मत्ती 24
24
यरूसलेम अर दुनिया को बिनास
(मरकुस 13:1,2; लूका 21:5,6)
1जद ईसु मनदरऊँ बारनै जार्यो हो जणा चेला बाकन आर बोल्या, “देखो ओ बडो अरदास घर कतो सोवणो ह।” 2ईसु बानै बोल्यो, “थे इ हेलीनै खड़ी देखो हो? म थानै सची बोलुँ हूँ अठै एक भाठो बी कोनी रेह्सी। सगळा भाठा ढा दिआ जासी।”
(मरकुस 13:3–13; लूका 21:7–19)
3जद ईसु जेतून की डूँगरी प बेठ्यो हो जणा चेला एकला म आर बाऊँ बोल्या, “म्हानै बता अ बाता कद घटसी। तेरै आबा अर इ दुनिया का अंत को काँई सेलाणी होसी?” 4ईसु बानै बोल्यो, “थे समळर रेहज्यो थानै कोई छळ नइ ले। 5म थानै अंय्यां इ ताँई बोलुँ हूँ क्युं क मेरै नामऊँ बोळा आसी अर खेसी, ‘म मसी हूँ।’ अंय्यां बोलर बे बोळा मिनखानै धोको देसी। 6थे जद राड़ अर बिकी अफवा सुणो जणा मना डरज्यो। क्युं क आ बाता को होबो ते ह। पण बा घड़ी नास की कोनी होसी। 7मिनख-मिनख प अर राज-राज प चढाई करसी। अर हर कठैई भूचाळ आसी अर काळ पड़सी। 8पण अ सगळी बाता तो पिड़ा की सरूआतई ह। 9#मत्त 10:22बा दिना म थानै सजा दिलाबा ताँई बे पकड़ासी अर मार गेरसी। क्युं क थे मेर प बिस्वास करो हो। इ ताँई सगळी दुनिया थारूँ नफरत करसी। 10बा दिना म बोळा मिनख बिस्वास करबो छोड देसी। एक दुसरानै धोकाऊँ पकड़ासी अर एक दुसराऊँ नफरत करसी। 11बोळा झूठा परमेसर की खेबाळा आसी अर लोगानै भटकासी। 12बुराई बढज्यासी अर बोळा मिनखा मऊँ प्यार-परेम जातो रेह्सी। 13#मत्त 10:22पण जखा आखरी ताँई सबर करसी बे बचाया ज्यासी। 14परमेसर का राज का चोखा समचार को हेलो पूरा जगत म पाड़्यो ज्यासी। जिऊँ जगत का सगळा मिनख परमेसर को बचन सुणै। जणा पाछै जार इ धरती को अंत होसी।
(मरकुस 13:14–23; लूका 21:20–24)
15“इ ताँई थे उजाड़बाळी सूगली चिजानै जठै नइ होणी चाए ही बठै देखो जिकै बारां म परमेसर की खेबाळो दानिअल बतायो हो। बाचबाळो आ बातानै हळकी नइ ले। #24:15 बाचबाळो आ बातानै हळकी नइ ले। आ बात मत्ती आप कानिऊँ मांडी ह। 16जणा जखा यहूदिआ म होवै, बानै डूँगरा म भाग ज्याणो चाए। 17#लूक 17:31अर जखा मिनख छात प होवै बे घर क मांय आपकी चिज लेबा नइ जावै। 18अर जखा खेत म होवै बे गरम गाबा लेबा ताँई ओटा नइ आवै। 19अ दिन बा लूगाया ताँई जखी आसऊँ होसी अर दुद प्याबाळी टाबरा की माँ ताँई बोळी पिड़ा का होसी। 20थे अरदास कर्या करो क थानै अरामहाळा दिन नहिस स्याळा का दिना म नइ भागणो पड़ै। 21#दरसा 7:14बा दिना म अंय्यां को कळेस होसी जखो नइ इ सरस्टि की सरूआतऊँ लेर इब ताँई कदै होयो अर नइ कदै होसी। 22ज परमेसर बा दिनानै कम नइ करतो जणा कोईबी कोनी बचतो। पण बिका टाळेड़ा मिनखा की बजेऊँ परमेसर बा दिनानै कम कर दिओ ह। 23बा दिना म थानै कोई खेवै, ‘देखो मसी अठै ह! नहिस बठै ह!’ जणा बाको बिस्वास मना करज्यो। 24क्युं क झूठा मसी अर झूठा परमेसर की खेबाळा आसी, बे सेलाणी-चमत्कार अर ताजूब का काम दिखासी। अर ज होयो तो बे टाळेड़ा मिनखानै बी छळबा की कोसिस करसी। 25पण थे सुणो म थानै अ सगळी बाता होबाऊँ पेल्याई बता दिनी ह। 26#लूक 17:23,24इ ताँई ज कोई थानै खेवै क, ‘सुणो बो उजाड़ म ह’ जणा थे बठै मना जायो। अर ज कोई खेवै, ‘सुणो बो कोठा म लुखर्यो ह’ जणा बाको बिस्वास मना करज्यो। 27जंय्यां अकास म बिजळी अगुणी दिसाऊँ लेर पाछुणी दिसा ताँई चमकै ह। अर सगळा मिनख बिनै देखै ह, बंय्यांई जद मिनख को बेटो आसी, जणा बिनै सगळा देखसी। 28#लूक 17:37जठै क्युं मरेड़ो पड़्यो रेह्वै ह बठै गिरज कांवळा भेळा होवै ह।
(मरकुस 13:24–27; लूका 21:25–28)
29 #
दरसा 6:12;
दरसा 6:13
“बा दिना म, बि कळेस क पाछै सूरज उजाळानै खो देसी अर चाँद बी कोनी चमकसी। अर अकास मऊँ तारा बी तळै पड़ मरसी। अर अकास की सक्तिया हलाई जासी जिऊँ बे आपकी झघा छोड देसी। 30#दरसा 1:7बि टेम अकास म मिनख का बेटा की आबा की सेलाणी दिखसी, जणा धरती का सगळा कूणबा का मिनख छाती पिटसी अर मिनख का बेटानै मेमा अर सक्ति क सागै बादळा म आतो देखसी। 31नरसिंगो फुक्यो जासी अर बो आपका ईस्बर नगरी दुतानै धरती प च्यारूमेर भेजसी। अर बे सगळी धरती पऊँ टाळेड़ा मिनखानै भेळा करसी।
अंजीर का दरख्तऊँ सीखो
(मरकुस 13:28–31; लूका 21:29–33)
32“थे अंजीर का दरख्तऊँ सीखो जद बिकी डाळ्यां नरम होवै अर बिकै कुपळ फूटबा लागै ह। जणा थे बिनै देखर जाणज्याओ हो क उंदयाळो आबाळो ह। 33अंय्यांई जद थे अ बातानै होता देखो जणा जाणज्याज्यो क मेरै ओज्यु आबा को टेम सांकड़ैई ह। 34म थानै सची खेऊँ हूँ, जद ताँई अ बाता कोनी बितसी इ पिडी को नास कोनी होसी। 35अकास अर धरती टळ ज्यासी पण मेरी बाता कोनी टळै।
जागता रेहज्यो
(मरकुस 13:32–37; लूका 17:26–30,34–36)
36“बि दिन अर बि घड़ी क बारां म कोईबी कोनी जाणै। नइ तो ईस्बर नगरी दुत अर नइ बेटो पण परम-पिताई जाणै ह। 37जंय्यां नूह का टेम म होयो हो। बंय्यांई मिनख का बेटा क ओज्यु आबा की टेम होसी। 38क्युं क जळ-परलै क पेली जद ताँई नूह झाज म कोनी चढ्यो हो बि घड़ी ताँई लोग खार्या-पीर्या हा अर ब्याया जार्या हा। 39अर बानै बेरोई कोनी पड़्यो क कद जळ-परलै आर बानै भालेगो अंय्यांई मिनख का बेटा क ओज्यु आबा की टेम होसी। 40बि टेम दो जणा खेत म होसी बामैऊँ जिको मेर प बिस्वास होसी बिनै सागै ले लिओ जासी दुसरानै छोड दिओ जासी। 41बंय्यांई दो लूगाई चाकी म दाणा पिसती रेह्सी बामैऊँ एकनै जिको मेर प बिस्वास ह बिनै सागै ले लिओ जासी अर दुसरीनै छोड दिओ जासी। 42इ ताँई थे चेता म रेह्ओ क्युं क थे कोनी जाणो क थारो परबु कद आसी। 43#लूक 12:39,40ज घर का मालिकनै ओ बेरो होतो की चोर की टेम आसी जणा बो चोरनै घर म आबाई कोनी देतो। 44इ ताँई थे समळर रेहज्यो क्युं क मिनख को बेटो बि टेम आसी जि टेम क बारां म थे बिचारई कोनी कर सको।
बिस्वास जोगो अर कुटिचर दास की निती-कथा
(लूका 12:41–48)
45“बो बिस्वास जोगो अर स्याणो दास कूण ह? जिनै बिको मालिक नोकर-चाकरा प मुखियो बणायो। जिऊँ बो बानै टेमुटेम रोटी-टुक देवै। 46भागहाळो ह बो दास जखो आपका मालिक क पाछो आबा प बिनै बिका कह्या गेल करतो लाधै। 47म थानै सची बोलुँ हूँ, बो मालिक बिनै आपकी सगळी जायजाद प मुनिम बणा देसी। 48पण जखो कुटिचर दास होवै ह। बो मन म आ सोचर क मेरा मालिकनै तो हाल आबा म टेम ह। 49अर नोकर-चाकरानै मारबा-कुटबा लाग्यो अर दारूकुट्या क सागै खाबा-पीबा लाग्यो। 50जणा बिको मालिक अंय्यां क दिन आसी जि दिन अर जि घड़ी क बारां म बो सोच्योई कोनी। 51बो आर बिनै भेंकर सजा देसी अर बिको भाग कपट्या क सागै गिणसी जठै रोबो अर दांत पिसणो पड़सी।
S'ha seleccionat:
मत्ती 24: एस डब्लु वी
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
(c) 2010-2017, New Life Computer Institute. All rights reserved