Mattaayo 5
5
Yeesso bur sartiis ka ꞌdooꞌd Yeedi Waakh icheeka
1Yeesso inkoo us ururi buure arge ka, irte burroo kore, orronte. Abattitiis la isookhayte. 2Yeesso ꞌdooꞌd walah abinnaan sookhabte.
Yeesso ꞌdooꞌdi Waakh imaalo cheeka
(Luuka 6:20-23)
3“ꞌDooꞌdi Waakh imaalo a ki wahanyeyyohi Waakh ka miskiine,
a mehe dakhi goobi Waakh a kichooda.
4ꞌDooꞌdi Waakh imaalo, a ki toolla uskeeli weeli enenyet bolkhicho,
Waakh icho uur a khoboochaa.
5ꞌDooꞌdi Waakh imaalo, a ki samacchaare,
Waakh harrati husub icho a siichaa!
6ꞌDooꞌdi Waakh imaalo, a ki fissanoon iankayo toro isubgaati,
Waakh icho a dargichaa.
7ꞌDooꞌdi Waakh imaalo, a ki uur nugul,
Waakh icho uur a inugleestaa.
8ꞌDooꞌdi Waakh imaalo, a ki uurassicho ka eloo rucchul laka ikhabin,
icho Waakh a argaanee.
9ꞌDooꞌdi Waakh imaalo, a ki enenyet isineybicho,
a mehe nyaakhuti Waakhe layadeeh.
10ꞌDooꞌdi Waakh imaalo, a ki jeenteti icho ifissanyahiin u sina loomhicho,
dakhi goobi Waakh a kichoodaa.
11“Waakh a atin imaala maanti enenyet jeenteteey u atin abaaro, sina atin omhicho, been ka suujoonki nool atin kacheekti. 12Girꞌdaama weyti hamaada giꞌde. Waakh goobiis ka kalaꞌddi buurenye atin gutaa. A mehe ꞌdooꞌdi Waákh íyeyyeedo goorat saggaas on sina liiomhiche.
ꞌDooꞌdi Yeesso raaho a iꞌdi magaaꞌdeet ichoow banay
(Marko 9:50, Luuka 14:34-35)
13“Atin a magaaꞌddi weeli enenyet tuumman. Iꞌdaasenyi magaaꞌde chiꞌiche gimbatiche waayte, saggoh toro liigimbaacha? Kola walah iche iroontahe mele, khubnaanki lakhubo enenyet yabti on menye.
14“Atin iꞌdi banay u, enenyeti harratane jiti Waakh tussaan, ilkerengeetti hal sartiis kadisan la ma ladabo. 15Toro la et taa bolkhicho baakhuul kaankubo mele. Taa a labolkhicha kombor lakorcha, ꞌdee eti tuummane min goya kajiro il kaarga. 16Taba giꞌde atin laka iꞌdaasu, haaggi atin yeessaan weeli enenyet tuumman a argo, ꞌdee enenyet tuumman Aabbahiinki serey jiro a inkaanyito.
Yeesso a yimiyye ꞌdee Amurre ichoow wihi ꞌdooꞌdi Waákh íyeyyeedo cheeke buuhicha
17“Kol an harra imiyye ꞌdee Amurre ommos wihi ꞌdooꞌdi Waákh íyeyyeedo enenyet abcho baabiicho akoogeynana. An baabiin ma imaatane, iꞌdaasenyi a imiyye wihi icho enenyet abchaan buuhicha. 18Rume atin icheeka, chirri sereyta daayan ichoow harra massataan laka, aytoo rucchul laka amurre Muusa goya ma lakabahcho, ichoowka wihi lachiire tuumman labuuhicha. 19Eti tuummane amuri amurreti Waakh goyaka rucchul laka jebche, toro la ꞌdooꞌdi addan laka iꞌdaas yeela iyadeeh, dakhi goobi Waakh ka walah us yahe mele. Iꞌdaasenyi eti tuummane amurretaas raahe, ꞌdooꞌdi addan iꞌdi iche ichiirantahe abche la, dakhi goobi Waakh ka a weenyahe. 20A mehe wihi an atin iadeeh, sammata fissanoonkiin ki tagaammeti amurre ichoow Farissaayo ikutin rumanka dakhi goobi Waakh ma gessaan.
Yeesso wori hol kaayyeeda
21“Saggi goorat Waakh aacchinyeteen, ‘Weeli enenyet dubunuunu iigaasan, eti tuummane enenyet yigis la a lahukkuma,’ iyidah a daagteen. 22Iꞌdaasenyi wihi an atin iadeeh, eti tuummane etoo keeye ihollowe, a lahukkuma. Toro la eti tuummane etoo keeye abaare Jaldaabti Weene Yaꞌhuude liikeena, hukkunta. Iꞌdaasenyi eti tuummane etoo addan, ‘ꞌDalanki marah,’ iyidah, a geeddi meessi ꞌdabi armaanjireen lakalugꞌdo.
23“Maantaka chirri at soorriyotaah chalagti Waakh soorriyo liikabahcho keente, at intaas ka saggi etoo keeye wohoo ikaakhabo kasooꞌhesse, 24soorriyotaas chalag orche katab. Koloo iro, eteeykaas isineyba, ꞌdee amiite soorriyotaah Waakh ibihi.
25“Chirri etoo kootiin kigeecho wohoo kaacheekti, etaas dowwa isineyba. Geeddi atin kootiin isohattaan isineyba. Chirri at iꞌdaas iyeelin, etaas eti ꞌdooꞌd hukkumo kicheekta, eti ꞌdooꞌd hukkumo la dahanti iskareet kigessa, iche la jeela kigelissa. 26Rume atin icheeka, jeelataas goya ma kasoobahto ichoowka mogtiis tuumman hiyyaayta.
Yeesso wori makhaaballeti oboorrihi kicho ieheynan leeuꞌdurto kaayyeeda
27“Saggi Waakh Chiirnaanne ka, ‘Makhaabassi taah ieheynan aleeurꞌdin,’#5:27 Guuram 20:14. iyidah a daagteen. 28Iꞌdaasenyi wihi an atin iadeeh, eti tuummane makhaabassi tiis ieheynan yeye, maanjeerte uuriis ka uskeeli us makhaabassi tiis ieheynan leeurꞌdo iche gele. 29Maantaka chirri issaahti miigeet uskeel kaaluguꞌddo, issaas bihiche, rog! Atihi sartaah tuumman khabtaayi meessi ꞌdabi armaanjireen lakaalugꞌdo ka, atihi miilaahkoo waayto deefta. 30Chiꞌ dahantaahti miigeet uskeel kaaluguꞌddo la, dahantaas gooche, rog! Atihi sartaah tuumman khabtaayi meessi ꞌdabi armaanjireen lakaalugꞌdo ka, atihi miilaahkoo waayto deefta.
Yeesso wori eti arantiis tuum riho kaayeyyeeda
(Mattaayo 19:9, Marko 10:11-12, Luuka 16:18)
31“Chiirnaanneti Waakh wihi kachiiran, ‘Chiꞌ etoo arantiis tuum riho, khadaabi saggi us iriho tuso a siicho.’#5:31 Deewutoronomi 24:1. 32Iꞌdaasenyi wihi an atin iadeeh, eti tuummane makhaabassiis tuum rihe chiꞌiche mejeloo addan leeuꞌdurte on menye, makhaabalaas makhaabassaas uskeeli iche mejeloo kiche ieheynan leeuꞌdurto iche kalugꞌda. Eti makhaabassi tuum larihe disti la, uskeeli us makhaabassi tiis ieheynan leeurꞌdo iche gela.
Yeesso daatoti Waakh liidaatti woriche kaayyeeda
33“Amuroo addane aacchinyeteen liicheeke a daagteene, wihi us yidah, ‘Wihi at ayyisse yeele, wihi at Kamur idaatatte la yeel.’ 34Iꞌdaasenyi wihi an atin iadeeh, adaatanna ba. Goobi Waakh akadaatanna, iꞌdi tahe goobi Waakh a komborti buurenye antoote Waakh. 35Ommos harra laka akadaatanna, iꞌdi tahe harra a komborti rucchule Waakh luhlohiis korcho ommos ilkerengeetti weene Yeerusaleem laka akadaatanna, iꞌdi tahe a ilkerengeetti Waakkhi karnatenye weene. 36Matakkaah laka akadaatan, iꞌdi tahe at tintaahtoo kalday laka ma dakhnaasso ommolla ma daayisso. 37Chirri at, ‘Aa,’ tidah, iꞌdaas on a eheetti. Chirri at, ‘Mele,’ tidah la, iꞌdaas on a eheetti. Wihi addane at kakhayto, ki uskeel lehe kayamiitiin.
Yeesso wori aassi lagutti kaayyeeda
(Luuka 6:29-30)
38“Amuri, ‘Eti il kibahche at laka il bihi. Eti ilah kibahche la at laka ilah bihi,’ yidah a daagteen. #5:38 Guuram 21:24, Laawi 24:20, Deewutoronomi 19:21. 39Iꞌdaasenyi wihi an atin iadeeh, eti suuje aleetirrimin. Chirri etoo fodoori miigeet kiguꞌdde, fodoori addan laka siiche a kiguꞌddo. 40Chirri etoo kootiin kigeen ꞌdoono ꞌdee us ubbaaraahki deer kaakhaato, kabuuꞌdaah laka iduumi. 41Chirri etoo iskareet meehiis kihosse, ‘Kiilomittatoo kalday siꞌd,’ kiyidah, at la kiilomittatoo kalday menye, kiilomitta lamma isiꞌd. 42Eti walah kidaahe siiche, toro la eti wohoo amah ka kidaahe, wihi us kidaahe atiran.
Yeesso ꞌdooninti chiiy laꞌdoono kaayyeeda
(Luuka 6:27-28, 32-36)
43“Saggi goorat ꞌhor amur, ‘Ollokkaah ꞌdoone,#5:43 Laawi 19:18. chiiytaah la ꞌdiiꞌd,’ iyidah a daagteen. 44Iꞌdaasenyi wihi an atin iadeeh, chiiytiin ꞌdoona,#5:44 Chiirnaanne gaasoo iꞌdane tadeeh, “Iꞌdaasenyi wihi an atin iadeeh, chiiytiin ꞌdoona, ꞌdooꞌdi atin falo iweesda, ꞌdooꞌdi atin ꞌdiiꞌdo la haag iyeela.” ꞌdooꞌdi sina atin omhicho la iweesda. 45Iꞌdaakka nyaakhuti Aabbahiinki serey jiro tateehiin. Us ꞌdooꞌdi sussuuje ichoow ki hahhaaggan ba orrah a isookorcha, ꞌdooꞌdi fiffissan ichoow ki khokkhollokkhan ba hir siicha. 46Chirri atin ꞌdooꞌdi atin ꞌdoono kalday on ꞌdoontaan, kalaꞌd atin sugtaan mele. A mehe ꞌdooꞌdi kooddi goocho laka iꞌdaas on yeela. 47Chirri atin ꞌdooꞌdiinna on bariitissaan la walah addane atin ꞌdooꞌdi addan ꞌdirihiis yeesseen mele. ꞌDooꞌdi Waakh igaran laka iꞌdaas a yeela on. 48Maantaka saggi Aabbahaahki serey jiro ꞌdooꞌdiis tuum isikasoobahchuu, at laka tuum issoobihiche, ꞌdee wihi Waakh kaaꞌdoono yeel.”
S'ha seleccionat:
Mattaayo 5: rel
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2018, Wycliffe Bible Translators, Inc. All rights reserved.