌin atiꞌatukay kay uimohey hamuat wen maꞌato yt uimohey teran hin i hap ewy. 18Miꞌi turan Iuwãu woꞌosetꞌok hat tuwemosyꞌat kahato itote. Yt tutuꞌu hin i sapo hy miꞌi hap eꞌat pe. Miꞌi pote torannia teꞌeroꞌe -Taꞌi maꞌãu saꞌag wyti meiẽ piit pe iꞌatuꞌe. 19Maꞌato Ihainia Saꞌyru tuut hawyi tenuk teꞌyꞌu eweiꞌe. Pyno eiwehaꞌat ro meiẽwat miit ienuk wato kahato hat eweiꞌe. Iꞌewyte mohy u kahato hat eweiꞌe. Iꞌewyte miitꞌin kaipywiat saꞌup poreraꞌat haria wyriaꞌin sese eweiꞌe. Iraniaꞌin yt nakuat i sese meiẽ eweiꞌe. Maꞌato pywo kahato miitꞌin iꞌatuweꞌeg hap kaipyi tuwemoherep iꞌatuminug wakuat kaipyi e.
Iruka 10.13-15 Piat Ewy
20Miꞌi hawyi Iesui tiꞌatukuasa kahato raꞌyn mekewat tawa piaria aiũpe toimoherep kahato raꞌyn tomisepap yt uwe minug ewywuat i pykai yt tomohey i hap upi. Katupono toimoherep taꞌyn iꞌatuehamo pykai yt taꞌatuwaure teran hin i taꞌatuminug saꞌag koꞌi pote. 21Miꞌi hawyi Iesui toꞌe tawa Korasĩ piaria pe iꞌewyte tawa Pesaita piaria pe -Kat pote eiperia ti atunug kahato raꞌyn uimisepap ehehamo pykai yt uimohey hin i. Miꞌi hap kaipyi ti aru aikotã tawa Tiro piaria iꞌewyte tawa Sitau piaria ieineꞌen haria miꞌiria ti iwaure raꞌyn taꞌatuminug saꞌag koꞌi hawyi te kahato raꞌyn. Miꞌi hap moherep hap ti taꞌatupag taꞌatuesokpe iꞌanam nakat iꞌewyte taꞌatupag ywyryp taꞌatuꞌakag note paa taꞌatuꞌe hap moherep hamo. 22Pywo pe ti areꞌe ehepe mekewat woꞌoꞌairo hap eꞌat pe ti aru poꞌog Tupana miꞌapiheg koꞌi wo eweikupteꞌen tawa Tiro piaria kai iꞌewyte tawa Sitau piaria kai. 23Iꞌewyte eipe tawa Kawanaum piaria -Taꞌi uruto ti iwatoꞌin nakaria atipy piaria ewy eweiꞌe maꞌato mio tã e haria ti aru tukupteꞌen guꞌuro hawe. Kat pote ti eipe eiwaꞌakasa raꞌyn uiminug uimisapap pykai yt uimohey i eipe. Maꞌato mio tã hap ewy atunug naꞌyn saꞌawyꞌi tawa Sutuma pe pote mekewat ywania toineꞌen ne mesuwe e. 24Karãpe Tupana woꞌoꞌapiheg hap eꞌat putꞌok e raꞌyn turan ti aru poꞌog eipe Tupana miꞌapiheg wuatnuaria wo eweikupteꞌen mekewat tawa Sutuma piaria kai mekewat tawa Tiro piaria kai are e Iesui tehay pun haria pe.
Iesui Yn Miitꞌin Mohy Hatno Sese Toineꞌen
Iruka 10.21-22 Piat Ewy
25Mekewat eꞌat pe Iesui toꞌe -Uiꞌywot En wyti mesuwat yi totiaria iꞌewyte atipy piaria potypot ereineꞌen. Miꞌi pote arehum ewowi katupono tukupteꞌen iraniaꞌin uruto ti yt uruikuap hin i te En iꞌatuꞌe aikotã hirokaria ewywuaria miꞌiria uimohey sese haria. Maꞌato iraniaꞌin uruto ti uruikuap kahato e haria wyti yt uikuap hin i haria teꞌeropyhuꞌat. 26Taꞌi Uiꞌywot En ni etunug naꞌyn aikotã paa e haria pe uimoherep kahato raꞌyn en emikyꞌesat ewy. 27Pyno Uiꞌywot tum yn raꞌyn uhepe torannia kat koꞌi kat koꞌi. Miꞌi turan yt uwe i kuap uwe Haꞌyru maꞌato Iꞌywot yn ikuap. Iꞌewyte yt uwe i kuap Iꞌywot hap Haꞌyru yn ikuap. Maꞌato uimiꞌairoria pe yn atimoherep kuap uwe Uiꞌywot e. 28Pyno eweĩꞌẽ ro uhewowi uwe uwe hoꞌopot haria. Katupono uito ahupit kuap ehetiat epotyi koꞌi hawyi atum ehepe eiwemohy hap. 29Pyno torannia uimohey haria eiwemohapap to uhete kat pote uito waku kahato areineꞌen iperupꞌi kahato rakat. Miꞌi hap kaipyi eweipuẽti kuap aru eiwemohy hap sese. 30Uimiium eipotpap wuat wyti yt ipotyi hin i katupono eipotpap uhewowi pote worohoꞌopowyro kahato hupit hap ete e Iesui wuatꞌi miitꞌin me.
S'ha seleccionat:
Mateu 11: mav
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2017, Wycliffe Bible Translators, Inc. All rights reserved.