मरकुस 16
16
येसुना असा जिवेमायाना
(मत्ति २८:१-८; लूका २४:१-१२; युह २०:१-१०)
1यहुदि लोकुरा पवित्र दिया मारत असके मरियम मगदलनि, याकुबना अवहारि मरियम अनि सलोमि हन्जुन येसुना मेन्दुलतुन लावे कियान साटि सोबाय दयमुरता चिजक अस्ततुंग। 2हपताता पहले दिया मन्जे इतवार दिया पोळद पसियाना मुने अव बिजगुडितिगा वातुंग। 3अनि वायानपा, “मावा साटि बिजगुडिता दरवाजाताल कलदुन बोर गुचहानुर?” इन्जोर अव आपसते इन्दुंग। 4मति कल गुचता मता इन्जोर अगा हतपा अव हुळतुंग, ओद कल पकाय हजोर मता। 5बिजगुडिता लोपा हतुंग असके अव वरोर लयोरिन पान्डरिंग सन्दरांग पोन्डस तिन्दानबासा उदस मतोर इदाम हुळतुंग अव पकाय दंगे मातुंग। 6ओर अवेहकुन इतुर, “निमाट दंगे मायमाट। कुरुस पोरो अन्जिहच हव्कतोर ओर येसु नासरिन निमाट पळकान्तोरिट। ओर असा जिवेमातोर; ओर इगा हिलेर। हुळाट! ओरक येसुन इरस मता जागा इद मता। 7मति निमाट हन्ज ओना चेलालोरकुन अनि पतरासिन ‘ओर मिया मुने गलीलतिगा दायनुर इन्जोर वेहाट, ओन बदाम पहले इन्ज मतोर अदामे निमाट ओन अगा हुळकिट इदाम वेहाट#मत्ति २६:३२; मर १४:२८।’ ” 8अनि अव वरे अनि आश्चरयता मारे बिजगुडिताल पसियस वितितुंग अनि वरेता मारे अव बोने बाताले इनोंग।
मरियम मगदलनिन येसु दिसान्तोर
(मत्ति २८:९-१०; युह २०:११-१८)
9(आटवळाता पहले दिया मन्जे इतवार दिया पोळद पसियाना मुने येसु असा जिवेमासुन पहले मगदलनि पोरोयता नाटेना मरियमतुन दिसतुर। ओदेनिगाडाल येसु सात दुष्टात्मातुन पसिहिस मतोर। 10ओद हन्जुन दुःखते डुब्बेमास अनि किलिंगसोर मतोरक ओर चेला लोकुरकुन इद समाचार हितु। 11येसु जितो मन्तोर अनि ओद येसुन हुळता इन्जोर ओर केन्जतुरक मति ओरक अदेन विस्वास केवोरक।
इवुर चेलालोरकुन येसुना दिसाना
(लूका २४:१३-३५)
12पजा इवुरक चेला लोकुरक नाटेनिके हन्ज मतोर असके ओर दुसरो रुपते ओरकुन ओर दिसतुर। 13ओरक वने हन्जुन माक येसुन हुळतोम इन्जोर दुसरो चेलालोरकुन वेहतुरक मति ओरक वने ओद पोल्लो विस्वास केवोरक।
येसुना खास चेलालोरक साटि येसुना हजोर आग्या
(मत्ति २८:१६-२०; लूका २४:३६-४९; युह २०:१९-२३; बुतोंग १:६-८)
14अकरा चेलालोरक जेवेकियाला उदस मतोरक असके ओरकुन येसु दिसतुर। अनि ओर जितो आतपा बोर बोर ओन हुळस मता ओरा गवाहितुन विस्वास केवो आस मतोर इन्जोर येसु ओरा अविस्वासतुन रांगतुर। 15येसु ओरकुन इतुर, “निमाट दरतिता सबोय जागादिगा हन्जुन सबोय लोकुरकुन सोबाता पोल्लो प्रचार किम्ट#बुतोंग १:८। 16बोर विस्वास किस बपतिस्मा येतानुर ओनाय पिसहानुर मति बोर नावागा विस्वास केवोरक आयनुरक ओरकुन दन्ड पुटार। 17अनि विस्वास केवालोरनिगा इदाम चिन्ह मन्दार: नावा पोरोयते ओरक दुष्टात्मातुन पसिहियानुरक, ओरक पुनांग-पुनांग बोलिंग वळकानुरक। 18ओरक तरासकुन ताहानुरक अनि ओरक जेहेर वने उन्डानुरक ते बाराय आयो आयार अनि ओरक बिमार लोकुरा पोरो कय इरानुरक ते ओरक चंगा आयनुरक” इन्जोर इतुर।
येसुना स्वरगारोहण
(लूका २४:५०-५३; बुतोंग १:९-११)
19प्रबु येसु ओरासंग वळकसोर मतोर असके ओर स्वरगतिगा ताहतुर अनि परमेस्वरना तिन्दान कयबासा उदितुर#बुतोंग १:९-११। 20अनि ओरक पसियस सबोय जागा सोबाता पोल्लो वेहतुरक, अनि प्रबु ओरासंग बुतो किसोर मतोर। अनि ओर वेहता सोबाता पोल्लो खरोय मन्ता इन्जोर ओद चिन्हाता द्वारा प्रबु मजबुत किसोर मतोर। आमिन।)
S'ha seleccionat:
मरकुस 16: fmu
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active) Wycliffe Bible Translators, Inc. All rights reserved.