ማቶሳ 13
13
ዜሪያዋ ሌሚሱዋ
(ማር 4፡1-9፤ ሉቅ 8፡4-8)
1ዬሱሲ ሄ ጋላሲ ሶዪፔ ኬሲዴ፥ ኣባ ጋፃን ኡቴዳ። 2ዳሮ ጮራ ኣሳይ ባሬ ዩሹዋን ዩዪ ኣዴ ሺቂና፥ ዎንጊሪያ ጊዶ ጌሊዴ ኡቴዳ፤ ኣሳይ ኡባይ ኣባ ጋፃን ኤቄዳ። 3ኣሳሲ ሌሚሱዋን ዳሮባ ሃዋዳን ያጊዴ ኦዴዳ፤ «ኢቲ ቢታኒ ዜሬ ዜራናው ኬሴዳ። 4ኢ ዜሪሺን፥ ኢቲ ኢቲ ዜሬይ ኦጊያ ዶናን ዎዳ፤ ያቲና ካፉ ዪዴ ሜዳ። 5ቃሲ ኢቲ ኢቲ ዜሬይ ኣንጮ ጊዴዳ ቢታ ቦላ ዎዳ፤ ዳሮ ቢታይ ባይና ዲራው፥ ሄ ዜሬይ ኤሌካ ዶሌዳ። 6ሺን ኣዋይ ኬሴዳ ዎዴ ጫርሻይ ሹሌዳ፤ ኣዱሳ ፃጱዋ ዬዲቤና ዲራው ሜሊ ኣጌዳ። 7ኢቲ ኢቲ ዜሬይ ኣጉን ጊዶን ዎዳ፤ ሄዋን ዶሌዳዋ ኣጉንይ ዲጪዴ ጩሌዳ። 8ኢቲ ኢቲ ዜሬይ ቱዔ ቢታን ዎዴ ዶሌዳ፤ ኢቱ ፄቱ ኣይፊያ፥ ኢቱ ኡሱፑን ታሙዋ፥ ኢቱ ሃታሙዋ ኣይፌዳ። 9ሲሲያ ሃይይ ዴዒያ ኡራይ ሲሶ!» ያጌዳ።
ዬሱሲ ሌሚሱዋን ኦዶ ጋሱዋ
(ማር 4፡10-12፤ ሉቅ 8፡9-10)
10ዬሱሳ ካሊያዋንቱ ኣኮ ሺቂዴ፥ «ኔኒ ኣዪሲ ኣሳሲ ሌሚሱዋን ኦዳይ?» ያጌዲኖ።
11ዬሱሲ ዛሪዴ፥ ኡንቱንቱሲ ሃዋዳን ያጌዳ፤ «ሂንቴንቱሲ ሳሉዋ ካዉቴ ፁራ ኤሩሳይ ኢሜቴዳ፤ ሺን ኡንቱንቱሲ ኢሜቲቤና። 12ኣዪሲ ጎፔ፥ ዴዒያዎ ጉጄታና፤ ኣው ዳራናዋ፤ ሺን ባይናዋፔ ሃራይ ኣቶ፥ ሄ ዴዒያዌካ ኣኬታናዋ። 13ታኒ ኡንቱንቱ ፄሊዴ ፄሌናዋዳን፥ ሲሲዴ ሲሴናዋዳን ሃኒያ ዲራው፥ ዎይ ቃሲ ኣኬኬና ዲራው ኡንቱንቶ ሌሚሱዋን ኦዳይ።
14«ኢሲያሲ ኡንቱንቱባ ሃዋዳን ኦዶዌ ፖሌታናዋ፤
‹ሂንቴንቱ ሲሳ ሲሳና፤
ሺን ሂንቴንቶ ጌሌና፤
ሂንቴንቱ ፄላ ፄላና፤
ሺን ቤዒኪታ። #ኢሳ 6፡9-10
15ኣዪሲ ጎፔ፥ ሃ ኣሳ ዎዛናይ ጉዙሜዳ፤
ባሬንቱ ሃይ ቱሊሴዲኖ፤
ባሬንቱ ኣዪፊያካ ጪሉሜዲኖ።
ሃዌ ባዌንቶ፥ ኡንቱንቱ ባሬንቱ ኣይፊያን ቤዓና፤
ባሬንቱ ሃይን ሲሳና፤
ባሬንቱ ዎዛናንካ ኣኬካና፤
ኡንቱንቱ ታኮ፥ ፆሳኮ ሲማና፤
ታኒካ ኡንቱንታ ፓና›
ያጌ።
16«ሺን ሂንቴንቱ ኣይፊ ፄሊያ ዲራዉኔ ሂንቴንቱ ሃይይካ ሲሲያ ዲራው፥ ሂንቴንቱ ኣንጄቴዳዋንታ። 17ታኒ ሂንቴንቶ ቱሙዋ ኦዳይ፤ ዳሮ ናባቱኔ ፂላቱ ሂንቴንቱ ቤዒያዋ ቤዓናው ኣሞቴዲኖ፤ ሺን ቤዒቤይኪኖ። ሂንቴንቱ ሲሲያዋ ሲሳናው ኣሞቴዲኖ፤ ሺን ሲሲቤይኪኖ።
ዬሱሲ ዜሪያዋ ሌሚሱዋ ቢሌ ኦዴዳ
(ማር 4፡13-20፤ ሉቅ 8፡11-15)
18«ሲሚ ካ ዜሪያዋ ሌሚሱዋ ቢሌይ ጊያዋ ሲሲቴ። 19ካዉቴ ቃላ ሲሲዴ፥ ኣኬኬና ኦኒኔ ኦጊያ ዶናን ዎዳ ዜሬ ማላ፤ ፃላሂያ ካፑ ዪዴ፥ ኡንቱንቱ ዎዛናን ዜሬቴዳዋ ማፂ ዲጌ። 20ኣንጮ ቢታን ዎዳ ዜሬይ ቃላ ሲሲዴ፥ ኤሌካ ናሼቻን ኣኪያዋንታ ማላቴ። 21ሺን ሄ ኣሳቱ ሃዒሳፔ ኣቲን፥ ኡንቱንቱን ፃጱ ባዋ፤ ቃላ ጋሱዋን ሜቱ ዎይ ዬዴሳይ ዪያ ዎዴ፥ ኤሌካ ቤቲ ኣጊኖ። 22ቃሲ ኣጉን ጊዶን ዎዳዌ ቃላ ሲሲያዋ ቤሴ፤ ሺን ሃ ሳዓ ዴዑዋሲ ሂርጉሳይኔ ዱሬቴ ሲቁሳይ ቃላ ጩሌ፤ ሃ ጋሱዋን ሄ ዜሬይካ ኣይፌናን ኣቲ ኣጌ። 23ቱዔ ቢታን ዜሬቴዳዌ፥ ቃላ ሲሲዴ፥ ኣኬኪያ ኣሳ ቤሴ፤ ኢካ ኣይፌ፤ ኢቱ ፄቱዋ፥ ኢቱ ኡሱፑን ታሙዋ፥ ኢቱ ሃታሙዋ ኣይፌ» ያጌዳ።
ዛሪንጊያ ሌሚሱዋ
24ዬሱሲ ኡንቱንቶ ሃራ ሌሚሱዋ ሃዋዳን ያጊዴ ኦዴዳ፤ «ሳሉዋ ካዉቴይ ባሬ ጎሻን ሎዖ ዜሬ ዜሬዳ ቢታኒያ ማላቴ። 25ሺን ቃማ ኣሳይ ጌሚዒሺዲጊና፥ ኣ ሞርኪ ዪዴ፥ ዛርጋ ዜሬዳዋ ቦላ ዛሪንጊያ ዜሪዴ ቤዳ። 26ሺን ዛርጋይ ዶሊ ኣይፌዳ ዎዴ፥ ዛሪንጊ ሄ ዎዴ ቤቴዳ።
27«ኣ ቆማቱ ኣኮ ዪዴ፥ ‹ጎዳው፥ ኔኒ ኔ ጎሻን ሎዖ ዜሬ ዜራቤይኪ? ያቲና፥ ዛሪንጊ ሃቃፔ ዬዴ?› ያጌዲኖ።
28«ሄዋፔ ጉዪያን ጎዳይ፥ ‹ሄዋ ሞርኪ ኦዳ› ያጌዳ።
«ቆማቱ፥ ‹ኑኒ ቢዴ ሾዳናዳን ዶሳይ?› ያጌዲኖ።
29«ሺን ኢ፥ ‹ኣጊቴ፥ ዛሪንጊያ ሂንቴንቱ ሾዲዴ፥ ዛርጋና ሾዳኒታ። 30ቦቾፒቴ፤ ቆይጪያ ዎዲ ጋካናው፥ ኢቲፔ ዲጪኖ። ቆይጪያ ዎዲ ጋኮዴ፥ ታኒ ቆይጪያዋንታ፥ ካሴቲዴ ዛሪንጊያ ማፂቴ፤ ታማን ጉዳናው ፖቺያን ፖቺያን ቃቺቴ፤ ሺን ዛርጋ ሺሺዴ ዲዪያን ቆሊቴ› ጋና» ያጌዳ።
ሳናፊጪያ ጌቴቲያ ሚቲ ዜሬ ሌሚሱዋ
(ማር 4፡30-32፤ ሉቅ 13፡18-19)
31ዬሱሲ ኡንቱንቶ ሃራ ሌሚሱዋ ያጊዴ ኦዴዳ፤ «ሳሉዋ ካዉቴይ ሳናፊጪያ ጌቴቲያ ጉ ሚቲ ኣይፊያ ማላቴ፤ ሄ ሚቲ ኣይፊያ ኣሳይ ኣኪዴ፥ ባሬ ጎሻን ዜሬዳ። 32ሄ ዜሬታ ሃራ ዜሬ ኡባፔ ጉፃው፤ ሺን ዲጬዳ ዎዴ፥ ሃራ ኣታኪልቲያ ኡባፔ ዳራው፤ ካፉ ዪዴ፥ ኢዚ ቃንካን ኬፂያዋ ኬና ዎጋ ሚ ጊዳዱ» ያጌዳ።
ኢርሹዋ ሌሚሱዋ
(ሉቅ 13፡20-21)
33ቃሲካ ዬሱሲ ሃራ ሌሚሱዋ ኡንቱንቶ ያጊዴ ኦዴዳ፤ «ሳሉዋ ካዉቴይ ኢቲ ሚሺራታ ሄዙ ኬሪያ ሊያ ኣካዴ፥ ሙናቄዳ ሙናቃይ ኡባይ ዴንዳና ጋካናው፥ ኣኒ ቲጌዳ ኢርሹዋ ማላቴ» ያጌዳ።
ዬሱሲ ሌሚሱዋን ታማሪሴዳ ጋሱዋ
(ማር 4፡33-34)
34-35ዬሱሲ ኣሳው ሄ ኡባ ሌሚሱዋን ኦዴዳ፤ ሌሚሱ ባይናን ኢ ኢቲባካ ኦዴና፤ ናቢ፥
«ታኒ ኡንቱንቶ ሃሳዪያ ዎዴ፥
ሌሚሱዋን ሃሳያይ።
ኣላሚ ሜቶዴፔ ዶሚዴ
ጌሜዳ ዬዋቱዋ ኦዳይ» #ማዝ 78፡2
ያጌዳዌ ፖሌታና ማላ፥ ሄዋ ኢ ኦዴዳ።
ዬሱሲ ዛሪንጊያ ሌሚሱዋ ቢሌ ኦዴዳ
36ሄዋፔ ጉዪያን፥ ዬሱሲ ኣሳ ኣጊዴ፥ ሶይ ጌሌዳ፤ ኣ ካሊያዋንቱ ኣኮ ቢዴ፥ «ጎሻን ዴዒያ ዛሪንጊያ ሌሚሱዋ ቢሌ ኑሲ ኦዳ» ያጌዲኖ።
37ዬሱሲ ዛሪዴ፥ ሃዋዳን ያጌዳ፤ «ሎዖ ዜሬ ዜሪያዌ ኣሳ ናዓ፤ 38ጎሻይ ሃ ኣላሚያ፤ ሎዖ ዜሬይ ፆሳ ካዉቴ ኣሳ፤ ዛሪንጊ ፃላሂያ ካፑዋ ናና። 39ዛሪንጊያ ዜሬዳዌ ሞርኪያ ፃላሂያ፤ ቆይቻ ዎዲ፥ ዎዲያ ዉርሴ፤ ቃሲ ቆይጪያዋንቱ ኪታንቻቱዋ።
40«ሄዋ ዲራው፥ ዛሪንጊያ ማፂዴ፥ ታማን ጉዲያዋዳን፥ ዎዲያ ዉርሴን ሄዋ ማላ ጊዳናዋ። 41ኣሳ ናዓይ፥ ኪታንቻቱዋ ኪታናዋ፤ ኡንቱንቱ ኣ ካዉቴ ጊዶን ናጋራው ጋሶ ጊዲያ ኡባቱዋኔ ኢታባ ኦያዋንታ ማፂዴ ኬሳናዋንታ። 42ያቲዴ ቶዔና ታማን ኦላናዋንታ፤ ሄዋን ኡንቱንቱ ዬካናዋንታኔ ኣቻ ቃናዋንታ። 43ሄ ዎዴ ፂላቱ ባሬንቱ ኣቡ ካዉቴን ኣዋዳን ፖዓና። ሲሲያ ሃይይ ዴዒያ ኡራይ ሲሶ!
ሞጌቴዳ ሚሻ ሌሚሱዋ
44«ሳሉዋ ካዉቴይ ጎሻን ሞጌቴዳ ሚሻ ቤሴ፤ ኢቲ ቢታኒ ሄ ሚሻ ዴሚዴ፥ ዛሪዴ ሞጊ ኣጌዳ፤ ዳሮ ናሼቲዴ ቢዴ፥ ባሬው ዴዒያዋ ኡባ ዛሊዒዴ፥ ሄ ጎሻ ሻሜዳ።
ኢንቁዋ ጌቴቲያ ዳሮ ኣልዖ ሹቻ ሌሚሱዋ
45«ቃሲ ሳሉዋ ካዉቴይ ኢንቁዋ ጌቴቲያ ዳሮ ኣልዖ ሹቻ ሻማናው ኮዪያ ዛሊዓንቻ ማላቴ። 46ሄ ዛሊዓንቻይ ዳሮ ኣልዖ ኢንቁዋ ዴሚዴ፥ ቢዴ ባሬው ዴዒያዋ ኡባ ዛሊዒዴ፥ ኣ ሻሜዳ።
ዳባ ሌሚሱዋ
47«ቃሲ ሳሉዋ ካዉቴይ ኡባ ቆሞ ሞሊያ ኦይቂያ፥ ኣባን ዬጌቴዳ ዳባ ማላቴ። 48ሞሊ ዳባ ኩሜዳ ዎዴ፥ ሞሊያ ኦይቂያ ኣሳቱ ኣባፔ ጋፃ ኬሲዴ ኡቴዲኖ፤ ያቲዴ ሎዖ ሞሊያ ቆሪዴ፥ ዬጊያ ሚሻን ዬጌዲኖ፤ ሺን ኢታ ሞሊያ ዎራ ኦሌዲኖ። 49ዎዲያ ዉርሴን ሄዋዳን ሃናና፤ ኪታንቻቱ ዪዴ፥ ናጋራንቻቱዋ ፂላቱዋ ጊዶፔ ቆሪዴ፥ 50ቶዔና ታማን ኦላናዋንታ፤ ሄዋን ኡንቱንቱ ዬካናዋንታኔ ኣቻ ቃናዋንታ።
51«ሃዌ ኡባይ ሂንቴንቶ ጌሌዴ?» ያጊዴ ኡንቱንታ ኦቼዳ።
ኡንቱንቱ፥ «ኤ፥» ያጌዲኖ።
52ኢ፥ «ሄዋ ዲራው፥ ሳሉዋ ካዉቴ ፁራ ሎይ ኤሪያ፥ ሂጊያ ታማሪሲያ ኡባይ፥ ባሬ ሚሻ ሺሺ ዎዳ ጎሊያፔ ኦራ ሚሻኔ ኤጫ ሚሻ ሻኪ ኬሲያ ኢዛዋ ማላቴ» ያጊ ዛሬዳ።
ናዚሬቴን ዬሱሳ ጋኬዳ ኢፁዋ
(ማር 6፡1-6፤ ሉቅ 4፡16-30)
53ዬሱሲ ሃ ሌሚሳቱዋ ኦዲ ዉርሶዋፔ ጉዪያን፥ ሄዋፔ ዴንዲዴ፥ 54ባሬ ካታማ ናዚሬቴ ቤዳ። ኣዪሁዳ ዎሳ ጎሌን ታማሪሲያዋ ሲሴዳ ኣሳይ ማላሌቲዴ፥ ሃዋዳን ያጌዳ፤ «ሃዌ ሃ ኣ ኤራቴኔ ፆሳይ ኦያ ማላታ ኦናው ዎልቃ ሃቃፔ ኣኬዴ? 55ሃዌ ኣናፂያ ናዓ ጊዴኔ? ኣ ዳያ ማይራሞ ጊዴኬ? ኣ ኢሻቱ ያዪቆባ፥ ዮሴፋ፥ ሲሞናኔ ዪሁዳ ጊዲኪኖ? 56ኣ ሚቻቱ ኡባይ ኑናና ዴዒኪኖ? ያቲና፥ ኢ ሃ ኤራ ኡባ ሃቃፔ ዴሜዴ?» ያጌዲኖ። 57ኡንቱንቱ ኢ ጊያባ ኣኬናን ኢፄዲኖ።
ሺን ዬሱሲ ሄ ኣሳሲ፥ «ናቢ ባሬ ጋዲያኒኔ ባሬ ሶይ ኣሳን ቦንቼቴና፤ ሺን ሃራሳ ኡባን ቦንቼቴ» ያጌዳ። 58ኡንቱንቱ ኣማኒቤና ዲራው፥ ዬሱሲ ዳሮ ማላታ ሄ ሳን ኦቤና።
S'ha seleccionat:
ማቶሳ 13: dwrENT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2011, Wycliffe Bible Translators, Inc. All rights reserved.
Més informació sobre Ooratha Caaquwaa