Matie 14

Zään Badisöö' 'kwiee yëkuu' wälɩ

(Makö 6.14‑29; Lukö 9.7,9)

1‑Lɔɔ' 'tänyɩɛ 'mnö nä, Galilee‑bhlɩɛɛ' 'loyoo, Elodö, ɔ nuu‑ sä Zozii nʋ bhlä nä, 2kɔ ‑soo ɔɔ' ‑gänʋnyʋa, ɔ lä Zään Badisö 'mɔɔ‑ ‑kʋ lä ‑lɔɔ! Ɔ yä 'kuëë glɔɔ nä, ɩɩ' ‑zä ɔ ‑kä lä 'päwä 'nɩ ɔ nʋ lä 'yiziziogbɩ.

3Sɩ ‑kʋ bhlä naa, 'tänyɩ ‑kʋ ‑lɔɔ 'nɩ Elodö ‑klä Zään Badisö 'nɩ wa ‑gʋɔ 'nɩ wa yio ‑jɩɩ' 'ŋʋ. ‑Ɔnöza bhɛɛ? Elodö nä, kɔ ‑sä bhä ɔ bheli Filipʋ 'ŋnɔ Elodɩadö, 'nɩ ɔ nönöɔ‑. 4Ɩ ‑kä 'ŋnö 'nɩ Zään ‑sonöɔ, ɔ lä ɩɩ' ‑wʋ 'kʋ ‑ŋwa nynä ‑mä ‑n 'ylä ‑n bheli 'ŋnɔ. 5Nä, kä Elodö ‑tään bhä nynä ɔ 'kä Zään 'bhlä ‑mä sä nyɩkpaa 'fɩɩn ‑yi bhlä sɔɔ nynä Zään ‑glö Laagɔɔ' 'plɔfɛtɩ nä, kä Elodö gu bhä. 6‑Mä 'tänyɩ ‑kʋ ‑lɔɔ 'nɩ Elodöö' gänöylʋʋ' ‑glɩsɩɩsɩɛ yi ŋëë. 'Nɩ ɔ bheli‑ Filipʋ 'ŋnɔ Elodɩadö ‑yɔŋnɔ yi ‑jlëë' slo, 'nɩ ɔ yi ye. ‑Mä sä ɔ ‑ye lä nä, sɔɔ ‑kamä kpänyɩ Elodö 'tʋ. 7Ɩ ‑gbä 'nɩ ɔ 'sɔlɩ‑. Ɔ ‑soo 'yuŋnʋgbänyɔɔ nynä lʋʋ ɔ kä ‑waa nä, ɔ 'ylänöɔ 'nyʋ ‑mä ɔ yionyʋ 'nyɛ. 8‑Mä ŋnʋgbɛnyɔɔ mʋ 'nɩ ɔ 'nɔ yio dɩgälɩ paa. 'Nɩ sä ɔ 'nɔ ‑sonöɔ lä nä, ɔ yi sɔɔ Elodö soo, ɔ lä Zään Badisöö' 'wluu, ‑n 'ŋʋʋ ‑kɔklʋʋ' ‑yä ‑n nyɛɛ'ɛ 'mʋʋ ‑lää ‑pɛpɛɛ. 9Ŋnʋgbɛnyɔɔ cii‑ lä sɔɔ nä kä wälɩɩ ‑kamä 'loyoo yëkuu'. ‑Mä sä ɔ yä bhɛ lä nyɩkpaa 'fɩɩn 'klʋ 'sɔlɩ nä, kɔ ŋoo yɩ. 10'Nɩ ɔ yi nyɩkpa ‑mɔɔ ‑jɩɩgbëë' lobho nynä wa ‑döö Zään Badisö 'wlu 'kʋ. 11'Nɩ wa mʋ 'nɩ wa yi Zään Badisöö' 'wlu 'kʋ ‑döö 'nɩ wa yiu ‑kɔklʋʋ' 'nʋ, 'nɩ wa yiu ŋnʋgbɛnyɔɔ ‑lä. 'Nɩ ŋnʋgbɛnyɔɔ ‑mä, ɔ yiu 'kʋ 'bhlü 'nɩ ɔ yiu ɔ 'nɔ 'nyɛ. 12Ɩ plöö‑ ylä sää 'kʋ nä, kä Zään' 'kʋgënyʋa yi 'nɩ wa yi ɔɔ' ‑gɛzɛɛ 'kʋ 'bhlü 'nɩ wa yie zizie. 'Nɩ wa yi Zozii Zään' 'kwiee 'döö fä.

Zozii nyɛɛ‑ nyɩkpaa' ‑bhɛgö ‑ngbü (5.000) lülülɩɩ

(Makö 6.30‑44; Lukö 9.10‑17; Zään 6.1‑15)

13Zozii nuu‑ lä Zään' 'kwiee wälɩɩ nä kɔ ‑bha ‑lɔɔ 'bhlɩɛ 'mnö. Ɔ ‑plä 'gokpë 'nɩ sää ‑blëlü ‑gbäsɩ, ‑mä nyɩkpɔɔ' bhɔɔ lä ‑kʋ nä, ɔ ‑mʋ ‑mɔɔ. ‑Mä nyɩkpa ‑bhutukpä ‑yibhë ‑mɔɔ dä. Ɩ ‑kä 'ŋnö 'nɩ wa nämnö‑ bhɩɩ' 'nɩ wa yio ‑mɔɔ 'kʋ 'gë. 14‑Mä ɔ ‑bha lä 'gää 'gokpëa 'mnö 'nɩ ɔ kwlii‑ lä nä, ɔ lɔ wloo nä nyɩkpaa' 'kpö 'kädä. 'Nɩ waa' ŋäzö yio 'kʋ ‑jɛɛ. Ɩ ‑kä 'ŋnö 'nɩ gupanyʋa 'fɩɩn wa ‑lä bhlä nä, ɔ ‑yamänʋwa. 15‑Kugbësä ‑yi ylä nä, 'kʋgënyʋa ‑yi Zozii yëku 'nɩ wa yio soo, wlä ‑gbäsɩɩ ‑a ‑kʋ lä ‑mää nä, kpänyɩ ‑mɔɔ ‑zie gwë, 'nɩ 'ylʋ yä 'sɩɩ yiosä bhlü nä, bheeje Cɩanyɔ‑, ‑n gbä ‑yä nyɩkpaa 'ylɩbhɔ yɩ. Wa mʋ 'dii 'mnö ‑yä wa 'kä waa' lülülʋʋ zɔɔ. 16Zozii lä ɩɩ' ‑wʋ 'kʋ ‑ŋwa nynä ‑mä wa 'ylɩbhɔ. Anyɩ 'titi, a 'nyɩwa lülülɩɩ! 17'Kʋgënyʋa lä ‑a ‑kä 'flɔɔbhü ‑ngbü ‑yä zliiyi 'sɔ 'cɩɩn! 18Zozii lä a ‑lä'ä 'mɩɩ ‑lää! 19'Nɩ ɔ yi nyɩkpaa soo nynä wa kʋ ‑pitii 'klʋ sä. 'Nɩ 'flɔɔbhüü ‑ngbü ‑yä zliiyii 'sɔ, ɔ yii 'kʋ 'bhlü. Ɔ ‑wloo ‑laagɔɔ', 'nɩ ɔ yi bhibhie. Ɔ ‑döödö 'flɔɔ 'mʋ, 'nɩ ɔ yi ɔɔ' 'kʋgënyʋa 'nyɛ nynä wa dënʋ ‑jlëa. 'Nɩ wa yiu ‑jlëa 'mnö nyɩkpa dëë. 20‑Mä nyɩkpaa 'fɩɩn ‑lü 'nɩ wa ‑loo, 'nɩ 'flɔɔ ‑ji 'kʋ 'nɩ wa ‑fämʋ. ‑Ʋ ‑ji lä 'kʋ nä, ʋ ‑nʋ 'flɔɔ ‑takwü 'kʋgbä 'sɔ. 21'Nɩ nyɩkpaa‑ ‑lü lä nä, ‑a gä zɛɛ 'nɩ ‑a gä ‑mɔɔ 'ŋwnɩa ‑yä 'yua 'sɔ ‑sä nä, wa ‑ŋëë nyɩkpaa' ‑bhɛgö ‑ngbü (5.000) yiosä.

Zozii nämnö 'nyie 'klʋ

(Makö 6.45‑52; Zään 6.16‑21)

22‑Nɩnɩ 'fɩɩn ‑bhɩä lä 'gää nä, kä Zozii ‑gbä 'nɩ ɔɔ' 'kʋgënyʋa ‑plä 'gokpë ‑yä, wa 'kɔ 'nyiee klë ‑bɛɛ ‑kää mʋ. Ɩyä ɔmɔ nä, ɔ 'kä klë too ‑yä ɔ 'kä gbä ‑yä nyɩkpaa 'kä waa' ‑bhäändö mʋ. 23Ɔ ‑gbä 'nɩ nyɩkpaa mʋ ylä nä, kɔ ‑mʋ ‑mɔɔ' 'kükëa 'wlu. Ɔ ‑zie ‑mɔɔ gwë 'nɩ ɔ yi bhibhie. ‑Mä 'ylʋ yä bhɛ bhlü 'nɩ ɔ ‑kʋ bhlä ‑mɔɔ ɔmɔ ‑bhlo. 24'Nɩ 'kʋgënyʋaa' 'gokpëa yä bhɛ 'sɩɩ kpänyɩ 'nyiee ‑kpʋkpʋʋ gwë ‑sä. ‑Mä 'nyiee 'klʋ ‑vʋvɔlʋ yi bhä 'nɩ ʋʋ' 'nyɩwa bhɔɔ 'casɩ ‑yä wa 'kä 'luu, 'nɩ 'nyinakwɩ 'sɛpɩɩ bhä 'gokpëa. 25‑Maa, zözädö‑tänyɩɩ' 'nɩ Zozii yi 'kʋgënyʋa 'bɩɩ 'bhää. Ɔ nämnö‑ 'nyie 'klʋ 'nɩ ɔ güwa‑ 'kʋ. 26‑Mä 'kʋgënyʋa nio‑ lä 'yi 'nɩ ɔ nämnö lä 'nyiee 'klʋ nä, kä ‑ŋänö ‑plʋwa 'nɩ wa ‑kplä 'saglöö, wlä 'ku ‑nyaaklɛ yi lä! 27'Nɩ Zozii yiwa ‑soo 'kpobhuu ‑bhlo 'kʋ, ɔ lä a 'ŋʋ ‑mɔɔ plɛ ‑mä ‑amʋ lä! ‑Ŋänöö' bhla'anyɩ lä!

28Ɔ cii‑ lä sɔɔ nä, Pɩɛlö lä Cɩanyɔ‑, ‑mɔɔ gä 'zaazɩ ‑lɔɔ ‑kʋ nä, ‑n gbä ‑yä n 'kä 'nyie 'klʋ nämnö ‑mɔɔ 'bhisäkʋ ‑yä n 'kä‑ä yii. 29Zozii lä ‑n yi ‑nä! 'Nɩ Pɩɛlö yi 'gokpëa 'mnö ‑bha 'nɩ ɔ yi 'nyiee 'klʋ nämnölɩ 'kʋ cie. Ɔ nää 'nɩ ɔ mʋʋ bhɛ Zozii. 30‑Mä ɔ ni lä 'nyiee 'klʋ ‑vʋvɔlʋʋ 'yi 'nɩ ʋ 'tɛmä bhɛlä kpänyɩ 'mʋ nä, kä ‑ŋänö ‑plɔɔ. Ɩ ‑kä 'ŋnö 'nɩ ɔ cie‑ yɩ 'kʋ mnɔlɩ 'kʋ. 'Nɩ ɔ yi 'mʋ ‑gaa, ɔ lä Kwlienyɔ‑, ‑n sä'ä ‑lɔɔ nëë'! 31‑Mä 'kpobhuu ‑bhlo 'kʋ Zozii ‑fä sɔ 'yikʋ 'nɩ ɔ yi Pɩɛlö klä. 'Nɩ ɔ yio soo, ɔ lä ‑naa pɔlötɛtɛɛ' ‑lɛ 'tɩkɩɩlɛɛ ‑ɛɛn! ‑Ɔnözä 'nɩ ‑n nö'ö bhä dë 'tɛɛ? 32'Nɩ Zozii ‑yɔsɔ yi 'gokpëa 'mnö ‑gblää. Sa wa gblää‑ lä 'gää nä, kä ‑vʋvɔlʋʋ doo‑. 33‑Mä 'kʋgënyʋa‑ ‑kʋ bhlä 'gokpëa 'mnö nä, wa pɔɔ‑ ‑kokoowli dëlüü glu 'nɩ wa yio bʋbɔ. Wlä 'zaazɩ, ‑mɔɔ plöö‑ lä Laagɔ ‑Yowli!

Zozii ‑yamä Zenezalɛtö‑bhlɩɛ 'mnö nyɩkpa

(Makö 6.53‑56)

34Wa tɔɔ‑ lä 'nyie nä, 'nɩ wa yi Zenezalɛtö‑bhlɩɛ 'mnö ŋëë. 35‑Mä ‑mɔɔ' nyɩkpaa ‑yibhë lä Zozii nä, kwa ‑fä 'bhlɩɛ 'mnö dää 'fɩɩn 'dö. Ɩ ‑kä 'ŋnö 'nɩ nyɩkpaa ‑lɔɔ ‑mɔɔ gupanyʋa 'fɩɩn. 36Wa bhibhio bhä nynä ɔ gbä ‑yä wa 'taa ɔɔ' ‑bänaa' numnuu' ‑kpakpa. ‑Mä nyɩkpaa 'fɩɩn‑ 'tanöɔ bhlä nä, kwa yamä bhä.

S'ha seleccionat:

Matie 14: god

Subratllat

Comparteix

Copia

Vols que els teus subratllats es desin a tots els teus dispositius? Registra't o inicia sessió

Més informació sobre GOD - u2

Matie 14

Versets bíblics populars de
Matie 14

Escolta Matie 14

La Bíblia:

Godié

Versió: GOD - u2 - god

Matie 14

Matie 14

Versets bíblics populars de Matie 14

Escolta Matie 14

La Bíblia:

Godié

Versió: GOD - u2 - god

Matie 14

Versets bíblics populars de
Matie 14