Rut 3
3
Byit bi Booŧ na Rut na uŧejan
1Wi ŋnuur ŋloŋ ŋaţëpuŋ, Nowemi ayootan Rut aji na a : « Abuk naan, dwo kalaaru ñiinţ, ihilna iwo bnuura. 2Ileş Booŧ i ? Ñiinţ anwutiiŋ na balemparul baaţ du uţeehul, awo ayiţ nja. Hënkuŋ, ŧiinkaan : Awo i pkoban ŋdeey nţa na utaakal. 3Yaan iñowa, ikërada ukëra ulil pţëkëñ ibot iwoh kamişa kadiţ. Idole kşë ya du dko di akkobnuŋ, işë iwut kado ame kë iwo da, te wi akdeeŋ kaba, kadaan. 4Tenan bnuura dko di apiinţuŋ, woli aŋoyënţi kşë ya gurëşa ihoţ kapiinţ kakab ţi ya. Aluŋ kaţupu uko wi iwooŋ kado. »
5Kë Rut aŧeema aji : « Uko wi ijakuŋ bŧi, ddo wa. »
6Kë hënk di di Rut ayaaŋ du dko di bakkobnuŋ, ado jibi Nowemi ajakuluŋ. 7Booŧ ade, adaan, alilan bŧi, aşë ya añog dko di bajunkanuŋ ŋdeey apiinţ. Wi wi Rut aşaaŋ añuugat aya agurëşa ihoţ, apiinţ kakab ya.
8Kaya pban uŧejan mnjel, kë Booŧ aşë lënk aten, aheŧ aşë win ñaaŋ ñaaţ kë apiinţ kakab ihoţul. 9Kë aşë ji : « In a wi ba ? »
Kë aŧeema aji : « Naweek, nji Rut a. Yeenkaan nji nalemparu, ţiki iwo ţi bankaaŋ na pdo kaţënkën#3.9 bankaaŋ na pdo kaţënkën : Natenan Rut 2.20. »
10Kë aŧeema aji : « Poon, dñehan Naşibaţi awulu bnuura. Bnuura bi ikaaŋ ado Nowemi ayootanu bi badëm apel bŧeek ; iinţo pla baţaşa, bajuuk këme bayok. 11Hënkuŋ poon, kţi nin we, uko wi ijakuŋ bŧi dluŋ kado wa. Bañaaŋ bŧi ţi ubeeka wi naan bame kë iwo ñaaţ anwooŋ na uhaaş unuura. 12Uwo manjoonan kë dwo ţi bankaaŋ na pduka na iwi, kë uşë ka aloŋ anŧaaŋuŋ na pdo haŋ apelën. 13Fëran ţi, faan woli aŋal kado uko wi aŧaaŋanaanuŋ pdo, uwo bnuura, ayeenku. Aşale wo aandii, dmehna ţi katim ki Nawat Kabuka kë dyeenku. Piinţan ţi te nfa. »
14Hënk, kë aduka apiinţ ţi kakab ihoţ yi Booŧ te nfa kub, kë Booŧ aşë ji : « Ñaaŋ aloŋ aanwo i kame kë abi ţi dko di kakob. » Rut anaţa ji unuur ubi udo kajinţ.
15Kë Booŧ aşë jaka : « Pënaan blaañ bi iguradiiŋ buŋ ibi itar. » Kë Rut amëban ba, kë ajej kako aniiba ŋyaaş paaj, kë ŋdeey ŋaŧum maakan. Akuŋana ŋa aşë kak ubeeka.
16Wi Rut akakuŋ du ayootanul, kë aşë jaka aji : « Abuk naan, iya do hum ba ? » Kë Rut aşë kakalëşa bŧi bnuura bi adoluluŋ : 17Ajaka aji : « Wi akniibnuŋ ŋdeey ŋyaaş paaj aji aankwutën ŋkak du iwi iñen ijinţ. »
18Kë Nowemi aşë ŧeema aji : « Abuk naan, ţooni, joobëţan ido katen di ŋkbañëşaanuŋ, ţiki ñiinţ i aankpiinţ nţa di, bë aando uko wi ajakuŋ. »
S'ha seleccionat:
Rut 3: knf
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2014, Wycliffe Bible Translators, Inc. in cooperation with Le Groupe CIM-TBM, Senegal