إنجيل يوحَنّا 12

الفصل طناش

1من قبل عيد الفِصح بْستّ أيّام، جا يَسوع نْبيت عَنْيا فاين كان لِعازَر الّي كان مات وْبعتوْ من بين الميّتين، 2وْعملو لو تمَّاك واحد العشا، وْكانتْ مَرْثا خدّامة وْلِعازَر كان واحد من الّي ݣالسين معاه. 3شبّرَتْ مَرْيَم نُص كيلو د عطر الناردين الحُرّ، الغالي بزّاف، وْدهنَتْ الرِّجلين د يَسوع وْمسحَتوم بْشعراْ، وْتعمّرَت الدار بالريحة الطيّبة. 4قال يَهودا الإسْخَريوطي، واحد من التلامد ديالو الّي كان غادي يخونوْ: 5"علاش ما تبيع شي هَد العطر بْتلت مية دينار وْتعطيها نالمساكن؟" 6قال هَد الشي ماشي حيت كانو كيهمّوه المساكن، وَلكن حيت كان سارق وْكان عندو الصنْدوق وْهُوَ كيرفد الّي تسيّب فيه. 7ديك الساعة قال يَسوع: "خلّيوها. هي كتحافظ على هَد الشي نالنهار د الدفين ديالي، 8حيت المساكن غادي يكونو دائمًا معكُم، أمّا أنا ما غادي شي نبقا معكُم دائمًا."

9بزّاف د الناس من اليهود عرفوه تمَّاك، وْجاو ماشي بْسباب يَسوع وْكان، وَلكن باش يشوفو لِعازَر حتّى هُوَ، الّي بعتوْ يَسوع من بين الميّتين. 10وَلكن خطّطو رُؤَساء المسؤولين باش يقتلو لِعازَر حتّى هُوَ، 11حيت بزّاف د اليهود كانو كيمشيو وكيآمنو بيَسوع بْسبابو.

12ولّا غدّا الناس كاملين الّي جاو نالعيد سمعو بلّي يَسوع ماجي نأُورُشَليم، 13وْشبّرو الجريد د النخل وْخرجو يتعرّطو لو وْكانو كيعيّطو: "أُوصَنّا!#12‏:13 أُوصنّا: هَدي واحد الكلمة عبريّة معناها "نجّينا." شوف المزْمور 25:118. مبروك هُوَ الّي ماجي بِاسم الرَّبّ، مَلِك إسْرائيل!" 14جبر يَسوع واحد الدحش وْركب عليه فحال ما هُوَ مكتوب: 15"ما تخاف شي، آ بنت صِهْيون. راه المَلِك ديالك ماجي راكب على دحش الحمارة."#12‏:15 هَد الاقتباس من سفر النَّبي زكريّا 9‏:9. 16في الُوّل، التلامد ديالو ما فهمو شي الّي وقَع، وَلكن ملّي تمجّد يَسوع، في ديك الوقت تفكّرو بلّي هَد الحاجات مكتوبة عليه وْهُوَ قالاْ لوم. 17الناس الّي كانو مع يَسوع ملّي عَيّط على لِعازَر من القبَر وْبعتوْ من بين الميّتين، شهدو لو. 18على هَد الشي تعرّطو لو الناس، حيت سمعو بلّي عمل هَد العلامة. 19قالو الفرّيسيّين بيناتوم: "أنتُمَ ما كتصلحو نْوالو، شوفو كيفاش الدنيا كاملة كَتْـتبعوْ!"

20كانو شي د اليونانيّين بين الّي طلعو يعبدو في العيد. 21في ديك الوقت قرّبو هَدو نْعند فيلِبُّس، الّي هُوَ من بيت صَيدا د الجَليل، وْرغبوه كيقولو: "آ سيدي، بغينا نشوفو يَسوع." 22وْمشى فيلِبُّس وْقالاْ نأَنْدَراوس، وأَنْدَراوس وْفيلِبُّس خبرو يَسوع. 23ديك الساعة ردّ عليهُم يَسوع وْقال: "جات الساعة باش يتمجّد اِبن الإنسان. 24كنقول لكُم الحقّ، إدا ما طاحتْ شي الحبّة د الزرع في الأرض وْماتتْ، هي كتبقا بوحداْ، وَلكن إدا ماتتْ، كتجيب بزّاف د الغلّة. 25الّي كيعزّ نفسو غادي يخسراْ، والّي كيكره نفسو في هَد الدنيا، كيحفظاْ نالحياة الأبديّة. 26كُل واحد الّي بغى يخدمني خصّوْ يتبعني، وْفاين ما نكون أنا، تمّاك غادي يكون عبدي. وِادا شي واحد كيخدمني، الآب غادي يكرّموْ.

27"دابا نفسي مشوّشة. شنّو غادي نقول؟: آ بابا، نجّيني من هَد الساعة؟ وَلكن بْسباب هَد الشي جيتْ نْهَد الساعة! 28آ بابا، مجّد اِسمك!" ديك الساعة جا واحد الصوت من السما وْقال: "مجّدْتوْ وْغادي نمجّدوْ عاود." 29الناس الّي كانو واقفين وْسمعو الصوت قالو: "هَدا صوت الرعد،" ويَخرين قالو: "هدَر معاه شي ملاك." 30ردّ يَسوع وْقال: "ماشي بْسبابي جا هَد الصوت، وَلكن بْسبابكُم. 31الحُكم د هَد الدنيا وصَل دابا والرئيس د هَد الدنيا غادي يتّطرد برّا. 32إدا أنا اتّرفعْتْ من الأرض، غادي نجبد الناس كاملين نْعندي." 33قال هَد الشي باش يورّي كيفاش غادي يكون الموت ديالو.

34جاوبو الناس: "حنايَ سمعْنا من الشريعة بلّي المسيح غادي يبقا على الدوام، وْكيفاش أنتينا كتقول بلّي اِبن الإنسان خصّوْ يتّرفع؟ شكون هُوَ هَدا اِبن الإنسان؟" 35قالّوم يَسوع: "الضَّو باقي معكُم مُدّة قليلة. تمشّاو ملّي باقي عندكُم الضَّو باش ما ينزل شي عليكُم الظلام، حيت الّي كيمشي في الظلام ما كيعرف شي فاين ماشّي. 36ما دام عندكُم الضَّو، آمنو بالضَّو باش تكونو أُوْلاد الضَّو." تكلّم يَسوع بْهَد الشي وْمشى وْتخبّع عليهُم.

37وَلكن واخّا يَسوع عمل بزّاف د العلامات قدّاموم، ما آمنو شي بِه، 38باش يتكمّل ديك الشي الّي قال النَّبي إشَعْيا: "يا رَبّي، شكون تيّق الخبار ديالنا، وْلمّن ظهَر دراع الرَّبّ؟"#12‏:38 هَد الاقتباس من سفر النَّبي إشعيا 53‏:1. 39على ديك الشي ما قدرو شي يآمنو، حيت قال إشَعْيا عاود: 40"هُوَ عمى لوم العينين وْردّ القلوبة ديالوم قاصحة باش ما يشوفو شي بْعينوم ويفطنو بْقلبوم ويرجعو، وانا نشافيهُم."#12‏:40 هَد الاقتباس من سفر النَّبي إشعيا 6‏:10. 41قال إشَعْيا هَد الشي ملّي شاف مجدو وْتكلّم عليه. 42واخّا هَيداك، آمنو بيَسوع بزّاف من الحُكّام حتّى هُمَ، وَلكن بْسباب الفرّيسيّين ما اعْتَرفو شي بِه باش ما يطردوهُم شي من بيت العبادة. 43حيت بغاو الرضا د الناس كتَر من الرضا د اللّٰه.

44غوّت يَسوع بْصوت عالي وْقال: "الّي كيآمن بيَّ ما كيآمن شي بيَّ، وَلكن كيآمن بْهَداك الّي صيفطني، 45والّي كيشوفني، كيشوف الّي صيفطني. 46أنا هُوَ الضَّو الّي جيتْ نْهَد الدنيا باش كُل واحد الّي كيآمن بيَّ ما يبقا شي في الظلام. 47وِادا شي واحد كيسمع كلامي، وْما كيطيعوْ شي، أنا ما غادي شي نحكم عليه، حيت ما جيتْ شي باش نحكم على الدنيا، وَلكن باش ننجّي الدنيا. 48أَي واحد الّي كيرفضني وْما كيقبل شي كلامي، كاين الّي كيحكم عليه. الكلام الّي تكلّمْتْ بِه غادي يحكم عليه في النهار الأخير، 49حيت أنا ما تكلّمْتْ شي من عندي، وَلكن الآب الّي صيفطني، هُوَ الّي عْطاني الوَصيّة شنّو نقول وْباش نتكلّم. 50وانا كنعرف بلّي الوَصيّة ديالو هي الحياة الدايمة، والّي كنهدَر بِه، فحال ما قال لي الآب، هَيداك كنهدَر."

S'ha seleccionat:

إنجيل يوحَنّا 12: ary

Subratllat

Comparteix

Copia

Vols que els teus subratllats es desin a tots els teus dispositius? Registra't o inicia sessió

Més informació sobre Northern Mor N T

إنجيل يوحَنّا 12

Versets bíblics populars de
إنجيل يوحَنّا 12

La Bíblia:

الدارجة المغربية

Versió: Northern Mor N T - ary