Matiyə̈ 6
6
Kə̂ nyisə̂ rə pâ pö ndə̂kə̂ kʉ rə sə̈ a-earə̂ yûkü
(Luk 11.2-4)
1«La nyê gbö-ê! Âdə nyê ânyində̂ kə̂ mbo rə ndə̂ ndïɛ̈ ndə̂ Ndjapä nyîsə̂ nə̈, nyë mböäbô rə̂ mbô lə̂ la azü gbɛ̂ ndə̂kə̂ pa andjë wun nyê-ê. Âdə nyê âmbo rə ndə̂ ndïɛ̈ ndə̂ Ndjapä nyîsə̂ nə̈ ndə̂kə̂ pa azü lusə̂ nyê la rə̂, nyê gboabô ngâ rə tchânə̂ Bha azə̂ bhâ lafô tee-a. 2Âdə mo ânyində̂ kə̂ za ngâ rə sə̈ ngâ earə̂ yûkü, amö muabô pö ndə̂nə̈ mû-ê, ndə̂kə̂ pa azü wun mö la rə̂-ê. Amö wabô wâ batə̂ azü ndə̂ pö ma andjê wâ ngbî tə̂kə̂ mbo rə ndə̂ andjê lâme-ê. Andjë zä rə sə̈ a-earə̂ yûkü lə̂ anda kə̂ voga Ndjapä ndə̂ ajuîfu, ndjë pâ agbölö köbo ndə̂kə̂ pa azü lusə̂ andjê. Ɛn-ɛn, tə̂ lëge nə̈ më tö rə̂ sə̈ nyê, andjë gbô andə̂ andjë nə̈ rə nə̈ nə̂. 3Âdə andə̂ zə nə̈, âdə mo âza ngâ rə sə̈ earə̂ yûkü la könô zə̈ də ndôkö, âwâbo pä könô zə̈ də gele wunsə̂ nə̈-a. 4Käko rə ndə̂ mo za rə̂ sə̈ earə̂ yûkü wa lə̂ küwû nə̈. Bha zə̈ ndə̂ tche wun rə gbɛ̂ ndə̂ mo mbo rə̂ lə̂ küwû nə̈ zadje rə sə̈ mö.»
Kə̂ nyisə̂ rə pâ pö ndə̂kə̂ to pö sə̈ Ndjapä
(Luk 11.2-4)
5«Âdə nyê ânyində̂ kə̂ to pö sə̈ Ndjapä, nyë mböäbô rə mbô batə̂ azü ndə̂ pö ma andjë wâ ngbî tə̂kə̂ mbo rə ndə̂ andjê-ê. Andjë nyïndə̂ kə̂ krʉ lafô lə̂ anda kə̂ voga Ndjapä ndə̂ ajuîfu, âdəndjë lə̂ atâtakpa köbo ndə̂kə̂ to pö sə̈ Ndjapä ânyë azü wun andjê. Ɛn-ɛn, tə̂ lëge nə̈ më tö rə̂ sə̈ nyê, andjë gbô andə̂ andjë nə̈ rə nə̈ nə̂. 6Praâbalë momö ndə̂ zə nə̈, âdə mo ânyində̂ kə̂ to pö sə̈ Ndjapä, amö li bhâlə̂ darə ndə̂ zə̈, kə̂ tchu manda nə̈ ëtâ, ânyë kə̂ to pö sə̈ Bha zə̈ ndə̂ tche wâ sə̂ tchô ndə̂ âwâ lə̂ küwû nə̈. Bha zə̈ ndə̂ tche wun rə gbɛ̂ ndə̂ mô mbo rə̂ lə̂ küwû nə̈, tchê zadje rə sə̈ mö.
7«Âdə nyë âsə̈ to pö sə̈ Ndjapä, nyë dɨ̈âbô angbängbä apö dɨ̂-î batə̂ azü ndə̂ andjë wûn-âbô sə̂ Ndjapä wûn lâme-ê. Andjë wüntî pä, lə̂ köbosə̂ kə̂ dɨ angbängbä apö kä ndə̂ Ndjapä dje andjê. 8Nyë wäbô wâ batə̂ andjê-ê. Bëte Bha nyê wûnsə̂ rə ndə̂ nyë nyîndə̂ kə̂ gbo rə̂ nə̂, dokʉ̈tchê ndə̂kə̂ pa nyë yu tchë tâ. 9Äwäpä nyë to pö sə̈ Ndjapä kâkë:
‹Bha ârâ ndə̂ mo sə̂ bhâ lafô,
äwäpä azü gbɛ̂ wunsə̂ nə̈ pä
mo də̈ Ndjapä ndə̂ tche dâka gbɛ̂.
10Äwäpä kə̂ mbo kümändëmä ndə̂ zə̈ nə,
äwäpä akrə balë balë pâ cho mbo rə ndə̂ su zə̈ nyîndə̂ nə̈
batə̂ rə̂ ndə̂ a mbô rə̂ bhâ lafô.
11Amö kʉ kɨ̈zɨ̂ ndə̂ ârâ la sə̂nə̈ sə̈ ârâ angêta,
12amö ko pö lə̂ küma ârâ,
batə̂ rə̂ ndə̂ ârâ ko ndjë pö lə̂ küma azü ndə̂ andjë mbo ngbongbo rə tə̂ ârâ.
13Amö gboabô gbôtə̂ ârâ
ndə̂kə̂ pa ârâ te lə̂ arə ndə̂ âbolo azü-î.
Praâbalë amö ji ârâ tchânə̂ Ngbongbo akrə.
[Bëte kümändëmä la gbôgbô lakə̂ lusə̂tə̂ də̈ andə̂ zə
nə̈ ndə̂ logbɛ̂ logbɛ̂! Amin#6.13 Lə̂ angâ angbängbä abəndɨ Mbëtï Ndjapä la ma gerêke, adɨ̂ mawû pö ndə̂ yɛ̈yɛ̈ da 13 lâme wâbo lə̂nə̈-a: Nyë dɨ̈ 1 Akn 29.11-13..›]
14«Bëte âdə nyê âko pö lə̂ küma azü ndə̂ andjë mbô ngbongbo rə tə̂ nyê, Bha nyê bhâ lafô koadje ndjë pö lə̂ küma nyê. 15Praâbalë âdə nyë âkoabô pö kô lə̂ küma azü ndə̂ andjë mbô ngbongbo rə tə̂ nyê, Bha nyê bhâ lafô koabô ndjë pö lə̂ küma nyê tee-a.»
Pö pâ kə̂ kosə̂ kɨ̈zɨ̂ ndə̂kə̂ to pö sə̈ Ndjapä
16«Âdə nyë âsə̈ kosə̂ kɨ̈zɨ̂ ndə̂kə̂ to pö sə̈ Ndjapä, tchâtchu nyê wäbô wâ la nyo-ê, batə̂ azü ndə̂ pö ma andjê wâ ngbî tə̂kə̂ mbo rə ndə̂ andjê lâme-ê. Tchâtchu andjê wä la nyonyo ndə̂kə̂ nyisə̂ nə̈ sə̈ azü päkëdə̂ ânyë kä lakə̂ kosə̂ kɨ̈zɨ̂ ndə̂kə̂ to pö sə̈ Ndjapä. Ɛn-ɛn, tə̂ lëge nə̈ më tö rə̂ sə̈ nyê: Andjë gbô andə̂ andjë nə̈ rə nə̈ nə̂. 17Praâbalë andə̂ zə nə̈, âdə mo ânyində̂ kə̂ kosə̂ kɨ̈zɨ̂ ndə̂kə̂ to pö sə̈ Ndjapä, amö djutu la zə̈, kə̂ soa tchə̂lə̂ su küma zə̈, 18ndə̂kə̂ pa azü wun-abô sə̂nə̈ wûn pä mo kä lakə̂ gbotə̂ kɨ̈zɨ̂ ndə̂kə̂ to pö sə̈ Ndjapä-ê. Praâbalë amö mbo rə̂ ndə̂kə̂ pa kütû Bha zə̈ ndə̂ tche wûn rə lə̂ küwû nə̈ kä ndə̂ âwûnsə̂ nə̈, tchê zadje rə sə̈ mö ngbânə̈.»
Pö pâ kə̂ pala arə bhâ lafô
(Luk 12.33-34)
19«Nyë pälabô arə ndə̂ nyê pâla pâ cho âtə-ê, ndə̂ ako la asökö ndɨ rə̂ âdəndjë a-earə̂ ngbä koa manda ndə̂kə̂ zɨ ngbä nə̈ lâme-ê. 20Käko nyë päla arə ndə̂ nyê bhâ lafô. Bhâye, ako la asökö ndôâbo la rə̂-a. A-earə̂ ngbä kôâbo manda ndə̂kə̂ zɨ ngbä nə̈-a, 21bëte sə̂nə̈ ndə̂ rə ndə̂ zə̈ wâ tâ, su zə̈ kä ndjë tâ.»
La akrə wä batə̂ lâmba ndə̂ tə̂ yê
(Luk 11.34-36)
22«La akrə wä batə̂ lâmba ndə̂ tə̂ yê. Âdə la zə̈ âwatə̂ tchôtchô nə̈, tə̂ zə̈ gbɛ̂ wa ndə̂ sɨ̂nyî nə̈. 23Praâbalë âdə la zə̈ âwa la tə̂kömbô, tə̂ zə̈ gbɛ̂ wa lə̂ bübü tchô. Âdə sɨ̂nyî lâmba ndə̂ âwâ lə̂ zə̈ âwrʉ nə̂, ârə̂ âkä bu ndïrʉ̈.»
Ndjapä âdəndjë makətche
(Luk 16.13)
24«Akrə balë wâbo ndə̂kə̂ mbo kua sə̈ agbölö azü bïchuû-a. Bëte tchê koadje sə̂ ngânə̈ balë ânyë kə̂ nyiadje ndə̂ ngânə̈ balë. Âdəndjë rə̂ tchê zadje tə̂ yê gbɛ̂ sə̈ dokʉ̈ nə̈ ânyë kə̂ koadje sə̂ bïchuû nə̈. Âwâbo pä nyë mbo kua sə̈ Ndjapä, kə̂ ngbo rə̂ la kua makətche-a.»
Nyë dɨ̈äbô su nyê dɨ̂-î
(Luk 12.22-31)
25«Bëte rə̂ kä ndə̂ më tô rə̂ sə̈ nyê: Nyë dɨ̈äbô su nyê dɨ̂ bëte tchîsûwu ndə̂ nyê, tə̂ pö ndə̂ kɨ̈zɨ̂, âdəndjë tə̂ pö ndə̂ tə̂ nyê, âdəndjë lə̂ba ndə̂ nyê yu rə̂ tə̂ kpoto nyê. Tchîsûwu ndə̂ akrə wâbo gbölö kə̈ rô kɨ̈zɨ̂? Tə̂ akrə wâbo ndjë gbölö kə̈ rô lə̂ba? 26Nyë wünsa anyïɛ̈nə̈ bhâ lafô, andjë lûâbo rəgʉ-a, kə̈ sôâbo ndjî rəgʉ-a, kə̈ pâlabô ndjë rəgʉ bhâlə̂ gro ndə̂ andjê-a. Bha nyê bhâ lafô kʉ̈ kɨ̈zɨ̂ sə̈ andjê. Âdə̂âbo nyënyê ndə̂ azü kä ndə̂ ârô anyïɛ̈nə̈ lâme? 27Tchabâ lə̂ gûtə̂ nyê kä ndə̂ âwâ ndə̂kə̂ za ngâ lö ëpâ lö yê lə̂ köbosə̂ kə̂ dɨ su yê?
28«Bëte giamâ kä ndə̂ nyê dɨ su nyê tə̂ pö ndə̂ lə̂ba? Nyë wünsa köbo ndə̂ anyînyî güsü kpo la rə̂: Andjë mbôâbo kua-a, kə̈ sɨ̂âbo ndjë lə̂ba-a. 29Käko më tö rə̂ sə̈ nyê: Salomön la tə̂ yê ndə̂ tche wâ alême la rə tə̂ gbölösə̂nə̈, tche yûâbo lə̂ba ndə̂ âfû batə̂ ngâ nyînyî güsü lâme-a. 30Ndjapä ndə̂ tche yu ndjë abë-kɨ̈ndɨ̈ ndə̂ âwâ angêta, ânyë lâmbo a yi rə̂ atə̂lə̂ wo, tchê mboabô rə̂ tə̂ gbölösə̂nə̈ tee tə̂ nyê-ê? Nyënyê ndə̂ azü ndə̂kə̂ za su nyê sə̈ Ndjapä wâ kpîɛ̂kpîɛ̂ rə̂ âtə! 31Nyë dɨ̈äbô su nyê dɨ̂ päkëdə̂: ‹Giamâ ârâ zɨ rə̂? Giamâ ârâ ndjo rə̂? Giamâ ârâ yu rə̂ tə̂ ârâ?› 32Azü ndə̂ andjë wûn-âbô sə̂ Ndjapä wûn kä ndə̂ âpu rə käko logbɛ̂. Nyënyê ndə̂ nye nə̈, Bha nyê bhâ lafô wûnsə̂ nə̈ nə̂ pä nyë nyïndə̂ arə käko-ë. 33Äwäpä nyë pu köbo Gbölö gö-gbïɛ̈ ndə̂ Ndjapä lakə̂ mbo djîrə̂ rə dokʉ̈tchê, käko ânyë Ndjapä kʉadje adɨ̂ arə gbɛ̂ sə̈ nyê. 34Nyë dɨ̈äbô su nyê dɨ̂ tə̂ arə ndə̂ tchêlâmbo-ê. Nyonyo ndə̂ tchêlâmbo wätə̂ nyonyo ndə̂ tchêlâmbo. Lö balë balë nə̈ la nyonyo ndə̂ yê.»
S'ha seleccionat:
Matiyə̈ 6: lnl
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© Wycliffe Bible Translators, Inc.