Taruparea̧ Ma̧ȩ 1
1
Pearä judirä Üte tjamo̧ judi chjö̧na̧i̧ oa pareaparëremȩdejȩ
1Pearä judirä Ütë tjamo̧ judi chjö̧na̧i̧ oa tarupë pareaparërea̧ ji̧, pareaparëremȩdejȩ a̧dë oa. Dabu oa peaja̧di pareaparëremȩdejȩ. 2Jabo Ütë tjamo̧ judi jabë pareapadärädëa̧ oaiä, jabechji̧ chirimi̧ dadëri̧ a̧rȩrëremȩde. Jadüpea̧mi̧ dadëri̧ a̧rȩrëremȩde. Jabechji̧ ui ana̧ ëtemo̧ a̧rȩrëremȩde chiri üdë cjücjürü tjamo̧räpȩ. Ado bagönȩ maearä a̧rȩrëremȩde. Ado Tjo tjamo̧ judi ui ana̧ uëmo̧ bararëremȩde.
3Ja̧dëa ji̧ Ütë tjamo̧ judi jibëa̧ ma̧ȩ maeara̧ pareapamȩrȩ ja̧di ta̧rëri̧ yo̧rëremȩde: "Tatarea̧ üdë tatatäde." Ado tatarea̧ decjiarërea̧ ji̧, jabechji̧ tatapea̧de. 4Ado Ütë tjamo̧ judi pio ju̧i̧ daea̧ ji̧, 'Aja̧, tatarea̧ üdë jabechji̧ chjadëdida’ quëna̧ jo̧rȩtamȩrȩ darëremȩdejȩ. Ja̧dëa̧ ji̧ tutirëremȩdejȩ bagönȩ oa gȩnȩpamȩräpȩmo̧. Ado tatarea̧ oa peaja̧di tutirëremȩdejȩ bagönȩremȩ oa, dopamȩräpȩmo̧. 5Ado 'tatarea̧ üdë jabechji̧ dodida' quȩna̧ jo̧rȩtamȩrȩ do yo̧mȩ ma̧ȩra̧ quȩparëremȩdejȩ Ütë tjamo̧ judi. Jabechji̧ uë tjamo̧räpȩ baramȩ tatarea̧ do üdë jabë pareapea̧ oa cjiadërä quȩparëremȩdejȩ tatarea̧ oa do yo̧mȩ ma̧ȩra̧. Ado gȩnȩpe jäa̧rä, tatadë mapea̧rä, damirerea̧mi̧dëpea̧rä, ‘jabechji̧ gȩnȩdida' quëna̧ jo̧rȩtamȩrȩ gȩnȩ yo̧mȩ ma̧ȩra̧ quȩparëremȩdejȩ. Ado ja̧di dari̧ chjätärëremȩde pearä do üdë, pearä gȩnȩ üdë, jabë tatarea̧ do decjiarä.
6-7Ja̧dëa ji̧ dopea̧rä ja̧di ta̧rëri̧ yo̧rëremȩde Ütë tjamo̧ judi: "Ui üdë, daburo a̧rȩmȩ ui üdë, jabechji̧ yo̧a̧ri̧ uipe bagari̧ tutia̧ oa cjiatäde, tjoro ja̧ üdë cjara maearë cjiadiärea̧mi̧ dari̧. Jabechji̧ cja̧rȩmȩ ui üdë uë tjamo̧räpȩmo̧ tutia̧ oa baratäde, a̧dë i uëräpȩ. Ado cja̧rȩmo̧ ui üdë daburo a̧rȩtäde" yo̧mȩrȩ yo̧rëremȩde. Ado Ütë tjamo̧ judi yo̧a̧mi̧ cjiadiärëremȩde. Jabechji̧ tutirëremȩdejȩ ui cja̧rȩmȩ oa uëmo̧ barari̧. Ado cja̧rȩmo̧ ui oa daburäpȩmo̧ cjiadiäri̧ tutirëremȩdejȩ. Ado pio ju̧i̧iä cjara maearë cjiadiärëremȩde tjoro ja̧ üdë.
8Ado Ütë tjamo̧ judi cjara oa daea̧ ji̧, 'jabechji̧ tjoro ja̧ cjara üdë a̧dë idida' quëna̧ jo̧rȩtamȩrȩ quȩparëremȩdejȩ. Ja̧di dari̧ chjätärëremȩde ado cja̧rȩmo̧ do üdë, ado cja̧rȩmo̧ gȩnȩ üdë, yo̧a̧ri̧ gȩnȩ. Aja̧, ja̧di dari̧ chjätärëremȩde ado cja̧rȩmo̧ do üdë, jabë tatarea̧ do decjiarä.
9Ja̧dëa ji̧ dopea̧rä, ja̧di ta̧rëri̧ yo̧rëremȩde Ütë tjamo̧ judi: "A̧dë i ëteräpȩ a̧rȩmȩ ui üdë, daburo a̧rȩmȩ ui pio judi, jabechji̧ cja̧rȩmȩrämo̧ tüdüa̧ oa a̧rȩtäde chiri üdë gaüpe jäpea̧ oa". Ado Ütë tjamo̧ judi ja̧di ta̧rëri̧ yo̧rërea̧ oaiä, jabechji̧ cja̧rȩmȩrämo̧ tüdüa̧ oa a̧rȩmȩpea̧de ui ana̧ üdë, dabu üdë gaüpe bagari̧. 10Ado Ütë tjamo̧ judi, ‘Aja̧, dabu ga üdë, ui ëteräpȩ a̧rȩremȩ dabu üdë, jabechji̧ dabudida' quëna̧ jo̧rȩtamȩrȩ quȩparëremȩdejȩ. Ado ui üdë, cja̧rȩmȩrämo̧ tüdüa̧ oa a̧rȩrëremȩ ui üdë, ‘jabechji̧ ui ana̧dida' quëna̧mȩrȩ quȩparëremȩdejȩ ui ana̧ oa. 'Jabechji̧ chjadë madida' quëna̧ jo̧rȩtamȩrȩ darëremȩdejȩ Ütë tjamo̧ judi.
11Ado Ütë tjamo̧ judi ji̧dë u̧i̧ pareaparërea̧ ji̧, “Aja̧, chiri nö̧ta oa torë chjö̧na̧i̧rȩ buiutäde" yo̧rëremȩde. "Cärä üdë cho chiari̧ cäräpatäde" yo̧rëremȩde. “Pjäë to üdë, chjai to üdë peaja̧di cho chiari̧ buiutäde" yo̧rëremȩde. "Ado jurarea̧ to üdë chjö̧na̧i̧rȩ cho chiari̧ tope jätäde, ado ta̧bë chiamȩ to üdë peaja̧di buiutäde" yo̧mȩrȩ yo̧rëremȩde Ütë tjamo̧ judi. Ado judi ja̧di dari̧ yo̧rërea̧ pio ju̧i̧iä, jabechji̧ chjö̧na̧i̧rȩ cjitërëremȩde. 12Chiri üdë cäräpea̧de. Ado chjereno̧ buiurea̧mi̧ dari̧ cäräpea̧de cho chiari̧. Ado dami̧ti̧ to üdë peaja̧di topea̧de ado chjereno̧ cjitërea̧mi̧ dari̧. Jurarea̧ to üdë cjitëmȩpea̧de cho chiape järi̧, ado chjereno̧ cjitërea̧mi̧ dari̧. Ado Ütë tjamo̧ judi jënȩ pareapea̧ pio ju̧i̧ daea̧rä, 'Aja̧, chjadë madida' quȩna̧ jo̧rȩtamȩrȩ darëremȩdejȩ. 13Ado ja̧di dari̧ chjätärëremȩde ado cja̧rȩmo̧ do üdë, ado cja̧rȩmo̧ gȩnȩ üdë, tjarari̧ gȩnȩ.
14-15Ja̧dëa ji̧ dopea̧rä Ütë tjamo̧ judi ji̧dë u̧i̧ pareaparërea̧ ji̧, "Aja̧, a̧dëräpȩ ju̧ri̧ baratäde do üdë, gupënȩ üdë, ado büë üdë peaja̧di" yo̧rëremȩde. "Ado do üdë mo̧ëtäde doro, ado gupënȩ üdë tatatäde gȩnȩrä. Jabechji̧ a̧dëräpȩ ano̧ mire are boatädirȩ" yo̧rëremȩde. 'Peaja̧di na̧rȩpea̧tädiro̧da, ütarapea̧tädiro̧da’ quëna̧ jo̧rȩtamȩrȩ yo̧rëremȩde Ütë tjamo̧ judi. Ado pumȩ judiro̧, ‘Aja̧, dopea̧diibëda, pea a̧rȩdiädiibëda’ quëna̧rea̧mi̧ dari̧ na̧rȩpea̧tädiro̧da’ quëna̧mȩrȩ yo̧rëremȩde. 'Aja̧, jono̧ro do üdë chjiaräpȩmo̧ biradiibëda, ado uipamȩrä chirina̧ biradiibëda' quëna̧rea̧mi̧ dari̧ na̧rȩpea̧tädida’ quëna̧mȩrȩ yo̧rëremȩde. Ado Ütë tjamo̧ judi ja̧di dari̧ yo̧rërea̧ oaiä, jabechji̧ japea̧ oa cjiarëremȩde. 16Jabechji̧ yo̧a̧ri̧ tatarea̧ oa, ma̧ri̧ oa pareaparëremȩdejȩrȩ Ütë tjamo̧ judi. Aja̧, do oa, gupënȩ oa pareaparëremȩdejȩrȩ. Jabechji̧ daburäpȩmo̧ tatapea̧ oa, daburäpȩmo̧ mo̧ëpea̧ oa pareaparëremȩdejȩrȩ. Ana̧ üdë doromo̧ mo̧ëpea̧de, ado boi̧chji̧ üdë gȩnȩrämo̧ tatapea̧de. Büë oa peaja̧di pareaparëremȩdejȩ chjö̧na̧i̧ oa. 17Aja̧, daburäpȩmo̧ tatapea̧ oa, daburäpȩmo̧ mo̧ëpea̧ oa cji̧därëremȩdejȩrȩ a̧dërä baraji̧ri̧ oa. 18Ado Ütë tjamo̧ judi, 'Aja̧, cja̧rȩmȩrȩ doromo̧ mo̧ëpadida, ado cja̧rȩmo̧rȩ gȩnȩrä tatapadida, ano̧ mire are boapadiro̧da' quëna̧ jo̧rȩtamȩrȩ cji̧därëremȩdejȩrȩ. Ado cji̧dä ëte, 'jabechji̧ chjadë madida' quëna̧mȩrȩ darëremȩdejȩ Ütë tjamo̧ judi. 19Ado ja̧di dari̧ chjätärëremȩde ado cja̧rȩmo̧ do üdë, ado cja̧rȩmo̧ gȩnȩ üdë, jadüchiami̧ gȩnȩ.
20Ja̧dëa ji̧ dopea̧rä, ja̧di ta̧rëri̧ yo̧rëremȩde Ütë tjamo̧ judi. "Jabechji̧ uirä cjo̧ro̧paji̧ri̧ pio judiro̧ chjö̧na̧i̧rȩ cjo̧ro̧tädirȩ no̧i̧dë tjamo̧rȩ. Ado pua chjö̧na̧i̧rȩ peaja̧di cjo̧ro̧tädirȩ chiri uëmo̧ pjo̧a̧ baäji̧ri̧rȩ. Ji̧ra̧ tjamo̧tädirȩ." Ado Ütë tjamo̧ judi yo̧a̧mi̧ japarëremȩde. 21Jabechji̧ pareaparëremȩdejȩrȩ uirä cjo̧ro̧paji̧ri̧ ji̧ri̧ chjö̧na̧i̧ oa. Uitapëra oa, oëbi oa, chjö̧ri̧ oa, ya̧ca̧ca̧ oa, choe oa, cho̧ oa, ütëbodärä oa pareaparëremȩdejȩrȩ. Pua oa peaja̧di chjö̧na̧i̧ti̧ oa pareaparëremȩdejȩrȩ. Ado Ütë tjamo̧ judi, jënȩ pareapea̧ pio ju̧i̧ daea̧rä, 'Jabechji̧ chjadë madida' quëna̧ jo̧rȩtamȩrȩ darëremȩdejȩ. 22Ado ja̧dëa ji̧ ja̧di ta̧rëri̧ yo̧rëremȩde Ütë tjamo̧ judi. "Bori̧ra̧ pio ju̧ri̧ra̧ ji̧ra̧pe jätä, noi̧dëpe jätä" yo̧rëremȩdejȩrȩ uirä cjo̧ro̧ji̧ri̧ pio ji̧ri̧, pua pio ji̧ri̧ peaja̧di. Jabechji̧ chjadëri̧ cjo̧ro̧pea̧ oa, uiräpȩti̧ oa, chiriräpȩti̧ oa chjadëri̧ cjo̧ro̧pea̧ oa no̧i̧dë tjamo̧pe järea̧ yürürëremȩdejȩrȩ. 23Ado ja̧di dari̧ chjätärëremȩde ado cja̧rȩmo̧ do üdë, ado cja̧rȩmo̧ gȩnȩ üdë, ca̧i̧ta̧ra̧ ichimo̧ gȩnȩ.
24Ado ja̧dëa̧ ji̧ dopea̧rä Ütë tjamo̧ judi chirirä cjo̧ro̧ji̧ri̧ pio ji̧ri̧ pareaparërea̧ ji̧, ja̧di ta̧rëri̧ yo̧rëremȩde: "Chirirä cjo̧ro̧ji̧ri̧ pio judiro̧ cjo̧ro̧ matädirȩ. Pumȩrȩ goapea̧ üdë, baca üdë, oveja üdë, yae üdë cjo̧ro̧ matädirȩ" yo̧rëremȩde. "Ado pumȩrȩ goadëpea̧ üdë, böa üdë, to yae üdë, chjido üdë, pa̧rȩmȩ üdë cjo̧ro̧ matädirȩ peaja̧di. Ado daburo coë jäji̧ri̧ pio judiro̧, datutumi̧ üdë, jo̧dë cara üdë, ipurimȩchja üdë cjo̧ro̧ matädirȩ peaja̧di" yo̧mȩrȩ yo̧rëremȩde. Ado judi yo̧rërea̧ pio ju̧i̧iä, jabechji̧ pareapea̧ oa cjiarëreji̧ri̧dirȩ. 25Ado Üte tjamo̧ judi, jënȩ pareapea̧ pio ju̧i̧ daea̧rä, ‘jabechji̧ chjadë tjamo̧dida’ quëna̧ jo̧rȩtamȩrȩ darëremȩdejȩ chirirä cjo̧ro̧ji̧ri̧ ütëbodärä oa.
26Ja̧dëa ji̧ ja̧di ta̧rëri̧ yo̧rëremȩde Ütë tjamo̧ judi: “Aja̧, pumȩ pio ji̧ri̧ pareapatäro̧jȩrȩ yaba̧. Jabechji̧ pio a̧ro̧rȩmi̧ dari̧ pareapatäro̧jȩrȩ." Ado 'pareapatäro̧ji̧ri̧da' quëna̧ jo̧rȩtamȩrȩ pareaparëremȩdejȩrȩ Ütë tjamo̧ judi, Tjarari̧rȩ. Ado pumȩ ji̧ri̧ pareapea̧ ji̧, ‘Aja̧, pumȩ pio judiro̧ chiri tjamo̧ cjo̧ro̧ji̧ri̧rȩ cjo̧ro̧padiro̧da, pio cüdë yürüa̧ oa chiri ütë cjo̧ro̧ji̧ri̧rȩ cjo̧ro̧padiro̧da, ado pio ju̧i̧iä chirirä cjo̧ro̧ji̧ri̧ pio judiro̧ pumȩ ja̧ chja̧oerä cjo̧ro̧padiro̧da, coë jäji̧ri̧ judiro̧, pua judiro̧, ado cho̧ judiro̧ pio ji̧ri̧ ja̧ chja̧oerä cjo̧ro̧padiro̧da, pio cüdë tänȩa̧ oa pumȩ ja̧ chja̧oerä cjo̧ro̧padiro̧da’ quëna̧ jo̧rȩtamȩrȩ yo̧rëremȩde Ütë tjamo̧ judi. 27Ja̧dea ji̧ pio jënȩmi̧ dari̧ pareaparëremȩdejȩrȩ pumȩ ji̧ri̧, Ütë tjamo̧ pio judimi̧ dari̧. Üi̧ oa, iei̧ oa pareaparëremȩdejȩrȩ. 28Ado judiro̧ chjadëri̧ cjo̧ro̧pea̧ oa, no̧i̧dë tjamo̧pe järea̧ yürürëremȩdejȩrȩ. Jabechji̧ judi ji̧ri̧ yo̧a̧ ji̧, "Aja̧, bori̧ra̧ pio ju̧ri̧ra̧ ji̧ra̧patä, no̧i̧dëpe jätä" yo̧rëremȩdejȩrȩ. "Dibëa̧ri ja̧paji̧ri̧ pio judiro̧ chiri nö̧tai̧ oa cjo̧ro̧pea̧ oa, chiri tjamo̧ cjo̧ro̧ji̧ri̧rȩ cjo̧ro̧pea̧ oa, jabechji̧ nö̧richji̧jȩrȩ dibëa̧ bori̧ ji̧ra̧ tjamo̧ oa" yo̧rëremȩdejȩrȩ. "Aja̧, pio mȩnȩro̧ chiri tjamo̧ cjo̧ro̧ji̧ri̧rȩ cjo̧ro̧panȩrȩ. Ado cüdë pareapea̧ üdë dibëa̧ chja̧oerä cjiapade. Ado pio ju̧i̧iä yo̧requededibe. Jabechji̧ chjadëri̧ jidachji̧vä chiri nö̧tai̧ oa. Ado cho̧ oa, pua oa peaja̧di chjadëri̧ jidapea̧de. Ado chirirä cjo̧ro̧ji̧ri̧ oa, coë jäji̧ri̧ oa chjö̧na̧i̧ oa peaja̧di chjadëri̧ jidapea̧ maeade" yo̧mȩrȩ yo̧rëremȩdejȩrȩ Ütë tjamo̧ judi.
29Ado ji̧dë duri oa ja̧di ta̧rëri̧ a̧de yo̧rëremȩdejȩrȩ: "Danȩrȩ, mȩnȩro̧ jurapea̧ oa, jurarea̧ chjö̧na̧i̧ oa pareapea̧requededibe cho chia oa, ta̧bë chia oa. Jabechji̧ dami̧ jurarea̧ chiamȩ to oa, chiriräpȩti̧ oa cjo̧ro̧mȩ jurarea̧ oa pareapea̧requede pio mȩnȩro̧ jurapea̧ oa. 30Ado chirirä cjo̧ro̧ji̧ri̧ pio judiro̧ chjadëri̧ jurapea̧ oa, jabechji̧ dami̧ pjö̧da chiamȩ to oa pareapea̧reconȩ, cärä oabo. Tjamo̧ davä, goadëpea̧ pio judiro̧, ado goapea̧ pio judiro̧borë chjadëri̧ jurapea̧ oa pareapea̧reconȩ. Aja̧, böa üdë, chjido üdë, datutumi̧ üdë, ütëborë chjadëri̧ jurapea̧ oa pareapea̧reconȩ peaja̧di. Ado pua pio judiro̧borë jurapea̧ oa, daburo coë jäji̧ri̧ pio judiro̧borë jurapea̧ oa, pareapea̧reconȩ" yo̧mȩrȩ yo̧rëremȩdejȩrȩ Ütë tjamo̧ judi. Ado jënȩ ma̧ȩ yürüa̧mi̧ japarëremȩde.
31Ja̧dea ji̧ Ütë tjamo̧ judi, 'jabechji̧ chjadë tjamo̧ madica̧da' quëna̧ jo̧rȩtamȩrȩ darëremȩdejȩ jënȩ pareapea̧ pio ju̧i̧ chjö̧na̧i̧ oa. Ado ja̧di dari̧ chjätärëremȩde ado cja̧rȩmo̧ do üdë, ado cja̧rȩmo̧ gȩnȩ üdë, ca̧i̧ta̧ra̧ ichiri cjarȩmȩ gȩnȩ.
S'ha seleccionat:
Taruparea̧ Ma̧ȩ 1: Pume
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
©2021 Global Partners, All Rights Reserved