Amainhama 2
2
1Olwo ni, eigulu n'ensi, ni byonabyona ebirimu, byamalirizibwa okukolebwa. 2Ku lunaku olwomusanvu Katonda yaamaliriza omulimo, gwe yali ng'ali kukola. Yaawuumula ku lunaku olwo olwomusanvu, ng'amaze emirimo gye gyonagyona, gye yali ng'ali kukola.#Heb 4:4, 10 3Yaagha olunaku olwo olwomusanvu enkabi era yaalutukuza. Kuba olwo lwe yawuumuliraku emirimo gye gyonagyona egy'okutonda. 4Kale ni eyo n'ensambo eigulu n'ensi ye byatondebwamu.
Enimiro ey'Edeni
Ku lunaku Musengwa Katonda lwe yakoleraku ensi n'eigulu, 5ku nsi tikwaliku kimera kyonakyona waire ekirala, era nga ghazira na isubi eryali limezeeku. Kuba Musengwa Katonda yali akaali kugwisa maadhi ku nsi, era nga ghazira muntu alima ku nsi. 6Aye oluudhiruudhi lwavanga mu itaka lwaboza ensi yoonayoona. 7Agho Musengwa Katonda yaawumba omuntu mu itaka, yaamufuuwa mu nhindo omuuka ogw'obulamu olwo omuntu yaatoolera okuba omulamu.#1 Kor 15:45-47
8Musengwa Katonda yaataagho enimiro mu Edeni ku luuyi olw'e buvandhuba yaata omwo omuntu ye yali amaze okuwumba. 9Musengwa Katonda yaameza mu nsi kiisi muti ogusanhusa okubona era omulungi okulyaku ebibala. Ghagati mu nimiro nga ghaligho omuti ogw'obulamu era ogw'okumanha obulungi n'obubi.#2:9 Okumanha obulungi n'obubi; oba Okumanha buli kintu.#Kwol 2:7; 22:2, 14, 19 10Omwiga gwakuuluulanga nga gubita mu Edeni era gwafukiriranga enimiro eyo. Nga bwe gumala gweyawulamu gwafuuka emiiga ena. 11Eriina ery'omwiga ogusooka nga ni Pishoni guno nga gukuuluula okwezungulula ekiketezo kyonakyona ekya Havila ekirimu zaabu. 12Zaabu ow'omu nsi eyo mukenenule, era eyo eriyo n'obuwoowo bwa bedeliyamu n'amabaale ga onikisi. 13Eriina ery'omwiga ogwokubiri nga ni Gihoni; guno nga gukuuluula okwezungulula ekiketezo kyonakyona ekya Kushi. 14Eriina ery'omwiga ogwokusatu nga ni Tiguri; guno nga gukuuluulira ku luuyi lw'e buvandhuba bw'e Assiria. N'omwiga ogwokuna ni Eufurate.
15Musengwa Katonda yaatoola omuntu, yaamuta mu nimiro ey'e Edeni, agirimenga era agirabirirenga. 16Yaamukoba ati: “Oli wa idembe okulya ekibala kyonakyona ekya kiisi muti oguli mu nimiro. 17Aye otalyanga ku kibala kya ku muti ogw'okumanha obulungi n'obubi,#2:17 Okumanha obulungi n'obubi; oba Okumanha buli kintu. kuba olunaku lwene lw'olikirya, olifa.”
18Musengwa Katonda yaakoba ati: “Ti kirungi omuntu okubanga yenka. Ndidha kumukolerayo omubeezi amugwanira.” 19Agho yaawumba mu itaka ensolo dhoonadhoona era n'enhonhi dhoonadhoona yaabireeta eri omuntu abone bw'anaabyetanga. Era omuntu kye yayetanga buli kiramu ekyatondebwa, n'eryafuuka eriina lyakyo. 20Kale, omuntu yaatuuma ensolo dhoonadhoona n'enhonhi dhoonadhoona amaina, aye ku ebyo byonabyona nga ghazira kyali kigwaine kuba mubeezi wa muntu.
21Agho Musengwa Katonda yaaleetera omuntu endoolo enhingi einho era bweyali ng'atendwike, yaamutoolamu olubavu lulala yaizaagho emamba mu kifo kyalwo. 22Yalukolamu omukazi, era yaamuleeta eri omuntu. 23Omuntu yaakoba ati:
“Otyo! Ono buti n'eigumba eriviire mu magumba gange,
omubiri oguviire mu mubiri gwange;
aidha kwetebwanga mukazi,#2:23 Mu Luheburayi “Ishshah” kuba atooleibwa mu musaadha.”#2:23 Mu Luheburayi “Ish”
24N'olw'ensonga eyo, kyova omusaadha alekanga ise n'inhina, ni yeeyimba ghalala ni mukazi we, ababiri ni baafuuka omuntu omulala.#Mat 19:5; Mar 10:7; 1 Kor 6:16; Efe 5:31
25Omusaadha n'omukazi bombi baali madu, aye nga tibagemwa nsoni.
S'ha seleccionat:
Amainhama 2: Sog
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Baibuli Ekibono kya Katonda © The Bible Society of Uganda, 2014