MATEO 5
5
Jesús cu tze'ec te j pu'uco'
1Jesuse' le ca tu yilaj le ya'ab máaco'obo' j na'ac te j pu'uco' ca j culaji. Ca j náadz u aj canbalo'obe', 2ca jo'op' u ca'anbesico'ob beya':
Máaxo'ob qui'imac u yóolo'ob
(Lc 6.20-23)
3Qui' u yóolo'ob le máaxo'ob cu kajóoltico'ob u yóotzilil u pixano'obo', tumen u ti'alo'ob u ajawil ca'an.
4Qui' u yóolo'ob le máaxo'ob okom u yóolo'obo', tumen Jajal Dios bíin qui'imacqunsa'ac u yóolo'ob.
5Qui' u yóolo'ob le máaxo'ob cabal u yóol u pucsi'ikalo'obo', tumen bíin u ti'alto'ob le lu'uma'.
6Qui' u yóolo'ob le máaxo'ob wi'ijo'ob yéetel ukajo'ob u ti'al u beetico'ob ba'ax utz tu t'aan Jajal Dios, tumen leti' cu bin áantico'ob u ti'al u beeto'ob beyo'.
7Qui' u yóolo'ob le máaxo'ob cu ch'a'ico'ob óotzilil ti' u láak máaco'obo', tumen bíin ch'a'abac óotzilil ti'ob tumen Jajal Dios.
8Qui' u yóolo'ob le máaxo'ob sac u pucsi'ikalo'obo', tumen leti'obe' bíin u yilo'ob Jajal Dios.
9Qui' u yóolo'ob le máaxo'ob cu meyajo'ob u ti'al ca yanac jéedzel óolal ichil máaco'ob, tumen bíin a'ala'aque', leti'obe' u paalalo'ob Jajal Dios.
10Qui' u yóolo'ob le máaxo'ob cu mukyajtico'ob ch'a'apachtajil tu yo'olal u beetico'ob ba'ax utz tu t'aan Jajal Dios, tumen u ti'alo'ob u ajawil ca'an.
11Qui' a wóole'ex le quéen po'och'oque'ex tumen máaco'ob, quéen beeta'ac ti' te'ex ba'alo'ob kaastac, bey xan quéen líikesa'ac ta wóokole'ex tuláacal tuuso'ob tin wo'olal. 12Qui'ichajac a wóole'ex, tumen bíin a kame'ex jun p'éel nojoch bo'olal te j ca'ano', tumen bey xan ch'a'apachta'abico'ob le aj bóobato'ob j taalo'ob táanil ti' te'exo'.
Te'exe' u ta'abil yéetel u sáasilil yóokolcaab
(Mc 9.50; Lc 14.34-35)
13Te'exe' u ta'abile'ex yóokolcaab. Ba'ale' wa cu sa'atal u ch'óoch'il le ta'abo', ¿bix cu bin ca'a ch'óoch'quinaj? Mix ba'al u biilal ba'ale' chéen u ti'al j pulbil yéetel u ti'al j pepe'echa'atbil tumen máaco'ob.
14Te'exe' u sáasilil yóokolcaab. Jun p'éel nojoch caaj yaan yóokol jun p'éel pu'uque' ma' tu páajtal u ta'aca'al. 15Mix cu t'a'abal jun p'éel sáasil u ti'al ca dza'abac yáanal jun p'éel muut; ba'ale' cu dza'abal ca'anal u ti'al ca u sáasilcunt tuláacal le máaxo'ob yano'ob ich najo'. 16Bey xan te'ex il a wile'ex ca juulnac a sáasile'ex tu táan le máaco'obo', tumen beyo', le quéen u yilo'ob le utz ca beetique'exo', yaan u qui'iquit'antico'ob a Taataex yaan te j ca'ano'.
Jesús cu ca'ansaj tu yo'olal le a'almaj t'aano'
17Ma' a tucultique'ex wa j taalen in lukes u ya'almaj t'aan mix xan u ca'anbesaj le aj bóobato'obo': Ma' j taalen in lukesi' ba'ale' j taalen in we'es ba'ax jach u káat u ya'ale. 18Tumen tu jaajil quin wa'alic ti' te'ex ca'aliquil yaan ca'an yéetel lu'ume' ma' bíin lukesa'ac mix u asab chichanil ti' le a'almaj t'aano' tac quéen dzo'ocpajac tuláacal le ba'ax o'olal dza'ano'. 19Le beetique' le máax ma' tu dzo'ocbesic je'el máacalmáac ti' le a'almaj t'aano', quex le u jach chichanilo', yéetel ca u ca'anbes ti' máaco'ob beyo', jach chichan bíin ila'ac tu ajawil ca'an. Ba'ale' le máax cu dzo'ocbesic yéetel cu ca'anbesic xan ti' máaco'ob u beeto'ob beyo', nojoch bíin ila'ac tu ajawil Jajal Dios. 20Tumen quin wa'alic ti' te'exe', wa a cuxtale'ex ma' asab toj ti' u cuxtal u j ca'anbesajilo'ob le a'almaj t'aano' yéetel ti' u cuxtal le fariseobo', ma' bíin ocoque'ex tu ajawil ca'an.
Jesús cu ca'anbesaj tu yo'olal le p'u'ujulo'
(Lc 12.57-59)
21Te'exe' a wu'uymaje'ex j a'ala'ab ti' le úuchben máaco'ob: Ma' a quíimsaj wíinic, tumen le máax cu quíimsaj wíinique' bíin p'is óolta'ac. 22Ba'ale' tene' quin wa'alic ti' te'ex, le máax cu p'u'ujul yéetel u sucu'une', yaan u xot kinta'al. Le máax cu poch'ic u sucu'une' bíin p'is óolta'ac tumen u nuuctaquil le caajo'; le máax xan cu ya'alic j ma' na'at ti' u sucu'une', bíin u najmat u káakil metnal.
23Bey túuno' wa ca bisic a siibal tu cúuchil kultajile', ba'ale' cu ka'ajal ti' teech, kuux teech a sucu'une', 24p'at a siibal te'elo', xeen táanil a caxant qui'imac óolal yéetel a sucu'un. Cu dzo'ocole' cu páajtal a suut a kub a ti'ibil óolal.
25Wa yaan máax cu taquic a pool ti' aj p'is óole', il a wil a caxtic qui'imac óolal tu yéetele', ca'aliquil ti' yane'ex te j bejo', tu yo'olal ma' u kubiquech ti' aj p'is óol, tumen le aj p'is óolo' je'el u kubiquech u ti'al ca ka'alaquech. 26Tu jaajil quin wa'alic ti' teche', ma' bíin jáalkabta'aquech wa ma' p'is a láaj bo'otic tac u dzooc centavo.
Jesús cu ca'anbesaj tu yo'olal le nupkebano'
27Te'exe' a wu'uymaje'ex j a'ala'ab ti' le úuchben máaco'obo': Ma' a nup kebantal. 28Ba'ale' tene' quin wa'alic ti' te'exe' je'el máaxac cu pactic jun túul co'olel u ti'al u dzíibolte' dzo'oc u nupkebantal tu pucsi'ikal tu yéetel.
29Le beetique' wa a x no'oj ich cu beetic a lúubul ti' kebane' jóokes a pule, tumen asab ma'alob ca sa'atac jun xet' a wíinclile' ma' ca pu'uluc metnal tuláacal a wíinclil. 30Bey xan wa a x no'oj kab cu beetic a lúubul ti' kebane', xot' a pule, tumen asab ma'alob ca sa'atac jun xéet' a wíinclile' ma' ca pu'uluc metnal tuláacal a wíinclil.
Jesús cu ca'ansaj tu yo'olal le p'atbáilo'
(Mt 19.9; Mc 10.11-12; Lc 16.18)
31A'ala'ab xan úuche': Je'el máaxac cu xúump'atic u yatane' u najmal u dzáic u ju'unil p'atbáil ti'. 32Ba'ale' tene' quin wa'alic ti' te'exe', le máax cu xúump'atic u yatan wa ma' tu yo'olal nupkebane', cu beetic u nupkebantal. Le máax cu dzo'ocol u beel yéetel le co'olel xúump'ata'ano' cu nupkebantal xan.
Jesús cu ca'ansaj tu yo'olal jalach t'aan
33Bey xan a wu'uymaje'ex a'ala'ab ti' le úuchben máaco'obo': Bic p'áatac ma' a dzo'ocbesic ba'ax a wa'almaj a beetic tu kaaba' Jajal Dios. 34Ba'ale' tene' quin wa'alic, ma' u najmal a jalach t'aane'ex tu yo'olal chéen mix ba'ali'. Ma' u najmal xan a jalach t'aane'ex tu yo'olal ca'an, tumen u jalach káanche' Jajal Dios. 35Mix tu yo'olal lu'umi', tumen u cúuchil tu'ux cu t'alcuntic u yooc; mix tu yo'olal Jerusalén, tumen u caajal nojoch Ajaw. 36Mix u najmal a jalach t'aan tu yo'olal a pooli', tumen ma' tu páajtal a saccuntic wa a booxquintic mix jun cúul u tzo'otzel a pool. 37Chéen u najmal a wa'alique'ex, bey, wa ma', tumen tuláacal ba'al cu máan tíip'il ti' lela', ti' kaasiba'al u taal.
Jesús cu ca'anbesaj tu yo'olal le sut lobilo'
(Lc 6.29-30)
38Te'exe' a wu'uymaje'ex j a'ala'ab ti' le úuchen máaco'obo': Ich tu yo'olal Ich yéetel coj tu yo'olal coj. 39Ba'ale' tene' quin wa'alic ti' te'ex: Ma' a sutique'ex le loob cu beetic jun túul kaakas máac, ba'ale' wa cu lajiquech ta x no'oj p'u'uque', suut le u láak a p'u'uc ti'o'. 40Wa máax cu taquic a pool tumen u káat u ch'a'a ti' teech a nooke', cha'a u bisic xan a tep'. 41Wa cu beeta'al a bisic jun p'éel cuuch yóokol táancoch lúube', bis yóokol stet lúub. 42Je'el máaxac ca u káat ti' teech wa ba'axe', dzáa ti'; ma' a sutic a paach ti' jun túul máac cu káatic ti' teech u majant wa ba'ax.
Yaacunaj ti' aj p'ec óolo'ob
(Lc 6.27-28,32-36)
43Bey xan a wu'uymaje'ex j a'ala'ab úuche': Yaabilt a wéet bisajbáa yéetel p'ect a aj p'ec óolo'ob, 44Ba'ale' tene' quin wa'alic ti' te'ex: yaabilt a aj p'eeco'ob, payalchi'inene'ex tu yo'olal le máaxo'ob poch'ique'exo' yéetel cu ch'aapachtique'exo'. 45Beyo' te'exe' bíin paalalta'aque'ex tumen a Taataex yaan te j ca'ano', tumen leti' beetic u jóokol kiin tu yóokol kaakas máaco'ob yéetel tu yóokol utzil máaco'ob; cu túuxtic cháac tu yóokol máaxo'ob toj u cuxtalo'ob yéetel tu yóokol máaxo'ob ma' toj u cuxtalo'obi'. 46Tumen wa te'ex ca yaabiltique'ex chéen le máaxo'ob yaabiltique'exo', ¿ba'ax bo'olil bíin a kame'ex tu yo'olal lelo'? Tac le j kam patano'obo' bey u beetico'obo'. 47Wa ca tziquique'ex xan chéen a sucu'une'exe', ¿ba'ax ma'alobil ca beetique'ex? Tac le máaxo'ob ma' ocsaj óolo'ob cu beetico'ob beyo'. 48Te'ex túune' chuca'anchajac a wutzile'ex je'el bix a Taataex yaan te j ca'ano' chuca'an u yutzil.
S'ha seleccionat:
MATEO 5: YUA04Ev
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Maya de YucatánTumben Nupt'an NT © Sociedad Bíblica de Mexico, 2004.