MATIYU 2
2
1Ban daa ti dɔ'ai Yisa Bɛtlihɛm timpuuni n‑naai, Meegyai daa yi wuntampusiri tinwa'aligu ziiya n‑kyɛ Gyɛrusalɛm na - ban n daa nyɛ ninvugseeba ban baŋŋi saŋmariwuusi yɛla, ni bamsim pam m‑paasi. Di saha maa Bɛtlihɛm daa bɛ la Gyuudiiya naam suulinsi ni, ka NaaHɛroodi mun daa di lala tingbaŋŋu naam maa. 2Ka Meegyai maa daa kur boosiri, ni, “Yɛni ka ba dɔ'ai Izraɛli dima naaba la? Ti daa nya u saŋmariwuu maa wuntampusiri lugri ni, dizugu ka ti kyɛ na ni ti gyeem u.” 3Ka NaaHɛroodi ŋɔn daa wum ba lala boosigu maa, di daa gyɛri u pampam - ŋɔn ni u niriba ban bɛ Gyɛrusalɛm zaa - ka ba sufu daa sa'am. 4Di saha ka u la'asi Izraɛli dima kpamma ban nyɛ Naawunni Gyeeŋŋu Toondaandima, ni zaaligu baŋŋniba la, m‑boosi ba zaŋŋi n‑kyaŋŋi Naawunni ŋɔn ya tum sɔ na ni u ti tiligi niriba n‑naayi di naam la; ka yɛli, ni, “Tinkani ka di wulisi, ni, ba nin ti dɔ'ai Masiiya la?” 5Ka ba daa labsi n‑yɛli u, ni, Bɛtlihɛm tiŋŋa kan bɛ Gyuudiiya suulinsi ni la ka ba nin dɔ'ai u. Ni, dama anabidima daa sɔbi n‑zaali, ni#:-
6“Nyin Bɛtlihɛm tiŋŋa wa,
Nyin bɛ Gyuudiiya suulinsi ni la,
I bu poora Gyuudiiya nabiisi sunsukkuni;
Nasɔ m bɛ ni ŋɔn ti ya n‑guri ya -
Ya Izraɛli dima maa -
Hoo ban guri bunkɔbri seem la:
Ŋɔnwa ti ya n‑yi nyin Bɛtlihɛm saani na.”
7Ka NaaHɛroodi daa booli Meegyai maa asiiri ni, m‑maali m‑boosi ba, ni, “Bɔn saha deede ka saŋmariwuu maa daa pusi saazugu na?” Ka ba daa wulisi u di saha ŋɔn bɛ seem. 8Ka u daa yɛli ba, “Ya kyɛm Bɛtlihɛm nti bɔ bii maa lahabaari. Ka ya yi ti paai n‑nya u, ya tumma yooma na n‑yɛli ma, ka man gba nin kyaŋŋi nti gyeem u.”
9Ka ban daa wum Naaba ŋɔn daa yɛli ba seem la, ba daa yi n‑lu Bɛtlihɛm soori yaasa, ka saŋmariwuu maa daa gaari ba tooni ka ba daa dɔla - ban daa pun nya seaa wuntampusiri zii la - halli nti paai n‑zaani saazugu n‑wulisiri bii maa ŋɔn daa bɛ seela. 10Ba sufu daa maaya pam, saŋmariwuu maa zugu. 11Ba daa ku mari la lala halli n‑ti paai bii maa ŋɔn daa bɛ luginseaa maa, ka daa kpɛ yiri maa ni - Mariama ni u bii maa ŋɔn daa bɛ seela. Ka ba daa gbaani n‑gyeem bii maa, ka daa lɔrigi ba neema n‑yiisi piini n‑tisi u - salima n daa bɛ ni, ni turaali zum ban daa zaŋŋni bunseebu n‑nyoori n‑gyeemni Naawunni la, ni kpaseebu bun mari toom ka bu ligri zoaai pam. 12Tɔ; ka Naawunni daa kyɛ ka ba zaasi zaasimni m‑bugsi ba, ni, ba di naa n‑labi NaaHɛroodi saani, ka dizugu ba daa lɔkki sɔseaa n‑labi n‑kuli ba tiŋŋa.
13Ban daa ti gaari n‑kuli n‑naai, Gyoosɛfi daa zaasi zaasimni n‑nya ka ti Dugma malaaka daa kyaŋŋi u saani na nti yɛli u, ni, “Doaama n‑zaŋŋi bii maa ni u ma la n‑zɔ n‑kyaŋŋi Igyipti. See ka ya kpalim m‑bɛ bɛni halli ka man ti laa n‑ti ya kukɔri; dama NaaHɛroodi ya boori la bii maa ziiya ni u gbaai u n‑ku.” 14Ka u daa doaai yuŋŋu n‑zaŋŋi u pɔ'a ni bii maa n‑yisigi n‑kyaŋŋi Igyipti. 15Ba daa kpalim la bɛni halli ka NaaHɛroodi ti kpi. Ka dinŋɔ n daa kyɛ ka di siri niŋi hoo ti Dugma ŋɔn daa pun kyɛ ka u anabisɔ ti tɔ'asi anabitiri ni, ni#:-
“N daa booli m bii maa
Ka yiisi u Igyipti tingbaŋŋu la ni na.”
16Ka NaaHɛroodi ŋɔn daa ti baŋŋi, ni, Meegyai maa yɔmsi u ka sɔ'ai n‑kuli, u sufu daa yisigiya pam. Ka u daa zaali zaaligu, ni, ba kyaŋŋi Bɛtlihɛm, ni tinkpanseesi an bɛ gyilagyila la ni, nti ku biisi maa - bidibseeba ban dɔ'ai ka ba nyɛ dahinyinni halli nti paai yuuma ayi biisi la zaa. U lala zaaligu maa daa dɔlisi la sahaseaa Meegyai maa ŋɔn daa wulisi u la. 17Di saha di siri daa niŋi hoo Anabi Gyɛrimaaya ŋɔn daa tɔ'asi anabitiri yɛliseelli, ni#:-
18“Raama ka kukɔri maa yi na,
Kunkuma ni fabligu pam n nyɛ di.
Reekyɛl n kumni u biisi zugu
Halli ka sɔ ka ni n‑nin toaai n‑goaai u;
Dama u biisi maa zaa na ka ni.”
19Tɔ. Ka NaaHɛroodi kum nyaaŋŋa, Gyoosɛfi daa zaasi zaasimni, ka ti Dugma malaaka daa laa n‑kyɛ u saani na 20nti yɛli u, ni, “Doaama n‑zaŋŋi bii maa ni u ma la n‑labi Izraɛli tingbaŋŋu ni, dama ninvugseeba ban daa boori ba ku bii maa la kpiya.” 21Ka dizugu u daa doaai n‑zaŋŋi bii maa ni u ma la n‑labi Izraɛli tingbaŋŋu ni. 22Amaa ŋɔn daa ti wum, ni, NaaHɛroodi bii Arikyileesi n diri u ba Hɛroodi naam n‑su Gyuudiiya maa, dabeem daa gbaai u ni u kyaŋŋi bɛni. Ka u daa zaasi zaasimni ka di wulisi u, ni, u kyɛm Galilii tingbaŋŋu ni nti zinni bɛni. 23Ka u daa doaai n‑kyaŋŋi n‑ti zinni Nazarɛti tiŋŋa ni. Ka dinŋɔ daa kyɛ ka di siri daa niŋi hoo anabidima ŋɔn daa tɔ'asi seem n‑zaali la, ni#:-
“Ba ti ya m‑boonni u la Nazarɛti nira.”
S'ha seleccionat:
MATIYU 2: maw
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2002, Wycliffe Bible Translators, Inc. All rights reserved.