मरकुस 12
12
दुष्ट कास्तकार लोकुरा पिटो
(मत्ति २१:३३-४६; लूका २०:९-१९)
1पजा येसु पिटोते ओरासंग वळकिला लागतुर, “वरोर मानेय अंगुरता बगिचा लावे कितुर अनि सबोयबासा वेटाळ कितुर अनि जोमा टन्डना चक्कि इरान साटि गुमिया बनेहकितुर अनि केपान साटि गुबा वने बनेहकितुर अनि कास्तकारकुन ओदेना टका हिस ओर परदेशते हतुर। 2पजा अंगुरक पन्डाना बेरा हेरे वात असके ओर कास्तकारनिकेडाल अंगुरता कायाना हिसा तरीर इन्जोर वरोर दासतुन कास्तकारना हेरे लोहतुर। 3मति कास्तकार लोकुरक ओर दासतुन पयस हाहतुरक अनि खालि कयदे मलिहचितुरक। 4पजा मालकाल असा वरोर दासतुन ओरा हेरे लोहतुर कास्तकारक ओना अपमान किस ओना तला ओहतुरक। 5पजा मालकाल असा वरोर दासतुन ओरा हेरे लोहतुर ओरक ओन होवक्स वाटतुरक। अनि ओर दुसरो लोकुरकुन वने लोहतुर हुचुलोर लोकुरकुन ओरक पिटिहतुरक अनि दुसरो हुचुलोर लोकुरकुन हवतुरक। 6इन्जोर आकरिते वरोरे पिस मतोर, ओर ओनोर मयातोर मरि मतोर। इदेक ‘ओरक नावोर मरिना आदर कियानुर’ इन्जोर विचार किस ओर ओन वने ओरा हेरे लोहतुर। 7मति ओरक कास्तकारक आपसते इतुर, ‘येर ते वारिस आन्दुर, वाट माक येन होवक्स वाटकाट असके इद सबोय मावा आयार।’ 8अनि ओरक ओन पयस होवक्स वाटतुर अनि अंगुरता बगिचाता बाहरो हरचितुरक। 9इन्जोर अंगुरता बगिचातोर मालकाल बाताल कियानुर? ओर वासुन ओरक कास्तकारकना नाश किस अंगुरता बगिचा दुसरोन हिस वाटनुर। 10बाताल निमाट पवित्र पुस्तकतिगा इद पोल्लो वाचे केविट बहे,
‘लोन बनेहकेवालोर मिस्रीलोकुरक खराब मन्ता इन्जोर हरचिस मतोर अदे कलदुन
पायवाता मुक्या कल आत।
11इद प्रबुनिकेडाल आत
अनि मावा नजरते अत्भुत मन्ता#भज ११८:२२,२३।’ ”
12असके ओर मावा विरोदते इद उदाहरण इतोर इन्जोर ओरकुन समजेमास ओरक येसुन पयान साटि इच्चा कितुरक मति ओरक भीळतुन वरियस ओन तासिस हतुरक।
येसुन फसेकियाना प्रयत्न
(मत्ति २२:१५-२२; लूका २०:२०-२६)
13असके ओरक येसुन पोल्लोते फसेकियान साटि हुचुलोर परीसि अनि हेरोदिया लोकुरकुन ओना हेरे लोहतुरक। 14ओरक वास ओन इतुरक, “हे गुरु, निमा बोनाय भेदभाव केवि आस परमेस्वरना हरि खरोय करियान्तोर इन्जोर निमा खरोय मन्तोन अनि बोने वरियवि इन्जोर माक पुन्तोरोम। बाताल कयसरतुन टाक्स हियाना बेस मन्ता या हिले? माक हियाकोम या हेवोम” इन्जोर पुच्चेमातोरक। 15येसु ओरा कपटपन पुनस ओरकुन इतुर, “निमाट बाक्या नावा परिक्षा किन्तोरिट? उन्दि दिनार नावा हेरे तराट नना ओदेन हुळका” इन्जोर वेहतुर। 16ओरक दिनार ततुरक, अनि ओर ओरकुन पुच्चेमातुर, “इगा छाप अनि पोरोय बोना मन्ता?” अनि ओरक इतुरक, “हजोर राजालना मन्ता।” 17येसु ओरकुन इतुर, “हजोर राजाना हजोर राजान हिम्ट, अनि परमेस्वरना परमेस्वरतुन हिम्ट।” असके ओरक ओना बारेते पकाय आश्चरय किया लागतुरक।
असा जिवेमायाना अनि मरमिंग
(मत्ति २२:२३-३३; लूका २०:२७-४०)
18ओदे दिया हातोर लोकुरा असा जिवेमायनातुन मानेमायोर सदुकियालोरक निकेडाल हुचुलोरक येसुना हेरे वास ओन पुच्चेमातुरक#बुतोंग २३:८। 19“हे गुरु, बोरे मानेय बालक आयवाय हायिर ते ओनोर तमो ओना मुतेनसंग मरमिंग किस आपुना तमोन साटि वंश पयदाह केविर इन्जोर मूसाल मावा साटि पवित्र पुस्तकतिगा कोटतोर#व्यव २५:५। 20इदेक माक सात तमोलोरक मतोम हजोर तमो मरमिंग कितुर अनि पजा बालक आयवाय ओर हातुर। 21इन्जोर ओनोर दुसरो तमो अदेन मरमिंग कितुर। अनि ओर वने बालक आयवाह मायतुर, अदामे तिसरो तमो वने अदेन मरमिंग कितुर अनि ओन वने इदामे आतुर। 22अनि सात तमोलोरक वने इदाम बालक आयवाह हातुरक, सबोय तमोलोरा परके ओद आळ वने हात। 23दुनियाता आकरिते हातोर लोकुरक असा जिवेमास तेदानपा ओद ओर सात तमोनिगाडाल बोना मुत्ते आयार? बाक्याकि ओद सात तमोलोरा मुत्ते आस मता बहे।” 24येसु ओरकुन इतुर, “निमाट पवित्र पुस्तकतुन अनि परमेस्वरना लावतुन पुनविट इन्जोर निमाट दोखाते अरान्तोरिट। 25बाक्याकि दुनियाता आकरिते हातोर लोकुरक असा जिवेमास तेदानपा मानेयक अनि आसकना मरमिंग आयो आयनुंग, मति ओरक स्वरगदूत लेहका मन्दानुरक#१२:२५ स्वरगदूत वने मरमिंग केवोरक। 26हातोर मानेयताल जिवे मायाना बारेते निमाट मूसाना पुस्तकतिगा जाडिना बारेता भागतिगा परमेस्वर अब्रहामिन इतुर, ‘नना अब्रहामना परमेस्वर अनि इसहाकना परमेस्वर अनि याकुबनोर परमेस्वर आन्दान#निर ३:६’ इदाम निमाट वाचे केविट बहे? 27परमेस्वर हातोर लोकुरा आयो मति जिवित लोकुरा परमेस्वर आन्दुर। मिकुन पकाय गलत आतोरिट।”
सबोयता हजोर आग्या
(मत्ति २२:३४-४०; लूका १०:२५-२८)
28मूसाना नियमतुन करिहवालोर लोकुरकनिगा वरोर मानेय वास येसु अनि सदुकि लोकुरा विवाद कियाना केन्जतुर। अनि येसु ओरकुन सोबाय रितिते उत्तर हितुर इन्जोर ओन पुन्ज ओर येसुन पुच्चेमातुर, “सबोयताल मुक्य आग्या बोद मन्ता#लूका १०:२५-२८?” 29येसु ओन उत्तर हितुर, “सबोय मुक्य आग्या इद मन्ता, ‘हे इस्रायेल केन्जा मावोर परमेस्वर प्रबु वरोरे प्रबु मन्तोर। 30अनि निया प्रबु परमेस्वरिन आपुना सबोय मन्दे, सबोय जिवाते, सबोय बुद्धिते अनि आपुना सबोय लावते मया इराना पहाजे इन्जोर मन्ता#व्यव ६:४,५। 31अनि दुसरो आग्या इद मन्ता, निमा आपुना हेरे हेरेटोरकुन आपुना लेहकाय मया किम#लेव्य १९:१८’, इदेनताल हजोर दुसरो बोदे आग्या हिले।” 32मूसाना नियमतुन करिहवाल येसुन इतुर, “हे गुरु, परमेस्वर वरोरे मन्तोर अनि ओन तासिस दुसरो बोरे परमेस्वर हिलेर#व्यव ४:३५ इन्जोर निमा खरोय इतोन। 33अनि ओन सबोय मन, सबोय बुद्धि, सबोय जिवा अनि सबोय लावतासंग मया कियाना अनि हेरेटोरासंग आपुना लेहका मया कियाना इद पोल्लो सबोय जानवरता बलिदान अनि बोदे दुसरो पयटेकियाना बलिदानताल#होशे ६:६ वने हजोर मन्ता।” 34ओर समजेमास उत्तर हितुर इन्जोर येसु हुळसुन, “निमा परमेस्वरना राज्यतिगा हन्दानाता पकाय हेरे मन्तोन” इन्जोर येसु ओन इतुर। असके पजा बोने असा बाताले पुच्चेमायाना हिमत आयो।
मसिहा बोनोर मरि आन्दुर
(मत्ति २२:४१-४६; लूका २०:४१-४४)
35पजा येसु येरुसलेम मन्दिरतिगा उपदेश हिसोर इदाम इतुर, “मसिहा दावुदनोर मरि आन्दुर इन्जोर नियमतुन करिहवालोरक बदाम इन्तोर? 36दावुद आपुने पवित्र आत्मातिगा आस इदाम इतोर,
‘प्रबु नावोर प्रबुन इतुर,
“नना निया दुश्मनतुन निया काल्क अडिय केवोन आयका अचोवनाह निमा नावा तिन्दान कयबासा उदा#भज ११०:१।” ’
37दावुद ते आपुने ओन प्रबु इन्तोर पजा ओर ओनोर मरि बदाम ठहरे मातुर?” अनि भीळताल लोकुरक ओना उपदेश गिरदाते केन्जिन्दुरक।
नियमतुन करिहवालोर लोकुराताल सावदान मन्ट
(मत्ति २३:१-३६; लूका २०:४५-४७)
38येसु आपुना उपदेशते ओरकुन इतुर, “लाटिह-लाटिह कुरता करस वलियाना अनि हाटुमतिगा ओरकुन आदरतासंग नमस्कार कियाना। 39अनि समाज मन्डिलिता मुक्य-मुक्य कुरचितिगा उदाना अनि बोदे कार्यक्रमता जेवनता पंगततिगा मुक्य-मुक्या जागातिगा उदाना इच्चा किन्तोरक ओर नियमतुन करिहवालोर लोकुराताल सावदान मन्ट। 40अनि रान्डिह आळदा धनसंपतितुन ओरक दोखा किस कलेर किन्तोर अनि दुसरो लोकुरक तोहान साटि पकाय बेरावनाह प्रार्थना किसोर मन्तोर इन्जोर ओर लोकुरकुन दुसरो लोकुराताल वने पकाय दन्ड भोगे मायनुरक।”
गरिब रान्डि आळदा दान
(लूका २१:१-४)
41अनि येसु येरुसलेम मन्दिरता दानपेटिता मुने उदस लोकुरक मन्दिरता दानपेटितिगा बोद प्रकारते डबुंग निहान्तोर इन्जोर हुळिन्दुर, अनि पकाय दनवान लोकुरक हुचुक डबुंग निहतुरक। 42अचोय बेरा उन्दि गरिब रान्डि आळ वास उन्दि रुपियाता बराबर रन्ड डबुंग निहतु। ओव डबुंगना किमत कमि मता। 43असके ओर आपुना चेलालोरकुन हेरे केयस ओरकुन इतुर, “प्रार्थना लोता दानपेटितिगा इद गरिब रान्डि बायि सबोयताल वले डबुंग हिता इन्जोर नना मिकुन खरोय इन्तोना। 44बाक्याकि सबोय लोकुरक आपुना पकाय धनतिगाडाल डबुंग हितोर मति रान्डि बायि ते आपुना हुचुन्सा धनताल आपुना जिवनता सबोयतुन हिस वाटत।”
S'ha seleccionat:
मरकुस 12: fmu
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active) Wycliffe Bible Translators, Inc. All rights reserved.