मरकुस 10
10
तलाक की सीख
(मत्ती 19:1–12; लूका 16:18)
1इकै पाछै ईसु बठैऊँ बिदा होर यरदन नदि क पार यहूदि भौम म आगो। अर भीड़ की भीड़ बिकन भेळी होगी, ईसु बानै आपकी बाण गेल सीखाबा लाग्यो। 2जदई फरिसी बिकन आर ईसुनै बिचासबा ताँई बिऊँ बुजबा लाग्या क आपणा बिधान म कोई मोट्यार आपकी लूगाईनै छोड सकै ह के? 3ईसु बाऊँ बोल्यो, “मूसा थानै काँई हुकम दिओ ह?” 4#मत्त 5:31बे बोल्या, “मूसा तो तलाकनामो मांडर देबा ताँई बोल्यो ह।” 5ईसु बाऊँ बोल्यो, “मूसा आ आदेसानै थारै मन की कल्डाईनै देखता मांड्यो ह। 6पण जद परमेसर आ सरस्टि बणायो हो जदऊँई बो बानै:
‘नर अर नारी कर बणायो हो। 7इ ताँई मोट्यार आपका माँ-बापनै छोडर आपकी लूगाई क सागै रेह्वै 8अर बे दोन्यु एक जीव होज्यासी, अर बे इब दो कोनी, पण एक जीव ह।’
9“इ ताँई जिनै परमेसर जोड़्यो ह, बिनै मिनख न्यारो नइ करै।”
10जद ईसु घर क मांयनै हो जणा चेला बिनै इ बात क बारां म ओज्यु बुजबा लाग्या। 11#मत्त 5:32; 1 कुरन्थी 7:10,11ईसु बाऊँ बोल्यो, “जखो मिनख आपकी लूगाईनै छोडर दुसरो ब्या करै ह बो कुकरम करै ह क्युं क बो आपकी पेलड़ी लूगाई क बिस्वास जोगो कोनी। 12अर लूगाई आपका मोट्यारनै छोडर दुसरो ब्या करै ह जणा बा बी कुकरम करै ह।”
ईसु टाबरानै आसिरबाद दिओ
(मत्ती 19:13–15; लूका 18:15–17)
13लोग टाबरानै ईसु कनै लेर आया बे चावै हा क ईसु बा टाबरा क सीर प हात म्हेलै पण चेला बानै दकाल्या। 14ईसु झाळ्या म भर'र चेलानै ओडायो, “थे टाबरानै मेरै कनै आबा द्यो। अर आ टाबरानै मना नटो, क्युं क परमेसर को राज आ जंय्यां कोई ह।” 15#मत्त 18:3ईसु बाऊँ बोल्यो, “म थानै सची-सची खेऊँ हूँ क जखो मिनख परमेसर का राजनै टाबरा की जंय्यां कोनी अपणावै बो परमेसर का राज म कोनी बड़ सकै।” 16ईसु बा टाबरानै कनै लेर बाकै सीर प हात धर'र बानै आसिरबाद दिओ।
पिसाळो मिनख ईसु कनै आयो
(मत्ती 19:16–30; लूका 18:18–30)
17जद ईसु बठैऊँ निकळर गेला म जार्यो हो बठै एक मिनख भागतो होयो ईसु कनै आयो अर बो गोडा टे'कर हात जोड़र ईसुऊँ बुजबा लाग्यो, “ओ चोखा गरूजी म अजर-अमर जीवन पाबा ताँई काँई करूं?” 18ईसु बिऊँ बोल्यो, “तू मनै चोखो क्युं बोलै ह? परमेसरनै छोडर कोईबी चोखो कोनी, 19तू परमेसर का हुकमनै तो जाणै ह जंय्यां मंडेड़ो ह:
‘तू कुकरम मना करजे, चोरी मना करजे, हत्या मना करजे, झूठी गुवाई मना दिजे, छळ मना करजे, अर माँ-बापा को मान करजे।’”
20बो मिनख ईसुनै बोल्यो, “ओ म्हान गरूजी अ हुकम तो म टाबरपुणाऊँई मानतो आयो हूँ।” 21ईसु बिकै कानि देख्यो अर बिनै परेमऊँ बोल्यो, “तेरै मांयनै एक बात की कमी ह। तू जा अर तेरै कनै जोक्यु बी ह बिनै बेचर गरीबानै देदे। तनै ईस्बर नगरी म धन मिलसी, अर तू मेरै गेल होले।” 22इ बातनै सुणर बिको मुंडो लटकग्यो अर बो दुखी होर बठैऊँ चलेगो, बो पिसाळो मिनख हो।
23ईसु च्यारूमेर देखर आपका चेलानै बोल्यो, “जखा मिनखा को मो धन म ह बा मिनखा को ईस्बर नगरी म जाणो बोळो ओखो ह।” 24चेला ईसु की इ बातनै सुणर ताजूब करबा लाग्या इ ताँई ईसु बाऊँ ओज्यु बोल्यो, “मेरा टाबरो परमेसर का राज म जाणो कतो ओखो ह? 25पिसाळा मिनख को परमेसर का राज म बड़बाऊँ तो सूँई का नाकाऊँ ऊँट को निकळबो सोरो ह।” 26बे बोळो ताजूब कर आपसरी म बतळाबा लाग्या, “ज अंय्यां की बात ह जणा कूण बचायो ज्यासी?” 27ईसु बाकै कानि देखर बोल्यो, “आ मिनखाऊँ अणहोती बात ह, पण परमेसर सक्यु कर सकै ह।” 28जणा पतरस ईसुनै बोल्यो, “म्हें सक्यु तज'र तेरै गेल आया हा।” 29ईसु बोल्यो, “म थानै सची-सची खेऊँ हूँ ज कोई मेरै ताँई अर चोखा समचार ताँई घर, सागे भाई-भाण, माँ-बापा, टाबर-टिकरा, अर खेतनै छोड दिओ ह 30बिनै अठैई इ जुग म सो गुणा घर, सागे भाई-भाण, माँ, टाबर-टिकर अर खेत मिलसी अर सागै की सागै अजर-अमर जीवन मिलसी। 31#मत्त 20:16; लूक 13:30पण बोळा ह जखा की आज बूज ह बाकी बूज कोनी होसी अर जखा की बूज कोनी बाकी बूज होज्यासी।”
तीसरका ईसु आपकी मोत क बारां म बतायो
(मत्ती 20:17–19; लूका 18:31–34)
32बे यरूसलेम जार्या हा गेला म ईसु आपका चेला क आगै-आगै चालर्यो हो। चेला ताजूब म पड़ग्या अर बाकै सागै जखा मिनख हा बे डरर्या हा। ईसु आपका बारा चेलानै एक कानि लेगो अर बानै बताबा लाग्यो क मेरै सागै काँई-काँई बितबाळी ह। 33ईसु बानै बोल्यो, “थे सुणो आपा यरूसलेम म जार्यां हां, मिनख का बेटानै धोकाऊँ पकड़र परधान याजका अर सास्तरानै सीखाबाळानै सूप दिओ ज्यासी। अर बे बिनै जानऊँ मारबा की सजा देर परमेसरनै नइ ध्यारबाळा मिनखा का हाता म सूप देसी। 34बिको तमासो बणायो जासी अर बिपै थूकिंगा अर तड़ा मारसी बिनै जानऊँ मार देसी पण बो तीसरा दिन ओज्यु जिंदो होज्यासी।”
याकूब अर यहून्ना की अरदास
(मत्ती 20:20–28)
35जब्दि का बेटा याकूब अर यहून्ना ईसु कनै आया अर ईसुऊँ बोलबा लाग्या, “ओ गरूजी म्हें चावां हां क जोक्यु बी म्हें थारूँ माँगा, बो थे म्हानै द्यो।” 36ईसु बिनै बुज्यो, “थे मेरूँ काँई चाओ हो?” 37बे ईसुनै बोल्या, “थारै मेमाभर्या राज म थे म्हानै थारै दाया-बाया बेठबा को सोभाग द्यो।” 38#लूक 12:50ईसु बाऊँ बोल्यो, “थे कोनी जाणो क थे काँई माँगो हो। जखो पिड़ाऊँ भर्यो बाटको म पीबा जार्यो हूँ के थे बिनै पी सको हो? अर जखो दुखा को बतिस्मो म लेबा जार्यो हूँ के थे बिनै ले सको हो?” 39बे ईसुनै बोल्या, “म्हें अंय्यां कर सकां हां!” ईसु बाऊँ बोल्यो, “थे ओ बाटको बी पीस्यो अर ओ दुखा को बतिस्मो बी लेस्यो जखो म लेबाळो हूँ। 40पण मेरै दाया अर बाया बेठबा को हक म कोनी दे सकूँ क्युं क जखा ताँई परमेसर आ झघा बणाई ह बानैई बो आ झघा देसी।”
41जद दस चेला इ बातनै सुण्या जणा बे याकूब अर यहून्ना प लाल-ताता होगा। 42#लूक 22:25,26ईसु बानै आपकै कनै बुलायो अर बाऊँ बोलबा लाग्यो, “थे जाणो हो क परमेसरनै नइ ध्यारबाळा मिनखा का राजा मिनखा प हुकम चलावीं हीं अर बाका सरदार जोर जमावीं हीं। 43#मत्त 23:11; मर 9:35; लूक 22:26पण थारै म अंय्यां कोनी थारै म जखो बी बडो बणबो चावै बो सगळा को दास बणै। 44अर थारै म जखो बी सऊँ पेलो होबो चावै बो सगळा को दास बणै। 45मिनख को बेटो सेवा-पाणी कराबा ताँई कोनी आयो। पण सेवा-पाणी करबा अर बोळासारा मिनखानै छुटाबा ताँई आपका पिराण देबा आयो ह।”
आँदा बरतिमाईनै सुजबा लाग्यो
(मत्ती 20:29–34; लूका 18:35–43)
46बे यरियो गाँव क मांयनै आया अर ईसु क सागै बिका चेला अर घणीसारी भीड़ ही बे यरियो मऊँ निकळर जार्या हा, जणा तिमाई को बेटो बरतिमाई जखो आँदो मंगतो हो बो सड़क क किनारै बेठ्यो हो 47जद बो सुण्यो क ईसु नासरी अठैऊँ जार्यो ह बो जोर-जोरऊँ खेबा लाग्यो, “ओ दाऊद का बेटा ईसु मेर प दया करजे।” 48लोग बिनै दकालर बोल्या, “तू चुपचालो रेह पण बो ओर बी जोर-जोरऊँ खेबा लाग्यो ओ दाऊद का बेटा मेर प दया करजे।” 49ईसु बिकी सुणर डटगो अर ओडायो, “बिनै मेरै कनै ल्याओ।” अर बे लोग बी आँदानै बुलाया अर बिनै बोल्या, “राजी हो अर खड़्यो हो तनै ईसु बुलावै ह।” 50बो आपका गाबा बगार बेगोसो उठ्यो अर ईसु कनै आयो। 51ईसु बिनै बोल्यो, “तू के चावै ह क म तेरै ताँई करूं?” बो आँदो मिनख बोल्यो, “ओ गरूजी म देखबो चाऊँ हूँ।” 52ईसु बोल्यो, “चल्यो जा तेरो बिस्वास तनै निरोगो कर दिओ ह।” जणा बो बठैई देखबा लागगो अर ईसु क गेल होलिओ।
S'ha seleccionat:
मरकुस 10: एस डब्लु वी
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
(c) 2010-2017, New Life Computer Institute. All rights reserved