मत्ति 25
25
दाहा कुवारिह लयाहना पिटो
1येसु स्वरग राज्यता बारेते असा उन्दि पिटो वेहतुर, “स्वरग राज्य आपुना टिवरि पयस दुलहान मिलेमायान साटि पसियान्तांग ओव दाहा कुवारिह लेयाना लेहका मन्दार#लूका १२:३५ । 2ओव लयाहनिगा सयुंग लयाह मुर्ख अनि सयुंग लयाह समजदार मतांग। 3मुर्ख लयाह आपुना टिवरि पयतुंग मति जासतिता निय पयोंग आतुंग। 4मति समजदार लयाह आपुना टिवरितासंग डपकितिगा निय वने पयतुंग। 5दुलहान वायान साटि बेरा आतु असके अवेहकुन उसकाळ वान्दु अनि ओव हुन्जतुंग। 6अरदो नरका ‘दुलहाल वायिला आतोर! ओन मिलेमायान साटि वराट!’ इदाम जोरदे लेंग वात। 7असके ओव सबोय कुवारि लयाह तेदस आपुनांग टिवरि पोतिहतुंग। 8अनि मुर्ख लयाह समजदार लयाहकुन ‘मावांग टिवरिह पियिला आतांग इन्जोर आपुना नियनिगाडाल हुडुक निय माकुन वने हिम्ट’ इन्जोर इतुंग। 9मति समजदार लयाह ‘इद निय माकुन अनि मिकुन वने हालो आयार इन्जोर निमाट निय मोमवालनिके हन्जुन आपुन साटि निय असकिट ते बेस आयार’ इदाम उत्तर हितुंग। 10ओव लयाह निय असिला हन्दिला आस मन्दुंग असके दुलहाल वातुर अनि तयार मतांग ओव लयाह ओनासंग मरमिंग लोन लोपा हतुंग अनि कवाळ बन्द आतु। 11इदेना पजा ओव दुसरो कुवारिह लयाह वने वास ‘हे स्वामि, हे स्वामि मावा साटि कवाळ तरिया’ इन्जोर इन्दिला लागतुंग#लूका १३:२५। 12अवेन ओर, ‘नना मिकुन पुनोन इन्जोर खरोय मिकुन इन्तोना’ इदाम ओर उत्तर हितुर। 13अदामे नना मानेयतोर मरि बसके वायका इदाम पुनविट इन्जोर निमाट दरोज केपसोर मन्ट।”
डबुंगना पिटो
(लूका १९:११-२७)
14येसु असा स्वरग राज्यता बारेता उन्दि पिटो वेहतुर, “वरोर मानेय मतोर, ओर दुसरो देशते हन्दान बेरा आपुना दास लोकुरकुन केयस आपुना संपति ओरकुन सोपे कितुर#लूका १९:११-२७। 15ओर वरोन सयुंग चुंगळिंग सोनाता डबुंग, दुसरोन रन्ड चुंगळिंग सोनाता डबुंग, अनि तिसरोन उन्दि चुंगळि सोनाता डबुंग इदाम वरोर वरोर मानेयतुन ओना सामर्थता अनुसार हितुर अनि पजा दुसरो देशतिगा हतुर। 16असके सयुंग चुंगळिंग सोनाता डबुंग पुटस मतांग ओर सान्डेय हन्जुन ओव डबुने मोमाना असाना बुतो किस असा सयुंग चुंगळिंग सोनाता डबुंग कमेह कितुर। 17इदे रितिते बोन रन्ड चुंगळिंग सोनाता डबुंग पुटस मतांग ओर वने असा रन्ड चुंगळिंग सोनाता डबुंग कमेह कितुर। 18मति बोन उन्दि चुंगळिंग सोनाता डबुंग पुटस मतांग ओर हन्जुन उन्दि गुमिया कातितुर अनि आपुना स्वामिना सोनाता डबुंग अगा मकिहिच इरतुर।”
19“पकाय दियाना पजा ओर दासलोकुरा स्वामि वास ओना डबुते ओर बाताल कितुर इन्जोर पुच्चेमातुर। 20सयुंग चुंगळिंग सोनाता डबुंग पुटस मतांग ओर असा सेयुंग चुंगळिंग सोनाता डबुंग ततस ‘हे स्वामि, निमा नाकुन सयुंग चुंगळिंग सोनाता डबुंग सोपेकिस मतोन, हुळा नना सयुंग चुंगळिंग सोनाता डबुंग असा कमेह कितोना’ इन्जोर इतुर। 21ओनोर स्वामि ओन इतुर, ‘वा! सोबाय अनि इमानदार दास निमा हुचुक डब्बुना बारेते विस्वासते मतोन, नना निकुन पकाय चिजता अदिकारि बनेहकियाका। आपुना स्वामिना गिरदातिगा सहभागि आम’ इन्जोर इतुर। 22अनि रन्ड चुंगळिंग सोनाता डबुंग पुटस मतांग ओर वने हेरे वास ‘हे स्वामि, निमा नाकुन रन्ड चुंगळिंग सोनाता डबुंग सोपेकिस मतोन, हुळा नना असा रन्ड चुंगळिंग सोनाता डबुंग कमेह कितोना’ इन्जोर इतुर। 23ओनोर स्वामि ओन ‘वा! सोबाय अनि इमानदार दास निमा हुचुक डब्बुना बारेते विस्वासते मतोन, नना निकुन पकाय चिजता अदिकारि बनेहकियाका। आपुना स्वामिना गिरदातिगा सहभागि आम’ इन्जोर इतुर। 24पजा उन्दि चुंगळिंग सोनाता डबुंग पुटस मतांग ओर वने हेरे वास ‘हे स्वामि निमा बगा वीतवि अगडाल कोयान्तोन, अनि बगा विजा वीतवि अगडाल फसल येतान्तोन इदाम कटोर मानेय मन्तोन इन्जोर नना निकुन पुन्दान। 25इन्जोर नना वरेते हन्जुन नियांग डबुंग गुमियातिगा मकिहिच इरतान। हुळा, निया मन्ता ओद डबुंग इदे आन्दु अदेन येता’ इन्जोर इतुर। 26ओनोर स्वामि ओन उत्तर हितुर, ‘हे दुष्ट अनि आळसि दास, बगा नना वीतवि अगडाल नना कोयान्तोना अनि बगा विजा वीतवि अगडाल फसल येतान्तोना इन्जोर निमा इद पुन्तोन बहे। 27ते निमा नावांग डबुंग व्याज हेवाल लोकुरा कयदे हियाला पहाजे असके नना वास आपुना डबुंग व्याजसकट येतस मनेना। 28इन्जोर अव डबुंग ओनाकेडाल येताट अनि दाहा चुंगळिंग सोनाता डबुंग मन्तांग ओन हिम्ट। 29बाक्याकि बोना हेरे मन्ता, ओन असा हियानुर अनि ओना हेरे पकाय आयार, मति बोना हेरे हिले, बोद ओना हेरे मन्ता ओद वने येतहानुर#मत्ति १३:१२; मर ४:२५; लूका ८:१८ । 30अनि येर बिनाबुतोतोर दासतुन बाहरोटा आन्दारतिगा वाटसिम्ट, अगा किलाना अनि पल्क कटरे कियाना आयार#मत्ति ८:१२; २२:१३; लूका १३:२८।’ ”
आकरि न्यायता दिया
31येसु असा इतुर, “नना मानेयतोर मरि आपुना महिमाते सबोय स्वरगदूतकनासंग वायनुर असके नना महिमातासंग आपुना सिंहासनतिगा उदका#मत्ति १६:२७; मत्ति १९:२८ । 32अनि सबोय जातिता लोकुरकुन ओना मुने जमा कियाहनुर, अनि ओर ओरकुन मेहवाल बेळानुंग हरेंगनिगाडाल अलग किन्तोर अदामे ओर वरोर दुसरोताल अलग कियानुर। 33ओर बेळानुंग आपुना तिन्दान कयबासा अनि हरेनुंग डावो कयबासा नितहानुर। 34असके राजाल आपुना तिन्दान कयबासाडोरकुन इन्दानुर, ‘हे नावोर बाबोनोर धन्य लोकुरक, वराट, दुनिया बनेकियानाता मुनेटाले मिया साटि तयार किस मन्ता ओद राज्यतोर वारिस आम्ट। 35बाक्याकि नना कर वस्तोर मन्दान असके निमाट नाकुन तिन्दिला हितिट, नाकुन एर उन्दिला वस मन्द असके निमाट नाकुन एर उहतिट, निमाट नाकुन पुनवि आन्दिट ते वने आपुना लोन मन्दिला हितिट। 36नावा मेन्दुलतिगा सन्दरांग हिले आसि असके निमाट नाकुन सन्दरांग पोन्डिहतिट, नना बिमारिते मतोना असके निमाट नावा सेवा कितिट, नना जेहलतिगा मन्दान असके निमाट नाकुन मिलेमायिला वातिट।’ ”
37“असके परमेस्वरना मुने येताना योग्य बुतो कितोर ओर लोकुरक ओन उत्तर हियानुर, ‘हे प्रबु, माक बसके निकुन करवस्तोर हुळस निकुन तिहतोम? या एर उन्डावसतोर हुळस निकुन एर उहतोम? 38माक बसके निकुन पुनवाय हुळसुन आपुना लोन मन्दिला हितोम? या निकुन निया मेन्दुलतिगा सन्दरांग हिले आसि इदाम बसके हुळस निकुन सन्दरांग पोन्डिहतोम? 39माक निकुन बिमार या जेहलतिगा मन्दानपा हुळस बसके निकुन मिलेमायिला वातोम?’ इन्जोर उत्तर हियानुरक। 40असके राजाल ओरकुन उत्तर हियानुर, ‘निमाट नावोर येर हुडलोरताल हुडलोर हेलाळ-दादानिगाडाल बोरे वरोनसंग ओद कितिट ओद नावासंग कितिट इन्जोर नना मिकुन खरोय इन्तोना।’ ”
41“पजा ओर डावान बासाडोरकुन इन्दानुर, ‘हे सरापि लोकुरक, नावा मुनेटाल सयतान अनि ओनोर दूतक साटि तयार किता मन्ता ओद अनन्त काळता साटि मन्ता किसतिगा हन्ट। 42बाक्याकि नाकुन करवस मन्द असके निमाट नाकुन तिन्दिला हेविट, नाकुन एर उन्डावस मन्द असके नाकुन एर उहविट। 43निमाट नाकुन पुनविट आन्दिट मति आपुना लोन मन्दिला हेविट, नावा मेन्दुलतिगा सन्दरांग हिले आसि असके निमाट नाकुन सन्दरांग पोन्डिहविट, नना बिमार अनि जेहलतिगा मन्दान असके निमाट नाकुन मिलेमायिला वायविट’ इन्जोर इन्दानुर।”
44“असके ओरक राजान उत्तर हियानुर, ‘हे प्रबु, माक निकुन बसके करवस्तोर या एर उन्डावस्तोर या पुनोर इदाम या मेन्दुलतिगा सन्दरांग हिले आसि या बिमार या जेहलतिगा मन्वाल हुळसुन निया सेवा केवोम?’ इन्जोर उत्तर हियानुरक। 45असके राजाल ओरकुन उत्तर हियानुर, ‘निमाट नावोर येर सबोयताल हुडलोरनिगाडाल बोरे वरोनसंग ओद केविट, ओद नावासंग केविट’ इन्जोर नना मिकुन खरोय इन्तोना। 46अनि येरक अनन्त काळता दन्ड भोगेमायान साटि दायनुरक मति परमेस्वरना मुने येताना योग्य बुतो केवाल लोकुरक अनन्त जिवनतिगा दायनुरक#दानि १२:२।”
S'ha seleccionat:
मत्ति 25: fmu
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active) Wycliffe Bible Translators, Inc. All rights reserved.